2Ch 15 | XteSC | STEP | Allah er Lek Sambalada, nimi si Oded, erdi deiamu ngebo nabi Azarya deiki wekudi, er dipru dekpepra kunmau.

2 Chronicles 15

Nimi deiyo ngebo Asadi ukupu kunange tep, seki upu

1 Allah er Lek Sambalada, nimi si Oded, erdi deiamu ngebo nabi Azarya deiki wekudi, er dipru dekpepra kunmau. 2 Ukunmaua cadi, nabi Azaryadi, ‘Nimi deiyo ngebo Raja Asa antapkamne’ tenen, beu. Beudi pepu, “Uo ne deiyo ngebo Asa cap, Yehuda mutu neitamai kunge nesala yuma cap, tonda Benyamin yala neng yuma cap tep pepsene! Moupra gekepso! Allah Yahweh sun damai kuserure. Ange utopu, sun peda er damai kurume. Atep, sundi Allah Yahweh tep, ‘Er pesere upu yuma adipapu dombankamepe, angepu talenkamepa tep, melipseo,’ pepra, moropmum pangeda, erdi sun damai yana melimserepa, er cap kikimanpu kunkamrume. Dinino, sundi er tep, men gekepmumdi, tapmumnyopda, erdi sun tep melimna gum dipapu, tamkamsere.

3 Pio pumun taru di, Allah erda dumsisi ngebo, tek sisi er tenpu kurur dinin, sun menop taru kurami Israel nesalada, er tep betapra men kael keami. Er upu moupra men taleamya cadi, er cap, sun cap, antapra kikiman men kurami. Utopu ton, Allah er cap, nimi cap, antamdana tep, pel dona deiyo neng, imam-imam neng ton pio men kuramya cadi, sun tep men peteremamsei. Tonda, Allahdi, ‘Angeda kunkamrume, angeda pio men kunkamrume,’ pepra, deiamu upu moupra men teneramidi, men talepra kurami. Atep, sun apu yapuda, tali-talipu kurami. 4 Tali-tali kuramidi, mali weik cap, ikin keca weik cap, kurami dinino, sun ataru kurami nesala yuma, mali kange doupra kuramidi, sun deiyo ngebo Allah er si Yahweh, Israel nesala wepra kalekra melimamu ngebo, Allah tep, ‘Melipseo,’ pepra moropi. Sun Israel nesala yumadi, ‘Gume, Allah erdi pesere upupu moupra talepmepedi, er tenpu tep, si eremkamepe,’ teneramidi, ‘Melipseo,’ pepra moropi. Moropi pangeda, adipapu sun moropi utopu, Allah Yahwehdi, yana sun tep melimamu.

5 Ataru neitamaida, anesala cap, yuk mutu nesala cap yumada, sun bouna di dim pepra telep deiki di men kurami. Mali kange doupra, yu weik kuna cap, tenimtona cappu kurami. Atep nengeda, ‘Yuk mutu nengdi poptapsenung’ tenen, pio tenedaramya tep, sun yumadi, tali lupra amutu-amutu neitamai di men embei. Ataru neitamaida, amutu neitamai yumada, nimi weika di podanapu kuramya cadi, nimi popmantoipu kwamu. 6 Tenpu ila tara kurami nesaladi, ton tara kurami nesala tep, popbisipra yanidanapu kupra mali pedanapu kuramidi, popra, gawal dangdanapu kurami. Tonda ton mutu neitamai, ton ila ati arum kurami nengdi, ton tara mutu neitamai ila ati arum kurami neng tep, popra gawal dangami. Ukuramya deiyoda, Allahdi sun amutu-amutu neng deikida, ila kange mun keca yala-yala yuma cap, podana tenena deiyo keca cap, kareamupa mali weik kurami.

7 Sun menop taru kurami nesalada, ukupra kurami dinino, sunda ataru kunmarum nesaladi aneng ukuramitopu men kunkamrume. Sun ukutaru kumum Israel nesalada, sun kware pio kuna gum dipapu, bouna di, dim pepra kunkurume. Tonda sun telep pel donmarumada, tamna gum dipapu, pio pe deipra pel donapu kunkamrume. Deiyoda, sun pio pe deipra telep pel donkamrum ngeda, nong kupkamre. Tonda, Allahdi sun tep menenga keca karenkamser ja, pepsene. Nabi Azaryadi, Raja Asa cap, sun Israel nesala cap tep pepu.

8 Uda, Oded er mi nabi Azaryadi, nimi deiyo ngebo Raja Asa tep, aupu lap pepudi, amenda taru kupkamunge tep, lap penmau pangeda, Asadi aupu gekepu. Ukupu dingeda, er kange pio deipra, gispal dopudi, kware tenena gum dipapu, balila weik kupu. Ukupu dingeda, Yehuda tara neitamai yuma cap, Benyamin yala neng, sun kurami mutu neitamai yuma cap, nimidi, ‘Nun nai bo ake’ tenen, isok-isok si eremna tep, ati dopra deiamyai yumada, Asadi uruptapudi, akeca gopra pio yuk karenai bena deipu. Tonda, sun Efraim mutu yuma popbisipmai mutu-mutu dana-dana tara yumada, sun anesala peda, isok-isok si eremna tep, keteneiamyai yuma uruptapra gopra deipu. Asadi, ‘Ukupkurume,’ pepra deiamupa, er pel don nengdi, ukupra pel dorami dingeda, adipapu Allah er si Yahweh, er si eremna cap, er karena cap tep keca, derina tepai, er si mesbada, pumun taru mali kupu dinin, Asadi amesba kange di lepsisikra dopudi, telep kupra deipu. Amesbada, Allah Yahweh er karerban ati damai dinin, urasin tarapu, akeca ketenepra deipudi dopu.

9 Apel yuma konum dopra, seng pepkopda, Asadi sun Efraim mutu kurami neng yuma cap, Manasye mutu kurami neng cap, tonda Simeon yala neng cap, sun Yudea tara yanamidi, kikiman kurami neng yuma, sun yuma tep, kongpepu pangeda, Asa tara mutu neng yuma yana bulupi. Tonda, sun aneng yuma, nimi deiyo ngebo kuramu ati damaipu kurami. Deiyoda, sun ayala-ayala nesalada, Israel tara neitamai kurami dinin, Asadi telep kuramupa, anengdi, ‘Uo, tek sisi Asadi si eremrur Allahda, Allah Yahwehdi Asa cap, sun Yudea tara kunge nesala cap tep, kalekra melimrure’ tenen, kael keamidi, sun anesaladi dirami. Atep, Asadi kongpepu pangeda, adipapu yana bulupi.

10 Sun ayala-ayala nesala yumada bulupra, Yerusalem mutupu wengyai. Ada, ware weneri tumi deiki di, bulupra wengyai taruda, ada Asadi keteng tamun lima belas (15) tahun deiki di Yudea tara taleamudi kuramu. 11 Ataru neitamaida, Allah Yahweh doupra karena cap, er si eremna cap tep kecada, denge pio weik poprapidi Allah tep karerami. Ada, sapi bisamda tujuh ratus (700) cap, tonda domba bisam cap, kambing bisam cap, tapakra karepmai ngeda, denge pio weik, tujuh ribu (7.000) bulupra, Allah tep popra karepi. Ayapi keca yumada, Sudan mutu jen talena neng, nimi porbenmaiyai di, bisbisa kapidi, akeca-keca dalupra doprapidi, tamupra Yerusalem mutu duyanami keca kupka cadi, ange yuma doupra, Allah Yahweh tep kareryai.

12 Ukupi dingeda, Allah Yahweh tep pepi. Ada, “Nun kange tenenange yuma cap, nun dipru yuma cap, nun nong cap yumada, nun nai bo Allah Yahweh kan tep karepkepe. Nun kange dipru kan deikipu derinkamkepe. Kandi, ‘Ukunkamenge,’ tenesememtopu, angepu talepra kunkamepe. Ada, nun apu yapudi, kan si eremamipa, kandi sun tep melimamum ngebo, Allah Yahweh kan tepapu tenenkamepe. Kan sipu eremkamepe,” pepra, pedina upu deiki di pepra deipi. 13 Ange yuma ukupra kuramya cadi, ataruda ware nesala do yuma, kaber neng do, wisi neng do, nerapu do, ila neng pe, mambul gum neng peda, sundi, ‘Gume, Allah Yahwehdi pesere ngeda, nun songe. Er tepapu men tenenkamepe,’ tenerami nesala yumada, ataru dipapu poptapipa depi.

14 Dinino ataruda, sun Allah Yahweh tep, pedina upu deiki di, “Er tepapu talenkamepe. Er sipu eremkamepe,” pepra deiami neng yumadi, ila upu deiki di, “Allah Yahweh er si deiki di, nun konum pepmaptopu, tek sisi kunkamepe,” pepra, pedina upu deiki di pepra deiami. Upenmai taruda, pio kange deiprapidi, pung pena lelim pen keca, er si terompet cap, jem domba bisam er giso takke keca dopra, ila lelim penmaidi gudinmai. 15 Sun Yehuda mutu kurami mutu nesala yumadi, pio kange deipi. Ada, sun anesaladi, “Gume apedina upu pepmapada, tali pertamna gum dinin, nun kange dipru yuma di, pio tek sisi pepmepe. Angepu kunkamepe,” pepra, pingping kange deipi. Sun anengda kange deipra, Allah Yahweh tep si eremami. Er si eremamipa, Allah Yahweh er peda, kange pio deipra, sun tep dopropu. Erdi sun tep amutu neitamai pio bouna di dim pepra kunange karepu. Atep, sun cap, sun dana-dana tara kurami nesala cap, nimi podana pio gum dipapu, telep kupra, bouna di dim pepra kikiman kurami.

16 Ange-ange yuma konum kupi pangeda, adinin dikdongoprapudi, nimi deiyo ngebo Raja Asadi, er nau ner Maakha tep, “Ila deiyo ner, Raja ner tupa men kupkamrume,” pepra, doprapudi er amutarapu deipu. Atep, aner er pel dona gum kupra deipu. Adeiyo ner, er si Maakha, amutara deipu deiyo ngeda, ake. Ada menop taru aner Maakhadi, isok si Asyera, er si eremna tep keca, ila lyom co tekra deiamnga deiki di, pio mali weik kuramu. Ukupka tep, er wenemna tep nengeda, Asadi aner dopra, amutara keipu. Ukupu dingeda, aisok si eremna lyom co ingamu ngeda, kweneprapudi, oloktapra sikke buktapra deipudi, mutu si Kidron me duman dinin, Kidron Banai dubena, uku dongopupa, uku di jepropu. 17 Yehuda tara nimi deiyo ngebo Raja Asada, er gam kuramu taru yumada, er kange dipru yuma deiki di, Allah er si Yahweh tep, pio talepra dombaramudi, er sipu eremamu. Ukuramu dinino, Israel nesala kurami tara neitamaida, ton nengda, isok-isok si eremna tep, mutu dup deiki dopra deiamyaida, erdi ange yuma men urumtamamu. Angeda, telep men kuramu dinin, yuk pel doramunge cap, kuramunge capda, teleppu kuramu.

18 Tonda, telep di kuramu ngeda, er nai bo Abia cap, tonda er pe Asa cap, sun butenedi, ‘Akecada, Allah er gispal dona tep, erngepu pio akunkamre’ tenen, kunumna weik keca emas yuma cap, perak yuma cap, akati pumbon pel dona tep keca yala-yala yuma cap, Allah Yahweh er gispal dona tep nengeda, akeca yuma dopra, Allah er si eremna ati pumbon duyana deipu. 19 Ukupudi dakuramnganen, keteng tamun weik, tiga puluh lima (35) tahun deikida, nimi deiyo ngebo Asadi taleamu tara neitamai yumada, pio nimi podana tep gonga kemna ton pio men kemamidi, telep kange doupra, dim peprappu kurami.