1Sa 5 | XteSC | STEP | Filistin nengdi Allah er pediramu upu dongopi co bekin, er sida Peti Perjanjianda, Eben-Haeser mutu di dalupra dopropidi, sun pe mutu sisa Asdod mutu bena deipi.

1 Samuel 5

Allah er pediramu upu dongopi bekinda, Filistin nesala, sun kurami mutu neitamaipu tupa kwamunge tep, pepu upu

1 Filistin nengdi Allah er pediramu upu dongopi co bekin, er sida Peti Perjanjianda, Eben-Haeser mutu di dalupra dopropidi, sun pe mutu sisa Asdod mutu bena deipi. 2 Sun Filistin nengdi abekin dopropidi sun si eremami isok si eremna tep derirbei. Sun si eremami isok er sida Dagon perami ati derirbei. Aisok si eremna tep petupra deiami keca damaida, Allah er pediramu upu dongopi bekin, Peti Perjanjian deipi.

3 Deipidi, mapmaiya bereku pangeda, sun Asdod mutu nesaladi, Allah er pediramu upu dongopi bekin akati pumbon deipmapaipu bena dipetepi. Dipetepipa, isok si eremami keca, er si Dagon perami ngeda, yana dinmaipa, Allah Yahweh er pediramu upu dongopi bekin, Peti Perjanjian damai, aca daksaka dourbenmaudi, er asoda, ason deiki lung-lungupra dourbenmau. Ange epidi apetupra deiami keca, sun isok si eremna keca, er si Dagon dopra, ka di tamupra men di deiamyaipu derirbei.

4 Men di deiamyaipu deribenmai dinin, kange di mapmaiya berekupa, yana dinmaipa, atali keca tep, ‘Nun nai bo,’ pepra si eremami keca Dagonda, kange di ton cap, Allah er pediramu upu dongopi bekin, Peti Perjanjian damai daksaka dourbenmaudi, er asoda, ason deiki lung-lungupra dourbenmau. Ataruda apatung gambarda, abekin damai saka dourbenmaudi, er buru dana-dana butene cap, er giso cap, copra yuk-yuk dourbenmau. Dinino, aDagon patungda, er nong ton pio men olokmau.

5 Ukupmaua tep, sun Dagon tep si eremami imam-imam neng cap, nimi yuma cap, ‘Akeca si erepkup’ tenen, Asdod mutu kurami nesala akeca saka dourbenmau buplan damaida men yanipra barami. Akuramitopu ukutaru tupa Asdod mutu banung nesala peda abuplan damai men yanipra banunge.

6 Tonda Allah Yahweh er ila puto deiki di Asdod mutu kurami nesala cap, amutu dana-dana neitamai kurami nesala yuma cap tep, sun wenemna tep, ila kange mun keca sun nong deiki deriramu. Ada ila kange mun suse, er sida tumor, sun nong deiki deipupa jeramu. Tonda, kupe weika di kareramupa, akupe embaramya deiki di, ila pu ton jeramupa, amutu-amutu neitamai nesala weik derami.

7 Sun Asdod mutu nesala ila kange mun suse sun nong deiki karepupa jeramunge cap, kupe embaramya deiki di pu jeramunge cap, abutene keca kuramnga deiki di, sun Asdod mutu neitamai kurami nesala yumadi moupra dirami uperami. “Uo, Israel nesaladi si eremnung Allahdi, sun tep er pedina upu kareamupa, abekin, Peti Perjanjian pumbon dongopi ngeda, nun damai pio men tapkamepe,” perami. “Tonda aperamu upu deiyo ngeboda er buru puto deiki di ila kange mun keca weik kuserure. Nundi si eremnup isok, er si Dagon peda, er tep ila ikin keca derirure,” perami.

8 Ange tep nengeda, sun amutu kurami deiyo neng yumadi Filistin mutu dana-dana tara yuma, sun ila nimi deiyo kepra taleami neng, sun Raja pamu bari neng tep kongpepipa, bulupra yai. Sun Filistin mutu neitamai pamu bari nimi deiyo Raja neng yuma tep anesaladi asipetepi. Asipetepi upuda ake. “Israel nesaladi si eremnung Allahdi peamu pedina upu dongopi bekin, Peti Perjanjian tep, nundi ware kupkamep do?” pepra asipetepi.

Asipetepipa sun pamu bari nimi deiyo Raja nengdi pepi. “Israel nesala sun nai bo Allahdi pediramupa, aupu dopra abekin pumbon dongopi ngeda, nun isok si eremna ati neitamai di doprapmumdi gopra, Gad mutu derirbenkurume. Ada, Filistin mutupu dinin, yuk karen mutu ton er sida Gad mutu gopra derirbenkurume,” pepi.

9 Upepipa Allah er pediramu upu dongopi Peti Perjanjian, amutu di konum doupra, Gad mutu deribei taru peda, Allah Yahwehdi amutu neitamai kurami nesala yuma tep, ila kange mun pu karepu. Ada, ila di nepredi gat weik kuramre nena, er sida tumor karepu. Aneramu tumorda, nimi gemdam cap, nerapu gemdam cap neramu. Tonda, ada wisi nesala pe, yambul nyapu pe yuma tep karepupa neramu. Tonda, Allahdi amutu kurami nesala wenemna tep, ila mutu longna karepu. Ila kange mun keca ukupra karepupa, amutu neitamai kurami nesalada yuma kange mun weik kupu.

10 Ange konum ukupu pangeda, Gad mutu kurami nesaladi mambul kange douramidi, Allah er pediramu upu dongopi co bekin, er sida Peti Perjanjian doupra, Filistin mutupu dinin, yuk karen mutu ton er si Ekron mutu derirbei. Allah er pediramu upu dongopi bekin, Peti Perjanjian, Ekron mutu derirbei taruda, amutu ati damai wengbenkoi atep, sun Ekron mutu kurami nesala yuma, ila upu di mali pepra ngolongamidi, perami upuda ake. “Uo, Allahdi sun Israel nesala tep pedina upu kareamupa, aPeti Perjanjian pumbon dongopi ngeda, nun damai duyanmaserumada, warya tep do? Nun amutu neitamai kunup nesala yuma popkamasenga tep, akecada nun damai benemyakanmaserum do?” pepi.

11 Ange tep nengeda, Ekron mutu kurami nesala yumadi, Filistin mutu talepra kurami ila nimi deiyo neng yuma tep kongpepipa, bulupra yai. Yai pangeda, anesala yumadi pepi. “Israel nesala talepra kurur Allah er pedina upu dongopi bekinda, kange di tamupra douprapmumdi er pe men di doupra yana deiamyaipu, bena deipkurume. Ange men kupmumnyopda, nun amutu kunup nesala yuma, wisi nesala cap, nyapu cap yuma, ‘Aco bekin, er sida Peti Perjanjian, nun damai tupa akapkamra deiki di, popserur’ tenen, pepmepe. Dinin, akeca dopra, menop taru Israel nesaladi deiamyaipu bena deipmumnyopda, akeca di nun men popkamsere,” pepi.

Angeda tali tep men pepi. Ada, ataru peda sun amutu nesala wenemna tep, Allahdi ila kange mun keca sun nong deiki kareamupa, kange mun kange doupra weika di mali perami. Tonda, amutu kurami nesala yumadi, ‘Uo, ware kuptepe do?’ tenen, kware pio weik kuramupa, kwepdanen embanapu kurami. Ada Allahdi sun amutu kurami nesala yuma, sun nong deiki ila kange mun keca deriramnga cadi, kware weik kuramu.

12 Ikin keca sun nong deiki deriramupa nesala gung weik tarada, derami dinin, gung yambula di ton tupa gam kurami. Anesala yuma men depi dinin, sun nong deiki yuma ila di nepredi gat weik kuramre nena, er sida tumor kareramupa, anesala nong deiki jeramu. Aneramu tumorda, nimi gemdam cap, nerapu gemdam cap neramu. Ukuramupa, sun amutu kurami nesaladi, “Uo, nun naio nun yana melipseo,” pepra, ila upu di ngolongamidi, mali pepra mororami.