1Sa 28 | XteSC | STEP | Uda ataruda, Filistin mutu jen talen neng yuma bulupra upu talepi. ‘Israel nesala porbenkamap’ tenen, keteneipi. Keteneipi pangeda, tenpu ngebo er si Akhisdi Daud tep pepu. “Kanda moupra tenepkurume. Kan cap, kan amutara kunge jen talen neng cap, yuma bupra keteneipmumpa, ne cap, ne jen talen neng capdi yuk mutu neng tep mar porbenkamepe,” pepu.

1 Samuel 28

Saulda, isok taleamu ner mororbana tep, En-Dor mutu beu upu

1 Uda ataruda, Filistin mutu jen talen neng yuma bulupra upu talepi. ‘Israel nesala porbenkamap’ tenen, keteneipi. Keteneipi pangeda, tenpu ngebo er si Akhisdi Daud tep pepu. “Kanda moupra tenepkurume. Kan cap, kan amutara kunge jen talen neng cap, yuma bupra keteneipmumpa, ne cap, ne jen talen neng capdi yuk mutu neng tep mar porbenkamepe,” pepu.

2 Upepupa, Dauddi Akhis tep tamupra pepu. “Telepe, neda kan melimna ngebo kunedi, ne kupkaman kecada, epra kael kepkamanerume,” pepu. Upepu pangeda, Akhisdi, Daud tep tamupra pepu. “Telepe. Ange tep nengeda, kan kunkamrem taru neitamai yumada kandi ne tep, ‘Mali nengdi popnenung’ tenen, pio kalekra dinkamnerume. Ne nong kalengna deiyo ngebo kunkamrume,” pepu.

3 Uda, ataruda, Allah er upu lap peramu ngebo Samuelda konum depu. Depu pangeda, Israel nesala yuma engeramyane, er nong douprapidi, er pe mutu sisi, mutu si Rama mutu peirbei. Tonda ataru neitamaida, Raja Sauldi, isok si eremami neng cap, asuru kwa neng cap, konum derami nesala sambala upu sisingna neng yuma capda, Israel nesala kurami mutu neitamai di, konum men di enepra dokotepupa benami.

4 Uda ataruda, sun Filistin nesaladi ‘Israel neng cap podankupe’ tenen, konum keteneipidi, sun opkal bol di dodin tenda atida, Sunem mutu damai bena deipi. Ukupi taru peda, Saul cap, Israel neng, sun jen talen neng yuma cap, Gilboa mutu bena sun opkal dodin ati deipi. Ada, amutu damai ‘Israel neng cap, Filistin neng cap popdankupe’ tenen, kupi. Amutu buteneda, yambul damai kupu. 5 Sun yuma bulupra keteneipipane, sun Filistin yala neng, jen talen neng pio weike bulupra kunmaiya tep, Saul epu dingeda, kware pio weik kupupa, mambul kange doupudi, dipru moropsepu.

6 Ukupu pangeda, Sauldi Allah er si Yahweh tep morona deiki di, “Naio, ware kupkun do?” pepra asipetepu. Asipetepu dinin, Allahdi er tep upu tamupra men lap pepu. Tonda, ‘Ware kupkamep do?’ tenen, dirtererami keca, er si Urim ^{▼▼Urim perami ngeda, yambul gel utopu keca kupu. Akeca dopra deiamidi, Allah mororamipa, agel deiptapra dipetepi. Dipetepipa, Allahdi, agel deiki di, ‘Ukupkamrume,’ pepra peten kemdina keca deriramupa kael keami.} ange ton dipetepu dinin, akeca deiki Allahdi upu men lap pepu. Ange utopu, ken mana deiki di ton, upu men lap pepu. Tonda, amenda kupkamu keca lap pena deiyo neng, Allah er nabi neng peda, Allah men melipupa, anengdi Saul tep upu men lap pepi.

7 Allahdi akeca-keca deiki di Saul tep, ‘Ukupkurume,’ pepra men lap pepu. Atep nengeda, Sauldi er amutara melimna neng tep upepu. “Konum derami neng, sun sambala cap upu sisingna ner tenpu dipetepmumdi, epmumnyopda, ‘Er mutu ace,’ pepra lap pepnemumpa, nedi aner damai benepa upu sisikamneme. Aner tep, ‘Ware kupkun do?’ pepra asipetepkamne,” Sauldi pepra deipu. Upepra deipupa, er melimna nengdi Saul tep tamupra pepi. “Naio, konum derami neng sambala cap upu sisingrur nerda, mutu si En-Dor mutu kurure,” pepi.

8 Upepi pangeda, Saulda ‘Yuk nengdi ne urasin kael kepnenung’ tenen, er pe opkal kwiriptapudi, yuk opkal kenekudi, tenpu lukunda neitamai, er cap, butene neng cap kikiman aner er damai bei. Beidi, Sauldi aner tep moropu. “Ka nero, ne melimna tep, konum derami neng sun sambala cap, upu sisi kurume. Ada, talinge tep gum dinin, men di deamu ngebo, nedi ‘Er si ake,’ pepkuken ngebo, er sambala upupmemnya deiki di, yankure,” pepra, Sauldi aner moropu.

9 Upepra moropu dinin, anerdi ‘Apepner ngeboda, Raja Saul,’ men tenepudi, tamupra er tep pepu. “Gume, tek sisi kan peda konum kael kepmume. Raja Sauldi, ‘Konum derami nesala sun sambala cap upu sisingna meme,’ peramudi, derami nesala sambala sisingmepe nerapu cap, nimi cap, tonda asuru kwa neng cap yumada, Israel nesala kunge mutu neitamai di konum enepra dokoteamseipa, yuk mutu konum bendopmepu. Ange tep nengeda, kanda ware keca deiyo tep, ‘Aner tomopnedi, lap pepnepa, popkamenge’ tenen, ne damai inipra yanmanerem do?” pepu.

10 Upepu pangeda, Sauldi, “Gume tek sisi pedina upu pepkene. Allah, er si Yahweh, ^{▼▼Yahweh – Allah er si, tek sisi ngeda, Yahweh kurure. Indonesia Alkitab neitamaida, Allah er si Yahweh kwamngaida, ‘TUHAN’ sengnunge. Aupu kael kemna tep, lap pena upu nomor 49 dirume.} gam pio kurur ngebo, er si deiki di tek sisi pepkene. Ne moropmaken keca melipnemempa, tek sisi yuk nengdi men wenepra popkamkenge. Allah er si deiki di pepkene,” pepra pedina upu pepu. 11 Upepu pangeda, anerdi pepu. “Atep nengeda, konum derami nesala sun sambala weik dakunung dinin, dan ngebo er sambala upupnepa, kan damai yan pepkuker do?” pepu. Upepupa, Sauldi, “Samuel er sambala si pepra upupmempa ne damai yanetue,” pepu.

12 Upepupa, anerdi Samuel er sambala si pepra upupu pangeda, Samuel er sambala katuai di yaupa epu. Epu dingeda, ila upu deiki di upepu. “Uo, ukuda ne kael kepkene. Kan moropmanerem ngeboda, kanda Raja Saul kurum adano. Ware keca deiyo tep, inimna upu deiki di mok pepmanerem do?” anerdi pepu. 13 Upepupa, Raja Sauldi aner tep pepu. “Ka nero kwar dangna gume. Dinino, konum kupmaupa epmamum kecapu lap pepo. Kandi ware keca epmarem do?” pepra asipetepu. Upepupa, anerdi tamupra pepu. “Tu pumbon di, tenpu ngebo sambala ton yanmarpa epmane,” pepu.

14 Upepupa, Sauldi tamupra aner tep, “Er urasinda wareto ngebo do?” pepra asipetepu. Asipupa, anerdi, “Gume nimi tenpu wisi ngebo lyom opkal kenekamu ngebo ton yanmarpa epmane,” pepu. Upepu pangeda, Sauldi ‘E, tek sisi ada Samuel yanmare’ tenen, kael kepu. Kael kepu dingeda, adipapu er giso genepdongopra tuai tarapu epudi gispal dopu.

15 Ukupu pangeda, Samueldi Saul tep pepu. “Kao, kanda ware keca deiyo tep ne upupmaneremdi dumanerem do? Tali dimpepra kuramsi dinin, ukuda ware keca deiyo tep upunmanerempa ne tamupra yan do?” pepu. Upepupa, Sauldi tamupra pepu. “Gume naio, nedi mesum tep men upupkene. ‘Ware kupkun do?’ tenen, walwal kupnera tep upupkene. Neda ila mambul kange doupra, ikin weik kupmanera tep upupkene. Sun Filistin tara nengdi popkunenge.

Tonda, nun nai Allahdi ne tep konum tapneue. Allah tep moroptenya peda, men gekenerure. Ken mana deiki di do, er upu lap pena deiyo nengdi do, men melimnerure. Allahdi melimrepa, anengdi, ‘Amenda kupkamre keca ake,’ pepra men lap penenunge. Ange tep nengeda, kandi, “Ukupkamrume, angeda ton kupkamrume,” pepra ‘Lape pepkunerem’ tenen, upupmakene,” Sauldi pepu.

16 Upepupa, Samueldi tamupra pepu. “Ware keca deiyo tep, ukutaru ne kongpepmanerem do? Gam kuramsi taruda, ne upu tep men gekeramnemume. Dinin, ukutaruda, Allah er si Yahwehdi kan epra konum tapkeudi, kan podana ngebo utopu konum kupkera tep, kongpepmanerem do? 17 Pumun taruda, Allah Yahwehdi, kan tep, ‘Ukupkamkene, ukupnepa Saul ukupra kunkamrume,’ pepra, ne pemkesi upu deiki lap peramkeu ngeda, konum kupkere. Ada, kandi mali weik kuramuma tep, Israel nesala cap, Israel neng kunge mutu cap yuma, kan dipu taleramum dinin, ukutaruda, Allah er si Yahwehdi, akeca yuma konum dalupra dopropmakere. Dopropkeredi, kan meneng damai ngebo tep karepkure. Ada Daud tep karepkure.

18 ‘Deiyoda, ware keca deiyo tep kupkamner do?’ tenena gume. Deiyoda ake. Allah yu weik kuramupa, kan tep, ‘Amalek yala nesala popra gawal dakamreme,’ peipkeu. Upeipkeu dinin, ange utopu men kupmumdi, er upu yaniptapmuma tep, Allah er si Yahwehdi atumi kan tep wenepkere.

19 Atumida, er puto kan deiki men deipkukere. Atep, kan cap, sun Israel nesala yuma cap doprapredi, sun Filistin yala nesala tep karepkure. Ukupyopda, sun Filistin nesaladi, sun Israel neng tep popbisipkunge. Popbisipmengedi, kan cap, kan nyapu cap poptapmengepa, konum deprumnyopda, ambutumida sunda ne damai yana kunkamrume. Angepu gum dinin, Allahdi Israel jen talen neng yuma taprepa, Filistin yala nengdi popbisipkamenge.” Samuel deamu ngebo, er sambaladi Raja Saul tep pepu.

20 Upepupa, Sauldi aupu konum gekepudi, Samuel peipu upu tep kware pio weik kupudi, moropsepu. Ukupu pangeda, adipapu tu deiki saka kwerepu. Tonda er puto yuma peda boun kupu. Ada atumi neitamai yuma cap, alukunda cap, jen ton pio men jenmaua tep, er puto gum kupupa, tuai saku. 21 Ukupupa, anerdi Saul damai yana dinmaupa, Saul ikin weik kupmaunge epu dingeda, upepu. “Ne kabo, kan amutara kune nerda, kandi ‘Ukuprume,’ pepmaneremtopu konum kupmakenue. Nedi, ‘Mali keca kupnepa, popnenung’ tenen, kware kupmanupapu, kan moropmanerem utopu konum melipmakeneu.

22 Ange tep nengeda, ne pepkuken upuda gekepkunerume. Nedi jen keca metekanun dapra karepkenyopda jepkurume. Jepmemdi puto kupkere pangeda, dukdongopra dabankurume,” pepu. 23 Upepu dinin, Sauldi tamupra, “Gume, ne men jepkune,” pepu. Upepu dinin, er kikiman yanmarei neng, butene neng cap, aner cap ka tamupra upu weika di ton penmai pangeda, gekepudi, tuai di tekrapudi, ‘Jen jepkun’ tenen, akati man keca deiki buku.

24 Ukupu pangeda, anerdi er sapi bisam mi galemna telepnge tenpu er ati di doprapudi, adipapu poprapudi sekra keteneipu. Tonda, roti dana deiyo keca gandum taikinge dopra, roti nena deiyo keca ragi dongona gum dipapu, keteneipudi, dapu. 25 Dapu dingeda, atu keca cap, aroti cap doprapudi, Saul cap, er melimna neng cap tep karepupa, sun yuma jepi. Konum jepra sengpepyopda, alukunda dipapu tekra er ati tapra bendopi.