1Sa 29 | XteSC | STEP | Filistin nesaladi, dana-dana taru kurami mutu yuma di, sun jen talena neng yuma bulupra deipipa, yana Afek mutupu bulupra wekmai. Ada, Israel tara nesala tep porbenkamepe,’ tenepya tep, Afek mutu wekmai. Dinino, sun Israel yala nesalada, Yizreel mutu me bungna bukra embenamu banaipu, sun opkal bol di dodin tenda ati deipra wekmai.

1 Samuel 29

Filistin mutu nesaladi Daud tep, “Nun mutu tapra, yukai tamupra berume,” pepipa, beu upu

1 Filistin nesaladi, dana-dana taru kurami mutu yuma di, sun jen talena neng yuma bulupra deipipa, yana Afek mutupu bulupra wekmai. Ada, Israel tara nesala tep porbenkamepe,’ tenepya tep, Afek mutu wekmai. Dinino, sun Israel yala nesalada, Yizreel mutu me bungna bukra embenamu banaipu, sun opkal bol di dodin tenda ati deipra wekmai. 2 Ataruda, sun Filistin mutu nimi deiyo talepra kurami neng ada, Raja pamubari neng yumadi, yuk-yuk gonga kepipa, sun jen talena neng cap, gung yuk-yuk neprapidi bisi banmai. Ada, ton gungda, denge pio weik seribu (1.000) neng banmai. Ton gungda, denge weik seratus (100) neng banmai. Sun ukupra mepra banmai pangeda, sun amnyo tarada, Daud cap, er melipra jen talen neng capda, sun yuma Raja Akhis cap, er jen talen neng cap, sun amenda tara banmai. 3 Sun amenda tara banmaipa, Filistin jen talena deiyo nengdi, epidi asipetepi. “Ware keca deiyo tep, sun Ibrani yala nengda, nun cap banmai do?” pepipa, Akhisdi tamupra sun tep pepu. “Gume, angebo Daudda, Israel nesala talepu ngebo Raja Saul, er pel dona ngebo kuramu. Tonda, er angeboda, Raja Saul taprapudi, ne damai yaupa, ne cap kikiman ue weik taru konum kuramnemu. Yaupa, kuramnemu taru di dipra ataru yumada, er mali kupunge ton men kupupa, nedi men kael kepsi,” pepu.

4 Upepupa, Filistin jen talena deiyo neng gekepidi, Akhis tep ila di wenepra derepidi, upepi. “Gume, angeboda, kandi er tep, ‘Kanda amutu di tapra, kan karepkesipa kumem mutupu benkurume,’ pepmempa, adipapu tamupra benkure. Ukupmempa, Daudda er kuramu mutupu bena kunkamrure. Angeboda, nun mar porbana tep benkamap taruda, er cap kikiman men betepye. Er cap tonpa bana gume. Er cap bepedi, mar podanmapya neitamai di, er kange tamuproredi, ‘Nun nyapu cap, nun tara neng cap tep, ton poprur’ tenen, pepmepe. Tonda, angebodi tenepkamrada, ‘Go telep taruda, akonuma, ne deiyo ngebo Rajadi, ila kange deipkamnera tep,’ tenepredi, nun jen talena neng ton popserure. Tonda erdi, er deiyo ngebo Raja Saul kange derina tep, karepserur atep, ‘Angeboda nun cap kikiman mar porbanada gume’ tenen, pepmepe. 5 Tonda, angeboda, Daud men kurur do? Er tep nengeda, men taruda, nerapu weika di mut semna deikida, er tep uperami. “Saul erda nimi weik ber ribu-ribu popu dinino, Daudda nimi denge men nukmanto, berpuluh-puluh ribu neng porure,” pepra mut semamidi perami.

6 Upepi pangeda, ataru dipapu, Akhisdi, Daud tep upupupa yau taruda, Akhisdi aupu pepu. Neda, ‘Tek sisi Allah er si Yahweh gam tupa kurure’ tenen, teka tenenuntopu, ukuda tek sisi upupu pepkukene. Teka tenepsi. Kanda ne cap kikiman kuramnemu taruda, mali men kweipnemumdi, dumsisipu kuramume. Ne kange telep deipkena cadi, kan cap, nun cap, kikiman mar podanai bana tep nengeda, telepe pua. Tonda, kanda menmena taru ne damai yamumpa kuramnemuai di dipra, ataru neitamai yumada, kandi mali kunange ton men kuramumpa, nedi men kael kepkesi. Dinin ataruda, ne tamna neng neitamai dinin, yuk nimi deiyo neng yumadi, kan tep nengeda, ‘Nun cap kikiman banada gume,’ tenepmakenge,” pepu.

7 Ange tep nengeda, kanda adipapu telep kange deipmemdi, kan pe mutu tamupra benkurume. Tonda, Filistin mutu neitamai di deiyo talepra kunge neng, sun dinmanga neitamai di, bankumem taruda, kandi maling ton kupmempa, mali-mali pepsenunga tep, ‘Telep dipapu benkurum’ tenen, pepkene,” pepu. 8 Raja Akishdi upepupa, Dauddi tamupra pepu. “Uo, ne deiyo ngebo Raja, angeda nedi ware mali kupsinge tep pepnerem do? Tonda, kandi ne tep pepnemumada, ‘Kanda ne damai yamumpa, kikiman kuramnemu taru neitamai yumada, kandi mali kupmumnge ton men kael kepkesi,’ pepnemume. Atep, ware keca deiyo tep, ne deiyo ngebo kandi ne tep, ‘Mar porbanaida men benkamareme,’ pepmanerem do?” pepra asipetepu.

9 Upepupa, Akhisdi tamupra pepu. “Gume, kanda mouprapmemdi kael kepkurume. Nedi kan tep kael kepkesi. Ada, Allah er pel dona neng malaikat, moupra pio dumsisi kupra, pel donge utopu, kan peda pio telep ngebo kurume. Dinin, sun Filistin mutu jen talena deiyo nengdi pepmanengada, ‘Er Daud cap, nun cap, mar podarbanaida, kikiman men benkamape. Nun pe yukpu benkamape,’ pepmanenga cadi, ware kuptene do, gumae,” pepu. 10 Upepudi aupu ton dukdongopra pepu. “Atep nengeda, sun Raja Saul damai di tapra yarumpa, ne cap kikiman kuramepu neng ada, Daud kan cap, kan nyapu sun jen talen neng cap, sun yumada adipapu, ambutumi ipna sisa, keteng wekra tengyakare taru dipapu, nedi kareamkesi mutu tamupra benkamarume. Tonda, sun yuk deiyo nengdi, kan tep mali pepmakeng upu tep nengeda, mali kange dopra tenena gume. Angeda dakwapmarye. Tek sisi ne damaida, kan pio telep kuprappu kuramnerume. Atep, mapmamumya berekyopda, ipna sisa di amutu tapra benkurume,” pepu.

11 Raja Akishdi upepka tep, Daud cap, er tara neng cap, mapmaiya bereku pangeda, ipna sisa di, Daud cap, er nyapu cap, adipapu tamupra, Filistin mutu bei. Ukupi pangeda, sun Filistin jen talena nengda, amutu taprapidi, ortara Yizreel mutu bei.