1Sa 6 | XteSC | STEP | Allah Yahwehdi pepra deiamudi, sekrapudi Israel nesala tep karepu mem upuda, sundi ange dopra deiami peti co pumbon er sida, Pedina Upu Peti, (Peti Perjanjian) pumbon dongopi ngeda, sun Filistin yala nesala kurami mutu neitamai apeti dopra, deiamipa, dakuramu taru dengeda, ware yoneitam bari (7) deiki di amutu akuramu.

1 Samuel 6

Allahdi pepu mem upu sekra karepu ngeda, peti co bekin pumbon dongopi ngeda, Filistin nengdi, Israel yala nesala tep, tamupra karepi upu

1 Allah Yahwehdi pepra deiamudi, sekrapudi Israel nesala tep karepu mem upuda, sundi ange dopra deiami peti co pumbon er sida, Pedina Upu Peti, (Peti Perjanjian) pumbon dongopi ngeda, sun Filistin yala nesala kurami mutu neitamai apeti dopra, deiamipa, dakuramu taru dengeda, ware yoneitam bari (7) deiki di amutu akuramu. 2 Ukuami taruda, sun Filistin nengdi, sun mutu neitamai kurami imam yala neng tep kong pepi. Tonda, amenda kupkamu keca kael keami neng, asuru kwa neng cap tep, kong pepidi asipetepi. Ada, “Israel nesala sun nai bo Allah Yahwehdi, mem upu pepra deipupa sekrapudi, co bekin, er sida Peti Perjanjian pumbon deipi ngeda, nun mutu neitamai akapmar dinin, ukutaru ware kupkamep do? Nun adipapu tamupra sun Israel nesaladi men di deiamiyaipu, dubepedi dokotepkamap do? Tonda, wareto keca deiki deipmepepa, peti co dubenkamep do? Tonda, apeti tali dempu dokotepkamep do? Gum dingeda, ware keca cap tapakra apeti cap deipmepedi, akeca tamupra dokoteptepe do?” pepra asipetepi.

3 Asipetepi pangeda, sun amutu neitamai kurami imam-imam neng cap, amenda kupkamre keca kael kepmanto neng, asuru kwa neng cap yumadi, tamupra pepi.

“Allahdi mem pepra deiamudi upu sekupa, sun Israel nengdi ange dopra, co bekin er sida Peti Perjanjian pumbon dongopi ngeda, ‘Sun Israel yala nesala kunge mutu dubena, aco bekin pumbon deipi keca tali dempu tamupra dubepedi, ormutupu dadeipkupe,’ tenena pio meme. Ange gum dinino, sun cap kikiman wisipra mali kumum keca yo pununa cap, kunumna cap, gum kupra derina cap tep nengeda, apeti cap, Allah er karena tep, yuk kunumna telep keca cap dubena karenkamrume. Ange konum ukuprumu pangeda, Israel nesala, sun nai bo Allahdi, nun Filistin neng tep, mali kupmepunge kaukepseredi, nun amutu kunup nesala kwetepra, telep kupra derinkamsere. Tonda, sun kael kepkamrume. Ada, Israel nesaladi si eremnung Allahda, erdi tupa-tupa pio ikin keca, nun deiki deriserurada, ‘Deiyo ake’ tenen, kael kepkamrume,” pepra, sun imam-imam nengdi pepi.

4 Upepipa, sun Filistin deiyo nengdi, ka tamupra, “Nun mali kunup keca daepra telep kudina tep, nundi Allah er tep, wareto telep keca kareptepe do?” pepra, sun Filistin deiyo nengdi asipetepi. Upepipa, sun imam-imam yala nengdi tamupra pepi, “Nun cap, nun pamubari ila nimi deiyo neng cap, ila kange mun suse jeramseutopu, ange urasin utopu kupra, kunumna weik keca emas di petupra deipkamrume. Ukuprumudi, pamubari ila toro utopu suse, ila di neramrenge cap, tonda kupe urasin utopu kupra pamubari cap, gat keca emas di, petupra deipkurume. Deiyoda, sun nimi deiyo-deiyo neng yuma cap, sun tali Filistin mutu neitamai dakurumu nesala cap, sun deiki akeca weike akwamnga cadi, akeca urasin utopu petupra dubenkamrume. Allahdi ikin keca sun nong deiki deipu ngeda, suse ila di neramudi, buka jeramunge cap, kupe weik ton cap kareamu. Atep, gat keca emas di, akeca urasin utopu kupra, petupra deiprumudi, Allah er namna tep dubena karepkamrume,” pepi.

5 Atep, sun Filistin nengda, susi ila di neramudi, buka jeramu suse cap, tonda, kupedi sun mutu neitamai kouramum keca weika di jeramungeda, akupe cap, asusu cap urasin utopu kupra, gat keca emas deiki di petupra deiprumudi ketenepkamrume. Sun yuma cap, sun ila deiyo neng capda, akeca weik kwamupa mambul kange doupra ikin kuramruma cadi, akeca dopra, Allah tep karenkamrume. Ukupmumpa, Israel nesaladi si eremnung Allah tep, ‘Er si eremkamnup’ tenen, er si ereprumudi, er damai bena gisal donkamrume. Ukuprumu pangeda, erdi sun wenemna tep, ikin keca weik kareserur kecada, ‘Kange di tamupra dopropredi, akeca gum kupra deipkamre do, gum do?’ tenen, dinapu kunkamepe. Ada, sun pe nong cap, sundi talepra kurum mutu cap, sundi si eremrum keca cap tep, ‘Wenemna kemna kecada, gum kupra deipredi, yamdongonkamre do, gum do?’ tenen, dinapu kunkamepe.

6 Tonda tenipetepso. Sundi apepmasepnge ton men kupmumdi, kika deiprumyopda, men taru Mesir taleamu ngebo Firaun cap, er taleamu nesala yuma capda, sundi Allah er upu gekena gum dipapu, kika deipipa, sun damai wareto kuamu do? Allahdi ila kange mun keca dopra, sun nong deiki deiamutopu, sun Filistin mutu kurum nesala peda, utopu kupkamser do? Angeda lumdongona yapkurume. Allahdi sun Mesir mutu nesala cap, sun ila nimi deiyo ngebo Firaun cap tep, ila di wenepupa, weika di depi. Ton ngeda, ikin keca weik, sun nong deiki deipupa, sundi ila kange mun kange doupra kuramidi, ailye weik kurami. Ukuramipanen, amenda taruda, Mesir mutu sun deiyo nengdi, Israel nesala yuma tapropipa, adipapu bendopi. Ange yumada, sun Filistin nesala ton men kael keprum do?

7 Ange tep nengeda, sapi bisam deiki di deipra, bukmengedi tapu gipropmengepa, tu deiki bukra ban keca ukupunge ton keteneipkurume. Tonda, ner sapi bisam butene ton ketenepra deipkurume. Ada, aner sapidi, sun nyapu moum tupa jenmarengepu keteneipkurume. Tonda, asapi bisam buteneda, tu deiki embana tep, kereta gipra dubana tep, sun kum deiki derinup gat coda, asapi bisam kum deiki pio men deriramingepu, wepra deipkurume. Ukuprumudi, aner sapi bisam buteneda, atu deiki embana keca, tapu di gerekurume. Asapi bisam butenedi deiamrei sapi bisam nyapuda, dopra yuk karenaipu dubena deipkurume.

8 Ukuprumu dingeda, Allah Yahwehdi, “Angeda kunkamrume, angeda pio men kunkamrume,” pepra deipudi, sekeiamupa, sun Israel imam nengdi aupu doupra, co bekin, er sida Pedina Upu Bekin (Peti Perjanjian) pumbon deiaminge, apeti dopra, asapi gipropnepa, tu deiki bana tep, kereta deiki di deipkurume. Tonda, apeti damai dana-dana tarada, Allah er karena tep, kunumna weik keca, emas deiki di kobe cap, susi cap urasin utopunge petupra deipmarumu keca ton, akereta deiki deipkurume. Angeda, ‘Nun mali kupmepu kecada, daemna cap, yo pununa cap tep, kaukepsetue’ tenen, keteneipkamrumnge tep pepmepe. Ange yuma dopra, kereta deiki deiprumupa, aner sapi bisam butenedi, akereta gipra dubenkamrenge. Sun pe yuk, ortara Israel nesala kunge mutu neitamai gipra dubankamrenge.

9 Ukuprumupa, sapi bisam butenedi, doupra barenge taruda, sunda dinapu kunkamarume. Allahdi pepra deiamu upu Pedina Upu Bekin co (Peti Perjanjian) pumbon kipra deipinge doupra bamarengane, ngedi ton tamupra yakana gum di, tupa bisi yopu banmarenganen, Israel yala nesala sun pe tara dinin, mutu si Bet-Semes mutu ati arum dopra, kungeyaipu berengopda, adeiki di konum kael kepkurume. Ada, ‘Israel nesala sun nai bo Allahdi, nun damai ila kange mun keca deiamseupa, pu jeserepa konum deramepu’ tenen, kael kepkamarume. Dinino, Allah upu peiamupa, kipra deipi Pedina Upu Co Bekin (Peti Perjanjian) pum cap, emas di suse cap, kobe cap urasin utopu keca petupra deipmamumnge, asapi bisamdi kipra banmarengeda, sapi bisamda, Bet-Semes tara bisi men berengedi, tamupra nun pe mutupu tamupra aceipu yarengopda, ‘Uo, nun deiki ikin keca yaupa doropmepu ngeda, Israel nesala sun nai Bo Allah, er di men deipseue. Nun mali kupmupka deiki dipu akeca yaupa, ikin keipseue’ tenen, kael kepkamarume.

10 Sun amutu imam-iman neng cap, asuru kwa neng capdi, upepra lap pepi pangeda, sun Filistin nesaladi apepitopu kupi. Ada, sun Filistin nengdi, ange yuma konum kupi dingeda, asapi bisam butene, sun nyapu moum karenmareiya dopropidi, asapi bisam butene, tapu di gerekdongopra, doupra tu deiki embana tep, kereta gipra berei. Ukupipa, sun nyapu moum dinimareiya doupra, yukai dinin, sun beilya wipra ongopdongomi ati pumbon deipi. 11 Ukupyopda, Filistin neng Allahdi, “Angeda kunkamrume, angeda pio men kunkamrume. Angeda meme,” pepra deipudi, gel deiki sekra karepupa, sun Israel nengdi, ange dopra, co bekin, er sida Peti Perjanjian pum dongopi keca cap, gat keca emas di petupra, kupe urasin utopu ketekepra deiami keca cap, tonda ila neramu suse buka jeramunge urasin utopu kupra deriraminge yumada, co pumbon dongopidi, akereta bali deiki di deipidi, asapi bisam butene tapi. Tapipa, aner sapi bisam butenedi, tu deiki embana tep dopi kereta gipra duberei.

12 Asapi bisam buteneda, akereta gipra bereidi, yuk bisi bana gum dipapu, Bes-Semes mutu tara bana tep, bisi yop deiki kwiryepu berei. Asapi bisam buteneda, bisi banmareidi, upu pepmanmarei deiki dipapu, banapu kunmarei. Ada, pio ila bisi yopu banmarei taruda, tebalal tara orkepropna, dumsisi tara akepropna, ton men kepbanmarei. Sun Filistin mutu nimi deiyo neng pamubari neng peda, akereta amenda tara melipra dombanmaianen, sun tara mutu cap, Bet-Semes mutu cap wilimdormyai aceipu bei.

13 Ataruda, Bet-Semes mutu neitamai kurami nesala, gandum wa peami ngeda, konum wisiamupa, amutu banai yumada, yupra kinmai. Ukunmai taruda, Allahdi, “Angeda kunkamrume, angeda pio men kunkamrume, ada pio meme,” pepra deiamudi, gel pala deiki sekra karepupa, sun Israel nengdi ange dopra, Peti Perjanjian pum dongopipa, sapi bisam butenedi gipra akereta duyakanmareipa, sun gandum kinmai neng epidi, amutu nesala yuma ila kange deipi. 14 Ange doupra yakanmau sapidi buyanmarei keretada, Bet-Semes mutu ngebo Yosuadi peamu wa damaida, ila gel ton abukamu cadi, aceipu yana dim pepra teku. Akereta aceipu dim pepra yana teku pangeda, amutu neitamai kurami neng yumadi, akereta deiki deipra, domi co yuma bong-bongopra depidi, asapi bisam butene peda, popra sekidi, Allah Yahweh er gispal dona tep, akeca yuma dopra uku dongopi. ^{▼▼uku dongopi – Asapi popra, ‘Allah karepkup’ tenen, uku dongona tep keteneipi keca gambar dina tep, Ulangan 12:6 dinkurume.}

15 Ukupi dingeda, sun Lewi yala nengda, Allah Yahwehdi pepra deiamunge dopra, co bekin, er sida Peti Perjanjian pumbon dongopi keca cap, tonda gat keca emas di, petupra kiaminge, kobe cap, ila toro cap, urasin utopu keca petupra deipinge yala-yala yuma cap, aco lase pum deipmai ngeda, kereta deiki dopra katuai deipi. Deipyopda, adipapu ila gel awai damai bukamnga deiki bena deipi. Ange konum kupyopda, Bet-Semes mutu neitamai kurami nengdi, Allah Yahweh er gispal dona tep, gam keca popra uku dongopyakanmai. Tonda, Allah er si eremna tep, yuk-yuk telep keca yala-yala yuma cap doupra, yana karenmaidi, Allah tep gispal dorami. 16 Ataruda, sun Filistin mutu di yakanmai neng, sun pamubari nimi deiyo nengdi, ange yuma konum epi dingeda, Bet-Semes mutu tapra, sun atumi dipapu sun pe mutu, Ekron mutupu tamupra bei.

17 Ange konum kupya deiki di, sun Filistin nengdi mali kuramya tep nengeda, Allah Yahweh erdi pamubari mutu neitamai kuramidi, sun pamubari nimi deiyo neng, Raja Filistin mutu kurami neng yuma, sun wenemna tep, ila kange mun susi karepunge cap, kope weik karepunge cap, ‘Gum kupra deipkamser’ tenen, Allah tep karepi. Ada, sun mali kuraminge cap, peraminge capda, ‘Allah tupa men wenepseredi, ange yuma gum kupra deipserepa, ka di tamupra teleppu kutepe,’ tenena tep, Allah tep karepi.

Animi deiyo neng kuramitopu, emas di petupra deipi susi urasin utopu petupra deipi ngeda, ake. Sun pamubari mutu-mutu yuma akuamutopu, emas keca petupra karepi. Amutu sida, Asdad mutu cap, Gaza mutu cap, Askelon mutu cap, Gat mutu cap, tonda Ekron mutu cap, sun mali kuraminge kunumna cap, pununa cap tep, emas keca karepi.

18 Ange utopu, sun Filistin nimi deiyo neng pamubari kuramitopu, emas di petupra deipi kobe urasin utopu petupra deipi ngeda, amutu-amutu kuamutopu, kobe urasin utopu keca peda, pamubari karepi. Amutu neitamai dinin, sun pamubari ila deiyo nengdi, ila ati arum dominge taleamitopu, akeca peda pamubari karepi.

Ada, gat gel tembok di ongopgenep dongopra, beilya wiami mutu cap, tonda yambul-yambul mutuda, gel beilya tembok deipra men dominge cap, amutu-amutu yuma tep nengeda, ila susi urasin utopunge cap, kobe urasin utopunge cap, gat keca emas deiki di petupra deipinge karepi.

Uda, apel dominge tep, ‘Tupa ange tenenkamep’ tenen, peten kemna tep nengeda, Yosua er wai dam neitamai ila mutu yungne gel tupa akurure. Agel damaida, sun Lewi yala neng Allah Yahwehdi, “Angeda kunkamrume, angeda kuna pio meme,” pepra deiamudi, sekra karepupa, sun Israel nengdi Peti Perjanjian ^{▼▼Peti Perjanjian – Peti Perjanjian kael kemna tep, Keluaran 25:11 dinkurume.} co lase pumbon deiaminge, aceipu bena deipi. Apel dopinge peten kemna tep, ataru neitamai di dipra, ukutaru pape, agelda tupa Bet-Semes mutu ngebo, Yosuadi peamu wai dam akupketopu, tupa akurure.

19 Dinino, atumida, sun Bet-Semes mutu neng neitamai di, ton neng dingeda, Allah Yahwehdi, “Angeda kunkamrume, angeda kuna pio meme,” pepra deiamudi sekra karepupa, sun Israel nengdi Pedina Upu Peti co lase, er si Peti Perjanjian pumbon deiaminge, neitamaipu bena dinmai. Akupi ngeda, pio men kupmanto keca, pio mem keca cadi, sunda apeti pumbon dipetepi taruda, Allah Yahweh yu kupupa, erdi sun wenemna tep, sun cap, sun kayapu neng cap, dengeda tujuh puluh neng (70) popra, gawal daku.

Allah Yahwehdi, ila kange mun keca dopra, sun deiki deipupa, akupunge tep nengeda, amutu neitamai kurami neng yumadi, ‘Uo’ tenen, ila di engenmaidi, mambul kange doupra kunmai.

Allahdi Pedina Upu peamudi, sekra karepupa, Israel nengdi, co bekin er si Peti Perjanjian pum dongopinge dopra, Kiryat-Yearim mutu deiamya tep, pepu upu

20 Ukupi dingeda, sun Bet-Semes mutu neitamai kurami neng yumadi pepi, “Uo, ware ngebodi, ‘Neda telep ngebo kunune’ tenen, Allah Yahweh er damai keana tep dabena tektu do? Gume, Allah Yahweh erda, pio telep kurure. Erda pio lengnapu ngebo kurure. ‘Apeti co pumda, nun mutu neitamai tupa akapyopda, Allahdi popserur’ tenen, kware kunmapa cadi, nun adipapu ware mutu doupra betepe do? Ukupra nun Bet-Semes mutu neng damai di, aPedina Upu kina tep co bekin, er sida, Peti Perjanjian doupra, dan mutu ton bena deiptepe do?” pepi. 21 Upepi dingeda, adipapu sun Bet-Semes mutu neitamai kurami nesaladi, yuk mutu neng tep, ada Kirya-Yearim mutu neitamai kurami neng tep, upu dokotepi. Upu dokotepkuya tep, sundi wepra deipi nengdi perbei upuda ake, “Sun Filistin nengda, Allah Yahwehdi peiamu upu sekra karepupa, Israel nengdi ange doupra, Peti Perjanjian co bekin pum deipinge, konum kange di tamupra deipmange. Atep nengeda, acei yamum dingeda, aco lase petida, sun Kiryat-Yearim mutu nengdi, aca yana, ange doproprumudi, sun kumum mutupu tamupra doupra bankamrume,” pepi.