2Ch 12 | XteSC | STEP | Raja Rehabeam nimi deiyo kepra Yehuda tara taleamu taruda, puto kepra deiamupa, sun amutu neitamai kurami Israel yala nesala cap, er capda, Allah Yahwehdi, ‘Angeda kunkamrume, angeda pio men kunkamrume. Angeda pio meme,’ pepra deiamu upuda, sundi, ‘Aupuda tali pua,’ tenepra kuramidi, aupu yaniptaprapidi, mali weik kurami.

2 Chronicles 12

Mesir mutu nengdi, Yehuda tara kurami neng porbeia tep, seki upu

1 Raja Rehabeam nimi deiyo kepra Yehuda tara taleamu taruda, puto kepra deiamupa, sun amutu neitamai kurami Israel yala nesala cap, er capda, Allah Yahwehdi, ‘Angeda kunkamrume, angeda pio men kunkamrume. Angeda pio meme,’ pepra deiamu upuda, sundi, ‘Aupuda tali pua,’ tenepra kuramidi, aupu yaniptaprapidi, mali weik kurami.

2 Ukurami taruda, Allah Yahweh tep, pio moupra kange deipnedi, men kurami. Ange tep nengeda, Allah er si Yahwehdi, wenemna keca dopra, sun deiki deipudi, go karepu pangeda, Mesir mut ila nimi deiyo ngebodi, ‘Yerusalem mutu neitamai yumada, popkamne’ tenen, yau. Ada, nimi deiyo ngebo Raja Rehabeamdi, gonga kepra, Yehuda tara taleamnganen, keteng tamun pamubari konum kupkopda, aketeng tamun neitamaida, nimi deiyo kepra, Raja Mesir mutu taleamu ngebo, er si Sisak, erdi, ‘Yerusalem mutu ila ati arum kunge nesala tep, porbenkamne’ tenen, beu.

3 Sisakdi porbeu taruda, nimi porbana tep, kuda bisamdi tu deiki gipra embaramre keca, er si kereta kuda, denge pio weik, seribu dua ratus (1.200) di doupra porbeu. Tonda, er jen talena nengda, denge pio weik enam puluh ribu (60.000) jen talen neng ton, kuda bisam bali deiki bukra porbei. Tonda, nimi porbana tep, jen talena neng, pio men nukmanto kupi. Ajen talena nengda, pio weike, men nukmanto kurami. Sundi mutu si Libia mutu cap, Suki mutu cap, Sudan mutu cap, amutu-amutu di yana, Raja Sisak tep meliprapidi, Yehuda tara kurami nesala tep porbei.

4 Yehuda tara mutu neitamai yumada, popbisipidi, Yehuda tara nengdi, ‘Yu nengdi popsenung’ tenen, ketenepra domi mutu yuma, popra bisbisa kapidi, dalupra dopropi. Ada, ila lyom gat gel beilya di wipra ongopdongomi mutu tep, bisbisa kapra porbenamyanen, Yehuda mutu di dipdongopra benamyanen, Yerusalem mutu ila ati arum damai porbei.

5 Ataru neitamaida, Yehuda tara nimi deiyo ngebo Raja Rehabeam cap, Yehuda mutu neitamai kuramidi, nimi deiyo kepra kurami neng cap, ‘Uo Mesir mutu ngebodi, poptapserur’ tenen, Yerusalem mutu neitamai bulupra yana kurami. Ukurami taruda, Allah er upu lap peramu ngebo, er si nabi Semayada, sun aneng damai yaudi upepu. “Allah er si Yahwehdi pepu upuda ake. ‘Sunda adipapu, ne tep konum tamnerume. Ukupneruma tep nengeda, nedi sun peda tapkamsene. Ukupra tapsenepa, Mesir mutu nimi deiyo ngebo Sisak dipapu popbisiseredi, sun Yehuda tara kurum nesala yuma talenkamsere.’ Allahdi upepsere.” Nabi Semayadi upepupa gekepi.

6 Aupu konum gekepya cadi, ataruda Yehuda tara nimi deiyo ngebo Raja Rehabeam cap, tonda amutu neitamai deiyo kepra taleami neng yuma capdi, ‘Uo, tek sisi, nun konum mali kupmupke,’ tenepi. Ukupra tenepidi, sundi pepi. “Gume, Allah er si Yahwehdi peipmaser ngeda, tek sisi walito pepsere. Nunda, mali kuramepu. Dinino, Allahdi kure keca yumada, dumsisingepu kurura cadi, walito wenepsere,” pepidi, mambul kange doupra, dipru amutara kepra, malye penmai.

7 Ataruda, sun anengdi dipru kange yuma, amutara kepra, bouna di tenepinge yuma tep, Allah er si Yahwehdi epudi kael kepu. Epu dingeda, erdi nabi Semaya tep pepu. “Deiyoda, sundi mali kuraminge yumada, inimna gum dipapu, katuai di lap pepidi, dipru kange amu kepi. Ukupya cadi, nedi sun tep popra gawal men dakamne. Ne adipapu sun tep lyepronkamsene. Tonda, sun mali kuraminge tep, yu kupnerur dinin, ataru neitamai dipu, Mesir mutu nimi deiyo ngebo Sisakdi poryanmara deiki di, ‘Yerusalem mutu peda, yawa popra, sikke buktapkamsere,’ tenepsi ngeda, men kupkamsene. 8 Dinino, go karepnepa, Mesir mutu taleramre ngebo, Raja Sisak, er dipapu sun tep popra bisbisa kapredi, sun Yehuda tara nesala yuma talenkamre. Ukupre pangeda, sundi moupra kael kemkamenge. Ne Yahwehdi talesenunada, teleppu kemdisenepa, pio kanampu kurume. Dinino, yuk mutu Raja nengdi, talesengedi, ikin keca sun nong deiki derinkameng ngeda, ikin weik kupserepa, kange mun kange doupra kunkamrume. Adeiki di, betapra kael kepkamrume.” Allahdi peipu upuda, nabi Semayadi lap pepu.

9 Allahdi upepka cadi, erdi peiputopu, go karepupa, Mesir mutu nimi deiyo ngebo Raja Sisakdi, Yerusalem ila ati arum yuma popra bisbisa kapudi, atara kurami nesala yumada, er amutara kurami. Tonda, Sisakdi, Allah Yahweh er si eremna ati neitamai deiami ila mambul keca, kunumna weik keca cap, tonda nimi deiyo ngebo Raja Rehabeam, er ati neitamai deiamu kunumna weik keca cap yumada, dalupra dopropu. Utopu tonda, nimi porbana tep, jen talena neng, sun nong lelimna keca, er sida perisai yuma cap, dalupra dopropu. Ada, menop taru nimi deiyo ngebo Raja Salomodi, kunumna weik keca emas di ketekepra deiamu perisai yumada, adipapu dalupra dopropu. 10 Sisakdi akeca dalupra dopropka cadi, Yehuda tara taleamu ngebo, Raja Rehabeamdi, emas di deipra domi perisai, er pununa tep, yuk gat keca, er si perunggu di punupra deipu. Ada, erdi, “Angeda, sundi ketekepra deipkurume,” pepra deipnepa, er pel don nengdi, akeca perisai ketekepra derirami. Atep, sun jen talena neng, sun nong lelimna tep keca, er sida perisai-perisai, gat keca perunggu di ketekepra deiramipa, Rehabeamdi akeca dopra, Allah er si eremna ati, bisi buplan damai kalengami neng tep karepupa, aperisai dopra talepidi, akati buplan-buplan damai yuma kalengami.

11 Tonda, nimi deiyo ngebo Raja Rehabeamdi, Allah Yahweh er si eremna atida, pio tupa banapu kuramu taruda, er melimna nengdi, akeca er si perisai doupra kikiman barami. Ukuramidi, Raja konum kupra sengpepkopda, tamupra er ati beu taruda, anengdi adipapu, akeca perisai doupra, sun kalengami neng kurami ati pumbon neitamaipu, dubena derirami. 12 Ange yuma kuramipa, nimi deiyo ngebo Raja Rehabeamdi, Allah Yahweh er damai dipru amu kepra beua tep, angeda telep kupra kuna ngeda, Allah Yahwehdi epka cadi, er yu weik kupkada, tapropudi, go karepupa, Yehuda mutu neitamai tupa akupu. Ada, Allah Yahwehdi nimi deiyo ngebo Raja Rehabeam tep, wenemna keca yambula dipapu wenepka tepa. Tonda, er tep pio gum kupra deipmatu dinin, go ton karepupa, Raja peda tupa gam kuramu. Tek sisi ngeda, ataruda Yehuda tara neitamaida, telep kun keca yambulanun ton, tupa akwamu.

Israel neng deiyo ngebo Rehabeam pel doramunge tep, sekra deipi upu

13 Uda, nimi deiyo ngebo Raja Rehabeamdi, Yerusalem mutu talepra kuramu. Tonda, erdi nimi deiyo ngebo kepra taleamu ngeda, keteng tamun empat belas (14) tahun neitamaida, Yehuda tara talepra kupbaramu. Ukuramu taruda, er nimi deiyo talepra, gonga keamu taruda, er nena tep, keteng tamun empat puluh satu (41) tahun nepbaramu. Ukupbaramu taru di, Yehuda tara taleamu taru yumada, keteng tamunda, denge weik, tujuh belas (17) tahun deiki di, pio Yerusalem mutu ila ati arum neitamai kuramudi pel doramu. Israel mutu neitamai kwamu mutu kan-kanda, ila ati arum weik akwamu dinin, Allah Yahwehdi, ‘Amutu Yerusalem neitamaida, ne si deipnedi, acapu kunkamne,’ teneramnga cadi, er si eremna tep atida, acapu ketenepra deamidi domi. Raja Rehabeamda, er nin sisada, er si Naama kuramu. Naama, erda Amon yala ner kuramu.

14 Rehabeamdi pio mali weik kuamunge deiyoda ake. Ada, Allah er si Yahwehdi peiamu ngeda, ‘Angepu, talepra dombanapu kunkamne,’ men teneramudi, pio pe deipra, men kuramnga cadi, ange taprapudi, mali pio weik kuramu. 15 Nimi deiyo ngebo Raja Rehabeam, er pel gonga kepra doramunge, adinin dipdongopra gawal dakunge yuma cap, erdi deipupa, dadeipdanen barami neng capda, ange yuma kael kemna tep, nabi Semayadi sekamu buku neitamai di sekeiamupa, ukutaru neitamai yuma peda, tupa akurure. Tonda, erdi pel doramudi, kuramu keca yumada, amenda taru kupkamu keca lap pena ngebo, er si Ido, erdi sekra deiamu buku cap, aneitamai ton sekra deiamu. Atep, sundi sekeiamrei buku neitamaipu, Raja Rehabeam pel doramunge peda, sekra deiprei. Raja Rehabeam cap, Raja Yerobeam cap, sun kuramrei taru neitamaida, podanapu kurami.

16 Uda, amenda taruda, Rehabeam konum depu pangeda, sun nimi deiyo-deiyo Raja neng depnepa, Daud mutu peirbaramyaipu doupra, bena peipi. Bena peipi dingeda, er yo pununa tep er mipu, er si Abia erepra deipipa, Yudea tara mutu neitamai talepra kuramu.