1Sa 30 | XteSC | STEP | Komuni weneri deiki di, Daud cap, er melimne jen talen neng cap, mutu si Ziklak mutu bei. Ataruda Negeb mutu neng cap, Ziklak mutu neng cap yumada, sun Amalek yala nengdi konum poryakarami. Ukuramyane, sun Ziklak mutu kurami nesalada popbisipidi, sun ati yuma uku dongopipa jepra gawal dakropu.

1 Samuel 30

Daud cap, sun Israel jen talen neng capdi, Amalek yala neng popbisipi upu

1 Komuni weneri deiki di, Daud cap, er melimne jen talen neng cap, mutu si Ziklak mutu bei. Ataruda Negeb mutu neng cap, Ziklak mutu neng cap yumada, sun Amalek yala nengdi konum poryakarami. Ukuramyane, sun Ziklak mutu kurami nesalada popbisipidi, sun ati yuma uku dongopipa jepra gawal dakropu. 2 Sun Amalek yala neng ange konum kupi dingeda, Ziklak mutu neng cap, nerapu cap, tonda wisi nesala cap, kaber nesala cap, metek nyapu cap yuma, sun amutu kurami nesala yumada, men poptapi dinin, tomoprapidi, ateng koupra, ‘Nun mutu dubenkamep’ tenen, doupra derirbei.

3 Sun Amalek neng konum bendopmai pangeda, amenda taru Daud cap, er jen talen neng cap, Ziklak mutu beidi dinmaipa, ati arum doamyai yuma, Amalek nengdi uku dongopipa jepra gawal dakmaunge epi. Tonda, sun Amalek yala nengdi, sun nerapu cap, sun nyapu bung yuma cap, konum ateng koupra dubenmainge peda kael kepi. 4 Ukupmai ngeda, Daud cap, er jen talena neng cap yuma, ange epra kael kepi dingeda, ila di engepi. Engenmankap, sun nonge boun kupupa, ton cap men engepmanto kupi.

5 Ataruda, Daud er nerapu butene sun sida, Ahinoam cap, Abigail cap kuramrei. Ahinoamda Yisreel mutu ner, ton nerda Abigail, Karmel mutu ngebo er si Nabal domua depupa, solu dakamu ner kuramu. Sun Amalek nengdi Ziklak mutu bisbisa kapi taru, abutene nerapu tomopmaidi, ‘Nun mutu tamupra dubenkamep’ tenen, konum bendopi.

6 Ange yuma ukupropmaipa, Daud er melimna neng, sun jen talen nengda, ila kange mun kupupa, ‘Uo, nun nerapu cap, nun nyapu yuma cap, Amalek nengdi konum tomopra dubenmasenge. Ukupmasenga tep nengeda, nun deiyo ngebo Daud tep gel dopra popkup do?’ tenenmai. Utenepipa, Dauddi ‘Uo, ware kupkun do?’ tenen, teniptopudi ikin kange doupu. Dinino, Allah er si Yahwehdi ^{▼▼Yahweh – Allah er si, tek sisi ngeda, Yahweh kurure. Indonesia Alkitab neitamaida, Allah er si Yahweh kwamngaida, ‘TUHAN’ sengnunge. Aupu kael kemna tep, lap pena upu nomor 49 dirume.} dipru neitamai puto karepka deiki di, Daud er dipru kwa dipupa, Daud er puto kange doupudi kupu.

7 Ukupupa, Dauddi nimi si Abiyatar tep upu pepu. Abiyatarda, ada Ahimelek er mi dinin, Allah er si eremna ati pumbon pel doramu ngebo kuramu. Dauddi angebo tep upepu. “Nundi Allah tep, ‘Ware kupkup do?’ tenen, moropmepedi, dirterenup keca, er si Efod ^{▼▼Efod perami ngeda, ada yambulanun deiyoteng utopu keca. Allah er si eremna ati pumbon pel dorami nengdi akeca kenengami. Akecada, pio telep opkal, singkaluma (warna biru) cap, miringe cap, yapi binge cap, ungu cap wiamidi, adeiki di kunumna weik gel ton getepra wiami. Allahdi peten kemna keca kareramupa, Efod deiki palepra deiami gel dirtereamya deiki di, katuai kuramupa, adeiki di, ‘E, Allahdi teneserurada, ake. Atep, ukupkamepe,’ tenen, kael keami.} dopra denerume,” pepu. Upepupa, Abiyatardi aopkal er si Efod dopra Daud damai duyau.

8 Duyaudi, Daud tep karepkopda, Dauddi akeca dipetepudi, Allah er si Yahweh tep asipetepu. “Ne nai Allaho, sun Amalek yala neng, nun mutu arup poryanmangka popbisipmasengdi banmang nengda, amenda dombenkup do? Dombenyopda, aneng damai betene do, gum do?” pepra asipetepu. Asipetepupa, Allahdi Daud tep pepu. “Teka, kandi amenda dombenkamrume. Amalek neng damai bememdi popbisipkamarume. Telepe sun nerapu cap, sun nyapu cap, sun tara neng yuma capda, tomopra dubenmai dinin, kandi aneng yuma lyepra bena dalupkurume. Ukupmemdi, sun nerapu cap, nyapu capda, ka tamupra dopropkamarume,” pepu.

9 Amoropunge tep, Allahdi “Telepe,” pepupa, Dauddi gonga kepupa, er melimne jen neng sun dengeda, enam ratus neng cap, amenda melipra dombanmaiya, ‘Amalek neng porbenkup’ tenen, Besor mutu mekin bei. Amekin bei dinin, ton nengda, puto boun konum kupupa, Besor mekin damaipu tapidi, tupa men banmai. 10 Sun puto boun kupmau nengda, denge dua ratus neng, Besor me goupra ortara men benmanto kupi atep, atara kunmai dinin, Daud cap, er jen talen neng dengeda, empat ratus neng cap, ame goupra ortara benmaidi, Amalek neng tupa dombenmai.

11 Ukupi taruda, Daud cap menmena mepra bei nengda, pio ila douai ban bisi banmanka, Daud er melipmai nengdi Mesir ngebo ton epidi, tomopra, sun deiyo ngebo Daud damai doupra yai. Ukupi dingeda, er angebo tep jen keca cap, me cap karepipa jepu. 12 Sundi angebo karepi kecada, yambulanun kwarang co du utopunge, ara co du dopra roti utopunge, kue betamaminge cap, tonda anggur du kalkal perurnge, kue betapra deipmainge butene cap, karepipa jepu. Konum jepupa, er puto ka tamupra kupu. Angeboda, komuni weneri cap, lukunda weneri cap deiki di, jen cap, me cap pio men jepmaua tep, puto boun kupmau dinin, jen jepupa er puto ka di ton cap kupu.

13 Konum jepudi puto kupkopda, Dauddi, “Kan deiyo ngeboda ware ngebo do? Tonda kanda dan mutu ngebo do?” pepra asipu. Upepra asipupa, aMesir mutu ngebodi pepu. “Neda Mesir mutu ngebo dinin, ne deiyo ngeboda, Amalek mutu ngebodi kunupneua cadi, er amutara tali pel melimna ngebo kunune. Kikiman banmanemu dinin, pu jepneupa, ne deiyo ngebodi, ne tapra bendopneu. Ukupmanua tep nengeda, komuni weneripu jenmaneupa, kunmanue.

14 Ne pu kapul jepneu taruda, ne cap, sun Amalek neng capdi, Negeb tara neitamai dinin, Kereti yala neng sun mutu iknapi tara popbisipmepu. Tonda, sun Yehuda yala neng talerami mutu popbisipmepu. Tonda Kalep er yala neng taleami mutu, mutu si Negeb mutu ton popbisipmepu. Tonda, tenpu arum domyaida Ziklak mutu, popbisipmepudi, sun ati arum yuma uku dongopra gawal dakmepu,” pepu.

15 Upepupa, Dauddi tamupra pepu. “Kandi nun yala neng tep, popbisipmangu neng kunge mutu bana tep, melipra dubesetum do?” pepra asipu. Asipupa, aMesir mutu ngebodi, tamupra pepu. “Allah dinmasera damai di, er si pepra pedina upu deiki di, pepnetumtoda, nedi melipketene. Ada, kandi upepkunerume. ‘Allah er si deiki di pepkepe. Kanda men popkukepe. Tonda, kan dopra kan deiyo ngebo damai dubekepedi, angebo tep tamupra men karepkamkepe,’ pepnetumtoda, nedi melipsenedi, ne tara neng damai dubenkamsene,” pepu.

16 Upepupa, Daud cap, er nyapu capdi, ‘Telepe amoropmaserumtopu kupkamkepe,’ pepi. Upepi pangeda, angebodi sun yuma douprapudi, sun Amalek yala neng tali bukra kuramyai dubeu. Ayu nengda, tenpuai men kurami. Tali kange doupra kunmaidi, amutu dana-dana yuma bungamidi, jen cap, kange yawaramne me cap, jenmaidi, telep kange doupra mali-mali kunmai. Deiyoda, sun Amalek nesaladi, Filistin tara neitamai dinin, Ziklak mutu kurami neng cap, Yehuda yala neng kurami mutu neitamai cap, anesala yuma popra bisbisa kapmaidi, upula doupra yanami bunga capda pio weik cadi, tali kange doupra, pingpinga di kunmaidi jen cap, kange yawaramne me cap weika di jenmai.

17 Ukunmaipane, atumi sintara di gonga kepra, alukunda cap, ambutumi cap, keteng komuni cap, adinen idona cap, ataru neitamai yuma, Daud cap er jen talena neng capdi, sun Amalek yala neng tep mar porbanmai. Ukupra pio apodanmaipane, lukunda kepu. Daud cap, er jen talen neng capdi, Amalek neng weika di popra gawal dakmai dinin, amutu kurami kaber neng dengeda, empat ratus neng, ‘Bura saka benkup’ tenen, unta perameng keca bali deiki bukrapidi, bura saka bendopi. Ukupi dinin, yuk Amalek neng yumada, tenpu peda ton men bei. Aneng yuma popra gawal daki.

18 Ukupra Daud cap er jen talena neng capdi sun Amalek nengdi upula dopra duyana deiami keca yuma cap, duyanmai nesala cap, tonda Daud er nerapu butene cap yumada, bena dalupra dopropi. 19 Dopropidi dipterepipa, akeca-keca yuma cap, anesala yuma cap, telep kupra kurami. Tenpu keca pe, tenpu nesala peda men gum kupu. Ada, Amalek nengdi dalupra dopropinge yuma, nimi pe, nerapu pe, wisi nesala pe, kaber nesala peda, ange-ange yuma tupa akurami. Aneng yuma cap, akeca-keca yuma cap, Daud dopropudi, ka tamupra sun pe mutu duyana deipu.

20 Ataru dipapu, sun Amalek nengdi upula dopropmangu domba bisam cap, sapi bisam cap, ma yala-yala yuma cap, mepra banmaipa, yuk gam kuramre keca yala yumada, amenda dukdongopra yakanmai. Banmaidi, upenmai. “Akeca yumada, Amalek nengdi upula dopropi dinin, Dauddi Amalek neng popbisipudi, dalupra dopropmar ngeda ake. Ukutaruda abunga yumada, Daud er keca pua,” pepra banmai.

21 Ukupra banmaidi, Daud bung tamupra, sun kayapu puto boun kupu neng, Besor mekin me pirimanai wilipra tabenamipa kurami nimi denge dua ratus neng kuramyaipu tamupra yai. Ada, Besor mekin damai me pirman kurami nengdi, Daud gonga kemna cap tamupra yakanmaipa, epidi, “Telepe sun tamupra yarume,” pepra gudinmai. Ukunmaipa, Daud er gonga kemna di, atapbenami neng tep, “Telepe, nun tamupra yanmape,” pepu.

22 Dauddi kange deipra ‘Telepe,’ pepu dinin, Daud cap benami neng kan-kan dinin, ton tara nengda, pio dipru mali neng cap, tonda mali-mali kunmai neng capdi, sun anengdi sun kayapu boun kupupa, Besor mekinpu kurami neng tep, “Sun anengda Amalek neng porbana tep kikiman men benmaiya tep, Amalek nengdi doupra derirbenamseipa duyanmap kecada, sun men doproptenge. Akeca bokra sun tep men karepkupe. Dinin, sun nerapu cap, nyapu capda, anengpu doproptengedi, sun pe mutu dubenkamenge,” penmai.

23 Upenmaipa, Dauddi sun aneng tep, “Ne kayapu nengo, Allah er si Yahwehdi nun yuma tep melipra karepmasernge cadi, aupu pena gume. Angeda nun podana tep yai neng, Allahdi kalekra melipmaserpa, sun yu neng konum popbisipmape. Amalek mutu neng kan-kan di lyepmasera tep, upedana gume. 24 Sun mali penmarum ngeda, ware ngebodi gekepkamser do? Gume, nun benamepudi Amalek neng popmepu neng peda, sun puto boun kupupa, nun bunga kalengna tep, Besor me damai akuramrum neng peda, kikiman utopu dopropkamepe. Nun yuma bunga weik utotopu doropkamape. Sun yuma tep pepsene,” Dauddi er jen talena neng yuma tep pepu.

25 Dauddi apepunge deiki, “Teka dumsisi kuna ngeda, angepu kunkamepe,” pepra peten pepu. Ukupupa, sun Israel nesalada angepu kupyakaramyanen, ukutaru peda tupa kununge. Ada, sun podan neng porbana neng pe, sun ati cap, sun bunga cap meneng damaipu kalengna neng peda, ‘Sun kunumna keca utopu dorona telepe,’ tenepi. Deiyoda, Dauddi, ‘Angeda pio kunkamepe,’ pepra deipka cadi, sun Israel nengdi ataru di dipra, ukutaru peda, angepu kununge. Yu neng popbisipmengedi, bunga dopropmengopda, akeca yuma bokra kikiman utopu doronunge.

26 Uda, ataruda Dauddi upepu dingeda, Daud cap er jen neng cap, tamupra Ziklak mutupu bei. Ukupidi Amalek nengdi doupra benamipa dalupra duyau kecada, Dauddi ton bokra Yehuda yala nimi deiyo neng, wisi neng ton karepu. Anengda er kayapu neng cadi, akeca karepudi upepu, “Telepe angeda, tali akarepsene. Akecada, Allah er si Yahwehdi yu tenere neng popbisipmapdi, sun kan-kan di doupra duyanmap keca dopropsi ngeda akarepsene,” pepu.

27 Ada sun Betel mutu kurami neng cap, Yehuda yala neng dinin, Ramot Negeb mutu neng cap, tonda Yatir mutu kurami neng cap tep, Dauddi abunga bokra karepupa dopropi.
28 – 29 Ange utopu, tonda Areor mutu neng cap, Sifmot mutu neng cap, Estemoa mutu kurami neng cap, tonda, Rakal mutu kurami neng cap, Yerameel mutu neng cap, Keni ati arum dorami neng cap,
30 Horma mutu neng cap, Bor-Asan mutu neng cap, Atak mutu neng cap, Hebron mutu neng cap, sun yuma dopropi.

31 Tonda, Daud cap er jen talena neng cap, mutu-mutu yuma kikiman embarami mutu kurami neng yuma tep, abunga bokra karepupa, sun ton dopropi.