1Ti 3 | XteSC | STEP | Apepkuken upuda, pio tek sisi upu cadi, nimi ban-ban yuma adipapu aupu teka teneptenge. Ada, ware ngebo do yuma, ‘Uo, Allah upu peteremna neng, sun pel dona cap, sun dipru makupra dina cap tep, sun deiyo ngebo kutene’ tenen, dipru putarepa kure ngeboda, angebo pio telep mambul pel putarure.

1 Timothy 3

Allah upu peteremna neng, sun deiyo neng cap, Allah teka tenena neng, sun melipra pel don neng cap tep, pepu upu

1 Apepkuken upuda, pio tek sisi upu cadi, nimi ban-ban yuma adipapu aupu teka teneptenge. Ada, ware ngebo do yuma, ‘Uo, Allah upu peteremna neng, sun pel dona cap, sun dipru makupra dina cap tep, sun deiyo ngebo kutene’ tenen, dipru putarepa kure ngeboda, angebo pio telep mambul pel putarure. 2 Uda, Allah upu peteremna neng, sun deiyo talepra pel dopmanto neng, sun adipapu kunge keca lape pepkukene. Sunda, mali kuna pio men kuramengepa, yuk nengdi, “Anengdi mali kunge kecada, ake-ake,” men pepmanto nengpu, wepra derina telepe. Tonda, sunda, nerapu tenpupu dopra kungedi, ‘Tali lupra kunkune,’ tenena gum dipapu, sun pe kuna keca tep moupra didangedi, pukam kuna cap, berbera tulum kuna gum, bouna di kuna cap, ayuma ukuramenge nengda, apel dona tep, wepra derina telepe. Ato neng tep nengeda, yuk nesaladi, “Anengda, tek sisi dumsisipu kununge,” pepra, teneramenge nengpu, apel dona tep, wepra deiptenge.

Tonda, yuk nesala do, nimi bo neng do, sun makuna tep, sun ati wekra kuna tep, buplan pangdinung neng wepra derina telepe. Anengdi, mambul pel dona tep, ‘E, tek sisi telep kuptepe ngeda ake,’ tenepmengedi, wang-wang pena cap, walwal kuna cap gum dipapu, ila kael deiki di, lap pen upu pesenunge. Tonda, yuk neng kael kemna tep, telep kupra petereptenge neng wepra derina telepe. Ukuramenge nesala pua. Yuk kunge nengda, wepra derina gume. 3 Wepra deipkamrum neng, men kuptenge kecada pepkusene. Ada ake. Sundi, kange yawaramne yu me weika di jena cap, tulum kupra nimi podana cap, upu deiki di pangdana cap, ‘Co bo weika di doproptene’ tenen, dipru engena cap, men kuptenge. Bouna di telep kupra kun nengpu wepra deipmumpa, apel doptenge.

4 Allah upu peteremna neng, sun makupra dina tep deiyo neng adipapu kunkameng kecada ake. Adeiyo kunkameng nengda, sun nyapu cap, sun nerapu cap, sun kunge keca yuma cap, moupra didangedi, dumsisipu kunkamenge. Tonda, sun telep kupra kungepa, sun pe nyapu sisa di, sun nai yapu upu moupra gekenunge. Ato deiyo kepmanto nengda, apel dona tep, wepra derina telepe. Dinino, aneng sun nyapu sisa di, sun nai yapu nengdi penge upu men gekepmenge pangeda, peteremna neng sun deiyo kuna tep, ato neng wepra men deipkamrume. 5 Ada tali tep gume. Ware neng do yuma, sun pe nyapu cap, sun pe nerapu cap, sun pe pel cap, moupra didangedi, telep kupra pel men dopmenge nengda, ware kuprap di, Allah upu peteremna neng cap, Allah tep teka tenena nesala cap, sun deiyo neng keptengedi, pel telep kupra doptenge do? Ange men kuptenge.

6 Uda, Allah upu peteremna neng cap, Allah tep teka tenena nesala cap tep, deiyo neng kupmanto nengda, ukupu teka tenenenge nengda, apel dona tep, wepra derina gume. Ukupu teka tenepmang neng wepra deipmumnyopda, amenda taru sundi, ‘E, nunda ila neng konum kunupe’ tenen, dipru erepdangedi, gemenge pangeda, Kain Jen Ngebodi, mali kupupa, ‘Allahdi er tep wenepra poputopu kupnunga’ tenen, pepne. Ada, Kain Jen Ngebodi, ‘Neda pio deiki tara deiyo ngebo kunkamne’ tenen, mali kupupa, ‘Allahdi weneputopu, kupnunga’ tenen, pepne.

7 Ange yuma, angepu gum dinin, tonda, Allah teka tenena gum nesaladi, adeiyo talepra kupkameng neng tep, “Sun mali kun kecada ake-ake,” pepra, ‘Lulupra deipnung’ tenen, yuk tali nengdi, “Anengda, pio dumsisi kununge,” tenepmenge nengpu, sundi wepmumpa apel doptenge. Yuk-yuk kunge nesala wepra deipmum pangeda, amenda taru Kain Jen Ngebodi, sun tep mali kweipkamre. Ukupmantoda, Kain Jen Ngebodi, er pena pumbon wekmengepa, youpkamre. Ada, Allah upu peteremna neng, sun dina cap, makuna cap deiyo-deiyo nengdi, mali kupmengepapu, ‘Dakwapye’ tenen, Allah upu ati deiyo neng pel dopbandenkapmengedi, amenda taruda, sun yuk nengdi, sun adeiyo neng tep, “Anengda mali neng pua,” ‘Pepsenung’ tenen, ne Paulusdi sekeipkene.

Allah teka tenena nesala makuna neng tep, pepu upu

8 Uda, Allah teka tenena nesala tep, sun makupra pel dopmanto neng upu pepkukene. Arup pepmakena utopu, yuk nengdi sun wepra derinkamrum neng tep, ‘Anengda telep kunge neng pua’ tenepmenge nengpu, wepra derina telepe. Tonda, anengda mawa di pena gum, tek sisi upu pena cap, yu me kange yawaramne me weika di men jenge neng cap, tonda, ‘Co bo weik doproptepe’ tenen, putana weik kuna cap, mali-mali kuna cap, mawa di pena cap, tenena deiki di, pel mali kupra dona cap, men kuptenge. Ange-ange yuma, pio men kunge nengpu apel dona tep wepra derina telepe. 9 Tonda, sun kange tenenange neitamai di, ‘Ne mali kune keca dakwapye’ tenena gum di, inimna gum, malinge yuma tapra, dumsisipu kungedi, Allah tep teka tenepra, pio moupra talen nengpu, apel doptenge. Teka tenepra pio moupra talenkameng keca ada, menop taru Allahdi jenek kupra men lap peamu dinin, ukutaru konum katuai di lap pepseupa, peteremamsei nge, pio neitamai ngepu talenkamenge. Ne Paulusdi pepne.

10 Tonda, Allah er tep teka tenenung neng, sun makuna deiyo neng kemna tep, aneng wepra deipkumum taruda, menmena yuk nengdi, sun kunge keca tep, pio moupra dipetepmengepa, mali kun keca men kungedi, pio dumsisi kunge nengpu, aneng dopra ereiptume. Gum dingeda, Allah er nyapu makuna deiyo neng pel talepra men doptenge.

11 Ange utopu, amakuna deiyo neng sun nerapu do, tonda Allah tep teka tenenge nesala makuna nerapu do, anerapu yumada, sun kunge keca tep upu ton pepkusene. Amakuna deiyo neng, sun domenge nerapu tep, yuk nengdi, “Anerapuda telep kun nerapu pua,” tenepra peramengepa, ato nengpu, apel dona tep eremdina telepe. Sun nerapudi, yuk nesala tep, tulum kuprepa luludina gum dinin, ware pel do, ware kun keca do yuma, tali lupra kuna gum di, kange moupra tenepmengedi, dumsisipu kunge nerapu, sun apu yapu eremdina telepe.

12 Allah tep teka tenena nesala, sun melimna deiyo ngeboda, er ner tenpupu dopra, kuna ngebo, apel dona tep wepra derina telepe. Tonda angebodi, er nyapu cap, er ner cap, er kun keca yuma cap, er pedipapu moupra diredi, telep kuramre ngebopu, wepra derina telepe. 13 Angeda tali tep men pepsene. Deiyoda ake. Allah tep teka tenenge nesala makuna deiyo nengda, apel talepra konum kunupsek pepra doramenge nengda, yuk nesaladi sun tep, “Anengda pio telepe,” pepra, eremengedi gudinunge. Tonda, konum dumsisikra apel dopmenga deiki di, kange tenimtona gum dipapu, Yesus Kristus tep, teka tenemenge kecada, kwar-kwar kuna gum dipapu, dimpeprappu puto di teka tenenunge. Yesus Kristus dipru dukdongopra kikiman kununga deiki di, puto di teka tenenunge.

14 Uda, ne mi Timotiuso, ‘Kan damai menmena yatene’ tenen, putanerur dinino, ‘Menmena do, sika di yankamne do?’ tenen, ukutaru asurat sekeipkene. 15 Menmena di men yanmanto kupnyopda, sika dipu yantenya peda, asurat deiki di, Allah er tep teka tenenge nesala adipapu kunkameng kecada pepkukene. Ada, ‘Telep kuna ngeda ake’ tenepkamruma tenena tep, aupu sekeipkene. Allah teka tenepmepupa, dipru dukdongoseu nesala yumada, Allah er bungsilip utopu nesala kunupe. Allahda pio Gam Kure Ngebo kurure. Nunda, er tep teka tenenupa cadi, er nyapu sisa utopu kunupe. Nimi ati ayumna co ikra dopmengepa, adeiki di longna gum, puto tengamretopu, Allah tep teka tenenup nesaladi, Allah er tek sisi upu moupra talepmepedi kalengkamepe.

16 Apepkuken upuda, ‘Allahdi akupu ngeda, ware kuprap di kuramu do?’ tenen, nong neitamainge yumada, men kael kepmanto, tonda men tenipmanto kuserure. Ada, Allahdi iniamupa, nimi men kael keami dinin, ukutaru Allahdi ataru neitamai ila mambul upu konum jenek kupra lap pepseudi, katuai keipseue. Ada, ake.
Allah nimi nong utopu daudi, nimi epkami atep, katuai di yaupa, nimidi konum dirami.
Allah er Lek Sambala pel dopka deiki di, ‘Yesusda er tek sisi Allah er Mi Sisa kurure’ tenen, ‘Nimidi teka tenepra, kael kepkameng’ tenen, jenek keipseupa kael kepmepu.
Jenek keipupa, Allah er im deiki pel don neng, malaikat yumadi epi.
Nimidi, Yesus er upu dopra, nimi nesala ban-ban yuma tep, amutu-mutu yuma bena peteremamipa, Yahudi yala nesala peda teka tenerami.
Yesus er upu peteremamipa, nesala ban-ban yuma kunge nesala kankan di, nesala yala-yala yuma weika di gekepra teka tenerami.
Amenda sirya taruda, Allahdi Yesus tep, pio telep kweipudi, dirine di erepra im deiki dubeupa, im deiki tarapu pio telep cap, puto cappu kurure.