1Sa 3 | XteSC | STEP | Samuelda kaber ngebo kuramu taru di, Allah er si Yahweh tep, er pel moupra doramu. Ataruda, Yahwehdi er ati pel dona deiyo ngebo Eli kuramnga cadi, Samuelda Eli er amutara bukra pel doramu. Ataru neitamaida, Allah Yahwehdi nimi tep, er upu weika di men peramupa, er upu lap pena nengdi meteka dipu gekerami. Ange utopu, Allah kareprepa, ken mapmenga deiki di, dirameng keca ton, meteka dipu kareramupa, meteka dipu dirami.

1 Samuel 3

Allahdi Samuel tep, pepu upu

1 Samuelda kaber ngebo kuramu taru di, Allah er si Yahweh tep, er pel moupra doramu. Ataruda, Yahwehdi er ati pel dona deiyo ngebo Eli kuramnga cadi, Samuelda Eli er amutara bukra pel doramu. Ataru neitamaida, Allah Yahwehdi nimi tep, er upu weika di men peramupa, er upu lap pena nengdi meteka dipu gekerami. Ange utopu, Allah kareprepa, ken mapmenga deiki di, dirameng keca ton, meteka dipu kareramupa, meteka dipu dirami.

2 Ataru neitamaida, Eli konum wisi deipu cadi, er asuru mali kupupa, metekanunpu epmanto kuramu. Tenpu tumi lukunda konum kupupa, ataru-ataru yuma tenpuaipu maramutopu, atumi lukunda peda, acapu mapu. 3 Alukunda neitamaida, Allah er si eremna ati pumbon pel dona tep, upna derirami ngeda kapul men tapdongopmau. Atep, bereng tamne taru damai konum kupu dinin, tupa kunuknapu kupu. Ukupmaupa, Samuel akati pumbonpu, Allah Yahweh er si eremna ati pumbon mapmau. Er mapmauaida, Allahdi er upu peramupa sekami co bekin, er sida Peti Perjanjian ^{▼▼Peti Perjanjian – Pumun taruda, Allahdi Musa tep peiputopu, sun Israel nengdi, co lase dopra, co peti ketenepi. Aco deiki yumada, emas dopra palepra deipi. Aco peti pumbon neitamaida, ila mambul keca weneri deipi. Ada, Allahdi, “Angeda ukunkamrume, angeda pio men kunkamrume,” pepra, mem upu peiamudi, gel pala deiki seku mem upu cap, Harundi taleamu maca cap, Allahdi Israel nesala tep kareamu im deiki kwaning, er si mana metekanun cap dopra, apeti pumbon dongopi. Sun Israel nesalada, ‘APeti Perjanjian damaida, Allah Yahweh, er Sambala cap, er puto cap, er dirine cap, er pio telep kurenge yuma capda, aPeti Perjanjian deiki tara pio akunkamsere,’ tenerami. Akeca tep, ‘Pedina Upu Kina Bekin’ peptepe. Akeca kael kemna tep, Keluaran 25:11 dinkurume.} pumbon deiamyai, akeca damaipu mapmau. 4 Ukupmaupane, Allah er si Yahwehdi Samuel tep upupu. Upupupa, Samueldi “Naio ne akunman adano,” pepu.

5 Upepudi, Samuel adipapu bukra, Eli damai beudi, “Naio, kandi upupmanerema tep, ne yanman adano,” pepu. Upepupa, Elidi tamupra pepu. “Ne kan tep ton men upupmakena cadi, tamupra marbeo,” pepu. Upepka tep, Samuel ka tamupra bena mapu. 6 Samuel ka tamupra beudi mapmau taruda, Yahwehdi kange di ton cap, “Samuel, Samuel,” pepra, Samuel tep tamupra upupupa, bukda peprapudi, ngedi Eli koripu beudi, “Naio, kandi upupmanerema tep, ne yanman adano,” pepu. Upepupa, Elidi tamupra pepu, “Ne mio, kan tep men upupmakena cadi, tamupra marbeo,” pepu.

7 Uda, ataruda, Allah er si Yahwehdi Samuel deiki ton er amenda kupkamu keca upu cap, yuk mambul upu cap, jenek men pediramnga cadi, Samuelda, Allah tep betapra kapul men kael keamu. Angeda kapula. 8 Uwe weneri ngeda, Yahwehdi Samuel tep upupupa, Samuel bukda peprapudi, Eli koripu beudi ngedi utopu, “Naio, kandi upupmanerema tep, ne ayanman adano,” pepu. Upepu taruda, Eli adipapu betapra tenepu. Ada, ‘E, Allah er si Yahwehdi upunmaner’ tenen, kael kepu.

9 Ukupu dingeda, Elidi Samuel tep pepu. “Tamupra marbenkurume. Ukupmempanen, kange di ton cap Allahdi upupkere pangeda, upepkurume. ‘Ne nai Allah, kanda Yahweh kurume. Neda kan amutara kune ngebo gekenmakena cadi, upu peipneo,’ pepkurume,” Elidi pepu. Upepra deipu pangeda, adipapu Samuel tamupra marbeu.

10 Ukupu taruda, Allah adipapu Samuel damai yaudi, arup taru kupmautopu, yan upupu. “Samuel, Samuel,” pepu pangeda, Samueldi tamupra, “Naio, neda kan amutara kune ngebo gekenmakena cadi, upu peipneo,” pepu. 11 Upepu pangeda, Allahdi pepu. “Kan dinkamrume. Ne Yahwehdi Israel nesala tep, ila mambul keca ton, sun damai kunepa, ton nengda dinkamenge. Ton nengda gekenkamange. Gekepmenge nengda, ‘Uo, angeda ila mambule’ tenen, nimi kange lopkamre,” pepu.

12 Upepudi, aupu ton pepu. “Ataruda, Eli er nyapu cap, er yala neng yuma, sun wenemna tep, orwar di peramsi keca yumada, ukutaru kupkamne. Tenpunge peda pepsi ngeda, men tapkune. Ange yuma kupkune,” pepu.

13 “Nedi Eli tep pepsi ngeda ake. Ada, Eli er nyapudi sun pio mali keca kudiramnereiya deiki di, ne tep yanipra pio mali kudiramnerei. Ukuramnerei taruda, sun nai bodi, er sipyal deiki dipapu, ‘Yapreso,’ pepu dinin, puto di men wenemamnga tep, sun tep upu men sengdongorumpa, sun aneng tupa malipu kuramrei. Ange tep nengeda, Eli er yala nesala yuma tep, wenemna keca pio karenkamne. 14 Ange tep nengeda, Eli er bung tep pepsi. Er nyapu pio ila mali keca kuramrei ngeda, mambul weik cadi, Eli er yala nengdi telep keca karepnetenga pe, tonda yapi keca popra duyatengedi, karepnetenga peda, sun mali keca men daepkamne. Sun wenemnada pio men taptene. Ange utopu, sundi gam keca weika di popnedi, ne karena tep gel pala yakra deiamnya deiki uku dongoptengya peda, sun mali ngeda, men kaukepkamne, pio akapkamre,” Allahdi pepupa, Samueldi gekepu.

15 Upepupa gekepu dingeda, Samuel mapmaua, ipna taru di bukra, Yahweh er si eremna ati buplan pakra, beu dingeda, kware kupmaupa, Allah peipmaunge yumada, Eli damai bena pedinada, men bena pepu. 16 Men lap perbenmau dinin, Elidi, “Ne mi Samuelo,” pepra upupupa, “Naio, ne akunman adano,” pepu. 17 Upepupa, Elidi tamupra asipetepu. “Allahdi ware pepmakeu do? Aupu yumada ne ton peipneo. Allahdi pepmakeu upu yuma men lap pepneremdi, ton ngeda iniptaprem pangeda, er weika di wenepkamkere tenepne,” Elidi, Samuel tep pepu.

18 Upepka tep, Samuelda, Allahdi peipmau upu yuma Eli damai pepra deipu. Pio tenpunge peda ton men iniptapu. Upepu pangeda, Elidi pepu, “Gume, erda Allah, er si Yahweh cadi, er dipapu, ‘Ange telepe,’ tenepre ngeda, apu kupkamre. Akonuma,” pepu.

19 Uda, ataru di dipra dortaru neitamai yumada, Allahdi Samuel tep melimamupane, nepbaramu taru neitamai yumada, Allahdi peramu upu yuma, tenpu peda men tapu. Samuel aupu yuma gekepudi lap peramu pangeda, Allahdi, ‘Ukupkamne. Ukupnepa akeca ton kupkamre,’ peiamupa, Samueldi, Israel nesala tep lap peramu upu yumada, tek sisi ukuramu.

20 Ukupupa, Israel nesala kurami mutu neitamai yuma kael kepi. ‘Samuelda, Allah er pel don ngebo kuredi, Yahweh pere upu gekepra lap pena ngebo tek sisa kurure,’ tenepidi, kael kepi. Ada amutu deiki tara Dan yala neng kuramyai di dukdongopra, dutara mutu si Bersyeba mutu yuma kael kepi.

21 Ataru neitamaida, Allah Yahwehda, er si eremne ati, Silo mutu damainge di yana, gonga kemna taruda, er peramu upu deiki di, Samuel damai jenek kupra deipupa, adeiki Samueldi Allah er si Yahweh tep, betapra teneramudi weika di kael kemamu.