1 Timothy 5

Wisi neng cap, wisi nerapu cap, solu nerapu cap tep, pepu upu

1Uda, yuk upu ton pepkukene. Wisi neng tep nengeda, lungdon pea wenemna cap, deremna cap gume. Ange gum dinin, ‘Anengda, ne nai yapu utopu kununge’ tenepra, bouna di, “Naio, ukuna telepe,” pepra, peteremkamrume. 2Yuk kaber neng utopu kunung nimida, ‘Ne weit yapu utopu,’ tenepra kunkamrume. ‘Wisi nerapuda, nanin yapu utopu,’ tenepra, bouna di kunkamrume. Yuk kaber nerapu dangeda, mali tenena cap, mali kuna cap, pio gum dipapu, ‘Ne weit nerapu utopu kununge,’ tenepmemdi, teleppu kunkamrume.

3Sun tek sisi solu nerapu kungepa, yuk neng yuma konum tapmengepa, sun yuk kunge solu nerapuda, gispal dopra makunkamrume. Timotius, kandi yuk nesala yuma tep, aupu peteremkamrume. 4Ukunkamrum dinino, ware solu nerapu do yuma, sun nyapu cap, sun nyapudi deipmenge nyapu cap, tupa kunge pangeda, tali lupra makuna gume. Asolu nerapu, sun pe nyapu nepmenge dingeda, sun adipapu sun pe sun nin yapu sisa tep, makunkamenge. Ada, menmena kael keptenge kecada, ‘Allah teka tenenupa cadi, tali men peptapkupe’ tenen, kael kepkamtenge.

Allah teka tenena nesaladi, sun pe tara nesala yuma tep, makuramengtopu, ‘Nun peda ukunkamep’ tenen, kael kepkamenge. Ukupmenga deiki di, sun nai yapu cap, sun nin yapu capdi, sun nyapu taru, bicau tenepra makuramsei utopu, ange yo pununa tep, kaberto nengdi, sun nai yapu cap, sun nin yapu cap tep adipapu makunkamenge. Tonda, ukupmenge pangeda, Allahdi pio kange deriserure.

5Ware solu ner do yuma, er makuna neng cap, er nyapu cap tek sisi men kungepa, akeca-keca putare pangeda, utenerure. ‘Gume, Allah er dipapu melimkamnere’ tenen, teka tenepmengedi, keteng komuni pe, lukunda peda, “Ne nai Allah melipneo,” pepra, Allah pio moronunge. Men tamnunge.

6Dinino, ware solu ner do yuma, ‘Gume, ne kange deipnedi kune keca cap, akeca-keca weike dopropkune,’ tenepredi, gemena cap kure nerda, gam tupa kurur dinino, konum depi nesala utopu kurure.

7Ange tep nengeda, ware neng do yuma, ‘Mankau kange doupra mali kupnung’ tenen, apepkuken upu dopra, nesala yuma tep peteremkamrume. Ada ake. 8Ware ngebo do yuma, ila mambulnge er nai sisa cap, er nin sisa cap, er ner cap, er nyapu sisa cap, uda sunpuda gum dinin, er yala neng cap, er ati kikiman kunge neng cap, anesala yuma sun putapre keca tep, bicau tenepra men makupyopda, ada pio mali. Ukunada, Allah upu yanitamna cap, Yesus tamna cap utopu kurure. Yesus teka men tenenung nesalada, yambul mali kunung dinin, ato ngeboda, pio ila mali kurure.

“Solu nerapu makuna tep, sun sida, Allah upu ati nimi si sengna buku neitamai sekra deipkamrume,” pepu upu

9Uda, Allah upu ati buku neitamai solu nerapu makunkamruma tep, si sengna tep nengeda, apepkuken keca kunge nerapu, sunpu si sengna telepe. Sun wisi derinada, keteng tamun denge weik 60 tahun utopu konum kupre nerapu. Tonda, sun apu yapu tupa gam kurami taru, tapra yuk neng men dorami nerapu sun sipu sengna telepe.

10Tonda, yuk nesala yumadi, asolu nerapu sun kurami keca konum epra kael keamidi, “Anerapuda pio teleppu kununge,” pepra perameng solu nerapuda, sun sipu sengna telepe. Aupuda ake. “Gume, asolu nerapu, sun telep kun keca weike akurure. Sun pe nyapuda, telep kupra gwanamamipa, ila di nerami. Nimi bo neng tep, ‘Nun ati kuna telepe,’ pepra, buplan pangdiramidi, melimami.” Aupu utopu upu peptenge nerapuda, sun si sekra makuna telepe.

Tonda, yuk nesala makuna tep, ‘Apelda mali pel cadi, nun telep nerapudi men pel dopkupe’ tenena gum di, yuk teka tenena nesala tep makurami. Tonda, kange mun kuramu nesala makurami. Uda, ware telep kun keca do yuma, yuk keca tenena gum, apelpu dopra moupra kurami. Yuk nesaladi, asolu nerapu tep aupu utopunge peptengopda, ‘Ato solu nerapuda, makunkamepe’ tenen, si sengna telepe.

11Dinino, solu nerapu dinin, pio wisi men deipi nerapuda, sun si buku neitamai sengna gume. Deiyoda ake. Si sengne taruda, sundi, “Gume, nundi Allah er pel dopra kunkamepe,” pepra, tali pepra iniptapmengedi, dakuramenganen, amenda taru, sun nong putapre keca tep, ‘Uo, apel tapra, nimi kange di ton cap doptepe’ tenen, putarepa tamengedi, nimi ton donunge. Atep sun si sengna gume. 12Ukuramenga deiki di, sun menmena, “Ukunkamepe,” pepra, Allah tep pediraminge tamengedi, Allah tep mali kungepa, Allahdi anerapu wenepkamre. Atep, solu nerapu makuna buku neitamaida, kaberto solu nerapu sun si sengna gume.

13Angepu gum dinin, ton mali kunungada pepkukene. Asolu nerapu kaber kuramenge nerapuda, tek sisi pel dona gum, tali-tali kungedi, yuk nesala ati tali wengbanunge. Sunda, tali sal nong-nong kamengedi, yuk nesala kunge keca pio dinapu kungedi, yuk ati nesala tep, tali lap perbanunge. Aupu penge taru neitamai di sun telep nesala men peptenge upu, anerapudi tali lupra mali-mali upu penunge.

14Apepmakentopu kununga cadi, ayuma tep nengeda, ne kangeda, solu nerapu dinin, sapal men deamenge nge kaber nerapu utopunge tep, upepra peteremsenune. Sun adipapu nimi dopmengedi, nyapu deipra, sun kunge keca yuma tep, moupra didangedi telep kupra kunkamenge. Ukupmenge pangeda, yuk nesala, Allah teka men tenenge nesaladi sun tep, “Anerapu sun mali kun kecada, ake-ake,” pepra, lulupra men deipsetenge. Mali men kupmengepa, deiyo men kapkamra tep, aupu men peptenge. 15Apepmakenada, tali tep gume. Yuk solu nerapudi Yesus Kristus bisi konum tapra, Kain Jen Ngebo er bisipu konum embanunga tep pepkene.

16Uda, ware teka tenena nerapu do yuma, sun yala nerapu solu konum kunge pangeda, sun adipapu asolu nerapu tep makunkamenge. Ada, ware mutu do yuma, Allah teka tenena nesaladi, asolu nerapu yuma tep, ‘Uo, ware kupra melimkamep do?’ tenen, ‘Ikin kange dopnung’ tenen, pepne. Ato solu nerapu gum dinin, Allah teka tenena nesala, mutu-mutu yumadi, tek sisi ikin kange doupra kunge solu nerapu, sun yala neng men kungepa, ‘Akeca-keca pio gum kupupa, putare nerapu makunkameng’ tenen, pepkene. Ne Paulusdi upepra sekeipkene.

17Ukuda, yuk upu ton pepkukene. Allah upu peteremna neng, sun deiyo neng yuma tep nengeda, yuk teka tenena neng yumadi, aneng tep sun adipapu weika di gispal dopra eremdinkamenge. Allah upu ati deiyo neng yuma tep, gispal donkameng dinin, ila mambul ngeda, ada, Allah upu pio moupra lepra peteremna cap, ‘Yuk nesala teka tenenkameng’ tenen, pukamkwa pena cap kungedi, pel donge neng tep, ila weika di gispal donkamrume, pepkene. 18Weika di gispal dopra aneng eremdinkamrume pepmakena deiyoda ake. Allah upu deiki sekeiamsei upu ake.
‘Beras utopu keca lana tep, sapi bisamdi beras deiki yanipra embare taruda, ‘Er ton bupra jeprur’ tenen, er sipyal tapu koudongona gume. Er pe ton bupra jena telepe.’ (Ulangan 25:4)

Tonda ange utopu.
‘Ware pel don neng do yuma, pel dopmengopda, sun pel domenga deiki di menenga keca adipapu karenkamrume.’ (Lukas 10:7)

Aupu yumada, akapka cadi, sundi sun pe keca bokra, sun peteremna deiyo neng cap, sun Allah upu ati deiyo neng tep, makupra karenkamrume.

19Uda, yuk nengdi, “Gume, Allah upu ati deiyo ngebo, er mali kure kecada ake-ake,” pepra, er nong deiki ikin keca deipmengopda, tali lupra gekena gume. Gekena gum dinin, er mali kure keca, yuk neng ton butene do, weneri do, sun pe ton epmengedi, kikiman utopu peptenge teptoda, adeiki dipapu gekenkamrume. 20Allah teka tenena nesala, sun deiyo neng kan-kan di, tek sisi tupa mali-mali kunge pangeda, aneng tep yuk nesala yuma, katuai gekenmangai di, lungdon penkamrume. Ukunkamruma deiyoda, sun yuk deiyo neng gekepmengedi, ‘Uo, nun peda mankau kange di mali kupnup’ tenen, ‘Moupra dindankamepe, tenepkameng’ tenen, ukunkamrume.

21Uda, Timotiuso, ne ukupu pepmaken keca yumada, pio moupra talepmemdi, peterepra kunkamrume. Allah cap, Yesus Kristus cap, Allahdi er im deiki pel melimna neng, wepra deipu neng malaikat cap, sun yumadi pio gekepra disenunga cadi, ne pekene upu moupra talenkamrume. Tonda, ‘Anengda ne kayapu neng cadi, men wenepkune, dakwapye,’ tenepmemdi, yuk orneng tep, ‘Puto di penkamne,’ tenena gum dipapu, ware nesala do yuma tep, utopu tenepra, dipru wilimdana gum di, telep kupra peterepra kunkamrume. Ne Paulusdi pepkene.

22Tonda, ‘Anesalada, Allah er pelpu donkameng’ tenen, ‘Sun nong deiki ne buru deipra, Allah moropnedi dokotepkamne’ tenen, tali lupra menmena men kunkamrume. Ada tali tep gume. Deiyoda, anengdi mali kupmengop peda, moupra tenena gum di, menmena sun buru sun nong deiki deipra, Allah moropmemdi, menmena dokotepmemnya deiki di, ‘Kan peda mali kuprum’ tenena tep, pepkene. Yuk neng mali kun kecada, kan cap kikiman mali kuna gume. Kanda mali kuna pio gum dipapu, dumsisikrap kunkamrume. 23Timotiuso, ataru ton, ataru ton kan mundu pu weika di jekerura tep, tonda, kan mundu pu jeramkerya gum kuna tep nengeda, tali yo mepu jerumada gume. Kan pu cap, mundu cap telep kudina tep, kange yawaramne me, anggur me meteka di jena telepe pepkene.

24Uda, Allahdi do, nimi deiyo nengdi do, upu bokra wenemna taru tep, ton neng dangeda, nimi wenemna deiyo neng damai kapul men dubenge taruda, katuai di pio mali kupmengepa, yuk nesala epmengedi katuai lap pepmengepa, yuma gekepra kael kepmengepane, sun mali kun neng amenda yakanunge. Ton neng dangeda, telep kun neng utopu kupra tali lupra nimi wenemnai yangepane, upu talepmenge taru dipapu, sun mali kuramenge keca jenek kemrure. 25Ange utopu, nesaladi telep kurameng keca peda, utopu katuai kupkamre. Ton neng dangeda, sun telep kun keca katuai kupmengepa, yuk nesala yuma epmengedi kael kemnunge. Ton neng dangeda, telep kunge dipunen, yuk nesaladi ataru dipu men dingedi, men kael kemnunge. Dinino, ange peda amenda taru men inipmanto keca cadi, katuai kupkamre ja.