1 Samuel 9

‘Saulda, nun ila nimi deiyo ngebo Raja kunkamser’ tenen, er tep wepra deipi upu

1Benyamin yala neng isomka ngebo tenpu er sida Kis. Tonda er nai boda Abiel. Abiel er nai boda Zeror, tonda er naida Bekorat. Bekorat er nai boda, Afiah. Sun yuma, Benyamin yala neng kurami. 2Kisda sal mi tenpu deiamupa, “Er sida Saul,” pepra deipupa si perami. Ange mida er kamo cap, er kuramunge capda, pio telep ngebo kuramu. Israel neng akuramya yumada, er kamo utopu neng ton pio men kurami. Tonda, Israel nengda bum neng pua. Er Saulda ila lyom ngebo kuramnga cadi, er gisoda yuk neng giso deiki tara bisipra kuramu.

3Uda, tenpu taru ton, Kis er peiramu keledai bisam yawarapmaupa, er mi Saul tep pepu. “Nun pel don ngebo tenpu ton dopra dubememdi, ne keledai bisam erbenkunererume,” pepu. 4Upepka tep, Saul cap, er pel don ngebo cap, Efraim mutu buma bukamngai dabena enmareiya tapra, Salisa mutu dam bena enmarei dinin, yawarapmau keledai bisam men eprei. Ukuprei dingeda, mutu si ton Sahalim tamna di epdanen, banmareiyane, akeledai bisam men eprei. Amenda taru, Benyamin yala neng tara erberei dinin, akeledai bisam ton pio men eprei.

5Akeledai bisam men epmarei atep, tupa aepra embanmareiyanen, sun adipapu Suf yala neng mutu berei taruda, Sauldi er melimne ngebo tep pepu. “Kao, dakwaprie. Men enkuneme. Komuni weik abisam teppu pio enmanema cadi, ne naidi mambul kange doupra, ‘Ware keca deiyo tep pio dimpepmareng do?’ tenepkusera cadi, nun pe mutu tamupra benkuneme,” pepu.

6Upepupa, Saul er melimne ngebodi pepu. “Telepe benkunem dinin, amutu neitamaida, Allah er pel don ngebo tenpu kurepa, nimi yuk neng yumadi er tep kange derinunge. Tonda erdi, ‘Ange kupkamre, angeda ton men kupkamre,’ perur upu yumada, tek sisi er peretopu kurure. Atep nengeda, er ati dam benemedi, asipetepnemnyopda, nun keledai bisam yawarapmaser ngeda, lap pepseredi, ‘Abisipu erbenkurerume,’ pepsetupa, erbetenemnye,” pepu.

7Upepupa, Sauldi tamupra er melimne ngebo tep, asipetepu. “Nun bisi jena tep kipmanemu keca yumada, konum gawal dakmanema cadi, er damai bena asipetepnemnyopda, er menenga keca tep, ware keca karepteneme do?” pepu. 8Upepupa, er melimna ngebodi tamupra pepu. “Naio, ne kupmaner ngeda, kunumna weik keca perak gel uang, meteknge tenpu kupmanere. Atep nengeda, akecapu Allah er pel don ngebo karepkamaneme. Ukupnemepa, ‘Akeledai bisamda, aca kunmange,’ pepkamasere,” pepu.

9Uda, pumun taru, Israel nesala sun putanman keca tep, ‘Allahdi peipsetue,’ tenepne taru yumada, Allah er upu lap pena deiyo neng koripu bena asimtererami. Ukuramipa, tenpu ngebo, erda jenek pedina deiyo ngebo, sun asipetepnei ngeda lap peramu. Pumun taruda, jenek perami neng tep, asuru epmengedi lap pena deiyo neng, tonda epnedi lap pena ngebo tep, ‘pelihat’ perami. Dinino, ukutaruda, Allah er upu jenek pena deiyo neng tep, ‘nabi neng,’ penunge.

10Uda, Sauldi er melimna ngebo tep pepu. “Kan tenepmarem ngeda, telepnge cadi, Allah er upu jenek pena deiyo ngebo damai benkuneme,” upepupa, er kuramngaipu berei. 11Berei pangeda, adipapu bisi banmareiyane, angebo er ati arum mutu buma deiki doramya aneitamai welepra berei taruda, kaber nerapu me gweryakanmaipa bisi neitamai antapdai. Antapdaidi, anerapu tep asiprei. “Allah er upu jenek pena deiyo ngeboda, amutu akunmar do,” peprei.

12Upepra asipetepreipa, anerapudi tamupra pepi. “Yo, angebo akunmare. Sun yakarerum tarupu, er mepra banmara cadi, menmena amenda dombenkurerume. Atumida, Allah er gispal dona tep, nun mutu nengdi yapi keca popra ormutu deiki karepkunga tep, er ukupu yanmare. Atep, sun menmena bererume.

13Nun ati dam bererum dingeda, acapu antapkamarume. Erda, yapi keca popkungai, ormutu deiki ati bo jerbenkur dinin, men benapre taru dipapu, menmena er antapkurume. Ormutu deiki welepredi, yapi keca karepkunge ngeda, erdi Allah moroprepa, telep kweipkamara tepa. Er moropre pangeda, sun yuma jepkamang dinin, er kapul men yanapre taruda, men jepkamange. Er men yanmare taruda, tali kunkamanga tep nengeda, erdi Allah moroprepa, jepkamange. Atep welerbererume. Weleprerumnyopda, er cap antapkamarerume,” pepi.

14Upepipa, adipapu Saul cap, er melimne ngebo cap, akati dam berei taruda, Samuel cap antapi. Ada, amutu nengdi, Allah er gispal dona tep, yapi keca popra karepkuiyai, Samuel baupa, abisi neitamai antapdai. 15Uda, Saul cap, er melimne ngebo cap, kapul Samuel damai men yarei tumida, Samuel damai Allah er si Yahwehdi menmena upu yana peipmau.

16“Ambutumi aketeng utopu konum kuprepa, Benyamin yala ngebo ton pepnepa, kan damai yankamare. Yarepa, antapdankamarerume. Ukupmem dingeda, angebo tep Israel nesala sun ila nimi deiyo ngebo kepkamra tep, wepra deipkamarume. Deiyoda, Filistin nengdi, ne mawa nesala, Israel neng talepra sun nong deiki ikin keca deriramengepane, Israel nengdi mambul kange doupra engenunge. Engenungada, ne ton gekenune. Atep, ayankamar ngebo Saulda, ‘Israel nesala sun ila nimi deiyo ngebo Raja kupkamar’ tenen, erepra deipmem pangeda, erdi Israel nesala ikin kan-kan kunge ngeda, lyepropkamre.” Allahdi Samuel tep lap pepu.

17Allahdi Samuel tep, ange yuma konum lap pepmaua cadi, Samuel cap, Saul cap, konum antapdarei taruda, Allah er si Yahwehdi Samuel tep upepu. “Uda, ne nyapu Israel neng talepkamre ngebo, ne pepmaken ngeboda, angebo adano,” pepu.

18Atarupu Saulda adipapu, ‘Asipetepkun’ tenen, Samuel damai beu. Ada, akati arum ila bisi buplan damaipu, Samuel bukmauai beu dingeda, Sauldi asipetepu, “Naie ne ton asipetepkukene. Amenda kupkamrenge tep, kael kemrurdi lap pena ngeboda, er ati dan do?” pepra asipetepu. 19Upepra asipetepupa, Samueldi tamupra pepu. “Gume, amenda kupkamrenge tep, lap pena deiyo ngeboda, ne akonuma,” pepu. Atep, kanda, menmena meprapmemdi, ormutu buma deiki Allah si eremnupaipu bena kwapkurume. Ukuapmempane, atumipu ne cap tonpa jen jepkamaneme. Mapmepya, ambutumi ipna sisa di, kan dipru neitamai di, ‘Angeda ware keca deiyo tep do? Ware kupkamne do?’ tenenmaremnge yumada, nedi lap pepkenepa, kael kepmem dingeda, tamupra benkamarume.

20Tonda, kan keledai bisam yawarapkeupa, komuni weneri tumi deiki di, ‘Dan mutu kunmang do?’ tenen, pio ememdi, ‘Uo, ware keca tep, kupneu do? Ware kupkamne do?’ tenenmaremdi, kange bongtokere ngeda, tupa tenenapu gume. Kan keledai bisamda, yuk nengdi konum epmanga tepa. Tonda, sun Israel mutu neitamai kunge nesala yumadi, ‘Uo, pio telep nimi deiyo ngebodi talepsetupa, teleppu kutepe’ tenen, ila mambul keca doupra pio tenenungada, kanda akonuma. Deiyoda, Israel mutu neitamai kapunge yuma cap, Israel nesala capda, kan cap, kan nai bo er nyapsilip cap, sun yumadi, akeca-keca yuma talenkamrume. Kanda ila nimi deiyo ngebo Raja kunkamruma tepa.” Samueldi Saul tep lap pepu.

21Upepupa, Sauldi tamupra pepu, “Uo naie, neda Benyamin yala ngebo pua. Uda, kan kaele, Israel mutu neitamaida, nimi yala weiknge ton akunung dinin, nun Benyamin yalada, nimi yambulpu kunupe. Nunda ila mambule gume. Tonda, nun nyapsilip tep nengeda, Benyamin yala nesaladi tenesenungada, ‘Sunda tali kan-kan nesala mambul gume,’ tenesenunge. Atep naie, angeda ware deiyo tep pepnerem do?” Sauldi pepu. 22Upepu pangeda, atarupu Samuel cap, Saul cap, tenpu mutu buma deiki welepreidi, ikwamu ati bena sun cap, yuk neng capdi weki. Samueldi, Saul cap, Saul er pel dona melimna ngebo tenpu capda, napdoupra ila ati upu wengna tep keteneiamiaipu weki. Ukupi dingeda, Samueldi ila deiyo neng, sun gispal dona tep, telep bungnai ton keteneiyamiaipu bena, Saul tep, “Aceipu bukrume,” pepra deipupa bukrei. Ukuprei taruda, akati neitamaida, tiga puluh (30) neng ton weka bukmai dinin, sunda yambul amutara kunge neng bungnaipu buki.

23Ukupi dingeda, Samueldi er ati jen keca dana deiyo ngebo tep pepu. “Ukutaruda, jena dapkurume. Tonda, arup taruda, nedi kan tep, ‘Ila mambul ngebo, er gispal dona tep, sapi bisam tu pio telepnge dopra, kan damai ketenepra deipkurume. Amenda taruda, angebo yaryopda, er tep karepkamne,’ pepra deipmanungepu, asapi bisam tu dopra, aceipu abukmare ngebo damai duyana karepkurume,” pepu. 24Upepu pangeda, Samuel er jen keca dana deiyo ngebodi, asapi bisam yan tu telepaipu, arup taru weprapudi dapra, ketenepra deipmaungepu doupra, Saul damai yana deipu. Ukupu pangeda, Samueldi Saul tep pepu. “Asapi bisam tuda, kan gispal dona tep keteneipmanunge cadi, kan cap, abukmange yuk nimi bo neng cap, tonpa jepkurume. Ne men di konum tenepsi taruda, konum kupmasera tepa,” pepu. Upepupa, Sauldi asapi bisam tu, pio telepnge dopra jenmau. Tonda, atumi dipu Saul cap, Samuel cap, sun peda jena tonpa jeprei.

25Ange konum kuprei dingeda, Allah er si eremnai mutu buma deiki di bukmaiyai di, tamupra kwerepreidi, amutu damai domi ati arum neitamai, ila ati doramiaipu yarei. Yarei dingeda, Saulda akati ban kupra domi arumai welepudi, amutu nengdi, ‘Ila ngebo yaredi, acapu mapkamare’ tenen, ason konum keteneipmai epu. Atep, akati ban kupra domi amnyabo deiki, beipye pengna tep dopra keteneiamiaipu, ‘Mapkun’ tenen, ason deiki mapmau. 26Mapmaupa, konum bereku pangeda, keteng kapul wekra tengyakaramrenge keteng di, Samuel welepudi Saul alau ati ada, ban kupra dominge, amyabo deiki beipye pengna tep, ketenepra deipmaipa, mapmauai beudi, “Ukuda kanda kan pe mutu tamupra benkurume. Atumida benkuruma cadi, nedi kan doupra benkukene,” pepu. Upepupa, Saul buku pangeda, Samuel cap, sun tonpa, alau ati di tamupra tuai tara kwerepreidi, bisi banmarei.

27Sun tonpa banmareiya, ila ati arum doramya neitamai di berei dingeda, Samueldi, Saul tep upepu. “Ukutaru kan melipmaker ngebo, er tep pepmempa, erda adipapu menmena benkurure,” pepu. Upepupa, Sauldi angebo tep pepupa, menmena mepra beu. Mepra beu pangeda, Samueldi aupu ton cap dukdongopra pepu. “Ukuda aceipu, ton yambulpu dim peapkurume. Nedi kan tep, Allahdi peipmaner upu ton lap pepkukene,” pepu.