2 Chronicles 11

Allahdi nabi Semaya tep, pepu upu

1Rehabeam er Yehuda nesala kuramyai dinin, ila ati arum Yerusalem mutu tamupra beu taruda, erdi kong pepupa, sun Yehuda yala jen talena neng yuma cap, sun Benyamin yala jen talena neng yuma cap, bulupra deipu. Sun abutene yala neng, sun jen talena neng denge yumada, seratus delapan puluh ribu (180.000) neng yuma bulupra yai. Bulupra yaiya deiyoda ake. ‘Sun Israel tara neitamai kunge nesala yuma tep popkamepe’ tenen, bupra yai. Tonda, ‘Aneng yumada, popmepedi, Raja Salomodi deipu mi, nun deiyo ngebo Rehabeamda, er dipapu nun deiyo ngebo Raja kupseredi, amutu yuma, Yehuda tara pe, Israel tara peda, er dipapu talenkamser’ tenen, sun Yehuda yala neng cap, Benyamin yala neng cap, yuma bupra yai. Uda, sun yumada, Israel neng dinin, yuk yala nengda, iknapi tara, (arah selatan) Yehuda tara kurami nengdi, yuk yala nengda, dapu tara (arah utara) kurami nesala porbana tep ketenepi.

2Dinino, Allah er si Yahwehdi, tenpu ngebo er si Semaya tep, upu peryau. Semayada, amenda taru kupkamu keca cap, Allah er upu lap pena cap ngebo kuramu. 3Ukuramnga cadi, Allah er si Yahwehdi, Semaya tep pepu. “Salomo er mi Rehabeamda, Yehuda yala neng, sun deiyo ngebo tep upepkamrume. Ada, er tepapu gume, Rehabeam cap, sun Yehuda yala nesala yuma cap, Benyamin yala nesala yuma cap, tonda sun yuk neng yuma cap tep, upepkamrume.

4Ada, sun moupra gekepkurume. Allah er si Yahwehdi upepsere. “Sun yumada, tenpu yala nesala utopu kurume. Atep nengeda, sun kankan dakunge Israel nesala yuma cap, sun deiyo ngebo Yerobeam cap tep, men porbenkurume. Sun Yehuda yala neng cap, Benyamin yala neng capda, sun pe atipu tamupra bendopso. Sun mutu neitamai konum kupunge cap, amenda kupkamrenge yuma capda, ne sun nai bo Allah dipapu kupsi. Ne si Yahweh kunune. Atep, ange yumada, ne deiki dipapu kupkamre ja. ‘Allahdi upeipseue,’ pepra lap pepkurume,” Allahdi Semaya tep pepu. Upepka tep nengeda, sun aneng yuma, Allah er si Yahwehdi, “Sun pe atipu tamupra beso,” peputopu, sun yuma tamupra bendopidi, Yerobeam tep, mar podana tapra, sun pe atipu tamupra bendopi.

Rehabeamdi, ‘Yudea mutu neitamai yuma, puto weik kupkamre’ tenen, peipupa, ila pala gel di deipra, benteng cap, lyom beilya cap, domya tep pepi upu

5Nimi deiyo ngebo Rehabeam Yerusalem mutu kunmaudi, ‘Yudea mutu neitamai yuma, puto weik kupmepepa, yu nengdi yana popsenung’ tenen, upu peipupa, Yehuda tara nesaladi, ila pala gel di deipra, benteng cap, lyom beilya cap, sun ati arum dana-dana tara ongopgenepra deiprapidi dopi. 6– 7– 8– 9– 10Ada, Yerobeamdi peiputopu, Yehuda mutu neitamai cap, Benyamin yala nesala kurami tara neitamai capda, lyom gel beilya deipra domi. Ada, Bet-Zur mutu cap, Zoko mutu cap, Adulam mutu cap, Gat mutu cap, Mares mutu cap, Zif mutu cap, Adoraim mutu cap, Lakis mutu cap, Azeka mutu cap, Zora mutu cap, Ayalon mutu cap, tonda Hebron mutu cap yumada, ila gat gel beilya di, deipra ongopdamidi, deiamidi wiami.

11Rehabeam amutu neitamai yuma, akati arum yuma tep puto keipudi, “Ukupkurume,” pepra deipupa, amutu yuma tep, jen talena neng cap, sun deiyo neng cap wepra deipupa, amutu yuma puto di kaleki. Amutu neitamai yuma, yuk-yuk ketenemne keca, sun jen keca cap, saitun me mokon cap, anggur mokon cap, ketenepra deipu. 12Tonda, ‘Mar popserur’ tenen, lelimna keca, er si perisai cap, nimi lungna tep keca er si tombak cap, ketenepra deipu. Ange utopu, Yehuda mutu neitamai cap, Benyamin yala neng kurami mutu neitamai cap yumada, er Rehabeam dipapu, jen cap, mar cap, perisai cap, denge weika di, akati-akati arum neitamai deiamnga deiki di, puto weik keipudi, amutu-mutu yuma, puto dipapu taleamu.

Israel nesala kurami tara di, sun imam-imam neng cap, Lewi yala neng cap, Yehuda mutu tara kepropya tep, seki upu

13Uda, sun imam-imam neng cap, Lewi yala neng cap, Israel mutu neitamai kuramya yumada, utenepi. Ada, ‘Nun nimi deiyo ngebo kuna tep nengeda, Rehabeam dipapu talenkamsere’ tenen, kikiman wisimdona tep, Israel tara di, Yehuda tara bei. 14Sun Lewi yala neng yumadi, talepra wa perami mutu cap, mutmuta paramu mutu cap, sun taleami tu cap, ayumada tapidi, gopra Yehuda mutu cap, Yerusalem ila ati arum cap bei. Abena dopinge deiyoda, Israel tara taleamu ngebo Yerobeam cap, erdi deiamu nyapu cap yumadi, ‘Gume, sun Lewi yala nengda, nun songe. Nun nai bo Allah Yahweh, er si eremna ati pumbonda, pel men dopsetenge. Sunda, tali neng pua,’ peramidi, sun Lewi yala neng tep nengeda, konum adipapa taproi.

15Tonda, Yerobeam er kange deiki dipapu, ‘Gume, aneng sun pena gume,’ pepudi, er pe kange deiki dipapu, yuk imam-imam neng ton erepra deipu. Ada, tali isok-isok si eremna tep neng cap, tonda sapi bisam cap, kambing bisam cap, urasin utopu petupra, akeca er si patung, sun pe buru deiki di betapra deipnedi, si eremna cap tep, melimna neng wepra deipu. Akeca yumada, mutu dup deiki di, atali keca si eremami. 16Er Yerobeamdi, ange pio mali kecapu kuramu dinin, sun Israel tara neitamai kurami nesala, yala-yala yuma kankan di, sun yuk nesalada, pio tek sisi pe deipra, Allah Yahweh tepapu, si eremami nengdi, ‘Gume, nunda, nun nai bo Allah Yahwehdi, Israel yala neng yuma tep, melimamu ngebo, er sipu eremkamepe’ tenen, gopra Yerusalem mutu bei. Ada, sun Lewi yala nengdi, Yerusalem mutu bei tarada, aneng peda, melipra beidi, Allah Yahweh er si eremna tep, yapi keca popra, uku dongorami. Ada, sun apu yapudi si eremami Allah tepapu, si eremami.

17Ange tep nengeda, nimi deiyo Raja Rehabeamdi, Yehuda tara taleramngada, sundi melimamipa, atarada pio puto weik ton kupu. Keteng tamun weneri deiki di, nimi deiyo ngebo Raja Salomo, erdi deiamu ngebo Rehabeamdi, Yehuda tara taleamupa, sundi, ‘Dyo, er dipapu pio talenkamsere,’ tenerami. Tonda, sun nimi deiyo neng Raja Daud cap, Raja Salomo capdi, Allah si eremamreidi, er tepapu taleamreidi, telep kuramreitopu, ‘Nun peda angepu kunkamepe,’ teneramidi, telep kupra kurami.

Rehabeam er yala neng tep seki upu

18Rehabeam er dopu ner sida, Mahalat dopu. Mahalat er nai boda, Raja Daud erdi deiamu ngebo, er si Yerimot kuramu. Aner Mahalat, er ninda, Isaidi deipu ngebo, er si Eliab, erdi deipu ner, er si Abihail kuramu. 19Sun aneng butene, Rehabeam cap, er ner Mahalat capdi deiamrei nyapuda, nimi weneri. Ada Yeus cap, Semarya cap, tonda Zaham cap deiamrei. 20Amenda taruda, ange utopu, Rehabeam dopu nerda, Absalom er ner mi Maakha dopu. Dopdarei dingeda, sun nyapuda, nimipu dumbari di deiprei. Ada, Abia cap, Atai cap, Ziza cap, tonda Selomit cap, deiprei.

21Uda, ataru neitamaida, Rehabeam er domu nerapu yumada, delapan belas (18) nerapu domu. Tonda, enam puluh (60) nerapu cap tapakra domu. Anerapuda, er melimna cap, nyapu derina cap tep domu dinin, sunda er nerapu sisa men kurami. Tonda, anerapu yuma cap kikiman kurami dingeda, erdi deiamu sal nyapuda, dua puluh delapan (28) deiamu. Tonda, erdi deiamu ner nyapuda, enam puluh (60) deiamu. Tonda, erdi moupra domu nerapu cap, er nyapu derina tep tali domu nerapu cap yumada, yambula dipu kange deiamu dinin, tenpu ner er si Maakha, anerpuda, pio ila di kange deiamu. 22Rehabeamda, erdi deiamu nyapu yuma tep, yambulanunpu kange deiamu dinin, er ner Maakha, erdi deipu mi Abia, erpuda Rehabeamdi pio kange deiamu. Ukuamnga cadi, Rehabeamdi, ‘Ne depnyopda, ne yo punupkamre ngeboda, ne mi Abiapu kupkamre’ tenen, Abia tep, ila di erepra deipupa, er weitap duap, sun deiki tarapu kuramu. Ada, ‘Erda, nimi deiyo ngebo Raja kupkamre ja,’ tenena tep, angebo wepra deipu.

23Nimi deiyo ngebo Rehabeam, ila kael keamnga deiki di, er nyapu yuma tep, pel dona deiyo keca karepudi, er taleamu mutu-mutu neitamai dopra deipupa, nimi deiyo neng kurami. Ada, Yehuda tara mutu neitamai cap, Benyamin yala neng kurami mutu neitamai cap, ‘Yu nengdi yana popsenung’ tenen, gat gel di lyom beilya, ongopdongopra wiami mutu yuma cap tep, aneng ereprapudi, deipra embeu. Adeipra embeu dingeda, sun jen keca yala-yala yumada, pio weika di ketenepra deiamu. Utopu, sun aneng er nyapu nerapu dona tep, nerapu yuma peda, adipapu weika di ketenepra deiamupa, dorami.