1Ti 4 | XteSC | STEP | Allah er Lek Sambaladi, konum katuai di lap pepseu upuda ake. “Sirya gawal dangne taruda, ton neng dingeda, Allah er tek sisi upu yanipmengedi, mawa di pen isok cap, mok upu di pen isok capdi peteremenge keca gekepra, ange talepra dombengedi, isok tara kepronkamenge.”

1 Timothy 4

Allah upu yaniptapra mawa di, mok upu pen neng tep, pepu upu

1 Allah er Lek Sambaladi, konum katuai di lap pepseu upuda ake. “Sirya gawal dangne taruda, ton neng dingeda, Allah er tek sisi upu yanipmengedi, mawa di pen isok cap, mok upu di pen isok capdi peteremenge keca gekepra, ange talepra dombengedi, isok tara kepronkamenge.” 2 Amok upu peteremna kecada, pio mali upu, mok upu pen neng aupu dopra, peterepmenga deiki di, amok upu nun damai yakaserure. Anengda, ‘Mok upu penupe’ konum tenenung dipunen, ‘Ange dakwapye, mok upu akaprepapu, tali lupra peteremkamepe’ tenenunge. Aneng, sun kange tenena ngeda, yan tei deriramseretopu ukurure. Menop taru, telep kupra tenerami dinin, mali kun keca weik kuramya deiki di, ukutaruda, moupra men kael keptengedi, telep kupra men tenenunge. Atep ukutaruda, sun kange tenenange deiki di, ‘Malinge ake, dumsisinge ake’ tenen, moupra men teneptenge.

3 Atep, sundi peteremnung upuda, ake. “Nimi ner dona mali, adipapu kaber nengda, kaberpu pio kunkamrume. Jen keca jena tep nengeda, ton jen keca yalada, adipapu men jenkamrume, ton jen keca yalada jenkamrume,” pepra, upu sekmengedi, peteremnunge. Upenung dinino, Allah tep teka tenepra, er tek sisi telep upu konum kael kemenge nengda, Allahdi anesala tep, utenerure. Ada, ‘Jen keca yala-yala yumada, sun jena tep ketekepra deipsa tep, ajen keca yala-yala yuma dopropmengedi, ‘Telepe,’ pepmengedi, tali lupra jenkamenge’ tenen, akeca-keca yuma ketekepra deipseu.

4 “Akeca-keca yuma jenada telep pua,” pepmakena deiyoda ake. Ada, Allahdi ketekeiamu keca yuma, ware yala keca do yuma, Allah tenepmepedi, akeca tep, “Telepe,” pepra, kange deipra dopropmepyopda, akeca jenada, teleppu kurure. Akeca yuma tenpunge pe tep, ‘Mali do?’ tenen, tamna gume. 5 Jen keca do, ware yala keca do yuma, tamna gum, tali lupra kange deipra doproptepya deiyoda butene. Tenpu ngeda, Allahdi, “Akeca-keca ketekeipsi keca yuma teleppu kurure,” peipseu. Butene ngeda, nundi akeca tep, “Nun nai Allah, Telepe,” pepra, Allah tep moropmepya deiki di, Allahdi akeca telep kemdiserure. Atep jen keca yala-yala yumada, tali lupra jeptepe. Ne Paulusdi pepkene.

6 Timotiuso, ukupu pepmaken keca yuma dopra, yuk teka tenena nesala tep, peterepmemnyopda, adeiki di Yesus Kristus, er amutara kumemdi, er telep pel melimna ngebo kuna tep, telep kunkamrume. Ukupmem dingeda, Allah er upu teka tenenup keca cap, yuk nesaladi telep kupra peteremamkeipa, kael kepmumdi, moupra talemem keca cap, aneitamai di nepra kan dipru puto kepredi wisinkamkere. 7 Allahdi men peiamu dinin, sun yuk nengdi tali nungameng nenung upu cap, nong men kupkamre upu, tali-tali peteremameng upu capda, kandi ato upu yuma gekepra teka tenena gume. Ange gum dinin, ‘Allah er dumsisipu kuretopu, ne peda kutene’ tenen, kan pedi moupra didamemdi, kael kemkamrume.

8 “Ukunkamrume,” pepmakenada deiyo ake. Ada, nun nong puto kemdina tep, kamet pena cap, puto di pel dona capda, yambul telep kuserur dinino, Allah pio dumsisipu kuretopu, nun peda mengnepu kuna tep, adipapu kael kemnada, ila mambule. Ange di, nun telep kemdiserura tepa. Dumsisi kupya deiki di, yuk kunup keca yuma neitamai ton melimserure. Nun kaele, ukutaru tuai mutu neitamai tupa kupe taru pe, amenda im deiki bena kunkamep taru peda, dumsisipu kupmepe pangeda, ange di melipra telep kemdinkamsere. Ila mambul ngeda, ‘Allah dumsisi kuretopu, ne peda dumsisipu kunkamne’ tenen, kunkamepe.

9 Apepkusen upuda, pio tek sisi upu cadi, nimi ban-ban yuma teka teneptenge. 10 Allahda, pio Gam Kuna Deiyo Ngebo kuredi, ‘Nimi ban-ban yuma lyeptene’ tenen, putarur ngebo cadi, nimidi teka tenepmengopda, tek sisi lyemserure. Nimi Lyemna Deiyo Ngebo kurura cadi, ‘Er dipapu lyepkamser’ tenen, Allah er deikipu nun kange derinupe. ‘Er dipapu melimkamser’ tenen, dinapu kunupe. Ukure ada, pio teka tenenupa cadi, pio pe deipra, puto di er pelpu donupe.

11 Ne konum pepmaken upu dopra, kandi yuk nesala tep, “Sun adipapu ukunkamrume,” pepra, puto di peteremkamrume. 12 Tonda, yuk nengdi kan tep, “Kanda kaber ngebo tupa kuruma cadi, kan upu men gekepkukep atep, dakwapye,” pepra pepkengopda, sun aneng tep upu sengkamrume. ‘Dakwapye,’ tenena gume. Ange gum dinin, kan kumem keca, dumsisipu kupmemnyopda, yuk neng epkengedi, kael kepkamenge. Atep, pio telep ukupmanto ngeboda, kanpu kunkamrume. Ada, kan upu pena cap, kan kun keca yuma cap, yuk neng tep bicau tenepra makuna cap, Allah cap, er upu cap teka tenerum keca cap, mengne kupra, dumsisi kuna cap, ukumemnya deiki di yuk neng kael kemkamkenge.

13 Kan damai kapul men yankamne taru neitamai yuma, tamna gum di, pio tupa-tupa apepkuken pelda donkamrume. Ada, ‘Yuk nesala gekenkameng’ tenen, katuai nimi gekengai di, Allah upu nungkamrume. Tonda, Allah er upu deiki di jenek lap pena cap, “Ukupso,” pepra, Allah upu peteremna cap, “Ukuna meme,” pepra, wenemna cap pio kunkamrume. 14 Pumun taru apel kapul men doramum taruda, Allah upu ati deiyo nengdi, sun buru kan nong deiki deipra, “Allah er pel pio telep kupra pel ukupra, ukupra donkamre,” pediramkeiya deiki di, Allah er Lek Sambaladi apel moupra dona deiyo keca karepkeu. Akarepkeu kecada, ‘Dakwapye’ tenen, tamna gume. Apu tenepra pe deipra, puto di pel donkamrume.

15 Apepmaken upu yumada, tamna gum dipapu pio pe deipra, pel donkamrume. Kan kange cap, nong cap, puto cap yuma deiki di pio piripterepra domem pangeda, yuk nesala epmengedi, ‘E, apel donmarada, telep kupbanmar adano,’ tenenkamkenge. 16 Kan kun keca yuma cap, kan peteremem keca yuma cap, ‘Mali kupnun, tonda mali pepnun’ tenen, kan pedi, kan pe kumem keca yuma tep, pio moupra didankamrume. Ada, ‘Ne pe, ne peteremne upu gekenenung nesala peda, Allahdi lyepkamser’ tenen, kan adipapu tamna gum di, tupa-tupa ukunkamrume. Ukupmem pangeda, Allahdi kan cap, kan peteremkamrum nesala cap lyepkamsere. Ne Paulusdi pepra sekeipkene.