2Ch 10 | XteSC | STEP | Ataruda, Rehabeam adipapu Sikhem mutu beu. Deiyoda, sun Israel nesala yuma buluprapidi, ‘Rehabeamda, nun nimi deiyo ngebo kunkamsera tep, erepra deipkamepe,’ tenepidi, sun yuma dipapu Sikhem mutu bei.

2 Chronicles 10

Israel nesaladi Raja Rehabeam tep, “Nun songe, er upu men gekepkupe,” pepra yanipi upu

1 Ataruda, Rehabeam adipapu Sikhem mutu beu. Deiyoda, sun Israel nesala yuma buluprapidi, ‘Rehabeamda, nun nimi deiyo ngebo kunkamsera tep, erepra deipkamepe,’ tenepidi, sun yuma dipapu Sikhem mutu bei. 2 Ukupi tarupu, nimi si Nebat, er mi Yerobeamda, ‘Uo, Raja Salomodi popnerur’ tenen, menop taru Mesir mutuda bena, inipra kuramupanen, tupa amutupu kunmau. Umutupu kunmau dinin, sun yuk nengdi, ‘Rehabeamda nimi deiyo talepra, Raja kunkamser’ tenen, “Erepra dekeipkamepe,” pepipa, er gekepu. Aupu konum gekepu dingeda, er adipapu Mesir mutu tapra, adipapu tamupra, Israel mutu neitamaipu yau.

3 Yerobeam tamupra yau pangeda, sun Israel mutu kurami nesaladi, Yerobeam tep kongpepipa yau. Yau pangeda, Yerobeam cap, sun Israel nesala cap, yuma wisiprapidi, Rehabeam damai bei. Bei dingeda, sundi Rehabeam tep pepi. 4 “Kan nai bo Salomoda, nun tep ikin keca pio weika di deriramseue. Ila ikin pel weika di dimamseupa, kange mun kuramseu. Dinino ukutaruda, kandi kanam kupra deipsememdi, nun kange mun kuserenge yuma, gum kupra deipkamsemem pangeda, kan amutarapu kupedi, kandi pesememtopu kunkamepe,” pepi. 5 Upepi dinin, Rehabeamdi sun aneng tep, tamupra pepu. “Ukutaru tamupra benamumnyanen, ue weneri tumi mapmumdi, ortumida kange di tamupra, ne damai yankamrume,” pepu. Upepupa, sun anesala yuma tamupra bendopi.

6 Sun aneng konum bendopi pangeda, Rehabeam er nai bo sisa, Salomo gam kuramu tep, “Ukunkamrume,” pepra, upu daramdina tep wisi nengda, ‘Sun damai asipkamne’ tenen, sun damai beu. Sun anengda, wisi neng cadi, men di er nai bo Salomo cap kikiman kurami taru, peramu neng tep, Rehabeam aneng sun damai bena asimpetepu. “Nedi asipetepsene. Sundi pepneso. Neda arup taru pepmaneng nesala tep, ware kupra upu pepkamne do?” pepra asipetepu. 7 Upepu pangeda, sun awisi nengdi tamupra pepi. “Gume kao, kan dipru neitamaida, ‘Nimi kankan neitamai, melimna ngebo kupnedi, aneng melimkamne,’ tenememdi, anesala sun putaretopu, anesala tep, ‘Telepe,’ pepra melimkamrume. Upepmemnyopda, amenda taru yumada, anengdi kan tep, pio tek sisipu melimkamkenge. Sundi, ‘Kan amutara kupedi, kan upu gekepra melimkamkepe,’ penkamkenge,” pepi.

8 Upepi dinin, Rehabeam sun wisi nengdi pepi upu men gekepudi tapu. Wisi neng pepi upu tapudi, yuk nengda, er metek mi kuramu taru kikiman nepbaramidi, er cap pel dorami neng damai beu. Beu dingeda, sun akaber neng tep, asipetepu. Akaber nengda, er Rehabeam cap, aneng cap, keteng tamun nenada, sun kikimanpu nemi. Milo nyapu taru di dipra, ataruda, kikiman nepbaramya cadi, erdi sun upupu gekepu. 9 Akaber neng tep asipetepudi, upepu. “Gume, arup taru moropmaneng nesalada, ‘Kan nai bodi, nun nong deiki ikin keca pio weik deriramseu dinin, kandi ange yuma dopra, kanam kepra deipsetum do?’ pepmanengada, anesala tep nengeda, ware upu tamupra pepkamne do?” pepra asipetepu.

10 Asipetepupa, akaber nengdi tamupra pepi. “Gume anengdi, ‘Kan nai bodi nun nong deiki ikin keca deipseue,’ pepmakengdi, ‘Kandi kanam kupra deipserume,’ pepra, moropmakeng nesala tep nengeda, sun damai upepkurume. ‘Gume, ne nai bodi taleamseu taruda, kanam utopu kuramrum dinino, nedi talenkamsen taruda, pio ikin weik kunkamrume. 11 Ne nai bo Daud, erdi taleamseu taruda, erdi ikin keca, nun nong deiki deriramseu,’ teneramrum dinin, neda ne nai bodi kuramu utopu gume. Erdi sun deiki deriramseu ngeda, tek sisi kanam pua. Nedi sun nong deiki derinkamsen ngeda, pio ikine weike kunkamsere. Tonda, ne nai bodi sun wenemna tep, tali tapu di, bongoramseu dinin, ne dingeda, sun wenemna tep, takke keca dopropnedi, sun nong bol deiki bongonkamsene,’ pepra, lap perbenkurume. Apepmasentopu, angeda lap perbenkurume,” pepi. Ada, sun akaber nengdi, sun kabo Rehabeam tep upepi.

12 Uda, ortaru di Rehabeamdi peiamutopu, ue weneri tumi konum kupu pangeda, nimi deiyo ngebodi, ‘Ue weneri tumi konum kupyopda, ne damai yankamrume,’ peiputopu, Yerobeam cap, er kayapu neng yuma cap, tamupra, nimi deiyo ngebo Rehabeam er damai bei. 13 Bei pangeda, Rehabeamdi aneng tep, ila yu upu deiki di, aneng tep puto di pepu. Ada, Rehabeam er nai bodi upu meliamu wisi nengda, ‘Upu bouna di pepkamrume,’ pepi ngeda, utopu gum dinin, ila upu deiki di tali-tali bena peptapu. 14 Rehabeamdi pepu ngeda, er cap kikiman kurami kaber nengdi, peipmainge utopu, sun aneng damai bena pepu. “Ne nai bodi sun tep, ila ikin pel deipra, tali tapu di wenepra poramseu dinin, neda ange utopu gume. Neda tek sisi ikin pel dimsenedi, takke keca, pio gatnge doprapnedi, wenepra ponkamsene,’ pepu.

15 Ange tep nengeda, Raja Rehabeamdi, er damai yana moropi neng tep, men gekepudi, mali upu peptapu. Ukupu dinino, erdi moupra men tenepu dinin, tek sisi akupu ngeda ake. Ada, ange-ange yuma kupu ngeda, ada tali nimi dipapu gume. Allah Yahwehdi, ‘Ukupkamrume,’ teneramutopu kupu. Tonda nimi tenpu, Silo mutu kuramu ngebo, er nai bo Ahia tep, Allah Yahwehdi, ‘Ukupkamrume,’ peiamutopu kupu. Angeda, Allahdi Ahia tep peipupa, ‘Nebat er mi Yerobeam tep, pepra deiamu ngeda, tek sisi kupkamre’ tenen, kupu. Atep, ange yumada, nun nai bo Allah er dipapu ange yuma kupseu,’ tenepi dinino, Rehabeamda ange yumada moupra men tenepu.

16 Uda, sun Israel nesala yumadi, dipetepidi, nimi deiyo ngebo Rehabeam, Israel wisi neng, sundi pepi upu men gekepmanto kupu pangeda, sundi adeiyo neng tep pepi. “Rehabeam, er yala nengda, sun Daud yala neng pua,” pepi. “Atep, nun ware kuptepya deiki di, Daud er yala neng cap kikiman kupkamtepe do? Isaidi deiamu neng, sundi deipipa, dadeipdanen yakarami yala neng yumada, nun cap kikiman men kunkamepe. Atep nengeda, nun yuk Israel nesala yala-yala yumada, bendopkamepe! Rehabeamda, er pe yuk dakunkamre. Er cap, er yala nengda, Dauddi deipupa, dadeipdanen yakarami yala neng yumada, sun pedi sun pe tara neng tep, kalekra melimdankamenge. Nun peda, nun pe yuk kunkamepe,” pepi. Upepi dingeda, sun Israel yala nesala dinin, yuk yala nesala yumada, sun pe ati tamupra bendopidi, Daud er yala nengpu, amutu neitamaida taproi. 17 Ukupi pangeda, Rehabeam er yuk Israel yala nesala dinin, Yehuda yala neng, sun kuramyaipu, tamupra bei. Tonda, Rehabeam tupa sun ila nimi deiyo ngebo Raja tekudi, sun Yehuda yala anesalapu talepra kuramu.

18 Amenda taru, Rehabeam nimi deiyo ngebo kuramu taruda, er amutara kurami neng, sun pel dimna tep deiyo ngebo, er sida Adoniram kuramu. Rehabeamdi angebo Adoniram tep, ‘Israel nesala ikin pel dipkamre’ tenen, wepra deipupa, amutu neitamai beu dinin, sun Israel neng yumadi, Rehabeam cap, er nyapsilip cap yumada, ‘Nun songe,’ tenepidi, gel doprapidi, angebo Adoniram popipa depu. Depu pangeda, Rehabeam erda ange epudi, menmena er kuda tu deiki gipra ban keca, er sida kereta kuda deiki bukrapudi, Yerusalem mutu tamupra sepra bendopu. 19 Ange yuma ukuramya tep, atumi di gonga kepidi, ataru dinin, dortara abuku sekamep taruda, sun Israel nesalada, Daud yala neng tep, ‘Nun songe,’ peramidi, sun nimi deiyo-deiyo neng perami upu yuma tep, pio men gekeramidi, tamami.