1Th 4 | XteSC | STEP | Telepe nun kayapu, amenda taru Allahdi, nun yuma tep, kange deipseredi, ‘Anengda, telep neng kununge, tenepkamser’ tenen, “Ukunkamrum, ukunkamrum,” pepra peteremamsepu. Nundi sun tep peteremamseputopu, tek sisi konum kurume. Atep nengeda, ukutaru akumum ngeda, weika di ton cap, pio tapakrap kunkamrume. Ada nun Deiyo Ngebo Yesus, er si deiki di, aupu puto di pepra deipsepe.

1 Thessalonians 4

‘Allahdi nun yuma tep, kange deipkamser’ tenen, kunkamep keca tep, pepu upu

1 Telepe nun kayapu, amenda taru Allahdi, nun yuma tep, kange deipseredi, ‘Anengda, telep neng kununge, tenepkamser’ tenen, “Ukunkamrum, ukunkamrum,” pepra peteremamsepu. Nundi sun tep peteremamseputopu, tek sisi konum kurume. Atep nengeda, ukutaru akumum ngeda, weika di ton cap, pio tapakrap kunkamrume. Ada nun Deiyo Ngebo Yesus, er si deiki di, aupu puto di pepra deipsepe. 2 Nun Deiyo Ngebo Yesus, er si deiki di, tonda, erdi nun tep pel deiyo keca kareamseua deiki di, nundi sun tep, “Ukunkamrum, ukunkamrum,” pepra, peteremamsepupa, dororamrum kecada, sun konum kaele.

3 Aupu utopunge ton pepkusepe. Ada, Allahdi nun yuma tep, ‘Ukunkamenge,’ teneramseu ngeda, ake. Tenpu ngeda, ada Allah erpu taleamrumdi, pio dumsisipu kunkamrume. Allahdi sun yuma tep, pio telep kemdinkamsere. Tonda, sun tali nesaladi, tali-tali nyangdarameng keca yumada, pio men kunkamrume. 4 Sun yuma dinin, tenpu-tenpu di, sun pedipapu sun pe nong cap, sun pe doamrum nerapu cap tep, ‘Tali lupra kupkun,’ tenena gum dipapu, kalekra didamumdi, mali kuna pio gum dipapu, pio dumsisipu kunkamrume. Ukuramrumu pangeda, yuk neng epsengedi, ‘Anengda, pio teleppu kununge,’ tenesetengetopu kunkamrume.

5 Sun Allah tep teka tenena gum nesaladi, yuk nerapu cap tep, ‘Uo anerapuda dopra tali nyaktene’ tenen, pio tupa tenena cap, ‘Ne putapneretopu, tali lupra kupkune’ tenena cap, kuramengtopu, sun ton pio men kunkamrume. 6 Nesala tali nyangdarameng keca cap, akeca-keca yuma pio putarepa, ‘Tali lupra kupkun’ tenena cap tep nengeda, sundi yuk neng yuma tep, tali-tali upu pertamna cap, mali kemdina cap, men kunkamrume. Tonda, sundi, ‘Ne pe putana tep, ukupkamne,’ tenena tep, yuk neng tep, tenena deiki di mok upu pena cap, pio men kunkamrume. Nundi sun tep konum peterepsepu. “Ware nesala do yuma, apepmasen mali kun keca cap, amali keca utopu keca cap, konum kupmenge pangeda, amendada, Allah ila di wenepra popkamre,” pepra wenemamsepu.

7 Aupu peteremamsepuada, tali tep gume. Allahdi nun tep upupseuada, mali kuna cap, telep kuna cap, tapakra kuna tep, men kong pepseue. Ange gum dinin, ‘Mali kun keca pio gum dipapu, dumsisipu kunkameng’ tenen, upupseue. 8 Ange tep nengeda, ware ngebo do yuma, apepmasen upu tapra, yanipre pangeda, tali tuai nesala penge upu tep, men yanirure. Erdi, Allah er Lek Sambala kareserure deiyo ngebo, Allah tep, yanirure. Angeda ila mambule.

9 Uda, sundi yuk nesala yuma tep, bicau tenedamumdi, makudana ngeda, upu ton men sekeipkusepe. Ware keca deiyo tep, yuk nengdi ton aupu pepra surat sekra dokotemkamseng do? Gume, Allahdi sun yuma tep, aupuda konum peteremamseupa, gekeramruma tepa. 10 Tonda, erdi peteremamseutopu, sundi yuk teka tenenge nesala yuma cap, Propinsi Makedonia tara neitamai kungedi teka tenenge nesala yuma tep, bicau tenepra makudanapu kurume. Dinino, nun weit yapu utopu nesalao, ‘Ange konum kurumnya utopu, pio weika di ton cap, tapakbankamrum’ tenen, pepsepe.

11 Nundi sun tep peteremna deiki di, konum pepseputopu, yuma taru yuma neitamai di, sundi yuk neng tep, “Sunda warya tep ange kunmarum do? Ukupkurum, ukupkurum,” pepra pedana gume. Sun yumadi, ange utopu tenenpra kunkamrume. ‘Nun pe buru dipapu pel dopmepedi, dimpeprappu kunkamepe. Ukupmepedi, kange deiprap, bouna dipu kunkamepe’ tenenkamrume. Pio pe deipra puto di pel kunkamrume. 12 Apepmaseptopu, tumi-tumi yuma ukupmum pangeda, yuk neng, ada teka tenena gum neng epsengedi, ‘Anengda, teleppu kununge,’ tenepra gispal dopsengedi, sun yuma tep, kange derinkamsenge. Tonda, sun pe buru dipapu, pel dopmum pangeda, ‘Yuk neng dipapu makupkamseng,’ men tenenkamrume. Sun pedipapu pel dopmumnya deiki di, sun putan keca doronkamrume.

Nun Deiyo Ngebo Yesus tamupra yankamra tep, pepu upu

13 Ne kayapu, konum deami neng kunge keca kael kemna tep, ‘Walwal men kunkamrum’ tenen, pepkusepe. Tonda, yuk teka tenena gum nesala yumadi, sun kayapu neng depmengepa, ‘Ila di engepra dipru sukuramretopu, sun peda ange utopu men kunkamrum’ tenen, aupu pepkusepe. Yuk tali dakunge nesaladi, ‘Yesus tep teka tenepmepya deiki di, depmepya peda, amenda taru gam bukeipkamsere,’ men tenenunga cadi, kange mun kange doupra engenapu kununge. 14 Nun teka tenenup nesalada, ange tenenupe. Ada ake. Yesus depu dinin, Allahdi, kange di tamupra gam bukra deipka cadi, Yesus teka tenerami dinin, konum deami nesalada, Yesus tamupra yankamre taruda, Allahdi nun cap, anesala yuma cap dopra, gam bukeipseredi dubenkamsere.

15 Nun Deiyo Ngebo Yesusdi peiamseutopu, sun teka tenerami dinin, konum deami nesalada, menmena Yesus cap tamupra im deiki welerbenkamenge. Ada, Yesus tamupra yankamre taru, sun tupa gam kunkameng nesalada, menmena im deiki men welerbenkamenge. Yesus tep teka tenerami dinin, konum deami nesaladi, mepra welepmenge pangeda, ataru sun gam tupa kunkameng nesalada, amenda taru welepkamenge. 16 Angeda tali tep men pepsene. Deiyoda, ake. Nun Deiyo Ngebo Yesus kwerepkamre taruda, erdi ila upu peprepa, im deiki pel don neng, malaikat sun deiyo ngebodi, ila upu pena cap, Allah er im deiki bung-bung pena er sida, terompet di lelim pena cap, ayuma konum kupre pangeda, sun Kristus teka tenerami dinin, konum deami nesalada, menmena gam bukra deiprepa, dua kan-kan neitamai welepkamenge.

17 Im deiki dice, tuai mutu duce, daneitamaida, sun men deami neng konum welepmenge pangeda, sun tuai mutu gam tupa akunkameng nesalada, Allahdi anesala dopra, erepra deiprepa, sun men deami nesala cap, nun Deiyo Ngebo Yesus cap, dua kan-kan neitamai adipu antapmengedi, Yesus cap kikiman im deiki welepkamenge. Ayuma konum kupre pangeda, nun yuma Allahdi dopra beserepa, im deiki Allah cap tonpua pio kunkamepe. 18 Ukunkamepa tep nengeda, aupu pepdamumdi, sun dipru kwa dimdanapu kunkamrume, pepsene.