1Th 3 | XteSC | STEP | Sun damai yana peteramepupane, sun tep tupa teneramsepupanen, ‘Gume, nun cap, sun Tesalonika mutu nesala cap, yuk-yuk kunada, tupa men kuptepe,’ tenepmepudi, men kupmanto kupseupa, nundi, ukupra tenepmepu. ‘Gume, nun acapu, Atena mutu akuramepepane, tenpu ngebo dopra deiproiptepepa, nun tapra, sun Tesalonika nesala damai dirbana tep, betue,’ tenepmepu.

1 Thessalonians 3

1 Sun damai yana peteramepupane, sun tep tupa teneramsepupanen, ‘Gume, nun cap, sun Tesalonika mutu nesala cap, yuk-yuk kunada, tupa men kuptepe,’ tenepmepudi, men kupmanto kupseupa, nundi, ukupra tenepmepu. ‘Gume, nun acapu, Atena mutu akuramepepane, tenpu ngebo dopra deiproiptepepa, nun tapra, sun Tesalonika nesala damai dirbana tep, betue,’ tenepmepu. 2 Ukupra tenepmepudi, Timotius sun damai dirbana tep, dopra deipmepupa, sun damai beu. Timotiusda, tali ngebo gume. Erda, nun weit utopu ngebo kurure. Tonda, Kristus er kai telep upu dopra, mutu-mutu yuma peterembana tep, Timotius cap, Allah capdi, pel kikiman dorerunge. ‘Timotiusdi, sun teka tenerumya tep, sun dipru kwaya dakredi, sun kange dipru puto kemdina cap, kupkamser’ tenen, nundi er dopra, sun damai dokotepmepu.

3 Yu nengdi, ‘Yesus er upu peteremnungada, nun songe’ tenen, sun tep, ikin keca weik, sun nong deiki derisengepa, kange mun kange doupra kuruma deiki di, Yesus tep, konum teka teneramrumnge, ‘Tapkup do?’ tenen, tonda, ‘Men tenimtonkamrum’ tenen, nundi Timotius sun damai dopreipsepu. Dinino, sun peda, ange konum kael keamrume. Aikin keca kusere ngeda, Allahdi er nyapu yuma tep, ‘Ne tep ikin kunkamenge,’ konum teneamseua cadi, ange konum kuserure. 4 Angepu gum dinin, nun cap kikiman kuramepu taruda, nundi sun tep, aupupu kange di ton cap, lap peramsepu. “Allah tep, teka tenepmepepa, yuk nengdi, ikin keca nun nong deiki derinkamsenge,” pepra, lap peramsepu. Aupu peramseputopu, konum kupmasera cadi, sun peda, ange konum kael keprume.

5 Ange tep nengeda, sun tep tupa teneramsisianen, tupa men kupmanto kupneupa, Timotius dopra, sun damai dopreipsisi. Ada, dirberedi, amenda taru, ‘Sun Tesalonika nesaladi, Allah tep teka tenenungada, tupa telep kunung do, gum do?’ tenen, ‘Epyopda, ne gekena tep, peipkamnere’ tenen, dokotepsi. Ada, ‘Isokdi kurpeten keca kareprepa, mali kupnung do?’ tenen, ne dipru pu jeramneu. Deiyoda, ‘Kain Jen Ngebodi, sun Tesalonika mutu nesala tep, ikin keca karepka deiki di, sun teka teneraminge konum kupetepupa, mali konum kupmenge pangeda, nundi Allah upu petermna pel doramepu kecada, nong men kupu do?’ tenen, Timotius dopra sun damai dokotepsisi.

Timotiusdi, Paulus damai bena, Tesalonika nesala tep lap pepu upu

6 ‘Nun pel doramepu ngeda, nong men kupseu do?’ tenen, kware kuramneu dinin, ukutaruda, Timotiusdi sun damai di, ka tamupra nun damai konum yanmasera cadi, sundi Allah tep, teka teneprumnge cap, yuk nesala tep, bicaue tenepra makuramrumnge cap tep, telep upu konum lap peryaseue. Tonda, upepseue. “Sun Tesalonika nesaladi, sun cap kikiman kurami taru tep, kange di ton cap tenepmenge taruda, kange deipra pingping kemnunge. Tonda, Paulus kan cap, kan kikiman kurum nesala capdi, sun Tesalonika nesala tep, ‘Uo sun ton epra, antapdatepe’ tenen, pio putaserurtopu, sun Tesalonika nengdi, sun yuma tep, utopu putarure,” upepra, Timotiusdi nun tep, lap pepseu. 7 Aupu yuma konum pepseua tep nengeda, nun teka tenepepa, ikin keca nun nong deiki derisenunga cap, kange mun kange doupra kunupa cap, akapmarya peda, sun Tesalonika mutu nesaladi tupa teka teneprumnge tep, lap pepseupa, nun kange lopseupa, telep kange deipmepe.

8 “Sunda, nun Deiyo Ngebo Yesus tep, teka tenepmengedi, dipru dukdongopra, tamna gum di, pio dimpeprappu kununge,” pepra, lap pepseupa, konum gekepmupka cadi, nunda, tek sisi pingping kange kemdiserume. 9 Allah cap dipru dukdongopra kikiman kunup taru neitamai yumada, sun tep tenepmepedi, kange deipra kunupe. Pio pingping kemdiseruma cadi, ware kuprap di, apingping kemdiserumnge tep, nun nai Allah tep, “Telepe,” peptepe do? Allah tep, weika di, “Telepe,” peptepya peda, ange deiki di, pingping kupra deipsemum ngeda, men punuptepe. 10 Lukunda pe, keteng komuni peda, nundi Allah tep, ‘Uo, nun kayapu neng Tesalonika mutu nesala cap, kange di ton cap antaptepedi, sun teka tenenung keca neitamai go kupmarenge do, sukmarenge do, nundi tapakrap petereptepepa, gawal dangna tep, mumupra pel doptepe’ tenen, morosenupe.

11 Ukutaruda, nun nai bo Allah cap, nun Deiyo Ngebo Yesus capdi, nun bisi moupra karepseretengepa, ‘Sun Tesalonika mutu nesala damai dirbetepe’ tenen, Allah moronupe. 12 Tonda, Allah morosenup kecada pepkusene. Ada, nundi sun Tesalonika nesala tep, bicau tenena cap, dipru karena cap, weik tapakbaramretopu, nun Deiyo Ngebo Yesus, sun tep melimserya deiki di, sundi yuk nesala yuma tep, bicau tenedarumdi, weika di makudankamrume. 13 Tonda, nun Deiyo Ngebo Yesus cap, er im deiki melimna neng, malaikat cap, tuai tamupra yankamenge taru neitamai dinin, sun Tesalonika nesalada, nun nai Bo Allah damai tengbenkamrum taruda, ‘Sun mali kun keca tenpunge pe men kuprea deiki di, pio dumsisipu kunkamrum’ tenen, nundi sun tep Allah morosenune. Tonda, ‘Ukupra kunkameng’ tenen, ‘Yesusdi sun dipru puto kemdinkamserya deiki di kunkameng’ tenen, nundi sun tep Allah morosenune. Ne Paulusdi pepsene.