1Ti 6 | XteSC | STEP | Mesum dipu tali pel don neng mali kupmengepa, yuk nesala epmengedi, ‘Allah er si cap, nun peteremnup upu, Allah upu cap tep, mali upu pepra luludisenung’ tenen, ware pel don neng do yuma, sun deiyo nengdi co bo deiki kunupipa, mesum dipu tali pel donung neng yumadi, sun pel deiyo neng tep, tali mawa di pertamna gum dinin, gispal dopra telep kunkamenge.

1 Timothy 6

“Sun yumadi, sun deiyo neng tep, gispal dopra, teleppu kunkamrume,” pepu upu

1 Mesum dipu tali pel don neng mali kupmengepa, yuk nesala epmengedi, ‘Allah er si cap, nun peteremnup upu, Allah upu cap tep, mali upu pepra luludisenung’ tenen, ware pel don neng do yuma, sun deiyo nengdi co bo deiki kunupipa, mesum dipu tali pel donung neng ^{▼▼co bo deiki kunumami nesala – Co bo deiki kunumami nesalada, isomka nengdi, pio kankan kunge nesala tep, co bo deiki di kunuamipa, akankan kunge nesaladi sun isomka nesala tep, sun pel talipu pel dorami. Tonda, lap pena upuda, nomor 36 dirume.} yumadi, sun pel deiyo neng tep, tali mawa di pertamna gum dinin, gispal dopra telep kunkamenge. 2 Angetopu, sun mesum dipu tali pel donung nesala dinin, sun deiyo neng, Allah teka tenepi neng kungopda, sun amutara pel dopra kunge nengdi, ‘E, nun deiyo nengda, Allah teka tenena neng cadi, nun yambul utopu neng kunupa tep, yambula dipu gispal dopra kunkamepe’ tenena gume. Angeda pio gum dinino, apel don nengdi, sun deiyo neng teka tenepi neng tep nengeda, yambula di gume, pio telep kupra, sun pel melipra donkamenge.

Deiyoda, sun pel dopmengepa, telep kupmengedi dopropkameng nengda, Allah teka tenena neng kununga tep, weika di gispal dopra kunkamenge. Tonda, amutara kupra pel donung nengdi, sun deiyo neng tep, sun adipapu bicau tenenkamnunga tep pepkene. Atep, aca di deiki tara pepmaken upuda, mesum dipu tali pel dopra kunge neng tep, puto di peteremkamrume.

“Ne kayapu, ‘Co bo weik doproptepe,’ tenena deiki di mali kununge,” pepu upu

3 – 4 Ware ngebo do yuma, mok upu peterepredi, nun Deiyo Ngebo Yesus Kristusdi peteremamseu upu cap, Allahdi, ‘Ukunkamenge,’ tenepseutopu, peteremna upu cap, teka tenena gum di, tapra yanitamre ngeboda, sal nong-nongpu kupredi, ‘Neda ila ngebo’ tenerur dinin, tek sisi pio walwal ngebo kurure. Akeca-keca yuma moupra men tenerure. Ato ngeboda, nimidi upu deiki pangdanung upu cap, moupra men lap pepmanto upu dinin, “Aupu deiyo ake-ake,” pepra, tulum kuprepa, deremdangedi, dipru yuk-yuk wilimdanung upu cap tep, pio putarure. Amali upu deiki di, nimi dipru wilimdangedi, ton ngebodi yuk ngebo tep, ‘Uo, angebodi mali kupkamner do?’ tenen, kware tenedanunge. Ato ngeboda, amali upu tep, kange derirura cadi, ukunada mali tep, erda pu jeramre ngebo utopu kurure. Ne Paulusdi pepkene.

5 Ukunga deiki di, kange deipra telep kupra kikiman kuna pio gum di, mali tenedana cap, pangdana cap, podana cap kununge. Akunge nesalada, sun kange dipru pio mali kupka cadi, tek sisi moupra men teneptenge. Allah er tek sisi upu tapra yaninunga cadi, ukutaruda dumsisi keca men teneptenge. Deiyoda sun dia. Tonda, aneng sun mali tenenungada, ‘Allah upu dopra yuk neng tep peterepmepyopda, amendada yuk nengdi co bo karepkamsenga deiki di, isomka neng kunkamepe’ tenenunge.

6 Sunda, ukupra tenenung dinino, tek sisi ngeda ake. Ada, ‘Allah dumsisi kuretopu kunkamne’ tenepra, ‘Ne damai akwapmaner keca konuma’ tenena cap, tonda, ‘Kange deipra teleppu kunkamne’ tenena capda, pio telepe. Ukunada, pio telep kudinkamsere. 7 Apepmaken upu deiyoda, nun nong nesaladi deipsei taruda, akeca-keca dopra men yanamupke. Tali nong yopu deipsei. Tonda, dakuramepyanen, depmepe taruda, tenpu keca pe men dopra betepe. Tali mesum banangapu benkamepe.

8 Dinino, nun jen keca putapserenge cap, opkale cap akapsere pangeda, akapserya deiki di tali kange deipra, teleppu kunkamepe. ‘Uo, akeca ton, akeca ton doproptene dipae,’ tenena gume. Kange telep doupra, ‘Ne kwapmaner kecada akonuma,’ tenen, dimpeprappu kuna telepe. 9 Dinino, ‘Uo, nunda isomka nesala kuptepe’ tenen, pio putapre nesalada, atenena deiki di, Kain Jen Ngebodi ‘Sun mali kuptenge’ tenen, sun kange dipru gidorepa, mali kun keca putarepa, mali weik kununge. Tonda, nong men kupkamre keca dinin, tali-tali keca putana weik cap, mali kusere keca putana cap, konum ukuprepa, mali weik kununge. Ukungopda, ukupmantoda, aneitamai di ikne pumbon kapang barepa youramretopu, ila ikin keca pio mali kudiserure. Angeda men dumsisikmanto.

10 Apepmaken upuda tali tep gume. Er deiyoda, ware nesala do yuma, ‘Uo, isomka neng kutepe’ tenen, co bo do, kunumna weik keca do, ila di putare pangeda, adeiki di mali kun keca yala-yala weik kunkamre. Apepmakentopu, ton neng dangeda, ‘Co bo weik doproptepe’ tenen, putapka deiki di, Allah teka teneramenge keca tapra, tali yuk bisi baramipa, amendada ila kange mun keca cap, ikine keca weik cap, kange bongtona keca cap weik kurure. Sun ikin kudidarami. Ne Paulusdi pepmakene.

Paulusdi Timotius er tep, pepu upu

11 Anesala mali kudidarami dinino, kanda, Allah er upu peseretopu kupra, er pelpu don ngebo kuruma tep, amali kun keca yuma damai kuna gume. Sepdaro yukai bena kuramengtopu, amali keca tapra, ‘Pio dumsisipu kutene’ tenen, putarepa pe deipra teleppu kunkamrume. Ada, dumsisi kuna cap, Allah dumsisi kuretopu kuna cap, Allah teka tenena cap, yuk nesala tep bicau tenepra makuna cap, ‘Ikin keca akapmanerpa, tapkune,’ tenena gum di, tamna gum pio pel dona cap, yuk nesala tep, bouna di kuna cap, ayumada kan adipapu pio piripetepra kunkamrume. 12 Jen talena nengdi, ‘Yuk mutu nesala popbisipsenung’ tenen, pio pe deipra podarameng utopu, Allah teka tenepra talepmumnge pio moupra talena tep, puto di piripetenkamrume. Allah tep teka tenemum ngeda, moupra talepmemdi, pio dombankamrume. Angeda, pio telepe.

Menop taru, nesala weik gekenmaipa, kandi, “Kristus tep teka tenenune,” pepra, telep upu pepmum taruda, Allahdi, ‘Angeboda, ne cap im deiki pio kunkamneme’ tenen, wepra deipkeue. ‘Bol koptapra pio gam kuna tep, ketenepneu keca dopropkamne’ tenen, pio moupra tenememdi doronkamrume. 13 Ne mi Timotiuso, yuma keca yuma, gam kuna deiyo keca karesere ngebo Allah cap, uda Pontius Pilatus damai upu bongdina taru di, upu telep kupra katuai di pepu ngebo Yesus Kristus cap, sun butene gekepra dinmaserenga deiki di, amambul upu pepra deipkukene.

14 Ada, asurat deiki pepmaken upu yuma gekepra talenkamrume. Moupra talenkamrum taru neitamai yumada, tenpunge pe men tapkamrume. Tonda, apepmakentopu, moupra pio telep pel donmamemyane, gawal dangkamrume. Ukupmem pangeda, yuk nesaladi, “E, er mali kure kecada, ake-ake,” men pepmanto kupkamenge. Ukupra pio kuramempanenda, amendada nun Deiyo Ngebo Yesus Kristus tamupra yankamre.

15 Yesus tuai mutu tamupra yankamrada, Allahdi er teneamutopu, ataru konum kupyopda, Yesus katuai di yankamre. Nun nai bo Allahda, pio telep-teleppu kurura cadi, nimi yumadi, er sipu eremengedi, ‘Kanda pio teleppu kurume,’ penkamenge. Er tenpu dipapu akeca-keca yuma talepra, pio deiki tara kuredi, ila Puto Weik Deiyo Ngebo kurure. Yuk ila nimi deiyo nesala, Raja neng akunung dinin, erda sun deiki tara, Ila Raja kurure. Nimi deiyo-deiyo neng, yala weik dakunung dinino, sun yumada, Yesus er amutarapu kununge. Er tenpuda, sun yuma cap, isok yuma cap, akeca-keca yuma cap, pio deiki tarapu kuredi, ila Puto Weik Deiyo Ngebo kurure.

16 Er tenpupuda, men deptue, pio gampu kunkamre. Er damaida, nimi tuai nesala men benmantoai, ila dirin neitamai kurure. Ware mutu nesala do yuma, er nong pio men dirami, tonda, pio men eptenge. Ne Paulusdi pepmakene. Ne pio putanerur ngeda, ada, nimi ban-ban yuma er sipu pio eremkamenge. Tonda, er ila puto di akeca-keca yuma cap, nimi yuma cap talepra kunkamre. ‘Angeda, tek sisi kupkamre’ tenen, Amin pepne. Ne Paulusdi sekeipkene.

Surat sirya gawal dangne tep, pepu upu

17 Ukutaru tuai mutu kungedi, akeca-keca yuma weik talengedi isomka kunge nesala tep, upenkamrume. “Sunda, sal nong-nong kamna cap, gemena cap gume. Bung keca cap, co bo cap, tuai isomka keca yuma capda, akeca deiki sun kange derina gume. Akeca di men lyepsetue. Akeca yumada, pio kunkamre keca gume. Ware kuprap tarupu akwapmaryanen, amenda taru, tuai keca yuma gum kupkamre. Tuai kecada, ware taru gum kupkamser do, nun walwal cadi, akeca tep kange derina gume. Akeca gum dinin, ‘Allah er dipapu melimseredi lyepkamsere’ tenen, er deikipu sun kange derinkamrume. Nun kange deipra, telep kuna tep, kareserur deiyo ngeboda, Allah er dipu akeca-keca yuma weika di kareserure.” Aupu penkamrume.

18 Tonda, isomka neng tep aupu ton penkamrume. “Sun isomka nengda, sun bung keca weike akuretopu, telep kun keca weika di pio kupmum pangeda, ange peda isomka utopu kupkamsere. Tonda, ‘Uo akecada, ne mawa keca cadi, men karenkamne’ tenen, tenimtona gum dipapu, tali kange doupra yuk nesala tep, sun keca weika di bokra karenkamrume.” Upepra peteremkamrume. Ne Paulusdi pepmakene.

19 Isomka neng sun keca bokra, yuk nesala kareramenge pangeda, adeiki di, im deiki menenga utopu keca weik kupkamre. Ukupmantoda, ayumna co telepnge deiki ati dopmengepa, pio dimpepra puto kuramretopu, isomka nengdi yuk neng tep, weika di makupmenge pangeda, amenda taru Allahdi melimrepa, sun pepe telep kunkamenge. Ayumada tali tep gume. Deiyoda, tali kuna gum dinin, ‘Pio tek sisi bol koptapra gam pio kun keca dopropkameng’ tenen, pepkene.

20 Timotiuso, pio mambul upu pepkukene. Allahdi kareamkeu kecada, ‘Er tek sisi upuda mali kuprur’ tenen, moupra dimemdi, pio moupra talenkamrume. Ware tali upu do yuma, nong men kupkamre upu, Allah tep yanina upu cap, Allah upu peseretopu gum dinin, yuk mok upu cap, tali peteremna upu capda, aupu yuma gekena pio gum dinin, amnyo karikrap karenaipu kunkamrume.

Atali upu yumada, ton nesala dingeda, “Gume, aupuda, ila kael kemna upu. Pio mambul upu,” penunge dinin, tek sisi, aupuda, walwal upu cadi, tali mok upu penunge. 21 Ton nengda, tali-tali upu gekepra taleamya deiki di, Allah er tek sisi upu cap, er tek sisi bisi cap tapra, taliyaipu bendopye.

‘Allahdi kan tep, er kange dipapu bicau tenepra makunkamker’ tenen, Allah morokenune. Telepe akonuma.

Telepe, ne Paulusdi akonum pepra sekeipkene.

Acapu deipne.