1Th 1 | XteSC | STEP | Telepe nun kayapu. Ne Paulus cap, Silas cap, Timotius cap, nun yumadi sun Tesalonika mutu nesala, teka konum tenerum nesala tep, asurat sekeipsepe. Sunda, nun nai bo Allah cap, nun Ila Deiyo Ngebo Yesus Kristus cap, dipru dukdongopra kurume. Nun nai bo Allahdi, sun Tesalonika mutu teka tenerum nesala tep, bicau teneseredi, er kange dipapu melimsere keca cap, ‘Yu tenedana gum di, kange deipra teleppu kikiman kunkameng’ tenen, karesere deiyo keca cap, kareserure. ‘Ange yumada, tupa-tupa karenkamser’ tenen, sun Tesalonika mutu kurum nesala tep, Allah morosenune.

1 Thessalonians 1

Paulusdi, ‘Telepe’ pena tep, pepu upu

1 Telepe nun kayapu. Ne Paulus cap, Silas cap, Timotius cap, nun yumadi sun Tesalonika mutu nesala, teka konum tenerum nesala tep, asurat sekeipsepe. Sunda, nun nai bo Allah cap, nun Ila Deiyo Ngebo Yesus Kristus cap, dipru dukdongopra kurume.

Nun nai bo Allahdi, sun Tesalonika mutu teka tenerum nesala tep, bicau teneseredi, er kange dipapu melimsere keca cap, ‘Yu tenedana gum di, kange deipra teleppu kikiman kunkameng’ tenen, karesere deiyo keca cap, kareserure. ‘Ange yumada, tupa-tupa karenkamser’ tenen, sun Tesalonika mutu kurum nesala tep, Allah morosenune.

Tesalonika nesala teka teneraminge tep, Paulusdi Allah tep, “Telepe” pepu upu

2 Allah moronup taru yumada, sun tep tenepmepedi, Allah tep, “Telepe” pepra, sun yuma tep Allah morosenupe. 3 Nun nai bo Allah moronup taru yumada, sun kurumu keca yuma tupa tenenupe. Tenenup kecada, ake. Ada, sun teka tenepruma deiki di, pel dorumunge cap, yuk neng tep bicau teneprumnya di makuramrumnge cap, sun pio pe deiprap, pel dorumnge cap, tupa tenenupe. Sunda, ‘Nun Ila Deiyo Ngebo Yesus Kristus, er dipapu lyemseredi, tek sisi melimkamser’ tenen, er tep, dimpepra dinapu kurumnya deiki di, pel tamna gum dipapu, pio pe deipra pel donkamrume.

4 Ange yuma kunkamruma deiyoda, ake. Ada, sun nimi cap, nerapu cap yumada, Yesus tep teka teneruma cadi, sunda nun weit yapu utopu nesala kurume. Tonda, sun yuma tep, nun kaele. Ada, Allahdi pio bicau teneseredi, sun yuma tep, ‘Anesalada, ne nyapu sisa kunkameng’ tenen, konum weiamseudi lyepseue. 5 Ange peda, tali tep guma. Allahdi sun tep weiamseudi, lyepseua ngeda, jenek kupupa, kael kepmupka deiyoda ake. Ada, nundi sun tep peteremamsepupa, adeiki di Allah er kai telep lyemna upu sun damai yau taruda, tali upu deiki dipu men yaue. Ange gume. Nundi sun tep, Allah er kai telep upu, nimi lyemna upu peteremamsepu taru yumada, Allah er Lek Sambaladi, er puto weika di kareamseunge cap, nun tep melimamseupa, kange bongtona gum dipapu, ‘Aupuda pio tek sisi kupkamre,’ teneramepunge cap deiki di peteremamsepu.

Atep, nun kaele, Allahdi sun tep, ‘Teka tenepnengedi, ne nyapu sisa kunkamenge’ tenen, weiamseudi, lyepseue. Tonda, sun cap kikiman kuramepu taru neitamaida, nundi, ‘Sun Tesalonika nesala teleppu kunkameng’ tenen, sun melimna cap, kael kemna cap tep, kuramepu keca yumada, sun konum diramserumdi, kael keamserume.

6 Nun cap, Yesus Kristus cap, kuramepu keca yuma diramrumdi, kael keamrume. Ukutaru konuma, nun kuramepunge cap, Yesus kuramunge cap, diramrumudi, konum kael kemruma cadi, ukutaruda, sun peda ange utopu kurume. Sun teka teneramrumpa, yuk teka tenena gum nengdi, ‘Angeda, nun song’ tenen, ikin keca weika di sun nong deiki derirami. Ukuramipa, sun kange mun kange douna cap, ikin keca cap, kuramseu dinino, sundi Yesus tamna gum di, Allah er kai telep upu yuma tep, kange deipra dororamrume. Allah er Lek Sambaladi, pingping kemdiramseupa, kange deipra Allah upu dororamrume.

7 Ukuramruma tep nengeda, yuk mutu neng dingedi, sun kurumu keca kael kemnunga tep, sunda ukupmanto neng kurume. Ada, sun Propinsi Makedonia tara teka tenepra kunge nesala cap, Propinsi Akaya tara teka tenepra kunge nesala capdi, sun Tesalonika mutu nesala kuramrum keca diramya deiki di, kael kemami. 8 Ange peda tali tep gum dinin, deiyo ngeda ake. Ada, Propinsi Makedonia tara cap, Propinsi Akaya tara cap, acapu gume. Yuk-yuk mutu nesala peda, sun kurumu keca gekepmengedi, kael kemnunge. Sundi Allah tep teka tenepra dumsisipu kurumnya deiki di, yuk mutu nesala epmengedi gekepmengopda, sun pedi lap perbangepa, mutu ban-ban yuma kunge nesaladi, sun teka tenerumnge cap, Allah er upu perumnge cap, gekepmengedi, kael kemnunge. Uda, nundi, ‘Yuk mutu nesala peda, gekepmengedi kael kepkameng’ tenen, peterembetepe dinin, sun kurumnya deiki di, konum gekepra kael kemnunga cadi, aupu yuma peterembana tep, ‘Dakwapye’ tenen, men lap perbanupe.

9 Amutu-mutu pepmap neng yumadi, konum kael keamya cadi, sun pedi lap penunge. Ada, nundi sun damai yapupa, kange deipra namdoramserumnge cap, uda, Allah upu gekepra dororamrumnge cap, konum kael keamya cadi, amutu-amutu nesala yumadi, ange lap pesenunge. Sundi lap pesenung upuda, ake. Ada, “Sun Tesalonika nesaladi, ‘Allah erda, pio tek sisi Gam Kurur Ngebo, er tenpua’ tenen, teka tenengedi, ‘Erpu talepra, er pelpu donkamepe’ tenen, sun mem keca isok si erepra, taleaminge yumada, konum tapi. Sundi, Allah teppu, er si eremengedi, er pelpu donunge.” Yuk nengdi upepra lap pesenunge.

10 Tonda, ‘Allahdi er Mi Sisa Yesus depu dinin, gam bukra deipka tep, angebo Yesusdi, dan taru di im deiki di tamupra doryankamser’ tenen, pio kange deiprumudi, ketenepra dinapu kurum ngeda, ange ton lap pesenunge. Uda, amenda sirya taruda, Allahdi, mali tupa kunge nesala cap, mali kun keca tupa akapmarenge yuma cap tep, yu weik kuprepa, ila di wenepredi, poptapra gum kupra deipkamre. Ukupkamre taru neitamaida, Yesusdi nun teka tenenup nesala tep, lyepra loptapkamsere.