1Ti 2 | XteSC | STEP | Uda, Timotiuso, sun yuma adipapu kunkamrum keca tep, puto di pepkukene. Ila mambul ngeda ake. Ada, sun teka tenena nengdi, ‘Allahdi yuk nesala yuma tep, melimkamre’ tenen, sun tep Allah moronkamrume. Nimi putan keca men kwapmarepa, ikin kuserenge tep, ‘Allahdi yuk nesala makunkamre’ tenen, moronkamrume. Tonda, yuk neng yuma teneprumudi, Allah tep, “Telepe,” pepra, moronkamrume. Tonda, sundi Allah tep moupra teneprumudi, sun teka tenenange puto kemdina cap, sun dipru kwa dimna cap tep, Allah tep moronkamrume.

1 Timothy 2

Allah morona cap, er si eremna cap tep, pepu upu

1 Uda, Timotiuso, sun yuma adipapu kunkamrum keca tep, puto di pepkukene. Ila mambul ngeda ake. Ada, sun teka tenena nengdi, ‘Allahdi yuk nesala yuma tep, melimkamre’ tenen, sun tep Allah moronkamrume. Nimi putan keca men kwapmarepa, ikin kuserenge tep, ‘Allahdi yuk nesala makunkamre’ tenen, moronkamrume. Tonda, yuk neng yuma teneprumudi, Allah tep, “Telepe,” pepra, moronkamrume. Tonda, sundi Allah tep moupra teneprumudi, sun teka tenenange puto kemdina cap, sun dipru kwa dimna cap tep, Allah tep moronkamrume. 2 Mambul ton pepkusene. Ada, ila nimi deiyo neng, Raja neng cap, nimi deiki tara kunge deiyo neng yala-yala yuma cap tep, Allah moronkamrume. Ada tali tep gume. Deiyoda, nun yumadi nimi deiyo neng tep, Allah moropmepe pangeda, Allahdi aneng tep melimrea deiki di, telep kupra bouna di talenkamsenge.

Ukupmenge dingeda, telep keipsengopda, nunda, ‘Tali kange deipra, bouna di telep kupra kikiman kuna cap, Allah dumsisi kuretopu, nun peda dumsisi kuna cap, kange dipru mali kuna gum dipapu, mengnepu kuna cap kutepe’ tenen, sundi deiyo-deiyo neng tep, Allah moronkamrume. 3 Ukupra kuna tep nengeda, Allah nun Lyemna Deiyo Ngebo kange deriserure. Ada telep kuna tep pepkene.

4 Nun nai Allahda, ‘Nimi ban-ban yumada, ne Allah tep teka tenepnetenga deiki di, lyepne pangeda, ne tek sisi upu yuma kael kemkameng’ tenen, putarepa teneserure. Allahdi, ‘Nimi tuai nesala yumadi, pio tek sisi upu kael keptenge’ tenen, putaprepa teneserure.

5 Allahdi, ‘Nimi tuai nesala yumadi, tek sisi upupu kael keptenge’ tenen, putaprepa teneserura deiyoda ake. Ada, Allahda er tenpua kurure. Yuk allah utopu ngebo ton pio men kurure. Utopu, Allah dana tara, nimi yuma dana tara, daneitamai kuredi, antapra dipru dukdongopra deriserya deiyo ngeboda, Yesus er tenpu kurure. Yuk ton gume. Angebo er sida, Yesus Kristus erpu nimi cap, Allah cap antamdina deriserur ngebo kurure. Er dipapu nun cap, Allah cap antapra dipru dukdongopra deipseredi, Allah er damai tamupra deriserure. Yesus Kristusda, nimi nong utopu daudi, im deiki di tuai mutu yaua tep, er peda nimi utopu kuramu. 6 Yesus erdi, ‘Nimi ban-ban yuma, sun mali kun keca gum kupra deipnedi, kunupra lyepkamne’ tenen, er pedi, er pe nongpu karepseupa, yu nengdi popi. Ada, nun mali kunup keca tep, Allahdi tali poptapsetu dinin, Yesusdi nun mali kunange daepseredi, nun yo pununa tep depseue. Allahdi, ‘Telep taruda, ataru pua’ teneamutopu, Yesus yanamudi nun lyemna tep depseu. Angeda, Allahdi, ‘Nimi yuma lyeptene’ tenen, putarurada, Yesus yaudi, depseua deiki di, Allahdi tenerur ngeda konum jenek kupra deipseupa, kael kemnupe.

7 Allahdi, ‘Nimi ban-ban yuma neitamai di, nimi weika di lyepkamne’ tenen, putarura cadi, ‘Paulusdi nimi lyemna tep kai telep upu dopra, gonga kemna ngebo kepredi, peterep embenkamre’ tenen, wepra deipneue. Tonda, Allahdi, ‘Yahudi yala gum nesala peda, ne tek sisi upu gekepra, teka tenenkamneng’ tenen, peteremna deiyo ngebo kuna tep, wepra deipneupa, apelpu talepra kunune. Aupu yumada, mok men pepsene. Tek sisipu pepsene.

8 Uda, ne kangeda, ‘Nimi ban-ban yuma, adipapu mali kange douna cap, tulum kuna cap, upu deiki di pangdana cap, pio gum dipapu, Allah tep kange deipra, pio dumsisipu kungedi, sun lengna ^{▼▼lengna – Ada, ‘Kurun buru,’ tenena gume. ‘Lengna’ pepkada, ada ‘Mali kunange pio gum, dumsisipu kunge nengdi, sun buru erepra, Allah moronkameng,’ tenena tep pepu.} utopu buru erepmengedi, Allah moronkameng’ tenen, Allah moronune. Ne Paulusdi sekeipkene.

Nerapu sun kunkamenga tep, pepu upu

9 Uda, ne kangeda, nerapu yuma adipapu, tali lupra kuna gum, kange moupra tenepmengedi, ‘Nimi yuk neng epsengedi, nyakteneme,’ tenepra, ‘Mek-mek penkamsenunga’ tenen, bum opkal rok do, kwerya weik kwamrenge do, kenengna gume. Tonda, sunda, yuk nesaladi nun kenengna keca epsengedi, ‘Uo anerapuda, urasin pio telepe cadi, dopra nyaktepe, tenepkamseng’ tenen, potong kouna cap, emas keca kenengna cap, kunumna weik keca kum dam garangna keca cap, uda kunumna weik opkal cap, yuk kwerya keca yuma capda, weika di kenengna gume. Ukuna yumada, mali pua. Nedi, ‘Ukunkamrum,’ tenena tep, “Telep ngeda, Allah diseredi, kang deipkamser tenena deiki di, sun opkal kenengkamrume,” pepsene.

10 ‘Nimi epsengedi, kange deipkamseng,’ tenena gum dinin, Allahdi, ‘Ne si erepra, ne tep kange deipmengedi, ne melimna nerapuda, ukupra teleppu kunkamenge,’ teneseretopu, kunkamrume. Ada, ‘Nerapu yumadi nimi makuna tep, telep pel dona cap, nesala bicau tenepra makuna cap, dumsisipu kunkamenge. Yuk nesala, akunge keca epmenge deiki di, ‘Anerapuda telepe pua,’ tenepkamenge. Kwerya kunumna weik keca kenengmenga deiki di gume. Allah si eremengedi, dumsisipu kunge nerapuda, amali kun keca men kununge.’ Allahdi tenepseutopu, kunkamrume.

11 Tonda, ne kangeda, nerapu yumada, sun adipapu Allah upu peteremna taru kael kemna tep, ‘Nun nai yapudi pepkuseng upu, moupra gekepkamep’ tenen, nimi amngaipu kungedi, kange dipru bouna di dimpeprappu, nimi upu moupra gekenkamenge. Nimidi peteremenge taruda, nerapudi upu men penkamenge. 12 Ne kange tenepnedi, peteremnun ngeda, nerapu yuma, nimi tep, deiki tara kupra kepmengedi, “Ukupso, ukupso,” pepra, Allah upu men petereptenge. Ange utopu kuna tep nengeda, nedi upu sengdongosenune. “Nerapudi nimi tep, Allah upu men peptereptenge,” pepne. Ne Paulusdi sekeipsene. Nimi cap, nerapu cap, kikiman Allah upu ati bulupmenge taruda, nerapu erepmengedi, nimi deiki tara utopu kupra, Allah upu peteremnada, meme. Allah upu peteremna taruda, nimi dipapu peterepmengepa, nerapuda adipapu upu pena gum, dimpeprappu moupra gekepmengedi, kael kemkamenge. 13 Ada tali tep gume. Ukunkamenga deiyoda, pepkukene. Ada, Allahdi Adam menmena ketekeipudi, amenda taruda, Hawa ketekeipka tep aupu pepmasene.

14 Ton deiyoda ake. Kain Jen Ngebodi mok upu mawa di pepupa, Adamdi menmena gekepudi, teka men tenepu. Hawadi menmena amok upu gekeprap, teka tenepudi mali kupupa, amem co du jepreia tep, sun butene mali kuna deiyo keca dopropreiya deiki di, mali kuramrei. 15 Teka, Hawa mali kupupa, Allahdi wenepu dinino, Allahdi teka tenenge nerapu tep, lyemrure. Nerapu sunda, Allah teka tenepmengedi, yuk nesala tep, bicau tenepra makuna cap, tali-tali kuna gum, kange moupra tenena cap, Allah dumsisi kuretopu, pio dumsisi kuna cap kupmenge pangeda, sun nyapu derin taru neitamai yuma, Allahdi, ‘Anerapu depnung’ tenen, kalekra melipredi lyemdirure. Ne Paulusdi sekeipkene.