1 Samuel 8

Israel nesaladi, “Ila nimi deiyo ngebo tenpu Raja karepsemempa, erdi talenkamsere,” pepra moropi upu

1Samuel konum wisi deipu taruda, er nyapudi Israel nesala talena cap, upu bongdina deiyo neng kemna tep, wepra deipudi erepra tekeipu. 2Samuel mi weni ngebo er sida Yoel. Butene deipu mi, er sida Abia. Sun buteneda, Bersyeba mutu talepra upu bongdina deiyo neng kuramrei.

3Dinino, sunda sun nai bo pel telep kupra pel doramudi, dumsisipu kuramutopu men kuramrei. Yuk nengdi, “Mali kupmepe ngeda wenemna gum dipapu, kaukepseremumnyopda, menenga keca karepkusepe,” pepra mororami.

Ukuramipa, Yoel cap, Abia capdi gekeramreidi co bo dororamreiya deiki di, amali kun neng men wenemamrei. Tonda, mok upu pena cap, mawa di inimna upu pena cap, upu gekeramreidi, kunumna keca inipra dororamreidi, Israel nesala tep pukam kupra men taleramrei. Mok kecapu talepra kuramrei.

4Ukuramrei atep nengeda, Israel nesala talepra kuramya deiyo neng yuma yana, Rama mutu bulupra, Samuel kuramngai bei. Amutu yana upu talepi dingeda, upepi. “Naio, Samuel, nun putan keca moropkukepe,” pepi. 5“Nun putapser ngeda ake. Nun nai, kanda konum wisi deipmume. Kandi dumsisi kupra taleamsemuma utopu, kan nyapu men kusererunga tep, kandi yuk ngebo tenpu ton, nun ila nimi deiyo ngebo Raja kemna tep, wepra deipseo. Tenpu ngebo wepra deipsemempa, yuk mutu neng sun ila nimi deiyo neng, Rajadi talepra kurameng utopu kunkamsere. Er amutara bukamepe. Angepu putapsera tep moropkepe,” pepra bena moropi.

6Upepra moropi dinin, Samueldi sun apepinge tep, mali kange doupu. Ada, ‘Telepnge pepmenge,’ men tenepka tep, mambul kange doupudi, ‘Ware kupkaman do?’ tenen, Allah er si Yahweh tep moropu. 7Ukupupa, Yahwehdi Samuel tep pepu. “Israel nengdi pepmakeng upuda, gekepkurume. Tek sisa, sundi ne Allah tep, ‘Nun ila deiyo ngebo er pua,’ men tenenenunga cadi, kan tep men tapunge. Tek sisi ne tepapu tapmanenge,” pepu.

8Upepudi aupu ton pepu. “Angeda, sun Mesir mutu di dopra yanamsipane, sundi ne teppu talepra, ne teppu men si eremamnei dinin, ne tapra tali isok sipu eremamitopu tupa kununge. Atep, sundi ne tamamneitopu, ukutaruda kan tep tapmakenge. 9Ange tep nengeda, sun pepmange ngeda gekepkurume. Dinino, tek sisi kandi tamupra sun tep, ‘Ikin keca yankamsere,’ pepra puto di wenepkurume. Tonda sun deiyo talepkamre ngebodi, amenda taru kunkamre ngepu, lape pepkamrume,” Allahdi pepu.

10Upepupa, Samuel gekepudi, Israel nesala, ‘Nun deiyo ngebo wepkamserume,’ penmai neng, sun damai bena, Yahweh pepmau upu yumada, lap pepra deipu. 11Samueldi pepu upuda ake. “Ortaruda, sun ila nimi deiyo kepra talepkamser ngebodi kupkamser ngeda ake. Sundi deipkamrum nyapuda, ‘Jen talen nengpu kepso,’ pepkamsere. Ukupre dingeda, ton jen nengda, kuda bisam bali deiki bukra emban neng kepkamenge. Ton jen nengda, kuda bisam gipra tu deiki embaramre keca, kereta deiki embankamenge. Ton ngeda, er podan neng porbenkamre taru, sun nyapu mepra bangepa, er amenda benkamre. Sun nyapuda, sun ila nimi deiyo kepkamre ngebo, Raja ngebo, er jen talen neng kupkamenga tep, pepsene,” Samueldi pepu.

12Upepudi aupu ton pepu. “Sun nyapu ton nengda, sun deiyo ngebo, er jen talen neng deiyo neng kepmengedi, yuk tali jen neng denge seribu neng talepkamenge. Ton nengda, denge lima puluh neng talepkamege. Sun nyapu ton nengda, sun deiyo kepra talepkamser ngebo, Rajadi pel pio dimrepa, er wa penkamenge. Ton nengda, er jen keca menmena yongopmenge ngeda, amenda taru er jen keca tep derirbenkamenge.

Ton nengda, er nimi pona tep mar cap, jen cap, tema cap, ya cap ketekemna neng kupkamenge. Ton nengda, er kuda gipra tu deiki embaramre kereta keca tep ketekemna neng cap, betamna neng cap kupkamenge. Sun ila nimi deiyo ngebo, Raja ngebo er amutara bukmengepa, ikin keca sun nong deiki deipkamra tep pepsene.”

13Upepudi, aupu ton pepu. “Uda, sun ner nyapuda, doproprepa, er pel melimna tep, donkamenge. Ada, ton nerapuda, nong bol liknepa, nintong telep peramre me ketekemkamenge. Ton ngeda er jen keca gamkamenge. Ton ngeda er roti dankamenge. 14Angepu gum dinin, sun wa tu cap, tali tu cap ton, aRaja ngebodi dopropkamsere. Ada sun kwaneng wa cap, ara co du wa cap, anggur tapu du wa peramumya weni ngeda, pio telepnge wepra dopropredi, Raja er ati pel don neng tep karenkamre. Raja ngebodi, sun nyapuda, pel dimserepa pel donkamenge pepsene.

15Tonda sun gandum wa cap, anggur tapu du wa cap peramumpane, nong konum kupre pangeda, apepmumnge tep, Raja ngebodi, ton bokra seper sepuluh dalupra dopropkamsere. Er tep karenkamrume. Karepmumpa, aRaja ngebodi er amutara pel dona ila deiyo neng cap, er damai melimna neng cap tep karepkamre. 16Angepu gum dinin, tonda, sun pel melimna neng peda, sun pel melimne nerapu peda, pio telep nengda Rajadi doproprepa, er pelpu donkamenge. Ange utopu, sun sapi bisam do, kambing do, keledai bisam do, pio telepnge peda, aRaja ngebodi doronkamsere.

17Tonda, sun peirum keca yala-yala yuma neitamai, ma yala yuma peiramrumya cap, yuk yala gam keca peiramrumnya cap, neitamai bokra seper sepuluh wilipra, aRaja ngebodi ernge tep doronkamsere. Angepu gum dinin, sun gekenmanerum neng peda, pel dimserepa, sunda Raja er tali pel don neng kunkamrume. 18Alape pepmasen keca kupkamser taruda, sundi weipmumpa deiyo ngebo kepra talepkamser Raja ngebo tep, mali kange doupra ila di engenkamrume. Sundi upenkamrume. ‘Uo, nun nai Allah, angebodi ikin keca nun nong deiki deriserura tep, lyepseo,’ pepra mali penkamrume. Dinino, Allah er si Yahwehdi, amali penkamrumnge tep, men gekepkamsere,” Samueldi Israel nesala yuma tep lap pepu.

19Samueldi ange yuma lap pepupane, sun Israel nesaladi, Samuel penmau ngeda men gekepidi, “Tali penmasera, akuserya peda, telepe pua. Nun putapser ngeda, ila nimi deiyo ngebo Raja karepsetumpa, er dipu talepkamsere,” pepi. 20“Nun tenepmepyada, yuk mutu neng yuma, sun deiyo neng, Rajadi talengeya utopu kuptepe. Ila nimi deiyo ngebo Raja talepsetudi, nun kunkamep keca yuma lape pepsetupa, gekepra kunkamepe. Tonda, sun mar podana neng yange taru, ‘Nun ila nimi deiyo ngebo Raja mepra betudi, er cap, er jen talen neng capdi, aneng poptengedi, lyepkamsenge’ tenen, angepu putapsere,” pepi.

21Uda, Samueldi sun penmainge yuma konum gekepu dingeda, apenmainge yuma, Allah er si Yahweh, er damai bena lap pepra deipu. 22Upepra deipupa, Allah er si Yahwehdi pepu. “Telepe, sun penmang upu gekepkurume. Sun tenengenge utopu, sun deiyo ngebo kepra talenkamre ngebo Raja weipmemdi, sun tep karepkurume,” Allahdi Samuel tep pepu. Aupu pepu taruda, Samueldi Israel nesala tep, “Sun ati yuk-yuk bena dopso,” pepupa bendopi.