2Ch 16 | XteSC | STEP | Keteng tamun pio weik, tiga puluh enam (36) deiki di nimi deiyo ngebo Raja Asadi, Yehuda mutu neitamai tupa taleamu. Ataruda, nimi deiyo ngebo, er si Baesa, erda Israel tara mutu taleamu ngebodi, Yehuda mutu neitamai kurami neng tep porbeu. Tonda ukupu dingeda, ila ati arum er sida, Rama mutu, akati neitamaida, ‘Yerusalem mutu nesala ikin weik kupkameng’ tenen, Rama mutu puto weik kemderirbeu. Ada, ‘Yehuda tara kurami neng, sun benapna yanapna kepnung’ tenen, tonda, ‘Yuk mutu nengdi, Yerusalem mutu kunge nesala tep, yana melipnung’ tenen, sun embarami bisida lelimna tep bena, Rama mutu popra bisbisa kapudi, amutu talepra puto weik kemderirbeu.

2 Chronicles 16

Yehuda tara kurami neng cap, Israel tara kurami neng cap, podarami upu

1 Keteng tamun pio weik, tiga puluh enam (36) deiki di nimi deiyo ngebo Raja Asadi, Yehuda mutu neitamai tupa taleamu. Ataruda, nimi deiyo ngebo, er si Baesa, erda Israel tara mutu taleamu ngebodi, Yehuda mutu neitamai kurami neng tep porbeu. Tonda ukupu dingeda, ila ati arum er sida, Rama ^{▼▼Rama – Rama mutuda, ada Yerusalem mutu bana tep, embarami bisi dinin, Yerusalem mutu di, dapu tara, (arah utarada), banbari kilometer (8) benamidi, akati arum domi. Raja Baesadi, amutu bisbisa kapka cadi, puto weik kweipupa, ware mutu nengdi do yuma, Yerusalem mutu men wekmanto, tonda Yerusalem mutu di, bura saka men benmanto kurami.} mutu, akati neitamaida, ‘Yerusalem mutu nesala ikin weik kupkameng’ tenen, Rama mutu puto weik kemderirbeu. Ada, ‘Yehuda tara kurami neng, sun benapna yanapna kepnung’ tenen, tonda, ‘Yuk mutu nengdi, Yerusalem mutu kunge nesala tep, yana melipnung’ tenen, sun embarami bisida lelimna tep bena, Rama mutu popra bisbisa kapudi, amutu talepra puto weik kemderirbeu. 2 Atep nengeda, Yehuda mutu taleamu ngebo, Raja Asadi, kunumna weik keca emas cap, perak capda, Allah Yahweh er si eremna ati pumbon neitamai, mambul keca derinai di, upula dopropu. Tonda er pe ati pumbon di deiamu kunumna weik keca weikanun ton dopropu. Akeca-keca dopra, Damasyik mutu kuramu ngebo Raja Benhadad. Angeboda, Siria mutu nesala tep, nimi deiyo ngebo Raja kuramudi, Siria mutu talepra kuramu. Atep, Asadi akunumna weik keca, Raja Benhadad dubana tep, doproipupa dubei.

3 Akeca dubei nengdi, Raja Asadi peipu upu ton lap perbei. Asadi Raja Benhadad tep upepu. “Nun buteneda, kange tenpu doupra, podana gum dipapu, dim pepra telep kupra kikimanpu kunkamepe. Ada, nun nai yapu, sun podana gum di, telep kupra kikiman kuramitopu, kunkamneme. Atep nengeda, kan menenga kunumnada, nedi kan tep, akunumna weik keca emas cap, perak capda, adopra deipkene. Atep nengeda, nedi kan tep moropkene. Ada, ukutaruda sun Israel tara mutu neitamai kunge nesala talepra kure ngebo, Raja Baesa cap, kan cap, ‘Nimi podana gum di, telep kupra kikiman kunkamepe,’ pepra, menop taru pel kikiman doramrum ngeda, tapkurume. Ukupmempa, Baesa er jen talena nengdi, ne mutu yana arapra kunungaida tapra, bendopkamenge. Ne tep men poryankamnenge,” pepra moropu.

4 Amoropu upuda, Benhadaddi, angeda gekepudi, ‘Telepe pua,’ tenepu. Gekepudi er jen talepra kurami neng yuk-yuk tep, deiyo kepra taleami jen neng pepupa, sun amutara taleami jen neng cap, sun cap yumadi, Israel tara mutu neitamai kurami nesala tep bena popi. Bena popra, gawal daki mutuda ake. Ada, Iyon mutu cap, Dan mutu cap, Abel-Bet-Maakha mutu cap, tonda Naftali yala nesala, sun bung keca cap, amenda taru jenkaminge cap tep, mawa derirami ati arum cap, amutu-amutu yumada, bena popra gawal daki. 5 Ukupi ngeda, nimi deiyo ngebo Raja Baesadi, alap penmai upu konum gekepu dingeda, ‘Uo,’ tenepudi, mambul kange doupra, Rama mutu talepra puto kemderiramu ngeda, adipapu taprapudi, bendopu. 6 Ange konum kupu pangeda, Raja Asadi pepupa, Yehuda yala nesala yumada, tenpu ngebo peda, ton men tapu. Sun anesala yuma beidi, Raja Israel tara kurami nesala, sun deiyo ngebo Baesadi, Rama mutu puto kepra derina tep gel cap, co cap, dopra deipmau nge yumada, ‘Dopra beso,’ pepupa, ange yuma dopra dubei. Adoupra bei keca yumada, Raja Asadi dopra, sun Mizpa mutu cap, Geba mutu cap, kurami nesala melimna tep, bena puto kepra deipu.

Nabi Hanani tep, pepu upu

7 Ataru neitamaida, amenda taru kupkamunge diramu ngebo, nabi Hananidi, nimi deiyo ngebo Raja Asa, er damai yaudi pepu. “Kanda kan nai bo Allah Yahweh, er tep kange deipra men kurume. ‘Er dipapu lyepnetue,’ men teneramume. Dinin, nimi deiyo ngebo Raja Siria mutu talepra kurur ngebo tepapu, ‘Er dipapu lyepnetue’ tenen, kange deipra kurume. Atep nengeda, kandi sun Israel tara kunge nesala, sun porbisina tep goda, konum wangaplummume. Atep, Siria mutu nimi deiyo ngeboda, konum bedopkeua cadi, er tep tomopra men ateng koupdogoptume. 8 Kanda kange di ton cap, moupra tenipetepo! Ada, sun Sudan mutu jen talena neng cap, Libia mutu jen talena neng cappu, sun ila jen talena neng yumada, ila puto weik jen talena neng men kunung do? Tonda, sun nimi porbana tep, sun keca er si kereta perang buknedi, tu deiki sepdaro nimi porban keca men talepra kurami do? Tonda, jen talena neng bungne kecada, kuda gipra men embarami do?

Ange-ange yuma taleprapreidi, sun mutu nengda, yuk mutu nesala utopu gum dinin, sun jen neng, sun putoda ila weika di yakanmai. Dinino, kandi, ‘Gume, ne nai bo Allah Yahweh, er dipapu nimi porbisina deiyo kecada, nun damai deriserura cadi, Allah er puto karepserya deiki di, nun podan neng tep poptapra bisbisa kapkamepe’ tenepmumdi, er puto deiki di aneng yuma popra gawal dakmume. 9 Kandi apodan neng popra, gawal dakmum ngeda, tali tep gume. Allah Yahwehdi tuai mutu neitamai ban-ban yuma kunge nesala tep, pio moupra diredi, er ila putoda dopra, er tep, tenimtona gum dipapu, pio pe deipra, er tep teka tenepra kunung neng, sun deikipu nimi porbisina deiyonge derirure. Kanda angeda pio telepnge tenena gum di, walwal kun keca cap, mali kun keca cappu kumemnya tep nengeda, kan damaida ukutaru di dipra, dorkunkamrem taru yumada, podana tep kecada, kan deikipu kunkamkere. Yuk mutu neng cap pio podanapu kunkamrume. Allah er upu lap pena ngebo, nabi Hananidi Raja Asa tep pepu.

10 Ataruda, nabi Hanani erdi pepu upu tep, nimi deiyo ngebo Raja Asadi derepu. Derepka cadi, anabi ngebo adipapu dopra, wenemna ati dongopu. Ataru neitamai peda, nimi deiyo ngebo Raja Asadi, er talepra kuramu mutu neng kankan, ton neng tep ikin keca dopra, sun aneng deiki deipupa, kange mun kange doupra kuramidi, ikin deikipu kurami.

Nimi deiyo ngebo Raja Asa kuramnganen, gawal daku taru tep, pepu upu

11 “Nimi deiyo ngebo Raja Asa, er yuk pel gonga kepra doramu adinin, sirya tarunge yumada ake,” pepra, sekeiami ngeda, ila buku neitamai sekra deiami. Abukuda, Yehuda tara kurami nesala taleami Raja-Raja neng cap, tonda Israel tara mutu neitamai kurami nesala talepra kurami Raja-Raja neng cap, sun kurami keca si sengna buku neitamai konum sekra deiami. 12 Keteng tamun denge pio weik tiga puluh sembilan (39) tahun deikida, nimi deiyo ngebo Raja Asa, ila pu er yan butene dana-dana jeramupa, ai bukamu. Ukuamu taru peda, tenpu taru pe ton, Allah Yahweh tep, “Uo ne naie melipneo,” pepra, men mororamu dinin, nimi kwetena tep neng, sun kwetena tep ngebo dokter puda mororamu. 13 – 14 Ai bukamnganen, keteng tamun butene kupkopda, konum depu. Konum depu pangeda, er nong yumada, co deiki deipidi, nintong telep pen keca, er si rempah-rempah cap, tonda utopu nintong telep pena tep keca, wangi-wangi cap, obat ramuan cap kepra er nong deiki likeipi. Ukupi dingeda, Daud er talepra kuramu mutu neitamai dinin, nimi deiyo neng Raja-Raja depnepa, peiramyaipu doupra, bena peipi. Asa peipyaida, er pedi peipupa, er pel don nengdi, konum ketenepra palipi. Tonda, Asa er taleamu mutu neng yumadi, er gispal dona tep, ila uku er si unggun deiki di upra gispal dorami.