1 Thessalonians 5

Dirinai kunung nesala cap, kunungnai kunung nesala cap tep, pepu upu

1– 2Telepe nun kayapu, Yesus teka tenepruma tep, nun weit yapu cap, du yapu cap utopu kurum nesalada, sun konum kaele. Sun upula don nengdi, yuk nesala men tenepmenge taru, lukunda neitamaipu, inipra yakaramengtopu, nun Deiyo Ngebo Yesusdi tamupra tuai yankamre tumida, ange utopu kupra yankamre. Nimi men tenepmenge taru tamupra yankamre. Atep nengeda, ‘Atumi ake, atanggal ake, aketeng tamun ake’ tenen, men lap pepmanto tep, ange men sekeipkusepe. 3Nesala yumadi, “Gume, ukutaruda, ikin kuna cap, podana cap gum dipapu, kange deiprap, pio teleppu kunupe,” penge taru neitamai dipapu, ila kange mun keca sun deiki yaryopda, sun yuma popra gawal dakamre. Ukupmantoda, nerapuda, ‘Ataruda mi deiyo jepkusere,’ men tenepmenge tarupu, dato-dato di mi deiyo jeramretopu, nimi men tenepmenge taruda, Allahdi sun tep, ila di wenepra popredi sikki buktapkamre. Ukupkamre taruda, sun tek sisi men lyepdatenge.

4Sun teka tenena gum nesalada, ukunkameng dinino, ne kayapu sunda ange utopu men kurume. Sunda kunungnaito men kuruma cadi, Yesus tamupra tuai yankamre taruda, upula don nengdi, lukunda neitamai, dato-dato di yangepa, nesala lungdaramengtopu men kunkamrume. 5Sun Tesalonika mutu nesala yumada, dumsisipu kun nesala kuruma cadi, ukupmantoda sunda dirinai kunge nesalapu kurume. Tonda, sunda keteng komuni neitamai kunge nesala kurume. Nun yumada, lukunda taru cap, kunungnai cap, kunge nesala kungetopu men kunupe. Ange utopu pio men kunupe.

6Kunungnai neitamai kunge nesala utopu men kunupa tep, yuk tali dakunge neng mapmengedi, u dangamengtopu men kunkamepe. Ange gum dinin, nun yumada, ‘Mankau di mali kupnup’ tenen, nimi konum bukmengedi, pio moupra teneramengtopu, nunda adipapu teleppu kunkamepe. ‘Akeca-keca yuma tali lupra kupkamepe’ tenena gum di, nundi nun pe tep, kalekra didapedi, dumsisipu kunkamepe. 7Sun maramenge nesalada, lukunda tarupu maramenge. Tonda, kange yawaramne yu me jepmengepa, kange yawaraprepa, mali weik kunge nesalada, lukunda taru neitamai dipu kange yawaramre me jenunge.

8Sunda, ukurameng dinino, nunpuda, ange utopu pio men kunkamepe. Nunda keteng komuni kun nesala kunupa cadi, ‘Tali lupra kupkupe’ tenena gum dipapu, nundi nun pe tep, moupra didapedi, teleppu kunkamepe. Ukupmepe taru yumada, Allah tep teka tenena cap, yuk neng tep bicau tenepra makuna capda, pio kunkamepe. Ukupmantoda, nimi podan taru, nimidi, ‘Mar popsenung’ tenen, teng kenengamenga utopu, nun yumadi, ‘Mali kupnup’ tenen, moupra kalengdapedi, pio dumsisipu kunkamepe. Tonda, ukupmantonge ton, sun jen talen nengdi, gat topi kenekrap, giso galuramengtopu, ukunkamepe. Ada, sirya taruda, Allahdi mali kun nesala yuma tep, upu bokeipredi, wenepra poptapkamre taruda, ‘Nun teka tenenup nesalada, tek sisi lyepkamsere’ tenen, nun kange er deikipu deipmepedi, teka tenepra, er tep dinapu kunkamepe.

9Angeda, tali tep men pepsepe. Deiyoda ake. Ada, Allahdi nun tep wepra deiamseua ngeda, erdi, ‘Nedi anesala wenepra poptapkamne’ tenen, men wepra deipseue. Ange gum dinin, nun Deiyo Ngebo Yesus Kristusda, depudi pel dopseua deiki di, ‘Ne tep teka tenenenung nesalada, lyepnedi, pio gam kuna deiyo keca karepnyopda, sundi dopropkameng’ tenen, Allahdi konum wepseua cadi, tek sisi lyepkamsere. 10Yesusdi nun tep depseua deiyoda, nun depkamep taru pe, tupa gam bungnup taru peda, erdi, ‘Ne cap, sun cap, dipru dukdongopra, kikiman kunkamepe’ tenen, nun tep depseudi, lyepropseue. 11Ange tep nengeda, sun konum kurumnya utopu, aupu yuma tupa teneprumudi, ikin kusere taru dipru kwa dimdana cap, sun teka teneprum ngeda, puto kemdidana cap, pio kunkamrume.

Asurat gawal dangna tep, pepu upu

12Uda, Yesus teka tenepruma tep, nun weit yapu cap, du yapu cap utopu kurum nesalao, Yesus cap dipru dukdongopra kurumnya neitamai di, sun deiyo neng tep, gispal donkamrume. Adeiyo neng talesengedi, sun melimna tep, pel puto di dosenunge. Tonda, sun mali kuprumu taruda, anengdi sun tep, “Angeda kupkurum, angeda pio men kupkurum,” pepra wenepra, peteresenung neng tep, “Telepe,” pepra, gispal domumdi, gudinkamrume. 13Anengda, ila mambul pel dosenunga cadi, aneng cap kikiman kumum taru yumada, sun tep, ‘Sunda pio telep neng kununge’ tenen, ila di gispal domumdi, gudinkamrume. Sundi, sun deiyo neng yuma tep, bicau teneprumudi, makunkamrume. Tonda, sun yumadi, yuk neng yuma tep, bouna di telep kuprappu, kikiman kunkamrume.

14Tonda, nun weit yapu cap, du yapu cap utopu kurum nesalao, mambul upu pekusepe. Ada, sun tek sisi pel talepra dona gum di, tali-talipu kunung nesala tep, “Kange moupkamrume,” pepra wenemkamrume. Kwar-kwar adi, kuramenge neng tep, telep upu peprumudi, sun dipru kwa dipra kunkamrume. Tonda, sun yambula dipu, Allah tep teka tenenge ngeda, dipru wisina gum nesala tep, melipra puto kemdinkamrume. Yuk nesala yuma tep nengeda, menmena di wenemna upu pena gum di, kaukepra bouna di melimkamrume.

15‘Sun mali nengdi mali kupsengepa, adipapu tamupra, sun tep mali kupkup’ tenena gum di, pio kalekra didankamrume. Mali kupsengepa, tamupra sun tep mali kuna gum dinin, sundi yuk neng yuma tep, ‘Bouna di telep kudidankamep’ tenen, pio pe deipra, teleppu kunkamrume.

16Ataru-ataru yumada, kange deiprap, teleppu kunkamrume.

17Tonda, tamna gum dipapu, ataru-ataru yumada, Allah pio moronkamrume. 18Allahdi sun tep, ‘Ukunkamenge,’ teneamseuada, ake. Ada, ‘Yesus Kristus cap, dipru dukdongopra kikiman kunkameng taru yumada, wareto kun taru do yuma, ikin kupre taru pe, kanam kupre taru peda, ne Allah tep, “Telepe,” pepra kange derinkamnenge,’ teneamseue. Atep, ange utopu pio kunkamrume.

19Tonda, uku jerepa, nimidi uku tamamengtopu, Allah er Lek Sambaladi sun dipruai pel dosere ngeda, ‘Dakwapye’ tenen, upu sengdongona gume. Erdi pesere upu yuma, moupra gekeprumudi, puto di pel donkamrume. 20Ange utopu, Allah er Lek Sambaladi nimi dipru neitam upu peiprepa, sun anengdi ka tamupra, yuk nesala tep, amenda kupkamre keca tep lap penge pangeda, sundi aupu tep, “Angeda talya, nong men kupkamre keca cadi dakwapye,” pepra, dabal kuprepa upu sengdongona gume. Anengdi penge upu moupra gekenkamrume. 21Ware kun keca do, ware upu do, akeca-keca yuma tep, ‘Telep kurur do, mali kuru do?’ tenen, pio moupra kurpetenkamrume. Kupetepmum dingeda, telep ngeda, gekepmumdi, pio moupra talenkamrume. 22Mali kun keca yala-yala yumada, pio beipra yukai kunkamrume. Tenpunge peda, talepra kuna meme.

23Nimi podana cap, pangdana cap gum dipapu, kange deipra bouna di telep kupra kikiman kuna tep nengeda, nun nai bo Allah, er pel doserya deiki dipu kunupe. Allah, er pedi sun tep, ‘Ne teppu teka tenepnengedi, dumsisipu kunkamenge’ tenen, sun nong cap, sun kange dipru cap, sun kun keca yuma cap, ‘Pio telep kudinkamser’ tenen, nedi sun tep Allah morosenune. Ange pio ukupra dakuramserepane, nun Deiyo Ngebo Yesus Kristus tuai mutu tamupra yankamre taruda, sun sambala cap, sun kange dipru cap, sun nong yuma capda, ‘Mali keca tenpunge peda, men kupserepa, pio dumsisipu kunkameng’ tenen, Allah morosenune. 24Sun yuma tep, ‘Ne nyapu sisa kunkameng’ tenen, upupseua Deiyo Ngebodi, pio telep kupra nimi men kupmanto keca, kunupsek pen pel dore ngebo kurura cadi, er dipapu ukupra melimserepa, teleppu kunkamrume. Erdi sun tep, pio men tamkamser dinin, erdi teneamseu utopu, teleppu kweipkamsere.

25Uda, nun weit yapu utopu nesalao, nundi sun yuma tep ila di bicau tenesenupe. Sundi nun tep Allah moronkamrume. 26Sundi yuk teka tenena nesala yuma tep nengeda, epra antamkamrum taru yumada, kange deipdamumdi, Yesus si deiki di, gispal dopdamumdi, iripra mutupdankamrume. 27Nun Deiyo Ngebo Yesus diserya deiki cap, er puto si deiki cap di, aupu pepra deipsene. Asekeipmasen suratda, dopropmumdi, ‘Sun teka tenengedi, nun weit yapu utopu nesala yuma gekenkameng’ tenen, sun damai bemumdi, asurat nukra penkamrume.

28Telepe ne kayapu, ne Paulusdi asuratda konum sekeipsene. ‘Nun Deiyo Ngebo Yesus Kristusdi, sun tep bicau teneseredi, er kange dipapu, telep kupra melimkamser’ tenen, Allah morosenune.

Ne Paulusdi konum pepsene.

Telepe, acapu deipsene.