2Ch 13 | XteSC | STEP | Raja Yerobeamdi nimi deiyo talepra gonga kepudi, Israel tara taleamnganen, keteng tamun weik delapan belas (18) tahun konum kupupa, aketeng tamun neitamai, ataru dipapu, Abia nimi deiyo ngebo Raja kepra, Yehuda tara kurami nesala tep, gonga kepra taleamu. Atarupu Abiada, nimi deiyo ngebo kepra, Yehuda yala nesala kurami mutu neitamai taleamu.

2 Chronicles 13

Raja Abia cap, Raja Yerobeam cap, popdareiya tep seki upu

1 Raja Yerobeamdi nimi deiyo talepra gonga kepudi, Israel tara taleamnganen, keteng tamun weik delapan belas (18) tahun konum kupupa, aketeng tamun neitamai, ataru dipapu, Abia nimi deiyo ngebo Raja kepra, Yehuda tara kurami nesala tep, gonga kepra taleamu. Atarupu Abiada, nimi deiyo ngebo kepra, Yehuda yala nesala kurami mutu neitamai taleamu. 2 Abiadi nimi deiyo ngebo kepra, Yerusalem mutu neitamai kurami nesala yuma tep, taleamu keteng tamunda, weneri (3) tahun kuramu. Abia er nin sisa, er sida Mikhaya kuramu. Mikhayada, Uria er ner mi kuramu. Anerda, Gibea mutu ner kuramu. Ataru neitamaida, Yudea tara taleamu ngebo Abia cap, Israel tara taleamu ngebo Yerobeam cap, bokropdareidi podaramrei.

3 Yudea tara nimi deiyo ngebo Raja Abiadi, er jen talena ila kael nengda, denge pio weik empat ratus ribu (400.000) neng ketenepra deipudi porbaramu. Utopu ton, Israel tara taleamu ngebo Raja Yerobeam peda, er jen talena neng, denge pio weik, delapan ratus ribu (800.000) ila kael keami jen neng di ketenepra deipudi, ‘Abia cap, er tara neng cap popkamne’ tenen, bena keteneipu.

4 Abutene nimi deiyo nengdi, wepra deiprei jen talena neng yumada, kikiman ortara di, atara di kepra deipreidi, itara iknapi dam tara, Efraim tara kepra deipre ngebo Raja Abiada, erdi Zemaraim mutu deiki ketenepra teku ngebo, Yerobeam tep kongpepu. Tonda, Yerobeamdi talemau nesala, sun Israel tara kurami neng tep, kongpepbanmaupa, gekepi. Abiadi pepu.

“Sunda, Yerobeam cap, erdi talerur nesala sun Israel tara kurum nesala cap, gekepnerume! 5 Ne pepkusen upuda, kapul men kael keamrum do? Gume, ne kaele, sun konum kael keamrume. Ada, Allah Yahwehdi, nun Israel nesala yala-yala yuma tep melimamseu Allahdi, konum pedina upu deiki di peiamseu upuda, garam uwa deiki di koupdongopnenga utopu kwamu ngeda, Daud tep peipu. ‘Daud kandi deipmempa, dadeipdanen bankameng nesala yumada, sun Israel yala-yala nesala yuma tep, deiyo talepra, nimi deiyo neng kepra, Raja pio kunkamenge. Yuk yala nengdi, ne mawa nesala, Israel yala nesalada, men talenkamenge. Kan yala neng dipapu talenkamenge. Uda, sun kaele, Allahdi, ‘Ukupkamenge,’ pepra, pedina upu deiki di pepra deiamu ngeda, pio akapkamre ja. Nimidi, ‘Angeda gume,’ peptenga peda, pio men gum kuptue. Pio atep kunkamre.

6 Allahdi aupu konum peiamseu dinino, yuk yala ngebo Nebat, er mi Yerobeamda, er deiyo ngebo Raja Salomo tep, pel doramu dinin, Salomo tep taprapudi, aupu deiki bisinapu kuramudi, yaninapu kuramu. 7 Ukuramu dingeda, ‘Raja kupkamne’ tenen, erepra deipdaudi, tekrou pangeda, mali kunge nengda, bura tara tali-tali kunge neng weika di bulupra, er cap gung kupra deriramidi, Raja Rehabeam tep yanipi. Tonda, sun dipapu tenepnedi, sun deiyo ngebo Salomo, er mi Rehabeam tep, tupa kaber ngebo kuramu taruda, erdi men tenepmanpapu sundi, ‘Angeda ukupkupe,’ perami. Sundi ange kurami taruda, Rehabeamda, kange pio moupra tenena gum, er puto yambula dipu kuramu taru di, ‘Anengda, poryankusenge,’ tenena ngeda, pio moupra men teneramu.

8 Ukutaruda, sun abulupra yanmarum nesala yumadi, Allah er si Yahwehdi Daud tep kareamupa, adinin Daud yala nengdi talepra kurami mutu yuma tep, ‘Popmepedi, amutu yuma dalupra dopropkupe,’ tenenmarume. Daud yala neng tep, amutu neitamai tali pertamne upu men peptume. Tek sisi nun epmape. Yerobeamdi kunumna weik keca emas di, sapi bisam urasin utopu ngeda, petupra deipudi, ‘Akecada, nun nai bo kurure’ tenen, ‘Atali keca si eremkamepe,’ peramupa, sundi akeca si eremrum ngeda, weika di ketenepra duyanmarume. Tonda, tek sisi sun jen talena nengda, denge pio weika di bulupra duyanmarumdi, keteneipmarume. Ange yumada nun epmepe.

9 Sunda, Allah Yahweh er si eremna ati pumbon pel dona deiyo neng, sun tek sisi imam-imam nengda, ada Harundi deipupa, dadeipdanen yakarami neng tep nengeda, sundi, ‘Anengda, nun songe, sunda pio gume,’ pepra konum tamrume. Tonda utopu, sundi Lewi yala neng, imam-iman neng pel melimna neng peda, konum tamrume. Ukuramrum dingeda, sundi uperamrume. ‘Gume ware ngebo do yuma, ‘Neda imam pel doptene,’ teneramtu ngeboda, sapi bisam nena yambulnge cap, domba bisam ngangtan bari cap di doupra, yana kareptu ngeboda, er angebodi Allah er si eremna ati pumbon pel dorameng nengdi pel doramenga utopu, doptue,’ perume. Aneng utopu nengda, erepra deiprumdi, ‘Sunda imam pel tali lupra doptenge,’ perume. Aperum upuda, yuk tali-tali kunge mutu nesala kuramengtopu kurume. Dinino, nun nai bo Allahdi, ‘Lewi yala neng dipapu, ne ati pumbon pel dopnetenge’ tenen, wepra deiamu neng men kununga cadi, mali weik kurume. Dinino, nun amutu neitamaida, akurum keca utopu ngeda, ton pio men kunupe.

10 Sunda ukurum dinino, nun atara kunup nengda, ange utopu pio men kunkamepe. Nundi si eremnup Allahda, yuknge ton gume. Nun nai bo Allah er si Yahweh tep, nun melipra kalengserur ngebo, Allah Yahweh tepapu, er sipu eremepedi, er pelpu donkamepe. Tonda, ukupedi, er tep pio men tamamupke, ton men tamkamepe. Nun kaele, Allahdi peiamseutopu, tek sisi imam-imam nengda, nun apu bo Harun erdi deipupa, dadeipdanen yakaramyanen, yana deipi yala neng pua. Yuk yala neng ton gume. Ukupmengopda, sun Lewi yala nengda, melipra pel donapu kunkamenge. 11 Sun anengdi, atumi-atumi ipna taru pe, idona taru peda, men tamkamenge. Sun siltong telep pen keca, er si dupa cap, tonda yapi keca cap popra duyangepa, ‘Allahdi nun mali kunup keca, gum kupra deipkamser’ tenen, Allah Yahweh er gispal dona tep, tonda er siltong gekena tep, akeca dopra, uku dongonkamenge. Tonda, aneng dipapu, minggu-minggu yumada, nena gum roti kwaneng ukupunge ketenepra, pio telep meja deiki derina pel cap donkamenge.

Utopu, atumi-atumi lukunda neitamai yumada, sun aneng dipapu, emas di keteneipi weica derinaida, er yan damai tara di aweica uku unkamenge. Ukunkameng taru neitamai yumada, nun yumadi Allah er si Yahwehdi, ‘Angeda kunkamrume, angeda pio men kunkamrume,’ pepra, deiamu upu yumada, pio moupra tenepra talenkamepe. Dinino, sundi Allah tep, konum taprume.

12 Atep nengeda, nun kaele. Nun ila nimi deiyo ngeboda, er Allah pua. Tonda, sun imam neng peda, aceipu kununga cadi, sun anengdi lelim pen keca er si terompet, ‘Lelim pung pepkamep’ tenen, konum ketenepra deipi. Ada, nundi sun poryakana taru tep, lelim pen keca konum keteneipunge tepa. Ange tep nengeda, sun Israel tara kurum nesala yuma tep nengeda, upepsene. Sun nai bo Allah, er si Yahweh tep, ‘Tapmepedi, er tep bisipkupe,’ tenena pio gume. Sun nai Allah tep men bisinkamrume. Sun kaele, angeda men kupmanto. Aupu yumada, Raja Abiadi, sun Israel tara nesala cap, Raja Yerobeam cap tep, pepu.

13 Uda, Yehuda tara taleamu Raja Abiadi, aupu penmau taruda, Israel tara taleamu nimi deiyo ngebo Yerobeamdi peipupa, er jen talen neng ton bokrapidi, Yehuda tara jen talen neng porbana tep, sun amnyo tara di doproipupa bei. Utopu, ton jen talen neng gung tenpu, Yehuda tara neng, sun urasin tarapu, menepra doproipupa, porbana tep ketenepmai. 14 Ataru dipapu, Yehuda tara jen talena nengdi, dinmaipa, sun Yerobeam tara nengdi, sun Yehuda urasin tara pe, amnyo tara peda, warekra ongopdongopmaipa epi. Ukupmainge konum epi dingeda, lukdanapidi, Allah Yahweh tep, “Uo, nun nai melipseo,” pepra, ila upu ngolongna deiki di pepi. Upepra, sun imam neng dingeda, lelim pen keca terompet pung penmai. 15 Terompet lelim pen keca pung penmai taru dipapu, Yehuda jen talen neng yumadi, nimi porbana tep lap petenkemna tep, ila upu deiki di, ngolokra penmai. Ila lelim penmai pangeda, sun dana-dana tara jen talena nengdi yai dingeda, podanapu kunmai. Dinino, sun Yehuda neng yumadi, ‘Allah melipseo,’ penmainge gekepu dingeda, Allahdi, adipapu puto karepka deiki di, sun Yehuda tara nengdi, Israel tara kurami nesala tep, popra gawal daki.

16 Allahdi Yehuda tara neng tep, puto karepupa, sun Israel tara jen talena nengdi, kware kupupa, adipapu sepra bei. Sepdaro bei dinin, sun Yehuda tara nengdi moropmai utopu kupra, sun Israel tara neng yuma popra gawal daki. 17 Raja Abia cap, sun Yehuda tara jen talen neng capdi, Yerobeam cap, er Israel tara jen talena neng cap tep popi. Ada, sun Israel tara neng denge pio weika di poptapi. Sun Israel tara jen talena neng popi nengda, sun pio ila kael keami jen talena nengda, denge pio weik, lima ratus ribu (500.000) neng popipa depi. 18 Ange tep nengeda, ataruda sun Yehuda tara jen talen nengdi popi. Sun Israel tara kurami nengda, sun amutara kepropi. Yehuda tara nengdi, Israel tara neng tep, popbisipya deiyoda, sun Yehuda tara nengdi, sun nai bo Allah Yahweh cap kikiman dukdongopra kuramya tep, sundi, ‘Gume, Allah Yahwehdi melipsetua deiki dipapu, bisbisa kaptepe’ tenen, teka tenenmaiya deiki di, Israel nesala popra gawal daki. Ada, sun apu yapudi si eremami Allah, sun deiyo ngebo Allah Yahwehdi, sun Yehuda tara neng meliamnga deiki di ukupi.

19 Uda, ukupi dingeda, Raja Abia cap, er jen talena neng capdi, Raja Yerobeam er jen talen neng tep, dombei. Dombanmaiyanen, amutu neitamai kurami ila ati arum cap, akati damai yambul ati arum cap, amutu neitamai kwamu wa tu cap, bena dalupra dopropu. Abena dopropu mutu sida ake. Ada, Betel mutu cap, Yesana mutu cap, Efron mutu cap, bena dalupra dopropu. 20 Abiadi Yehuda tara talepra kuramu taruda, Raja Yerobeam erdi amutu neitamai yuma tep, tamupra men dopropmanto kuramu. Kange di ton cap, puto men kuramu dinin, Allah er si Yahwehdi, amenda taru angebo popupa depu. 21 Yerobeamda, konum depu dinin, Abiada, amutu neitamai yuma talepra kuramudi, er puto ton cap tapakra ila puto weika di kuramu. Amutu taleamu taru neitamaida, Abia erdi, nerapu empat belas (14) di domu. Ukupra erdi deiami nimi nyapuda, dua puluh dua (22) di deiamu. Tonda, er ner nyapuda enam belas (16) deiamu.

22 Uda, Abia dorkuramu taru di dipdongopra, pel doramunge cap, tonda er upu yuma peramunge capda, ange yuma kael kemna tep, nabi Idodi sekeiamu buku neitamai akwapka cadi, aca di lap pepra sekeiamu buku neitamaipu ukutaru peda tupa akapu.