1Sa 31 | XteSC | STEP | Ataruda, sun Filistin yala nengdi Israel yala nesala tep, ‘Popra gawal dakup’ tenen, poryanmai. Podanmaipane, sun Israel neng kware kupupa, sepdaro bei dinin, Filistin nengdi nimi weik popi. Ada mutu si Gilboa mutu deiki di, nimi Israel neng weike popi. Ukupi pangeda, Saul cap, er nyapu sisa cap, er melimna neng cap, yuma sepdaro bendopi.

1 Samuel 31

Saul cap, er jen ngebo tenpu cap sun pedi popdarei upu

1 Ataruda, sun Filistin yala nengdi Israel yala nesala tep, ‘Popra gawal dakup’ tenen, poryanmai. Podanmaipane, sun Israel neng kware kupupa, sepdaro bei dinin, Filistin nengdi nimi weik popi. Ada mutu si Gilboa mutu deiki di, nimi Israel neng weike popi. Ukupi pangeda, Saul cap, er nyapu sisa cap, er melimna neng cap, yuma sepdaro bendopi.

2 Bei dinin, Filistin nengdi Saul er nyapsilip dombena, er nyapu weneri bena tomopidi popi. Aneng sun sida, Yonatan cap, Abinadab cap, Malki-Sua cap bena popi. 3 Ila di popdanen banmaiyanen, Saul cap banmai neng yuma, sun podan nengdi marap yakanmaipa, er nong yumada, susu dilapu kupu. Saul peda maraproipa, depmanto kupu.

4 Ukupua tep, Sauldi er nyapu jen talen ngebo, er nimi podan keca dubana tep melipra embaramu ngebo tenpu tep pepu. “Ukutaruda, kan doupmarem parang ya di dopra lukdongopra popneo. Gum dingeda, sun Filistin yala neng, pio mali kungedi, den bam bol men sengmenge yala nengdi popkunenge. Sundi popnengiopda, ne nong dopra kamet pedina utopu kweipnenge. Tonda, ne nong dopra pio mali kweipnenung tepa.

Angeda pio mali tep, nun pe yala ngebo, kan dipu kan parang ya dopra popneo,” pepra moropu. Upepra moropu dinin, er melimna ngebo kware weik kupka tep, Saul men popu. Tonda, angebodi Saul tep, ila di gispal dopka tep, ‘Ne nai men poptene,’ tenepu. Ukupu pangeda, Saul er pedipapu, lyom parang ya dopra, tuai ikra deiprapudi, itara di sakapudi, lukupa depu.

5 Ukupu pangeda, er cap melipmaupa banmarei jen talen kaber ngebo, Saul depupa epu dingeda, er peda utopu, er pe lyom parang dopra tu deiki ikra deipudi, akeca deiki sakudi popdau. Ukupra atumi dipapu, Saul depmauaipu angebo peda depu. 6 Ange tep nengeda, Saul cap, er nyapu sisa weneri neng cap, Saul er melimna ngebo cap, uda Saul er jen talen neng yuma, weika di, sun yumada atumi tenpu dipapu depi.

7 Uda, ange yuma konum kupupa, epi nengdi kai perbeipa, sun yuk Israel yala nesala, tali nesala gekepi. Ada, ila banai kurami neng cap, tonda Yordan me ortara kurami neng cap gekepi. Ada, Filistin yala jen talen nengdi, Israel jen talen neng cap weike, Saul er nyapu weneri neng cap, poptapi pangeda, yuk Israel jen talen neng sepdaro bendopipane, tonda Saul konum popdau ngeda konum gekepidi kael kepi dingeda, atara neitamai kurami Israel nesala kwar weik kupu. Kware weik kupupa, sun ati yuk-yuk kuramyai yuma tapra, bura saka bendopi. Sun ati tapra bena dopi pangeda, sun Filistin yala nengdi, yana akati yuma dopropidi, amutupu wekra kunmai.

8 Tonda, sun yuma mapmaiya bereku pangeda, sun Filistin nengdi, ambutumi poptapmangu neng, ‘Sun nong deiki kenekmangu keca cap, sun bunga cap dopropkup’ tenen, popdanmaiyai yan dipetepi. Gilboa mutu deiki bena dipetepipa, Saul cap, er nyapu weneri neng cap, poptapmaiyaipu tupa kupmaupa epi.

9 Epi dingeda, Saul er kum sekra, er giso buluktapidi dopropi. Tonda, er podana taru tep, kenekmau gat opkal yuma upula dopropi. Ukupi dingeda, sundi peipipa, yuk nengdi akupmainge tep, upu kai perbanmai. Ada, amutu-amutu neitamai yuma, ‘Israel sun ila nimi deiyo ngebo Saul konum popbisipmape,’ pepra kai perbanmai. Upepra penmaipane, sun yala neng kuramyai yuma cap, sun isok si eremna ati neitamai, nimi urasin utopu kupra petupra derirami ati yuma cap, aupu penmaipa, sun yala neng yumadi gekepi.

10 Sun Filistin deiyo nengdi, Saul er podana taru tep gat opkal keneku ngeda dopra, sundi sun isok si eremami ati, isok er sida Asytoret, er si eremna ati bena deipi. Saul er nongda, doprapidi, mutu si Bet-San ati arum domyai dana-dana ikra wiami gel beilya deiki gerekdongopi. Ada, ‘Nun yala neng yumadi epkameng’ tenen, Saul er nong dopra, abeilya deiki gerekra deipi. 11 Ukupi pangeda, yuk nengdi lap perbeipane, mutu si Yabes-Gilead mutu nengdi, ‘Saul popidi, er giso sektapra, er nong dopra beilya deiki gerekdongopra deipmange,’ pepipa, gekepi dingeda, ‘Uo, angeda pio mali,’ tenepi.

12 Utenepya tep, Yabes-Gilead mutu neng, pio kware gum, balila weik nengdi, ‘Bet-San mutu bepedi, Saul er nong dopropkamepe’ tenen, alukunda neitamai yuma bisi banmai. Banmaiyanen, Bet-San mutu bei. Bei dingeda, Saul cap, er nyapu cap, sun nong beilya deiki gerekra deipmaiyai dipu dopropidi, ka tamupra sun pe mutu Yabes mutu bei. Bei dingeda, Saul cap, er nyapu weneri cap, sun nong doprapidi, uku dongopipa, uku jepropu. Ada, ataru sun gispal dona tep kuraminge utopu kupi.

13 Uku di sun nong konum jepropupa, Yabes mutu nengdi, Saul cap, er nyapu weneri cap, sun yo puda, doprapidi, Yabes mutu neitamai dinin, ila co tekamnga iriamu tara tu palipra, ayoda du mouramre co, er sida tamariska co tekamnga damai peipi. Ukupi dingeda, Saul er gispal dona cap, depmaua tep engena cap tep, ue yoneitam bari tumi deiki di, jen men jenmai. Jen jena gum dipapu, si tepra mesumpu kunmaiyane, ue ware kuprap taru konum kupu.