1Sa 4 | XteSC | STEP | Ataruda Filistin sun jen talen neng yuma puto keprapidi, Israel nesala sun poryakana tep ketenepra deipi. Ukupidi, sun opkal bol atida Afek mutu neitamai yana dopi. Ange utopu, sun Israel jen talen neng yumadi, ‘Filistin neng porbenkamep’ tenen, puto kepidi sun opkal bol atida Eben-Haeser mutu neitamaipu bena dopi.

1 Samuel 4

Filistin nengdi Allah er pediramu upu dongopi bekin upula dopropi upu

1 Ataruda Filistin sun jen talen neng yuma puto keprapidi, Israel nesala sun poryakana tep ketenepra deipi. Ukupidi, sun opkal bol atida Afek mutu neitamai yana dopi. Ange utopu, sun Israel jen talen neng yumadi, ‘Filistin neng porbenkamep’ tenen, puto kepidi sun opkal bol atida Eben-Haeser mutu neitamaipu bena dopi. 2 Sun Filistin jen talen neng yumadi, ‘Israel mutu nesala porbenkamep’ tenen, konum puto kepra ketenepi dingeda, Filistin neng cap, Israel neng cap, mar podanmaiyane, Filistin nengdi Israel nesala yuma popbisipi. Popbisipidi Israel sun jen taleng neng denge pio weik, empat ribu (4.000) neng popi. Ada amar podanmaiya deiki di poptapi.

3 Konum popbisipidi, sun Israel neng jen talen neng tupa tapi nengda, sun pe ati tamupra yaidi, Israel neng sun ila nimi deiyo neng tep pepi. “Ware keca deiyo tep Allah Yahweh er putoda nun tara tapmaserdi, sun Filistin neng tara kepmarpa nun popbisipseng do? Atep nun yumadi Silo mutupu bepedi, Allah Yahweh er pediramu upu donopmepu co bekin, er sida Peti Perjanjian ^{▼▼Peti Perjanjian – Akeca gambar dina tep, Bilangan 7:89 dinkurume.} doupmepedi, mar podanai bapyopda, Allah Yahwehdi nun tep melimserya deiki di, Filistin jen talen neng popbisiptepe,” pepi.

4 Upepidi, sun anesala yumadi, “Allah Yahweh er pediramu upu donopmepu bekin, er sida Peti Perjanjian, Silo mutupu dorbenkurume,” pepra, nimi ton wepra deipi. “Allah Yahweh erda akeca-keca yuma talepra ila puto deiki erepra kure ngebodi, amambul bekin deiki tara bungrurai dana-dana tarada, Kerub butene tenererunge. Ada, ila nimi deiyo nengdi ila bungna keca deiki bukmengedi, ‘Ukupkurume,’ pepra peramengtopu kurure. Tonda Allah er pediramu upu dongopi co bekin, er sida Peti Perjanjian damaida, Eli er nyapu butene Hofni cap, Pinehas capda aco bekin damai apu kalengrerunge,” pepi.

5 Allah Yahweh er pediramu upu dongopi bekin, Peti Perjanjian konum doupra yaidi, sun pe opkal bol ati neitamaipu yana dopra deipi. Deipi dingeda, Israel nesala yumadi, upu ila di penmaidi mut penmai. Ataru sun Israel nesala yumadi mut penmaipa tuai mutu neitamai long-long penmau. 6 Mut penmai taruda, sun Filistin neng yuma gekenmaidi, upepra asipetepdai. “Uo, sun Ibrani nesaladi sun opkal bol ati yana deipmangdi ila upu di penmangada, ware keca deiyo tep do?” pepra asipdai. Asipetepipa, yuk nengdi, “Gume, Israel deiyo nengdi, sun nai bo Allah Yahweh er pediramu upu dongopi bekin duyana deipmanga tep, ila upu penmange,” pepra lap pepipa, gekepra kael kepi.

7 Sun Filistin nesala yumadi, aupu pio moupra gekenmai taruda, sun kware weik kupu. Sun kware kupupa sundi upepi. “Uo, sun Israel nesaladi talepra kunge Allahda, sun opkal bol tenda ati dominge damai yana deipmangpa kunmar adano! Uo, nun bicaue. Akupmara utopu keca ton, pumun taru di dipra ukutaru ton, pio men kuramseu. Atep nengeda, akeca nun damai yanmara tep, kange mun kupsere,” pepra, mali pepi.

8 Tonda, upepi. “Uo, tek sisa nun bicaue. Nunda ware ngebodi lyepra deipsetu do? Israel nesaladi talenung Allahda, er puto weika di, nun popbisipserur’ tenen, ware ngebodi lyepsetu do? Yuk isok-isok yumada, ton men lyepropsetenge. Nun kaele, pumun taru ton, Israel yala nesala lyemna tep, Mesir mutu neitamai kurami nesala weik pomudi, Israel nesala katuai mutu duyakaramu taruda, yuk yala nesala yuma ton wenepyakaramu Allahda, nundi men bisiptepe. Tonda, sun nai bo Allahdi, Mesir mutu kurami nesala tep, kange mun keca yala-yala yuma kareramu ngeda, nun ton gekeramupke.

9 Atep nengeda, tek sisi bamur kupmasere. Atep, uo, nun Filistin nesala yumada, dipru puto kepra kunkupe. Puto di nimi porbaramengtopu kupra kunkurume. Sun yumadi ange utopu men kupmumnyopda Ibrani nesaladi popbisipsengepa, nun yuma sun pel melimna nesala utopu kupra kunkamepe. Ada, ‘Pumun taru sun Ibrani nesala yuma nun amutara kuramitopu, sundi popbisipsengopda, nun peda utopu kupnup’ tenen, pepsepe. Ange tep ngeda sun peda nimi cadi, mar podan taruda puto kepra ketenepkurume,” sun Filistin deiyo nengdi, sun amutara jen talen neng tep pepi.

10 “Ukupkamepe,” pepipa sun yuma ketenepidi, Filistin neng cap, Israel neng cap, mar podanmaiyanen, Filistin nengdi Israel nesala yuma popbisipi. Sun Israel neng jen talen neng dengeda, pio weik, tiga puluh ribu (30.000) neng poptapi. Ukupra popidi, tupa tapi nesala yumada tamupra sun pe opkal bol di keana dodin tenda ati yuk-yuk kuramitopu sepdara yandopi. 11 Israel jen talen neng yuma sun ati tamupra badoidi, Allah Yahweh er pediramu upu dongopi co bekin, er sida Peti Perjanjian tapipa, Filistin nengdi dalupra dopropi. Ataruda, Eli er nyapu butene Hofni cap, Pinehas capda popi.

Eli depu upu

12 Ange ukupi taruda, nimi Benyamin yala ngebo tenpu sepdara Silo mutu beu. Atumi dipapu Silo mutu sepdaro beu dingeda, er kenekamu opkal yuma kwiripra gweltapudi tapu. Tonda, er giso deikida tu di likmautopu beu. Ada, ‘Sun Silo mutu kunge nesaladi, ‘E, ada ila mambul kange doupmardi kupmara,’ tenepkamnenge’ tenen, er opkal kwiriptapra giso deikida tu likmautopu beu.

13 Angebo Eli bukmau bungna keca deiki bisi piripai yana bukmaudi, ketenepra dinmau. Tonda, ‘Uo, Allah er pediramu upu dongopmepu bekin, Peti Perjanjianda, Filistin nengdi dalupra dopropmang do?’ tenen, kware kupupa tenimtonapu kunmau. Silo mutu lap perbeu ngebo ukunmauanen, amutu kurami nesala yuma tep lap pepmaupa, amutu kurami Israel nesala yuma ila di engenmaidi mali penmai.

14 Amutu nesala yumadi mali pepra engenmaipa, Eli gekepudi asipetepu. “Amutu nesalada warya tep ila di mali pepra engenmang do?” pepra asipeptepu. Upepupa atumi di Silo mutu yanmau ngebodi, Eli er damai yaudi amambul upu yana lap pepu. 15 Elida konum wisi deiamudi kuramu keteng tamun denge pio weik 98 tahun kuramnga cadi, er asuru peda konum pupbaramu. Er asuru ukupra pupbaramu taru yumada, erdi pio moupra men diramu. 16 Ayanmau ngebo Eli tep pepu. “Neda mar podamangua kan-kan di atumipu sepdara yakanmananen, ayandi pepne,” pepu. Upepupa Elidi tamupra pepu, “Ne mio, kan tep asipetepkune. Israel jen talen neng cap, ne nyapu cap yumada ware kupmaneng do?” pepu.

17 Elidi upepra asipupa, aupu doupra yanmau ngebodi pepu. “Uo, Israel nesala yumada, kware kupmaupa, Filistin nesala sun damaipu sepdara bendopmange. Ukupmangpa, sun Filistin nengdi Israel nesala weika di popra gawal dakmanto kupmasenga tep, ila kange mun kupmasere. Ada nimi pio weika di popmasenga kan-kan di ne nai bo kan nyapu butene Hofni cap, Pinehas cap, popmangdi, Allah er pediramu upu dongopmepu co bekin, er sida Peti Perjanjian dalupra dopropmange,” aupu doupra yanmau ngebodi Eli tep aupu lap pepu.

18 Tonda, aupu doupra yanmau ngebodi, “Allah er pediramu upu dongopmepu co bekin, er sida Peti Perjanjian konum dalupra dopropmange,” pepu taru dipapu Eli er bungna keca deiki bukmau buplan dam tara gangaksaka dourbeudi, er kum yoda dakroupa depu. Angeda, Eli erda wisi deipudi galemna weik kwamnga cadi, saka dourbeuopda er kum yoda adipapu dakroupa depu. Eli erdi Israel nesala sun ila deiyo ngebo kepra upu bongdiramu keteng tamun denge pio weik 40 deiki di taleamudi upu bongdiramu dinino, atumi di depu.

Pinehas er domu ner solu depu upu

19 Ataruda, Eli er mi Pinehas popmaiya tep, er domu nerda solu ner kepu. Ataru neitamaida, mundu konum douamu. Mundu douamnganen, mi deipmanto taru damai konum kupmaua tep, atumi dipu abamur upu gekepudi ikin kange doupu. Ada, aupu peryanmau ngebodi, “Allah er pediramu upu dongopmepu co bekin, er sida Peti Perjanjian konum dalupra dopropmange,” pepu. Aupu pepunge cap, tonda “Kan yamal bo cap, kan nenge cap, depmarenge,” pepupa gekepu. Aupu gekepka tep, ikin kange doupu. Atarupu dato-dato di mi deiyo jenmaudi pu weik jenmaudi depmanto kunmau.

20 Mi deiyo donmauanen, konum depmanto kupbau taruda, er melimna tep meneng damai awekmaidi dinmai nerapudi upepi. “Ka nero, kan kware dangna pio gume. Kan mida sal deipkamareme,” pepi. Upepi dinino, aner er kange pio gum kupka tep, er kange tenena cap, upu tamupra pena cap ton men kupu.

21 – 22 ‘Ami deipkun’ tenen, konum keteneipu taruda, er nindi ami er si tep Ikabod pepu. Ibrani upu deiki di Ikabod ^{▼▼Ikabod – Ibrani upu deiki di Ikabod si peramya deiyoda, ada ‘Ila mambul keca gum kupsere,’ tenena tep perami.} peramya deiyoda, ‘Nun Israel nesala neitamai Allah puto meliamseua deiki di kareamseu mambul kecada, sun Filistin nesaladi dalupra dopropmasenga tep, Allah er peda, tapra bendopkasere,’ tenen, ami er si tep Ikabod pepu. Ada tali tep men pepu dinino ada, ‘Allah er pediramu upu dongopmepu bekin konum dalupra dopropmange,’ pepmaunge cap, ne nenge cap, ne yamal bo cap depmarunga tep, er deipkamau mi er si tep Ikabod pepu. Ange tep nengeda, anerdi pepu. “Uo, sun Filistin nesaladi Allah er pediramu upu dongopmepu co bekin, er sida Peti Perjanjian dalupra dopropmasenga tep, Allah er peda, tapra bendopkasere. Atep nengeda, nunda mesumpu kunkamepe,” pepu.