2Ch 1 | XteSC | STEP | Raja Salomo er nai boda, nimi deiyo ngebo Raja Daud kuramu. Salomoda, pel weik doramnga deiki di, ila puto ngebo kweipdanamudi, sun Israel mutu neitamai nimi deiyo ngebo taleamudi kuramu. Allah Yahweh erdi Salomo tep, pio meliamupa kuramu. Tonda, ila puto ngebo kepra deiamupa, pio eremna ngebo kuramu.

2 Chronicles 1

Raja Salomodi Allah tep, ‘Ila kael kemna deiyo keca karepneo,’ pepra, moropu upu

1 Raja Salomo er nai boda, nimi deiyo ngebo Raja Daud kuramu. Salomoda, pel weik doramnga deiki di, ila puto ngebo kweipdanamudi, sun Israel mutu neitamai nimi deiyo ngebo taleamudi kuramu. Allah Yahweh erdi Salomo tep, pio meliamupa kuramu. Tonda, ila puto ngebo kepra deiamupa, pio eremna ngebo kuramu. 2 Salomoda, ila nimi deiyo ngebo konum kupudi, er amutara jen talena neng yuma, sun deiyo neng tep, upu peipu. Ada, jen talena deiyo neng, sun amutara jen neng dengeda, seribu (1.000) neng tep, upu perami deiyo neng cap, tonda jen talena deiyo neng, sun amutara jen neng dengeda, seratus (100) neng tep, upu perami deiyo neng cap tep, upu peipu. Tonda, Israel nesaladi, yu kuprepa, upu deiki di pangdana kuramipa, sun upu lepsisikra bongdina deiyo neng cap, tonda Israel mutu neitamai kurami nesala tep, deiyo-deiyo neng cap, tonda, Israel nesala sun yala-yala dakuramitopu, sun nai yapu neng cap tep, adeiyo neng yuma tep, Salomodi “Ukupkurume, ukupkurume,” peprapudi deipu.

3 Nimi deiyo ngebo Raja Salomodi, ‘Ukupkupe,’ peprapudi, er cap, sun Israel nesala yuma cap, Gibeon mutu dup, Allah cap, nimi cap, antamna tep ati, Allah er si eremna ati wengbana tep, mutu welerbei. Sun amutu tara beiya deiyoda, amutu tarada, Allah Yahweh er karena cap, er si eremna cap tep atida, amutu kwamu. Akatida, Allah Yahweh er amutara pel don ngebo Musadi, nimi pio gumai, katawai mutu kuramu taru di doyamu ati damai welepbei. 4 Dinino, Raja Allah Yahwehdi, “Angeda kupkamrume, angeda pio men kupkamrume,” pepra deiamudi, pala gel deiki sekra karepupa, sundi akeca dopra, co bekin pumbon deiami ngeda, nimi deiyo ngebo Raja Dauddi, Yerusalem mutu neitamai lyom opkal di dodin tenda ati ketenepra deiamudi, aco bekin er sida, Peti Perjanjian, Kiryat-Yearim mutu di doprapudi, Yerusalem mutu tamupra dubeudi, atenda ati pumbon deipu.

5 Tonda, gam keca popra Allah karena tep, uku dongonai, er sida mesba, tenpu ngebo er si Uri, er mi Bezaleeldi dopra deiamu ngeda, Allah Yahweh er si eremna ati damai dinin, urasin tara deipkaida, tupa akwamu. Uda, angebo Uri, er nai bo sida, Hur kuramau. Salomo cap, erdi taleamu mutu kurami nesala, sun Israel nesala yuma cap, akati damai konum beiyopda, ‘Allahdi ware upu pepserepa, tek sisi telep kunange ake,’ tenepmepedi, kael kepkup do?’ tenen, Allah Yahweh tep moropi. 6 Ukunmai taru neitamaida, Salomodi, ‘Ne nai bo Allah Yahweh, er si eremna cap, er gispal dona cap tep, gam keca popnedi, amesba deiki uku sekmanguai di, uku dongopkamne,’ tenepu. Amesbada, Allah cap, nimi cap, antamdana tep, tenda ati damai dinin, urasin tara kupkaida, nimi deiyo ngebo Raja Salomodi, Allah er karerbana tep, gel pala di yakeiamidi, kunumna weik gat keca, er si perunggu deiki di palepra deiaminge deiki di, er popmau gam keca uku dongopudi, Allah tep karepu. Ada, yambula dipu gume. Salomodi kareamu ngeda, denge weik seribu ekor (1.000) dopra, Allah Yahweh tep popra, uku dongopra karepu.

7 Ukupra karepu pangeda, atumi lukunda neitamaida, nimi deiyo ngebo Raja Salomo ken mapupa, Allah er si Yahwehdi jenek kupupa, Raja Salomodi epu. Epupa, Allahdi Salomo tep upepu. “Ataruda, kan tenemem ngeda, lap pepnememdi, moropmemnyopda, tek sisi ne Allahdi karepkamkene,” pepu. 8 Upepupa, Raja Salomodi Allah tep pepu. “Ne nai Allah, kandi ne nai bo Raja Daud tep, bicau teneramumdi, tamna pio gum dipapu, pio telep kupra melimamumpa, kan amutarapu kuramu. Tonda, ne nai Daud, er mi sisa kununa tep, er yo pununa tep nengeda, kandi konum wepra ereipnemumpa, neda Israel nesala talepra kunune. 9 Ukutaruda, “Uo ne nai Allah Yahweh, kandi ne nai bo er tep, pedina upu peiamum ngeda, tek sisi nong kupkamre’ tenen, moropkene. Ada tali tep gume. Kandi erepra deipnemumpa, nimi deiyo talepra Raja kununa cadi, kandi wepra kareamnemum nesalada, pio men nukmanto kununge. Sunda, tuai mutu tu deiki butbuta men nukmanto kuramretopu, anesala peda, denge pio weik kungepa, neda sun kankan kunedi anesala talenune.

10 Ange tep nengeda naio, kandi ne tep ila kael kemna deiyo keca cap, ‘Telep kuna ngeda, ake,’ tenenange cap, tonda, ‘Telep kuna ngeda ake, mali ngeda ake,’ tenepra dumsisi kunange karepnemempa, ne dipruai weknetuopda, kandi wepra deiamum nesala tep, ‘Ukupkamepe,’ tenepra peptene. Ne benkamne taru pe, tamupra yakankamne taru peda, ‘Telep kuna ngeda ake,’ tenepnedi, peptene. Ange utopu, kandi moupra men peipnetumopda, kan nyapu sisa kandi wepra deiamum nesala yuma tep nengeda, ware peptene do? Atep, ‘Ne pe dipapu men kuptene,’ pepra, Salomodi Allah tep, upepra moropu.

11 Moropupa, Allahdi Salomo tep tamupra pepu, “Teka kandi ne tep tali keca men moropmanereme. Ukupmantoda ake. Kandi, ‘Naio kandi ne melipnemempa, gam pio kutene. Tonda, kandi karepnetumpa, talen keca yala-yala yumada, weika di karepnetumpa, ila isomka ngebo kutene. Tonda, kandi melipnetumpa, ne podan neng yumada, yu kuprepa popetepkamneng taruda, ne dipapu aneng tep, poptenepa deptenge,’ pepra, kandi men moropmanereme. Tonda, kandi, ‘Ne ila di nepbankamne,’ tenena tep, kandi karepnemempa, yuk mutu nesala yumadi, ne tep gispal donkamnenge,’ tenen, men moropmanereme. Ange-ange yuma gum dinin, kandi, ‘Kange pio tenena dumsisi ngepu karepnetumpa, nedi kan wepra deiamum nesala tep, telep kupra sun upu bokeiptenedi, sun Raja ngebo kunkamne’ tenen, moropmanereme. Angeda, pio telepe pua.

12 Atep nengeda, kandi moropmanerema utopu karepkamkene. Nedi ila kael kemna deiyo keca cap, tonda, ‘Telep kuna ngeda ake, mali ngeda ake,’ tenena deiyo keca capda, karepkamkene. Tonda, ware kunumna weik keca do yuma, co bo cap, gel uang cap, emas cap, bung keca yala-yala yuma capda, karepkamkene. Tonda, ukupkenepa, kandi talepra pel donkamremnge yumada, pio telep kupkamre. Amenda taru kunkameng nengda, kandi talepra pel donkamrema utopu, men dopkamenge. Tonda, pumun taru kurami ngeda, kan utopu pio men kurami. Atep, sun menop kurami Raja neng cap, amenda taru kunkameng Raja neng capda, yambulanunpu telep kurami dinin, kanda pio telep kupra pel dopbaramemyanen, ila isomka ngebo kunkamrema tepa. Ange yumada, Allahdi Raja Salomo tep pepu.

Nimi deiyo ngebo Raja Salomoda, isomka keca cap, ila puto keca capda, er deikipu kuramnga tep, seki upu

13 Allahdi Salomo tep aupu yuma pepu pangeda, Salomoda, Gibeon mutu Allah er si eremna tep wengamyai di tapra, tamupra Yerusalem mutu beu. Ada, Allah Yahweh cap, nimi cap antamna tep ati, er keana dodin tenda ati dopra deiamyai bena, Allah moropudi sengpepkopda, adipapu tamupra Yerusalem mutu beu. Ataru di dipdongoprapudi, sun Israel nesala yuma tep, talepra sun ila nimi deiyo ngebo, Raja kuramu. 14 Raja Salomodi, Israel nesala talepra kuramu taru neitamaida, jen talena nengdi nimi porbana tep, kuda bisamdi gipra, tu deiki embana keca, er sida kereta perangda, denge pio weik, seribu empat ratus (1.400) ketenepra deipu. Tonda, nimi porbana tep, kuda bisam bali deiki bukra, mar porbana tep, denge weik dua belas ribu (12.000) jen talen neng ton wepra deipu. Sun awepra deipu nengda, ton bokra, ila ati arum, Yerusalem mutu tara ton deipu. Ton tara jen talena nengda, bokra yuk-yuk ila ati arum doamyai kalengna tep, wepra deipu.

15 Nimi deiyo ngebo Raja Salomo, erdi Israel nesala talepra kuramu taruda, Yerusalem mutu neitamaida, kunumna weik keca, perak cap, emas capda, dopra bena derirami ngeda, pio weik kwamnga cadi, akecada tali gel sisa pio weik kuramretopu kwamu. Tonda, Libanon mutu di dekarami gat co, er sida kapyal co (cemara co), pio weika di dekaramipa, weik akwamu. Ukuramudi, tali-tali paramre co, arah co weika di paramra utopu, agat co kapyal coda, weike kwamu. 16 Tonda, nimi deiyo ngebo Raja Salomo, erdi Mesir mutu cap, Kue mutu cap di, kuda bisam weika di kunuamupa, anengdi, kuda bisam pio weika di Yerusalem mutu dekaramipa, Raja Salomo er kuda bisam kunumna tep, pel dona deiyo nengdi, dororamidi, jen telena neng tep karerami. Kue mutu di dekaramipa, apel dona deiyo nengdi, kunuproami.

17 Tonda, kuda bisam tapu gerekdongopra gipropnepa, tu deiki embaramre keca kereta perangda, Mesir mutu di, doupra yakaramipa, apel dona nengdi, kunumna keca weik, er si emasda, yuk-yuk dinin, tenpu-tenpunge tep, gel uang perakda, enam ratus (600) kunupra karerami. Tonda, gel uang perakda, seratus lima puluh (150) deiki di tenpu kuda bisam tep kunupra karerami. Israel nengdi akeca konum kunupropi dingeda, tamupra Het mutu nimi deiyo neng, Raja damai cap, tonda Siria mutu nimi deiyo Raja ngebo damai cap, kunumami.