1 Thessalonians 2

Paulusdi Tesalonika mutu neitamai pel doramu upu

1Uda, Yesus tep teka tenepruma tep, nun weit yapu cap, du yapu cap utopu kurum nesalao, sun peda konum kael keamrume. Nundi sun damai yana pel doramepu taruda, mesum tep men yapu. Gume, Yesus teka teneprumdi, dumsisipu kuruma tep, nong konum kepu. 2Sun kaele, menop taruda, Filipi mutu bepupa, mali nengdi nun tep, mali upu pepra nalemamseidi, nun nong deiki ikin keca weika di deriramsei. Tonda, yuk nengdi, nun peteremna upu cap, nun cap tep, ‘Sun upu sekmepedi, aneng tep, bisbisa kapmepedi, nun mutu neitamai di enepra dokotepmepepa bendopkamep’ tenen, yanipetepsei dinino, nun nai Allah meliamseua deiki di, balila kupra deipseupa, kwar dangna gum di, duka di er kai telep nimi lyemna upu tupa peteremamsepu. Yu nengdi, ila ikin keca, nun nong deiki deriramsei dinin, nunda tamna gum di, tupa peteremnapu kuramepupanen, sundi konum teka teneprume.

3‘Tesalonika nesala teka tenepkameng’ tenen, peteremamsepu upuda, kip upu peptapra, inimna upu cap, mok upu cap, tenepmupka deiki di, men peteremamsepu. Tonda, nun kange dipru neitamai di, ‘Mawa di pepmepepa, mok upupu teka tenenkamenge. Tonda, aupu pepmepepa, sun amutu nengdi, telep keca karenkamsenge’ tenena deiki di, pio men peteremamsepu. Nun dipru kange dumsisi kuna deiki dipapu, Allah er upu peteremamsepu.

4Mali tenena deiki di pio gume. Allahdi nun tep, ‘Anengda, pio dumsisi kunung nesala cadi, ne upu dopra, peterep embenkamenge’ teneramseudi, konum wepra deipseue. Erdi wepra deipseupa, kunupa deiki di, er kai telep upu, nimi lyemna tep upu peteremnupe. Nundi, yuk tuai kunge nesala tep, ‘E anengdi nun tep, telep neng tenepsengedi, kange deipsetenge’ tenen, pel men donupe. Ange tenena gum dinin, ‘Allahdi nun kange dipru neitamai kuserur keca tep, ‘Mali do, telep do?’ tenen, kurpeteserur ngeboda, Allah er dipu kange deipsetua’ tenen, er teppu tenepmepedi, er pel donupe.

5Tonda, Allahdi nun kuramepe keca yuma gekepra diserura cadi, nundi sun tep tali upu pio men pepsepu. Sun kaele, nundi sun tep, ‘Telep upu peptapmepepa, anengdi kange deipkamseng’ tenen, men kuramepu. Tonda, ‘Kange derin upu peptapmepepa, amutu nengdi, bung keca weika di karepsengepa, dopropmepedi, isomka neng kunkamtepe’ tenen, mawa di nunul upu men peramsepu. Tonda, ‘Sun keca upula doproptepe,’ tenenupada, ‘Kael kepsenung’ tenen, inimtamna upu pio men peramsepu. Ange yumada, pio men kuramepu.

6– 7Gume, sundi do, yuk neng yumadi do, ‘E, anengdi nun tep, kange deipra gispal dopsengedi, telep upu pepsengedi, ereipkamseng’ tenen, pel men doramepu. Angeda, sun kael kemamsemume. Nunda, tali neng men kunupe. Kristusdi nun tep, ‘Ne upu dopra peterep embenkamenge’ tenen, wepra deiamseupa, Rasul neng keipseupa kunupe. Ukunupa deiki di, ‘E akeca-keca yuma ton karepsetenge’ tenen, ikin keca, sun nong deiki deiamsetepe dinin, ikin kepra men deiamsemupu. Akeca-keca weika di men mororamsepu. Ange gum dinin, ukupmantoda, sun nin yapudi, sun nyapu tep, pio bicaue tenengedi, kang dipru bouna di melimamengtopu, nundi sun tep utopu kuramepu.

8Nundi sun tep, pio bicaue tenepra, dipru konum kareamseua tep nengeda, nundi, sun tep uteneramsepu. ‘Allah er kai telep nimi lyemna upu peteremkamep dinin, angepu men kunkamepe. Tonda, nun kuramepe keca yuma deiki di, anesala tep bicau tenepmepedi, weika di melimkamepe’ teneramepudi, kange deipra kuramsepu. Ukuramepua deiyoda, nundi sun tep, pio dipru kareramseua tep pepmepe. 9Nun kayapu, tek sisi sun tupa tenerume. Sun cap kikiman kuramepu taru neitamaida, nundi ila pel doramepunge cap, ikin kuramseunge capda, men luproserume. Ukuramupka deiyoda, nundi, uteneramepu. Ada, ‘Tesalonika mutu nesala tep, Allah er nimi lyemna tep kai telep upu peteremkamep taru yumada, nun putan keca tep, karepsengepa, sun ikin kuprur’ tenen, akeca yumada men moronkamepe,’ teneramepu. Ange gum dinin, keteng komuni cap, lukunda cap, nun pe dipapu pel pio doramepudi, nun putan keca yumada, nun pe dipapu kunuamepu.

10Sun Allah tep teka tenerum nesala cap, nun cap, kikiman kuramepu taru yumada, Allahdi diramseue. Tonda, sun peda, diramruma cadi, sun kaele. Allah kuretopu, nun peda, mali kun keca tenpunge pe kuna gum di, pio dumsisipu kuramepupa, yuk nengdi nun tep, “Aneng mali kunge kecada, ake-ake,” pepra, men pepmanto kurami. Sun cap kikiman kuramepu taruda, nunda dumsisi kunge nengpu kuramepu. 11Ukuramuppka deiki di, kael kepsemuma deiyoda, sun kaele. Sun nai yapudi, sun nyapu sisa tep, bouna di telep kupra melipra peteremamengtopu, nundi sun tenpu-tenpu dinin, sun yuma tep, ange utopu kupra peteremamsepu.

12Ada, Allahdi sun tep, ‘Anesalada, nedi akeca-keca cap, tuai nesala yuma cap, talepra kune taru, pio telep ila dirinai kunkamnada, sun cap kikiman kunkamepe’ tenen, upupseue. Allahdi sun tep, upupseua cadi, ‘Amenda taru Allahdi sun tep, kange deipkamre’ tenen, nundi sun tep, “Pio telep kupra kunkamrume. Nun kayape, Allahdi telep kuramretopu, sun peda utopu, dumsisipu kunkamrume,” pepra, peteremna cap, “Ukunkamrume,” morona cap, kuramepu. Tonda, sun ikin kuramseunge cap, sun kange mun kange douna cap kuramrum nge tep, dipru kwa dimna upu peramsepu.

13Uda, nundi Allah er upu peteremamsepupa, sundi gekeramrumdi, teka teneamrum taruda, sundi aupu tep, uteneramrume. ‘Gume aupuda, tali tuai nimidi penge upu gume. Aupuda, tek sisi Allah er upu pua’ tenen, teka teneamrumdi, aupu talepra dombaramrume. Nundi peteremamsepu upuda, tek sisi Allah er upu cadi, teka teneamrum ngeda, telep kuramrume. Sundi Allah tep, teka tenerum nesala, sun dipru neitamai di, Allah er upu di pel tupa doserure. Ayuma tep nengeda, nundi Allah tep, moronup taru yumada, sun tep tupa tenepmepedi, Allah tep, “Telepe,” pepra morosenupe.

14Allah tep, teka tenerum nesala, sun dipru neitamai di, Allah er upuda pel dosere pangeda, yuk mutu nesala dinin, Allah tep teka tenenung nesala, Yudea tara kunge nesaladi, Yesus Kristus cap, dipru dukdongopra kungedi, pio dumsisipu kuramengepa, sundi epmumdi kael kepmumnyopda, sun Yudea tara teka tenenung nesala kunge utopu, sun peda utopu konum kurume. Yudea tara teka tenenge nesala, teka tenepra, telep kupra kuramipa, sun teka tenena gum Yahudi nesalada, Yesus tep teka men teneramya cadi, sun Tesalonika mutu nesala tep, sun nong deiki ikin keca weika di derirami. Sun Yahudi yala nesaladi, Yudea tara teka tenemi nesala tep, mali kuramipa, kange mun kange douamitopu, sun Tesalonika mutu kurumu nesala peda, sun tara nesaladi, ange utopu ikin keca dopra, sun nong deiki derinunge. Ada, sun mutu kunge nesala dinin, teka tenena gum nesaladi, sun tep, ikin keca weik, sun nong deiki deriramseipa, sun peda kange mun kange doupra kurume.

15Sun Yahudi yala nesala, Yesus tep teka tenena gum nengda, ukurami. Sunda, nun Ila Deiyo Ngebo Yesus cap, uda Allah er upu lap pena neng, nabi-nabi ▼
▼Nabi-nabi neng – Allah er upu lap pena deiyo nengda, Allahdi, ‘Nimi gekepkameng’ tenen, erdi wepra deiamu neng tep, er upu cap, amenda kupkamre keca upu cap, lap peramu pangeda, aneng gekeramidi, yuk nesala yuma tep, lap perbarami. Anengda, ‘nabi-nabi neng’ penupe. Nabi neng, sun lap pena upuda, nomor 25 dirume.
 neng cap porami. Tonda, nun tep, sun mutu neitamai di enepra dokotepsei. Anengda, mali kuramengepa, Allahdi sun tep, yu kuprepa, dabal kurure. Tonda, yuk mutu neng yuma tep nengeda, domdongonungedi, podan neng utopu kununge.

16Ukununga deiyoda, sundi Yahudi yala gum nesala tep, ukupra tenenunge. Ada, ‘Gume, Yesus tep teka tenenung nengdi, Yahudi gum nesala tep, Allah upu peterepmengepa, gekepmengedi teka tenepmengopda, Allahdi Yahudi yala gum nesala ton lyeprur’ tenen, sundi, nun tep, upu sengdongosenunge. Tonda, sundi nun tep yanisengedi, ‘Yahudi yala gum nesala tep, Yesus er upu peterepnung tenen, ikin keca weik, nun nong deiki derisenga deiki di, ikin weik kunupe. Ukununga deiki di, sun mali kun keca pio weika di tapakra kupmengepa, weik kupbarure. Me mau dopra, me dingdongomengepa, me mokon deipredi, dinisangamretopu, sun mali kun kecada, pio weik konum kupke. Allahdi sun tep, yu kuprepa, tek sisi ila di wenepra poptapkamre. Ne Paulusdi, upepra sekeipsene.

Paulusdi, Tesalonika nesala uruna tep, pepu upu

17Nun kayapu, sunda Yesus teka teneruma tep, nun weit yapu cap, du yapu cap, utopu nesala kurume. Sun mali nengdi, nun tep, yu kupupa, sun kan-kan di, nun dopra wenemna ati dongombesei taruda, nun cap, sun cap, kikiman kuna tep, men kupmanto kuramepu dinin, nun kange tenenange neitamai di, sun tep tupa tenenapu kuramepu. Tonda, nundi sun tep, tupa teneramsepu. Nundi sun tep, ‘Uo, nun kayapu neng epra antapdatepedi, kikiman kutepe. Sun Tesalonika mutu nesala dirbetepe’ tenen, pio putaramseupa, sun tep tenenapu kuramepu. 18Angeda, tali tep men pepsene. Nun yumadi, ‘Sun Tesalonika mutu nesala damai betepe’ tenen, putaramsepu. Tek sisi, ne Paulusdi, angeda pio putaramneupa, ton taru ton cap, kange di yuk taru ton cap, ‘Sun anesala damai benkaman’ tenen, pio piripeteramsi dinin, Kain Jen Ngebo, Seramkidi, bisi sekdongomseupa, sun damai men yanmanto kuramepu.

19‘Tesalonika nesala cap, uruna tep dirbenkamepe’ tenen, ‘Sun damai bena, kikiman kunkamepe’ tenen, pirirteramupu ngeda, tali tep gume. Deiyoda ake. Ada, ware mutu nesala di pingping kange kemdisenung do? Gume, ada sun Tesalonika mutu kurumu nesala pua. Teka, nundi peteremamsepupa, teka teneprume. Atep nengeda, Yesus doryankamser taru, nundi sun tep kange deipkamsere. Nun Deiyo Ngebo Yesus damai konum bepyopda, er tep, upepra lap pepkamepe. “Naio, nundi kan upu pepteremamepupanen, sun Tesalonika mutu nesala weika di teka tenerami,” pepra, lap pepmepedi, pingping kange deipkamepe. Kange deipsere dingeda, sun teka tenepruma tep, Yesusdi menenga keca karepkamsere. Ange tep nengeda, nundi sun tep, kange pingping kuserure.

20Aupu pepmasentopu, nundi sun tep kange deriseredi, ‘Nundi tek sisi telep pel doramepu ngeda, sun Tesalonika mutu nesala tep, Allah upu peteremamepu,’ tenenupe. Peteremamepupane, sun teka teneprumdi, dumsisipu kurumnya deiki di, Yesusdi nun tep, kange deipkamsere. Atep, nundi sun Tesalonika mutu nesala tep, pio kange deipsere.
Copyright information for XteSC