1Ti 1 | XteSC | STEP | Telepe, ne Paulusdi, kan Timotius tep, asurat sekeipkene. Kanda, Yesus teka konum tenepmumpa, dipru dukdongopseua cadi, ne mi sisa utopu ngebo kurume. Nun Lyemna Deiyo Ngebo Allah cap, ‘Yesus Kristus tek sisi doryankamser’ tenen, kange deipra dinapu kunup ngebo Yesus cap, sun butene, “Ukunkurume,” pepra, deipnereiya deiki di, pel donune. Ne pelda, ada Yesus Kristus er upu dopra, peterembana tep, wepra deipnereipa, Rasul ngebo kunune.

1 Timothy 1

Paulusdi, ‘Telepe’ pena tep, pepu upu

1 Telepe, ne Paulusdi, kan Timotius tep, asurat sekeipkene. Kanda, Yesus teka konum tenepmumpa, dipru dukdongopseua cadi, ne mi sisa utopu ngebo kurume. Nun Lyemna Deiyo Ngebo ^{▼▼Lyemna Deiyo Ngebo – Alkitab neitamaida, Lyemna Deiyo Ngebo sengnungada, ton taru Allah tenena tep sengnunge. Ton taruda, Yesus tenena tep sengnunge, dinin deiyoda, Yesus er depseua deiki di Allahdi lyemserure. Paulusdi Allah tep aupu pepu. Lap pena nomor 17 dirume.} Allah cap, ‘Yesus Kristus tek sisi doryankamser’ tenen, kange deipra dinapu kunup ngebo Yesus cap, sun butene, “Ukunkurume,” pepra, deipnereiya deiki di, pel donune. Ne pelda, ada Yesus Kristus er upu dopra, peterembana tep, wepra deipnereipa, Rasul ngebo kunune.

2 Uda, ne mi Timotiuso, nun nai bo Allah cap, nun Deiyo Ngebo Yesus Kristus cap, sun butene di, kan Timotius tep, bicau tenekerengedi, sun kange dipapu tali melimkerenge keca cap, uda nun mali kuna tep, wenepra tali poptapsereteng dinin, ange kaukemserengedi, nun putasere keca mesum dipu kareserenge keca cap, tonda, ‘Yuk neng cap yu tenedana gum di, kange deipra teleppu kikiman kunkamre’ tenen, karekerenge deiyo keca cap, karekerunge. ‘Ange yumada, tupa-tupa weika di tapakra karenkamkereng’ tenen, kan Timotius tep Allah moronune.

Mok upu peteremna neng tep, pepu upu

3 Uda, ne Makedonia mutu benamsi taru peamkesitopu, kanda Efesus mutu tupa kunkamrume. Ada, tek sisi Allah er upu kuretopu gum dinin, yuk mok upu peteremnung neng tep, ‘Kandi sun upu sengkamrum’ tenen, pepkesi. 4 Tonda, anengdi, tali-tali nungameng upu, pumun taru nenung upu utopu nungami upu cap, nong men kupkamre upu cap, sun co puna nengdi dadeipdanen, yakaramidi perami upu cap, moupra talengedi, aupupu gekenunge. Anengdi gekenung upuda, tali upu cadi, ‘Adipapu tapkameng’ tenen, upu sengkamrume pepkene. Amali upu pio tenepra talenge pangeda, nimi dipru wilimdidangedi, upu deiki di pangdangedi, yuk-yuk kepronunge. Allah er nyapu yuma tep, bicau tenepra makuna cap, telep kupra peteremna capda, Allah teka tenena deiki dipapu kunupa cadi, amok upu deiki telep kupra men kunupe. Ada men kupmanto. Allah er tek sisi upu gekepmepedi, teka tenena deiki dipapu, moupra kael kemnupe. Atep, yuk nengdi peteremenge tali-tali upu yala-yala yumada, kandi, “Upena gume, ange yapropkurume,” pepra, anengdi penge upu tep, upu sengkamrume.

5 “Allah er tek sisi upupu peterepmempa, teka tenena deiki di kael kepkamenge,” pepmaken upu deiyoda, yuk ton gume. Ada, ‘Nundi yuk nesala yuma tep, bicau tenepra makunkamnup’ tenen, pepmakene, apua. Yuk neng tep, dipru kareprepa, makupra kuna deiyoda ake. Nimi kange dipru mengne utopu kuna cap, nun kange tenenange neitamai, mali keca inimna gum, dumsisipu kuna cap, mawa di tali pertamna gum dinin, pio teka tenena cap, ange yuma ukunupa deiki di, yuk nesala tep, bicau tenepmepedi, dipru karedannupe.

6 Ton nesalada, aweneri pepmaken keca tapra, urasin yuk kepra, gwalin bisi embangedi, nong men kupkamre upu, pio tali-tali upupu gekepra kununge. 7 Anengda, utenenunge. ‘Gume. Allahdi, ‘Ukunkamrume, ange ton men kunkamrume,’ pepra deipupa, Musa sekeiamseu upuda, ^{▼▼Musa sengamu upu lap pena upuda, nomor 35 dirume.} nundi peteremna deiyo neng kunkamepe’ tenen, piripetenung dinino, tek sisi ngeda, sundi, ‘Tek sisi deiyo ake’ tenen, puto di peteremenga deiyo upu cap, tali sisingameng upu capda, sun pe ton pio walwalpu kununge. ‘Deiyo ake’ tenen, moupra men tenenunge.

8 Uda, nun kaele. Allahdi, ‘Ukunkamrume, angeda men kunkamrume,’ pepra deipupa, Musadi sekeiamseu mem upuda, tek sisi telep upupu kurura cadi, ware ngebo do yuma, aupu dopra, tek sisi pio telep dumsisipu kupra peterepyopda, yuk nesala tep, teleppu kupra melimserure. 9 Tonda, nun kaele. Allahdi peipupa, Musadi sekeiamseu upu, mem upuda, Allahdi dumsisi kun nesala tep nengeda, aupu men peipu. Gume. Aupuda, Allah cap, nimi deiyo neng cap, sun amngaito kuna gum di, sun penge upu yuma tep, yanipmengedi, mali kun kecapu talepra kunge neng, sun wenemna tep, Allah er upu peipseu.

Tonda, ‘Allah er mambule,’ tenena pio gum di, dipru pio mali-mali kun neng cap, tonda ‘Allah pesere upu cap, er kure keca cap tali keca pua,’ tenengedi, Allah er mengne keca yuma tep, yanipmengedi, autupra nyek-nyek penge neng cap, mali kecapu talepra mali-malipu kunge neng cap, tonda, sun nai yapu sisa cap, sun nin yapu sisa cap, yuk tali neng cap, portamenge nesala cap tep, Allahdi amem upu peipupa, Musadi sekeipseu.

10 Ange utopu, sun pe nerapu tapra, yuk nerapu tali nyangna neng cap, tonda, nimidi nimipu nyangdana nesala cap, nerapudi yuk nerapu nyangdarameng nesala cap, tonda ‘Aneng ateng koupmepedi, yuk neng damai kunupra, co bo weik doproptepe’ tenen, nimi kunumnung neng cap, mok upu tali pertamnung neng cap tep, Allahdi amem upu peiamseu. Tonda, upu bongdin taru, “Tek sisi upupu pepmape,” pepra, tali pertamnung dinin, mok upu mawa di penung neng cap, uda ware mali kun keca do yuma, amali kun keca talenge nesaladi, Allah er tek sisi upu yuma peseretopu yanipra, pio mali kun keca yala-yala yuma talepmengedi kunge neng cap tep, sun wenemna tep, Allahdi amem upu peipupa, Musadi aupu sekra karepseue. 11 Allah er tek sisi kai telep upu cap, er pe nong cap, yuma taru yuma, pio teleppu kurure. Allahdi, ‘Nimi lyemna tep, ne kai telep upu dopra, peterep embenkamre’ tenen, wepra deipneue. Ne Paulusdi upepra sekeipkene.

Allah er kange dipapu Paulus tep, meliamemeu upu

12 Nun Deiyo Ngebo Yesus Kristusdi, ne tep, ‘Ne pel melimna ngebo kuredi, tamna gum di, pio kunupsek pepra, ne pel donkamnere,’ tenepneudi, wepra deipneue. Uteneamneua tep, wepra deipneudi, er puto kareamneua tep nengeda, nedi er tep, “Naio, kanda pio telepe,” penune. 13 Pumun taru neda, ‘Yesus Kristus erda tali ngebo’ tenen, er tep mali upu peramsidi, er teka tenerami nesala tep, pio yu kupneupa, sun nong deiki ila ikin keca deriramsidi, aneng poramsi. Ukupra kuramsi dipunen, amali kuramsinge yumada, Yesus tep teka tenena gum, pio walwal deiki di kuramsa tep nengeda, Allahdi ne mali kuramsinge tep, tali lupra poptapnetu dinin, amali kuramsinge kaukepra, bicau tenepneudi, melipra lyepneue.

14 Nun Deiyo Ngebo Yesusdi, er kange dipapu ne tep, dipru kareamupa, pio weika di melimamneu. Yambula di gume, er tep teka tenena deiyo keca cap, yuk nesala tep, bicau tenena deiyo kuna keca cap, abutene kuna deiyo keca weika di kareramneu. Yesus Kristus cap, dipru dukdongopra kuramepe taru neitamai di, teka tenena cap, yuk neng tep bicau tenena cap, kuna deiyo kecada, weika di kareserure.

15 Apepkuken upuda, pio tek sisi upu cadi, nimi ban-ban yuma, adipapu aupu teka teneptenge. Aupuda ake. Yesus Kristus tuai mutu yaua deiyoda, yuk gume, erdi, ‘Mali kun nesala lyepkamne,’ tenena tep yaue. Mali kun nesala weik akunung dinin, pio ila mali weik kuna ngeboda, nedi ukuramsi, pepkene. 16 Ila mali ngebo kuramsi dinin, Yesus Kristusdi ne tep, ‘Aila mali ngebo tali lupra poptene dinin, er tep bicau tenepnedi, er mali kunange kaukepnedi, dipru karenerepa, er tep melipra lyepnyopda, yuk neng ange epmengedi, ‘Uo, Kristusda bicau tenesere ngebo kurure,’ tenepra, kael kepkamneng’ tenen, lyepneue.

Kristusdi mali kun nesala yuma tep, bicau teneredi, ‘Uo, amenda teka tenepnetenge’ tenen, menmena wenemna gum di, kaukemseredi, men tamserure. Atep, Yesusdi bicau tenepneudi, er kange deiki dipapu lyepneua cadi, yuk neng ton ange epra kael kepmengedi, ‘E Yesus tek sisi kaukemseredi, lyepkamsere,’ tenen, kael kepkamenge. Kael kepmengopda, Yesus tep teka tenepmengepa, bol koptapra, pio gam kuna deiyo keca dopropkamenge. Yesusdi, ‘Paulus tep kaukepra lyepsi ngeda, yuk nesala ton epmengedi, kael kepkameng’ tenen, neda ukupmanto ngebo tep, kupra deipneue.

17 Ange tep nengeda, nun nai Allah, erda Ila Nimi Deiyo Ngebo, Raja kurure. Pumun taru dordi dipra neitam taru cap, ukutaru cap, amenda doryankamre taru yuma cap, er pio kunkamre. Erda, pio gam kurur ngebo cadi, men deptue. Nimi asuru di, er nong pio men eptepe. Tek sisi Allahda, er tenpua, yuk ton men kurure. Atep nengeda, nimi yumadi, adipapu ataru pe, amenda taru yuma peda, ‘Er tep teka tenepmengedi, er tep gispal dopra, er si ila di eremkameng’ tenen, Allah moronune. ‘Angeda tek sisi kunkamre’ tenen, pio putanerura cadi, Amin pepne. Akonuma.

18 Ne mi Timotiuso, pumun taru, Allah upu lap pena deiyo neng, nabi ^{▼▼Nabi neng – Allah er upu lap pena nengda, Allahdi, ‘Nimi gekepkameng’ tenen, erdi wepra deiamu neng tep, er tek sisi upu cap, amenda kupkamre keca upu cap, lap pepu pangeda, anengdi, yuk nesala yuma tep lap perbarami. Anengda, ‘nabi neng’ penupe. Nabi neng, sun lap pena upuda, nomor 25 dirume.} nengdi, amenda kupkamu keca tenepra, kan tep lap perami upu utopu, ne peda ukutaru kange di ton cap, aupupu konum pepmakene. “Ukupkurum, ukupkurum,” pepmaken upu deiyoda, tali tep gume. Ada, jen talen nengdi, mali kun nesala tep, pio piripra puto di porbarameng utopu, ‘Apepmaken upu gekepmemdi, moupra talepmemya deiki di, Allah er pel telep kupra donkamrem,’ tenena tep, pepkene.

19 Ataru-ataru yuma neitamai di, kange bongtona gum dipapu, Allah tep, pio teka tenepra kunkamrume. Tonda, kan kange tenenange neitamai, mali kun keca inimna gum di, dumsisipu kunkamrume. “Ukupkurume,” pepra, deipmaken keca buteneda, yuk neng dingeda, akeca butene tapya deiki di, Allah tep tupa teka men tenenunge. Konum tapidi, pio kange mun kununge. Ukupmanto ngeda, laut mokon deiki embaramre gapung co, er sida kapal laut embandenkap, mankau di mokon pumbon kwamre gel dukpeprepa, mokon pumbon wekredi, jeramretopu, aneng peda utopu kununge. Teka tenena gum di, sun kange tenenange neitamaida, mok upu tupa tenengedi, mali kun keca inimnunga cadi, ukupmenga deiki di, sun kun keca yuma malipu kununge.

20 Amali kunge neng utopu, kurenge neng butene, sun sida, Aleksander cap, Himeneus cap, ukurunge. ‘Kain Jen Ngebodi aneng tep, mali kemdirepa, ila kange mun kange dounkamreng’ tenen, anengda tapnedi, Kain Jen Ngebo tep karepsi. Deiyoda, sun anengdi, ‘Allah erda tali ngebo’ tenena cap, ‘Yesus tep mali upu penada, pio mali kun keca kurure,’ tenena cap, ‘Sun butenedi kael kepkamreng’ tenen, nedi aneng sun wenemna tep, Kain Jen Ngebo, Seramki tep konum karepsi. Ne Paulusdi sekeipkene.