1Sa 27 | XteSC | STEP | Daud er pe kange tenenange neitamai dipapu, ukupra pepdau. ‘Gume, dan taru do, ne walwal dinin, ne kangeda, amenda taru neitamai di, Raja Sauldi popterepkamner ja. ‘Popnerpa, depkaman’ tenena tep nengeda, ware telep kunange kuptene do guma. Yuk bisi ton men kupmanto tep, neda, sun Filistin nesala kunge mutu neitamaipu kurapra benyadi, inipra sun mutu neitamaipu kunkamne ja. Ukunyopda, Raja Sauldi tupa men epkamnere. Erdi, Israel nesala kunge mutu neitamai di, ‘Angebo Daud popkamne’ tenen, tupa men enkamnera cadi, yuk karen mutu neitamai di, bena kunedi, tali kange dopnedi, dim pepra teleppu kunkamtene,’ teneramu.

1 Samuel 27

Dauddi, Filistin nesala sun kan-kan bena kuramudi, Gat mutu ila nimi deiyo ngebo, Raja Akhis tep melimamu upu

1 Daud er pe kange tenenange neitamai dipapu, ukupra pepdau. ‘Gume, dan taru do, ne walwal dinin, ne kangeda, amenda taru neitamai di, Raja Sauldi popterepkamner ja. ‘Popnerpa, depkaman’ tenena tep nengeda, ware telep kunange kuptene do guma. Yuk bisi ton men kupmanto tep, neda, sun Filistin nesala kunge mutu neitamaipu kurapra benyadi, inipra sun mutu neitamaipu kunkamne ja. Ukunyopda, Raja Sauldi tupa men epkamnere. Erdi, Israel nesala kunge mutu neitamai di, ‘Angebo Daud popkamne’ tenen, tupa men enkamnera cadi, yuk karen mutu neitamai di, bena kunedi, tali kange dopnedi, dim pepra teleppu kunkamtene,’ teneramu. 2 Ange teneramnga tep, er cap, er nyapsilip cap, er melipra kikiman embarami jen talena neng cap, denge weik enam ratus (600) jen neng capda, amutu tapra adipapu menmena ortara mutu neitamai, Filistin nesala sun ila nimi deiyo ngebo Raja Akhisdi taleamu mutu neitamai bena kurami. Raja Akhisda, er nai bo sida, Maok kuramu. Maokda, Gat mutu ngebo kuramu.

3 Ataru neitamaida, Daud cap, erdi domu nerapu butene, Yizreel mutu ner Ahinoam cap, tonda Karmel mutu ner Abigail cap, amutupu kurami. Abigailda, menop taru Nabal domu dinin, depupa solu kuramupa, Dauddi aner solu dakudi domu. Ange tep nengeda, Daud er jen talen neng peda, sun cap, sun nerapu cap, sun nyapu cap yumada, Raja Akish taleamu mutupu bena kikiman kurami. 4 Uda, yuk nengdi, Raja Saul tep, “Daud cap, er nyapsilip yuma cap, orkaren mutu, Gat mutu neitamai bena kununge,” pepra lap pepipa, gekepu dingeda, kange di ton cap, Daud tep, men erbenamupu. ‘Dakwapye, ormutupu dakunkamrure,’ tenepudi, tapnapu kuramudi, ‘Daud tomopkamne’ tenemu ngeda tapu.

5 Ataru neitamai di, Dauddi Raja Akhis tep upepu. “Gume, kandi ne tep kange telep kupkeryopda, telep tenepnetumtoda, ila ati arum doamrumai gum dinin, ne kunkamnai tep, tali bura tara mutu, yambul mutu tu ton karepnetumpa, amutu neitamaipu kunkamne. Neda, kan amutara pel dona ngebo utopu kununa cadi, kan Raja cap, ila telep nimi ati arum, telep kota neitamaida, ne men kutene. Neda mambul ngebo men kununa tep, yuk karenaipu ‘Ukutene’ tenen, moropkene,” pepu. 6 Dauddi upepra moropupa, Raja Akishdi, ‘Amutupu bena kunkamre’ tenen, Ziklag mutu karepu. Ada, yambul bura tara kwamu mutu tepa. Ukupupa, Daudda amutu talepudi dakuramnga cadi, ataru di dipra ukutaru yumada, ‘Yehuda, sun ila nimi deiyo ngebo, Raja, er pe mutu sisapu akurure,’ peramitopu, tupa penunge. Tonda, Yehuda yala nesala mutu ila nimi deiyo nengdi, amutu tupa talenunge.

Daud Ziklag mutu taleamu taru kuramu keca tep upu

7 Daudda, Filistin nesala kurami mutu neitamai kuramu taru yumada, keteng tamun tenpu cap, ware dumbari cap, amutu neitamai maramudi taleramu. 8 Akuramu taruda, Daud cap, er melimna jen talena neng cap, sundi yuk mutu nesala tep, nimi porbarami. Ada, Gesur mutu neitamai kurami nesala cap, Gersim mutu neitamai kurami nesala cap, tonda Amalek mutu neitamai kurami nesala cap tep porbarami. Sun ayala nesala yumada, menop taru di amutu neitamai kurami. Amutu neitamai kuramipa, Daud erdi mar porbaramu nesalada, Sur mutu di dipra, adinin, Mesir mutu tara kurami nesala tep porbaramu. Sun yumada, menop taru di Mesir mutu damai kurami.

9 Daud cap, er jen talen neng capdi, amutu-amutu neitamai kurami Filistin yala nesala tep porbarami taru yumada, amutu kurami nimi cap, nerapu cap yuma, popra tamamudi, tenpu peda men tamami. Yuma poptapnapu kurami. Dinino, amutu nesala yuma poramudi, sundi peirami domba bisam cap, keledai bisam cap, sapi bisam cap, unta bisam cap, tonda sun kenengamidi mawa derirami opkal yuma capda, anesala popbisipi, sun taleami keca yala-yala yuma dalopra dororami. Ange yuma konum kepyopda, Daud cap, er jen talen neng cap tamupra Akhis damai yau.

10 Ukupra kuramu taru neitamai yumada, Raja Akhisdi Daud tep, “Atumida dan tara mutu kunung nesala porbenkurem do?” pepra asipeteramu. Uperamupa, Dauddi mok upu deiki di, tamupra uperamu. “Gume naie, atumida Yehuda yala nesala kunge mutu ada, itara, arah selatan tamna kunung nesala porbenkune,” peramu. Ton tumida, “Gume, Yerameel mutu kunung nesala dam tara porbenkune,” peramu. Agum dingeda, “Keni yala nesala kunung mutu tara porbenkune,” pepra lap peramu. 11 Dauddi warekra porbaramu mutu, Filistin nesala kurami mutu neitamai kurami nesalada, tenpu ngebo ton tapnepa, men gam kurami. Anesala yuma popra, gawal dangnapu kuramu.

Deiyoda, ‘Nimi ton tapmepe pangeda, angebodi Gat mutu nesala damai beredi, ‘Daud cap, er melimna jen talen neng cap, sunda ukupra-ukupra kununge,’ pepra, lap pepserepa, Raja Akishda kael kepsenung’ tenen, amutu-amutu neitamai kurami nesala yuma popra tamnapu kuramu. Ataru yumada, Daudda Filistin yala nesala sun mutu neitamai kuramudi, mar porbaramu taru yumada, angepu kuramu. 12 Dauddi, ‘Tek sisi upu pena gum, mawa dipapu mok upupu penkamne’ teneramudi, Raja Akhis tep, angepu lap peramnga cadi, Raja Akhisdi Daud tep nengeda uteneramu. ‘Gume, tek sisi Daud er mutu sisa kunge nesala, sun Israel mutu yala nengdi Daud tep, yu tenepmengedi, ‘Angeboda nun songe,’ tenenkamenge. Atep nengeda, er pe mutu sisa tamupra men benmanto kunkamra cadi, Daudda ne amutu tara kuredi, ne pel pio tep donkamnere,’ teneramu.