1Sa 7 | XteSC | STEP | Pumun taru, Allahdi pediramu upu sekra karepupa, Israel nengdi, co bekin, er sida Peti Perjanjian pumbon deipi ngeda, sun Filistin mutu nengdi, akeca dalupra dopropi dinin, Allahdi sun nong deiki kange mun keca weik kareramu pangeda, Israel nesala tep ka tamupra duyana karepi. Ukupipa, sun Kiriat-Yearim mutu nengdi yana abekin doprapidi, tenpu ngebo er si Abinadab, er ati pumbon dongopi. Abinadab, er atida mutu buma deiki domupa kwamu. Allah er si Yahwehdi peramu upu deipi bekinda, Abinadab ati pum deipi dingeda, er mi Eleasar tep, ‘Abekin moupra kalengkamre’ tenen, wepra deipi. Ada, sundi, Allah dinmauai di Eleasar wepra deipi.

1 Samuel 7

Samueldi Israel nesala tep, pepu upu

1 Pumun taru, Allahdi pediramu upu sekra karepupa, Israel nengdi, co bekin, er sida Peti Perjanjian pumbon deipi ngeda, sun Filistin mutu nengdi, akeca dalupra dopropi dinin, Allahdi sun nong deiki kange mun keca weik kareramu pangeda, Israel nesala tep ka tamupra duyana karepi. Ukupipa, sun Kiriat-Yearim mutu nengdi yana abekin doprapidi, tenpu ngebo er si Abinadab, er ati pumbon dongopi. Abinadab, er atida mutu buma deiki domupa kwamu. Allah er si Yahwehdi peramu upu deipi bekinda, Abinadab ati pum deipi dingeda, er mi Eleasar tep, ‘Abekin moupra kalengkamre’ tenen, wepra deipi. Ada, sundi, Allah dinmauai di Eleasar wepra deipi.

2 Allah pediramu upu co bekin pumbon deipi ngeda, mutu si Kiriat-Yearim mutu deiami keteng tamunda, denge weik dua puluh tahun (20) kuramu. Ukuramu taru yumada, Israel nesaladi, mambul kange doupra, Yahweh tep “Melipseo,” pepra mororamidi engerami. 3 Ukuramipane, Samueldi Israel nesala tep pepu. “Uda, sun kange dipru yuma dopra deipmepedi, ‘Allah er si Yahweh damaipu tamupra yankupe,’ tenepmum dingeda, sun adipapu ukupkurume. Ada, yuk mutu yala nengdi si eremenge isok, sun peda aisok si eremum ngeda tapkurume.

Tonda, angetopu, isok si Asytoret, er urasin utopu keca petupra deipi ngeda tapra, er si ton men eremkamrume. Ange yuma tapra, sun dipru, nonge, kange yuma Allah er si Yahweh tep karepmumdi, Yahweh tepapu er si eremkamrume. Er amutara bukra, er pelpu donkamrume. Ukuprumu pangeda, Filistin nengdi, sun talepseipa, ikin kange doupra kurumu ngeda, Allahdi lyepropkamsere,” pepu.

4 Upepka tep, Israel nesala yumadi, sun Bahal ^{▼▼Bahal sekmepu ngeda, yuk Alkitab neitamai ‘Baal’ sengnunge. Bahal sekmupkada, ‘Baal pepetepmengepa, aupu penada ikin kuprur’ tenen, Bahal sekmupke. Si yuk sekmepu dinino, aisokda, tenpua.} isok si eremaminge cap, isok ner Asytoret, er si eremaminge cap, akeca yuma tapidi, Yahweh er sipu eremamidi, er amutara bukra kurami. 5 Konum kupi taruda, Samueldi Israel nesala yuma tep pepu. “Sun yuma mutu si Mispa mutu yana bulupra wekamrume. Yamum pangeda, ‘Allah er si Yahwehdi melipra lyepkamser’ tenen, nedi Allah moropkamsene,” pepu.

6 Israel nesala yuma, Mispa mutu bulupra weki taruda, me gwepra keteneipi dingeda, Allah er si Yahweh, er gispal dona tep, tuai diktapi. Tonda atumida, jen jena gum di, bulungnapu kunmaidi, ‘Allah kaukepkamser’ tenen, sun mali kuraminge tep, “Gume, nundi nun nai Allah, er si Yahweh yaniptapra, tek sisa pio mali kuramepu ngeda, ange ton, ange ton,” pepra katuai lap pepidi ange yuma tapi. Israel nesala yumadi, Allah tep si eremaidi penmai taruda, Samueldi sun upu bongdina deiyo ngebo kemna tep, gonga kepudi, Allah moropu.

7 Ataruda, yuk nengdi, “Israel nesala yuma Mispa mutupu bulupra wekmange,” pepipa, Filistin nesala taleamya deiyo neng gekepi dingeda, gonga kepipa, sun nyapu jen nengdi, Israel neng cap podana tep, “Mispa mutu benkupe,” pepidi ketenepi. Ukupipa, Israel neng ange gekepidi, kwar weik kupu. 8 Atep nengeda, Israel nesaladi Samuel tep pepi. “Kandi nun tep tamna gume. ‘Nun nai Allah er si Yahwehdi lyepkamser’ tenen, moronapu kunkuserume. Ukupmempa, Yahwehdi Filistin neng popbisipsengedi, talesenga deiki di ikin keca weik nun nong deiki derisenunga kan-kan lyepropkamsere,” pepi.

9 Upepipa, Samueldi domba bisam pio meteknge, moum tupa jeramunge ton popra, Allah tep uku dongopra karepu dingeda, ‘Nun nai Allaho, Israel nesala lyepseo,’ pepra, Yahweh tep moropupa, Allah Yahwehdi gekepu.

10 Samueldi Allah karena tep, ametek domba uku dongopmaudi, Allah tep tupa moronmau taru di, Filistin neng, ‘Israel nesala popkup’ tenen, sun damai konum yai. Yanmai dinin, Allah er si Yahwehdi Filistin neng deiki ila kulman karepupa, kulman ponmaupa, ayanmai neng yuma kware weik kupupa, tenimtonapu kupi. Ukupi pangeda, Israel nesaladi Filistin neng popbisipipa, Filistin neng ton bura saka sepdaro bei. 11 Israel jen neng Mispa mutu kunmaiya di, Filistin neng damai sepdaro banmaipane, sun sepdara banmai bisi neitamai yuma, Israel nengdi Filistin neng weika di popbanmaiyane, yuk mutu Bet-Kar mutu damai bena tapi. Filistin neng pio weika di popra gawal daki.

12 Tapipa bei pangeda, Samueldi gel tenpu dopropudi, Mispa mutu cap, Sen mutu cap, amutu bongdona neitamai bena ikra deipudi, agel deipunge tep si pepu. “Agel sida Eben-Haser penkamepe. Deiyoda amutu acada, Yahwehdi melipseua tepa,” pepu. Asi pepu ngeda, sun Ibrani upu deikida, aupu deiyoda, ‘Allahdi makupseuai tep, gel deipmepe,’ penunge. Ange tep, asi pepu. 13 Ange tep nengeda, ataru di dipra, dortaru yumada, Filistin nengdi ton, Israel neng kuramyai kan-kan ton men wengyakarami. Samuel gam kuramu taru yumada, Allah er si Yahwehdi, sun Filistin neng tep, bisi sengdongoramupa, talipu kurami.

14 Tonda, Israel nesala, sun mutu dinin, menop taru sun Filistin nengdi dalupra dopropi mutu, Ekron mutu di dipdongopra, Gad yala neng kurami mutu yumada, Israel nengdi ka di ton dopropidi, amutu neitamai kurami. Tonda, amutu butene damai mutu ton, Filistin neng taleami dinin, Israel nesaladi ka di ton dopropi. Amutu yumada, sun mutu pua. Ataru di gonga kepra, dortaru yumada, Israel neng cap, sun Amori yala neng cap, kange deipdaidi, podana gum di, telep kupra tonpa kurami. 15 Ataru di dipra, Samuel gam kuramu taru yumada, Israel nesala sun upu bongdina deiyo ngebo kuramudi, Israel nesala pio taleamu.

16 Aketeng tamun, aketeng tamun yumada, Gilgal mutu cap, Mispa mutu cap, Betel mutu cap, amutu yuma Samuel dipra embaramudi, sun mali kurami keca yuma tep, upu bokra karepnedi, teleppu kupra deriramu. 17 Yuma embana kuramu dinin, ange konum kupne dingeda, er pe mutu, Rama mutupu tamupra yakaramu. Amutu peda, Samuel dipapu Israel neng sun upu bongdina deiyo ngebo kuramu. Tonda, Allah er si Yahweh, gispal dopra er si eremna tep, Samueldi gel pala dopra, Rama mutu neitamai beudi, gel pala taplakra yakeipudi, yapi keca popra, agel pala deiki uku dongoramudi, Allah tep kareramu.