2Ch 14 | XteSC | STEP | Nimi deiyo ngebo Raja Abia konum depu pangeda, adipapu er nong dopra, nimi deiyo-deiyo neng, sun Raja Daud mutu neitamai peirbaramyaipu bena peipi. Konum peipi dingeda, er yo pununa tep, er mi Asapu nimi deiyo ngebo Raja kepra deipi. Asa nimi deiyo ngebo kepra kuramu taruda, Yehuda mutu neitamai yumada, keteng tamun morokyo dam di dutara yuma, sepuluh (10) deiki di, yuk mutu neng cap podana gum dipapu, bouna di dim pepra kurami.

2 Chronicles 14

Nimi deiyo ngebo Raja Asadi Sudan mutu neitamai popra gawal daku upu

1 Nimi deiyo ngebo Raja Abia konum depu pangeda, adipapu er nong dopra, nimi deiyo-deiyo neng, sun Raja Daud mutu neitamai peirbaramyaipu bena peipi. Konum peipi dingeda, er yo pununa tep, er mi Asapu nimi deiyo ngebo Raja kepra deipi. Asa nimi deiyo ngebo kepra kuramu taruda, Yehuda mutu neitamai yumada, keteng tamun morokyo dam di dutara yuma, sepuluh (10) deiki di, yuk mutu neng cap podana gum dipapu, bouna di dim pepra kurami.

2 Nimi deiyo ngebo Asadi er nai bo Allah, er si Yahwehdi, “Ange kunkamrume, angeda men kunkamrume,” peiamutopu, angepu talepra kuramu. Ada, Allah er kange di, ‘Angeda telep kuna cap, teknge kuna capda ake,’ teneramungepu, telep pel dopra kuramu.

3 Tonda, ton nengdi, Allah teka tenena gum di, ‘Yuk tali keca tepapu, nun nai bo ake’ tenen, Asadi taleamu mutu neitamai, nimidi akeca si eremna tep doramidi deiami keca cap, si eremna ati cap yumada, uruprapudi gawal daku. Tonda, yuk tali keca gispal dona cap, si eremna cap tep, dorami keca, er si mesba-mesba cap, mutu dup deiki isok si eremna tep dorami ati-ati capda, urupra sikke buktapu. Tonda, isok si eremna tep, mem gel deiaminge dopra, taikra gum kupra deipu. Tonda isok si Asyerah, er si eremna tep keca, ila lyom co ingami ngeda, ange-ange yuma kweneprapudi, gawal daku. Ton ngeda, gopra yuk karenai deipu. Ada, nimidi, ‘Isok-isok si eremamyai yuma peda, gopra yukai deipudi, ton ngeda urupra, sikke buktapudi, gum kupra deiamu.

4 Ukupu dingeda, ataru dipapu, Raja Asadi, sun Yehuda mutu neitamai kurami nesala yuma tep, peipu. Ada, “Nun nai yapudi, si eremami Allah, nun nai bo Allah Yahwehdi, ‘Angeda kunkamrume, angeda pio men kunkamrume. Telep kuna ngeda, ake, dumsisi kuna ngeda ake,’ peiamseunge cap, peteremamseunge yuma capda, angepu talepra kunkamepe. Ukupedi, er sipu erepra, er tepapu gispal donkamepe,” pepra deiamu. 5 Allah teka tenena gum nengdi, isok si eremna tep, mutu dup deiki di, isok si eremami ati-ati yuma cap, isok-isok morona cap, gispal dona cap tep, siltong telep keca uku dongonai yuma capda, uruprapudi, sikke buktapudi, gum kupra deipu. Amali keca yumada, Yehuda mutu di gopra, yuk karen mutu deipu. Ukupka tep nengeda, er Asadi Yehuda mutu talepra kuramu taru yumada, amutu neitamai yuma, yuk mutu nesala podana gum dipapu, bouna dipapu kurami.

6 Yehuda tara neitamai yumada, yuk mutu nesala podana gum dipapu, bouna dipapu kuramya tep nengeda, amutu neitamai yuma, ‘Yuk mutu yu nengdi yana popsenung’ tenen, ila lyom gel beilya wipra deiamidi, ila ati arum dominge yumada, lepsisikra doramudi, telep kupra puto keipu. Allah er si Yahwehdi Asa tep, kange pio bouna di dukdongopra kunange kareamupa, adeiki di Yehuda tara neitamai yuma, podana gum dipapu, dim peprap, bouna dipapu kurami. Ukupka cadi, keteng tamun ware kupra deiki di ton men poryanami. Telep kupra kikiman kurami.

7 Ataru neitamai di, nimi deiyo ngebo Raja Asadi, Yehuda mutu neitamai kurami nesala yuma tep pepu, “Pio tek sisi ngeda, ‘Yu nengdi yana popsenung’ tenen, nun yumadi, amutu neitamaida, aila ati-ati arum yuma, gat gel dopra, ila lyom beilya, er sida tembok kepra ongopdongopmepedi wipkamepe. Tonda akati-akati wengna bisai tep, gat keca er si besi di ila buplan ton ketenepra deipkamepe. Tonda, nun mutu kalengna tep, akati-akati damaida, gat gel di lyoma di deipra dona tep, er si menara-menara weika di dopkamepe. Tonda, ila bisi buplan deikida gat keca, er si besi beton di, lelipra dopmepedi, puto keipkamepe.

Amutu neitamai yuma, nun dipapu talepra kunkamepa deiyoda, nun yumadi, ‘Nun deiyo ngebo Allah Yahwehda, er sipu erepmepedi, erdi peiamseu upu yuma talepmepedi, moupra kunkamepe,’ tenen, konum telep kupra kunupa cadi, Allah Yahweh er dipapu, ‘Yehuda tara neitamai kunkameng nesalada, nedi melipsenepa, nimi podana gum di, bouna dipapu amutu kunkamenge,’ teneamseutopu, go konum karepseua cadi, amutu-mutu yumada, tupa talepra kunkamepe. Ukupseua tep nengeda, nun amutu neitamai yuma apel donkamepe.” Asadi upepka cadi, sun apel gonga kepra dopbaramidi, sun kurami keca yuma nong kepka cadi, pio telep kupra kurami.

8 Ataruda, nimi deiyo ngebo Raja Asa, er Yehuda tara neitamai kurami jen talena neng, sun dengeda, pio weik tiga ratus ribu (300.000) neng kurami. Ajen talena neng, nimi podan tara tep, sun nong lelimna keca, er sida perisai, weiknge cap, ketenepra taleami. Tonda, lyom co takke deiki di lun keca, er si tombak cap talerami. Tonda, sun Benyamin yala neng neitamai di, sun jen talen nengda, denge weik dua ratus delapan puluh ribu (280.000) neng peda, sun nong lelimna tep keca, er si perisai dinin, meteknge cap, mar cap, jen cap yuma doupi. Ukupi dingeda, sun ajen talena neng yumada, pio kwar kuna gum di, nimi podana keca ila kael keami nengpu kurami. 9 Amenda taruda, Sudan mutu ngebo, er si Zerahdi, Yehuda mutu porbana tep, er jen talena nengda, denge pio weik, men nukmanto, beribu-ribu nengdi doupra, Yehuda tara neng tep, poryau. Tonda, nimi teknedi porbana tep, kuda bisamdi gipra tu deiki embana keca, er sida kereta kuda ngeda, tiga ratu (300) di duyana poryau. ‘Yudea tara neng popkun’ tenen, ketenepra kunmai taruda, bisi yakanmaiyanen, mutu si Maresa mutu damai di gopra ortara di kepropi.

10 Ukupipa, Yudea tara nimi deiyo ngebo Asa adipapu gupra, Zerah damai beu. Ukupu pangeda, sun anengdi yuk-yuk sun nyapu nepra tengna tep, Merasa mutu damai dinin, mutu si Zefata mutu tarada bena, ‘Nimi podankup’ tenen, ketenepra tekmai. 11 Ukunmarei taruda, Yudea mutu nimi deiyo ngebo Asadi, si eremamu Allah Yahweh tep moropudi upepu. “Uo, ne nai bo Allah Yahweh, kan dipapu nimi puto gum neng tep melimrume. Nun peda, puto boun nengpu kunup dinin, ortara puto weik neng damai bena popdanapu kepkupa cadi, kan dipapu nun tep ‘Melipsememdi, puto karepkuserem’ tenen, moropkene. Atep ukutaruda, nun melipkuserume.

Ada tali tep gum dinin, nundi kan tepapu, ‘Allah Yahweh dipapu melipsetue’ tenen, kunupa tep moropkene. Tonda, nun nai bo Allah Yahweh, ukutaruda nundi kan teppu, ‘Kan dipapu melipsetum’ tenen, dinapu kukenupa cadi, bariamkepedi, kan tep kange derinupe. Nun nai bo kan si deiki di yana, ortara ketenepmange neng, ila puto jen talena neng, denge pio weik, men nukmanto ortekmengedi, balila deipra yana kunmange. Atep Allah, kanda nun nai bo Allah Yahweh kuruma cadi, ‘Naio, ortekmang nengdi, popra bisbisa kapsenung’ tenen, tonda ‘Kan mawa nesala cap, kan cap tep, men popra bisbisa kapsetengedi, men poptapra gawal daksetenge’ tenen, moropkene. Tonda, ‘Kandi puto karepsemempa, nundi aneng popra bisipmepedi, sikke buktaptepe’ tenen, moropkene naie.” Raja Asadi moropu.

12 Upepra moropu dingeda, nimi deiyo ngebo Asa cap, Yehuda tara jen neng cap di, Sudan mutu jen talena neng damai porbei. Ataruda, Allah er si Yahwehdi, puto weik karepka deiki di, sun Yehuda tara nengdi, Sudan mutu jen talena neng yuma tep, popidi tapipa, sun tupa gam kunmai neng yuma, domaipanen, bai tara saka, sepra bendopi.

13 Sepra banmaipa, sun Asa cap, er jen talena neng capdi, popra dombanmaiyanen, karen mutuda, ortara Gerar mutu bei. Sudan tara nengda, pio weika di popipa depi. Atep, sun Sudan mutu jen talen neng yumada, pio puto boun kupupa, Allah er si Yahwehdi, Yudea tara neng tep, puto weik karepka deiki di, sun Yudea tara jen nengdi, Sudan mutu jen neng popra sikke buktapi. Tonda, sun Yehuda tara jen talena nengdi, sun Sudan tara jen talena nengdi talerami bung keca yumada, dalupra dopropi.

14 Ukupi dingeda, Yehuda tara jen talena nengdi, Gerar mutu neng cap, aila ati arum cap, tonda akati arum damai kwamu yambul mutu-mutu yuma capda, popra bisbisa kapidi, sikke buktapi. Deiyoda ake. Ada, Allah Yahwehdi amutu nesala yuma tep, sun dipru neitamai kware pio weik keca karepupa, sundi, Allah Yahweh tep, ‘Uo,’ tenepidi, lukdana kware weik kupu. Ukupu taru dipapu, sun Yehuda tara jen talena nengdi, amutu neitamai kurami nengdi talerami keca pio weik akapka cadi, sun bung keca yala-yala pio weika di, adipapu dalupra dopropi.

15 Angepu gum dinin, tonda ukunmai taru dipapu, sun amutu nesaladi talepra peirami gam keca, ati damai yuma peda popnapu kupi. Ukupya tep, amutu-amutu neitamai yuma, sun domba bisam cap, kambing bisam cap, unta bisam capda pio weika di dalupra dopropidi, dubenami. Ange yuma konum kupi dingeda, Asa cap, er jen talena neng cap, adipapu tamupra, Yerusalem mutupu bei.