2Ch 17 | XteSC | STEP | Nimi deiyo ngebo Raja Asa konum depu pangeda, er nai bo yo pununa tep, Yosafat Yehuda mutu talena tep wepra deipi. Tonda, sun Israel nesala porbana tep, puto keipra deipu.

2 Chronicles 17

Yosafat nimi deiyo ngebo Raja teku upu

1 Nimi deiyo ngebo Raja Asa konum depu pangeda, er nai bo yo pununa tep, Yosafat Yehuda mutu talena tep wepra deipi. Tonda, sun Israel nesala porbana tep, puto keipra deipu. 2 Er jen taleng neng yumada, ‘Yu nengdi poryasenung’ tenen, Yehuda tara neitamai, ton ila ati arum, lyom gel beilya di ongopra wiamya damai ketenepra dipupa, bena kalengami. Tonda, Yehuda tara dinin, yuk jen talena neng gung ton, yuk-yuk wipra bura tara peda dopra deipu. Tonda, er nai bo Raja Asadi bisbisa kapudi, dalupra dopromu mutu, Efraim yala nesala kurami mutu neitamai peda, jen talena neng gung ton dopra dokotepupa, sundi akati-akati arum dopra kuramya neitamai bena kalengami. 3 Yasafat kaber ngebo tupa kuramu taru neitamaida, erda er apu bo Dauddi, dumsisi kupra kuramutopu, er peda telep kupra kuramnga cadi, Allah Yahwehdi, Yosafat tep pio melimamu. Tonda, Yosafat erda, isok-isok si Bahal, atali keca tep, ‘Ware kupkamne do?’ tenen, men mororamudi, aisok si pio men eremamu. 4 Isok si pio men eremamu dinin, er nai bodi Allah er sipu eremamutopu, Yosafat peda, Allah er sipu eremamudi, Allah tepapu, ‘Ware kupkamne do?’ tenen, asimpeteramudi, mororamu. Utopu, Allahdi, “Angeda kunkamrume, angeda pio men kunkamrume,” pepra, deiamu upupu talepra kuramu. Tonda, er tupa gam kuramudi, pel doramu taruda, Israel tara mutu neitamai kurami nesaladi, mali-mali weik kuraminge ton, ange utopu men kuramu.

5 Allah er si Yahwehdi Yosafat tep, puto weik keipka cadi, ‘Yehuda mutu neitamai ila nimi deiyo ngebo Raja Yosafatdi, Yehuda mutu talepra kunkamre’ tenen, ila puto keca kareamupa, atara yuma puto di talepra kuramu. Ukuramu taruda, amutu neitamai kurami nengdi, sun pe kange dipapu, menenga keca cap, karena telep keca yala-yala yuma cap dopra, er damai talipu kareryakarami. Kareramipa erda, ila isomka weik ngebo kuramupa, kange pio deriramidi, er tep gispal dorami. 6 Ila puto deiki di, er kange tenenange cap, er dipruai capda, Allah Yahweh deiki deiamudi, Allahdi, “Angeda kunkamrume, angeda pio men kunkamrume,” peiamunge tep, moupra gekeramudi, talepra kuramu. Tonda, Yehuda mutu neitamai isok-isok si eremna tep, mutu dup deiki ketenepra deiamyai yuma uruptapra sikke buktapudi, isok si Asyerah si eremna tep, ila lyom co di ikra, deiaminge peda, kwenepra sikke buktapupa, ange yuma gum kupu.

7 Yosafatdi, Yehuda tara taleamnganen, keteng tamun weneri deikida, er amutara pel melipra dona deiyo nengda, weneri wepra deipupa, Allah er si Yahwehdi, “Ange kunkamrume, angeda men kunkamrume,” pepra, deiamu mem upu dopra embaramidi, peteremami. Sundi Yehuda mutu neitamai kurami nesaladi, domi ati-ati arum bena peteremami. Yosafatdi wepra deipu deiyo neng, sun sida ake. Ada, Benhail cap, Obaja cap, Zakaria cap, Netaneel cap, tonda Mikha cap wepra deipupa, peretepembarami. 8 Sun anesala melimna tep neng, kikiman embarami nengda, sun Lewi yala neng topnebari (9) neng cap, imam neng butene cap, ketenepra deipupa embarami. Lewi yala neng sun sida, Semaya cap, Netanya cap, Sebaya cap, Asael cap, Simiramot cap, Yonatan cap, Adonia cap, Tobira cap, Tob-Adonia cap, wepra deipu. Utopu, sun imam neng butene sida ake. Ada Elisama cap, Yoram cap wepra deipu.

9 Wepra deipupa, aneng yumadi, Allahdi, ‘Angeda kunkamrume, angeda pio men kunkamrume,’ pepra, mem upu dopra, kikiman peterep embarami. Yehuda mutu neitamai yuma peterep embarami taruda, Allah Yahweh erdi, “Angeda kunkamrume, angeda pio men kunkamrume,” pepra, deiamupa sekeiami mem upu bukuda doupra bendi, ‘Amutu neitamai kurami nesala yuma, gekepkameng’ tenen, peterep embarami.

Yehuda mutu yumada, Yosafat er dipapu taleamu upu

10 Allah Yahwehdi, Yehuda mutu neitamai yumada, puto weik keipudi, sun dana-dana tara yuk mutu nesala tep, ila kware deiyo keca karepupa, atara nesala yuma cap, sun nimi deiyo neng yuma capdi, Yehuda tara nesala tep, kware weik kupu. Kware weik kupka cadi, sun yuk mutu dana-dana tara kurami nesala cap, sun deiyo neng Raja-Raja capdi, Yudea tara nimi deiyo ngebo Yosafat tep, kware kupka cadi, sundi Yudea mutu neitamai nimi mar poryakanada, pio men kurami. Bouna dipapu, dim pepra kurami. 11 Sundi, ‘Podana gum dipapu, telep kupra kikiman kunkamepe. Tonda, aRaja ngebo gispal donkamep’ tenen, sun Filistin mutu nengdi, doupra yakarami kunumna weik gat keca perak cap, yuk-yuk menenga keca yuma cap, duyanmaidi, Yosafat tep karepipa, erdi dopra deriramu. Utopu tonda, sun Arab tara nengdi duyakarami kecada, domba bisam denge weik tujuh ribu tujuh ratus (7.700) cap, tonda utopu, kambing bisam tujuh ribu tujuh ratus (7.700) cap doupra yakaramidi karerami.

12 Ange tep nengeda, ataru neitamaida, nimi deiyo ngebo Raja Yosafat, er telep kupra amutu talepbanmauanen, ila nimi deiyo kemnange puto weik cap tapakra kepbaramnganen, puto di talepra kuramu. Yehuda mutu neitamai yumada, ‘Yu nengdi poryasenung’ tenen, ila ati arum dana-dana tara, gat gel di lyom beilya wiprapudi, ongopgenepra deipudi puto keipu. Tonda amutu neitamaida, sun amenda taru jenkameng keca cap, kunumna telep bung keca cap, mawa derina tep ati, ton domngai benai deriramu.

13 Ukupudi er dipapu Yudea mutu neitamai yumada, amutu nesala putapkamre keca yala-yala yuma weika di, sun ila ati-ati arum neitamai mawa deriamu. Ada, er tara nengdi putapne taru dopra karen nge tep, ketenemderin mutu dopra deriramu. Tonda, ‘Yerusalem ati arumda, kalengkameng’ tenen, sun podan taru ila kael keami jen talen neng weika di wepra deipu.

14 Sun ajen talena neng, sun yuk-yuk dinin, sun nimi deiyo kepra, sun amutara jen nengda, denge pio weik seribu (1.000) jen talen neng ton talepra, nimi deiyo neng kurami. Erdi sun aneng wepra deipu jen talena deiyo nengda ake. Ada, nimi si Adna, erda jen talena neng sun deiyo ngebo panglima kupudi, denge weik tiga ratus ribu (300.000) jen neng taleamu. 15 Butene ngeboda, er si Yohanan wepra deipu. Erda sun jen talena neng denge pio weik dua ratus delapan puluh ribu (280.000) jen neng talepra kuramu. 16 Weneri ngeboda, er si Amasia wepra deipu. Er nai boda, Zikri kuramu. Erdi sun jen talena neng dengeda, pio weik, dua ratus ribu (200.000) jen neng taleamu. (Angebo Amasia erda, menop taru er pe kange dipapu, “Nedi Allah Yahweh er gisal dona tep, er pel tep tali melipra jen talena pel donkamne,” pepudi, yana gonga kepra melimamu.

17 Tenpu jen talena deiyo ngebo, er si Elyada, Benyamin yala nesaladi deiamipa, dadeipdanen yakaramyanen, deipi ngebo kuramu. Er Elyada, pio kware gum dipapu, balila weik kuramudi, jen talena ngebo kuramu. Er amutarada, jen neng denge weik, dua ratus ribu (200.000) jen neng ton taleamu. Sun anengda, nimi podana tep, mar cap, nimi porban taru nong lelimna tep keca, er sida perisai cap, ketenepra taleramidi, akeca talena deiyo neng kurami. 18 Aneitamai tenpu ngebo ton wepra deipu ngeboda, er si Yosabad wepra deipu. Er amutara talepra kurami jen nengda, denge pio weik, seratus delapan puluh ribu (180.000) jen neng taleamu. Sun ajen neng yumada, adipapu nimi podan keca yala-yala yuma ketenepra taleami. Aneng ton wepra deipu.

19 Aca di deiki tara sekmapu neng yumada, Yosafatdi, wepra deiamupa, sundi Yerusalem mutu cap, Yehuda tara neitamai cap, talepra kalengami. Akuramitopu, nimi deiyo ngebo Rajadi, jen talena neng yuk-yuknge ton, gung tenpu-tenpu kepra deiamupa, sun Yehuda tara neitamai dinin, ‘Yu nengdi poryasenung’ tenen, ila ati arum dana-dana tara lyom gel beilya wipra deiamyai tep, kalengami.