2Ch 18 | XteSC | STEP | Yosafat Yehuda mutu nimi deiyo ngebo Raja kuramu taruda, ila isomka weik ngebo kuramu. Tonda, er akeca taleramnga deiki di, ila ngebo kuramupa, Yosafat er tara nengdi er tep gispal doramidi, ‘Erda ila mambul ngebo,’ teneramidi, er tep kange derirami. Yosafat cap, Ahab cap, ‘Nunda telep kupra kikiman kunkamep’ tenen, upu sisikreipa, Raja Ahabdi, er ner mi dopra, Yosafatdi deiamu mi, er sida Yehoram karepupa, Yehoramdi dopropudi aner cap kikiman kuramrei. Yehosafat ukupka deiyoda, ‘Ne cap, Israel tara talerur deiyo ngebo Raja Ahab cap, podana gum di, telep kupra kikiman kutepe,’ teneramudi, kupu.

2 Chronicles 18

Nabi Mikhadi, Israel tara ila nimi deiyo ngebo Ahab tep, “Akupmaremtopu kuna meme,” pepu upu

1 Yosafat Yehuda mutu nimi deiyo ngebo Raja kuramu taruda, ila isomka weik ngebo kuramu. Tonda, er akeca taleramnga deiki di, ila ngebo kuramupa, Yosafat er tara nengdi er tep gispal doramidi, ‘Erda ila mambul ngebo,’ teneramidi, er tep kange derirami. Yosafat cap, Ahab cap, ‘Nunda telep kupra kikiman kunkamep’ tenen, upu sisikreipa, Raja Ahabdi, er ner mi dopra, Yosafatdi deiamu mi, er sida Yehoram karepupa, Yehoramdi dopropudi aner cap kikiman kuramrei. Yehosafat ukupka deiyoda, ‘Ne cap, Israel tara talerur deiyo ngebo Raja Ahab cap, podana gum di, telep kupra kikiman kutepe,’ teneramudi, kupu. 2 Ukupudi, dakuramnganen, ware kuprap keteng tamun ton konum kupu pangeda, Yosafatdi Ahab Samaria mutu neitamai kuramngai dirbeu. Dirbeu taruda, er cap, er melimna neng cap yumadi, bena kunmaipa, Ahab tara nesaladi, sun tep gispal dopi. Ukupi taruda, Israel tara taleamu ngebo Raja Ahabdi, ‘Er cap, nun cap, ila kailya kalepkamep’ tenen, er melimna neng tep peipupa, sundi domba bisam cap, sapi bisam cap poprapidi, Yosafat tep, karepi. Ataru neitamai dinin, go akupu taru dipapu, Ahabdi Yosafat tep pepu. “Gume ukutaruda, Ramot tara dinin, Gilead mutu neng porbenkamarume,” pepra moropu.

3 Upepmaua cadi, beu dingeda, adipapu asipetepu. “Yosafat kanda, ne Ahab cap kikiman Ramot mutu neng tep porbenkamnem do?” pepu. Upepupa Yosafatdi pepu, “Jo telepe, atep kan jen talena neng cap, ne jen talen neng cap yuma, kikiman tenpu nesala utopu kunupe. Utopu kan cap, ne cap tenpu kange dounume. Utenenuna cadi, nun kikiman di, Ramot mutu neng porbenkamepe,” pepu. 4 Upepu dinino, Yosafatdi Israel tara taleamu ngebo, Raja Ahab tep pepu. “Pio telep ngeda, nundi, ‘Nun nai bo Allah er si Yahwehdi, ware pepkamser do? Ramot neng porbenkamep do, gum do?’ tenena ngeda, Allah tep asipetepkamne,” pepu.

5 Yosafatdi upepka tep nengeda, ataruda, Israel tara nimi deiyo ngebo Ahabdi, er mutu neitamai kurami nabi neng, denge weik empat ratus (400) neng upupupa, sundi bulupra yai. Er damai yaiyopda, erdi sun tep asipetepu. “Ada tek sisi ne cap, ne tara neng capdi, Ramot mutu nengda porbetepe do, gum do?” pepra asipetepu. Upepra asipetepupa, sundi nabi-nabi nengdi tamupra pepi. “Jo telepe. Nun deiyo ngebo, amutu tep nengeda, Allahdi puto karepkerepa, kandi amutu neng cap, sun mutu cap popra bisbisa kapmemdi, ange yuma dopropkamrume. Allahdi ange yuma karepkamakere,” pepi. 6 Upepi dinin, Yosafatdi Ahab tep, tamupra asipetepu. “Jo, anabi-nabi nengdi, upepmakeng dinin, nun mutu neitamaida, yuk nabi neng ton akunung do? Ada, tek sisi Allah Yahwehdi perur upu gekepra lap pena deiyo ngebo ton akurur do, gum do? Akapyopda, angebo tepapu, asipetepteneme,” pepra, nimi deiyo ngebo Yosafatdi pepu.

7 Upepra asipetepupa, Ahabdi tamupra pepu. “Gume, tenpu ngebo ton tupa akunmare. Ada nimi si Yimla, erdi deipu ngebo, er si nabi Mikha akurure. Angebodi Allah Yahwehdi perur upu gekerura cadi, er tep asipetepnemepa, erdi, ‘Allah Yahwehdi upepsere,’ pepra, lap pepsetue. Dinino, nedi ange bo tep, ‘Ne songe,’ tenenune. Deiyoda, erdi ne tep, telep upu ton pio men penerure. Erdi ne tep, ‘Pio mali kupkamre’ tenen, mali kecapu penerura cadi, angebodi perur upuda, ne songe,” Ahabdi pepu. Upepupa, Yosafatdi tamupra pepu, “Uo, ne kap Ahab, aupu utopu ngeda, pena gume!” pepu. 8 Upepka cadi, Ahabdi, ange konum gekepudi, Ahab er amutara melipra pel doramu deiyo ngebo tenpu tep, “Kan adipapu Yimal, erdi deipu ngebo, nabi Mikha damai menmena bena pepmempa, tamupra ne damai, sun butene kikiman yankururume,” pepra deipupa, angebodi Mikha damai kai perbeu.

9 Amenda taruda, angebodi bena pepupa, Mikha tamupra, Ahab damai yau taruda, sun nimi deiyo neng butene, Ahab cap, Yosafat cap, nimi deiyo neng kemameng opkal pio telepnge kenekmareidi, sun ila neng bungameng keca deiki yuk-yuk bukmarei. Sun aneng bukmareiaida, gandum du wena cap, taingna cap pel doramyaida, ada Samaria mutu bana tep, bisi buplan damai bena bukmarei. Bukmareipa, amenda kupkamu keca upu lap pena deiyo nengda, denge pio weik, sun butene damai yakanmaidi, sun deiyo neng bukmareiai, amenda kupkamu nge tep, pepra deriryakanmaidi, upu weika di penmai.

10 Ataruda, Ahab er mutu ngebo, er si Kenanadi deiamu ngebo, er si Zedekiadi, upu ton penmau. Ada, sun amenda taru kupkamu keca upu peipnepa, lap pena neng, Israel tara kurami nabi-nabi akunmai dinin, tenpu ngebo nabi Zedekiadi, sapi bisam takke dana-dana beleamu urasin utopunge, gat keca er si besi di betapra keteneipu keca doupmaua di, Ahab damai yaudi upepu. “Gume, kanda ne deiyo ngebo. Allah Yahwehdi ne tep upeipneutopu yana pepkene. Ne doupman gat keca utopunge di, doupra bememdi, sun Siria mutu kunge nesala popra, gawal dakmemdi, sun kunung mutu yuma, dalupra dopropkamreme, pepkene. Zedekiadi pepu.

11 Uda, angebo Zedekiadi upenmautopu, sun awekmai nabi-nabi neng yuma, Ahab taleramu mutu kurami lap pena deiyo neng, nabi-nabi nengdi, aupu utopu penmai. Ada, “Jo, angeda pio tek pepmakere,” pepi. “Nun nai bo kandi Ramot Gilead mutu neitamai kunung nesala yuma porbememdi, bisbisa kapkamreme. Ada tali gume, Allah Yahwehdi, puto weik karepkerepa, apenmaptopu tek sisi kupkamrume,” penmai. 12 Upenmai ngeda, sun amutu neitamai wekmai neng yumadi, gekenmai. Ataruda, Ahabdi doproipupa, Mikha damai kai perbenmau ngebodi, ton cap Mikha tep pepu. “Naio, dipetepo. Amutu upu pena deiyo neng, amenda kupkamre keca, lap pena deiyo neng yumadi, sun amutu nabi-nabi yumada, ‘Tek sisi Siria tara neng porbememdi, bisbisa kapkamrume,” utopu penmange.

Ada sun yumadi, ‘Ahab tek sisi Ramot Gilead mutu nesala yuma popra bisipkamreme. Allahdi puto karepkerepa, anesala popra gawal dakamrume,’ penmanga cadi, kanda Mikhadi ton, aupu utopungepu, telep upu bena pepkamrume. Yuk upu pena gume. Kandi angepu bena pepmempa, sun ila deiyo neng kange pio telep kupkamre. Kandi ton, ‘Telep upupu bena pepkuruma’ tenena tep pepkene,” pepu. 13 Upepu dinin, sun butene Ahab damai kapul men yarei taruda, Allah Yahweh, er upu tek sisi lap pena deiyo ngebo Mikhadi, er damai kai perbenmanu ngebo tep pepu. “Gume, neda yuk nge ton men pepkune. Allah er si Yahwehda, tek sisi gam kurura cadi, yuk tali upu men peptene. Ne nai bo Allah Yahweh erdi pepkuner upupu, tek sisi angepu bena pepkune,” pepu.

14 Nabi Mikhadi konum aupu pepu pangeda, sun abutene neng, Ahab bukmauai berei pangeda, Israel nesala sun deiyo ngebo, Raja Ahabdi asipetepu, “Mikhao wareto upu pepkunerem do? Ne cap, Yosafat cap, nun butenedi, Ramot Gileat mutu nesala tep, porbenkamnem ngeda, telepe pepsemempa porbenkamnem do? Gume, pepsemempa tapkamnem do?” pepra asipetepu. Upepupa, Mikhadi tamupra pepu, “Jo, porbana pua. Ormutu kunge nesala porbememnyopda, bisbisa kapkamreme. Ne deiyo ngebo Allah erdi kan tep, puto karepkeredi, melipkerepa, kandi Ramot Gilead mutu neng popmemdi, sun kunung mutu neitamai yumada, dalupra dopropkamareme,” pepu.

15 Mikhadi upepupa, Israel nesala sun deiyo ngebo Raja Ahabdi, tamupra Mikha tep upepu. “Tek sisi Allah Yahweh er si deiki di, pio tek sisi ngepu pepkamnerume. Tali upu pio men penkamnerume. Ware kuprap taru yumada, nedi kan tep, ange konum pepkesi do? Atep, Allah Yahweh, er si deiki di, pio tek sisi upupu pepkunerume,” Ahabdi pepu.

16 Upepu pangeda, nabi Mikhadi tamupra pepu, “Tek sisi ngeda ake. Ne dinmasipa, Israel neng sun jen nengda, domba bisam pein ngebo, utopu ngebo ton gum tep kungedi, tali-tali mutu yuk-yuk embaramengtopu kunmaipa epsi. Ange epmasipa, nun nai bo Allah Yahwehdi upepneu. ‘Ukutaruda, sun Israel tara kunge nesalada, sun ila deiyo ngeboda, konum gum kupkamra cadi, sun anesala yumada, sun tali kange doupra, sun mutupu tamupra benkamenge. Telep ngeda, ton cap podana gum di, tali kange doupra, sun pe mutupu tamupra benkamenge.’ Allah Yahwehdi upepra deipneue,” Mikhadi Ahab tep pepu.

17 Raja Ahabdi aupu konum gekepu dingeda, erdi Yosafat tep peipu. “Adano kao, ne konum pepmakene utopu, angebodi, upepmanere. Angebo Mikha dingeda, ataru-ataru pio yumada, erdi ne damaida telep upu ton men penerure. Mali upupu penerura cadi, ataru peda, mali upu pepnere,” pepu. 18 Aupu pepupa, Mikhadi tamupra pepu.

Ange tep nengeda, ne pepkusen upuda, moupra gekepnereso! Tek sisi upupu pepmakene. Atep nengeda, Allah Yahwehdi peipmaker upuda, moupra gekepkurume. Akeca-keca yuma deiki tara kuredi, er dipapu talerur ngebo, er si Allah Yahweh, er mambul bungnai bukmaupa, er pel don jen talen neng malaikat yumada, er buru tebalal tara cap, dumsisi tara cap, bukmauai tekmaipa epsi. 19 Epsi taruda, Allah Yahwehdi upepu. “Ware ngebodi mok upu deiki peipmamerpa, Ahabdi, teka tenepredi, ‘Ramot-Gilead mutu porbenkaman’ tenen, bisi banmarpa, sun podan taruda, amutu nengdi, er poptapkamang do?” pepu. Upepupa, abulupmai jen talen malaikat kan-kan di, ton ngebo, ton ngebo yuk-yuk di, “Ange kupkup do? Ange kuptepe do?” pepra, upu yuk-yuka di pedanmai.

20 Upenmaiyanen, amenda taruda, jen talena malaikat tenpu ngebo katuai di, Allah er si Yahweh damai tekudi pepu. “Nedi Ahab er dipru tamuna tep, gekena telep upu deiki di, ‘Ukupkamrume,’ perbenkamne. Upepnyopda, ‘Ne pepmakentopu kupkamrume,’ pepkamne,” pepu. 21 Aupu pepupa, Allah Yahwehdi amalaikat tenpu tep asipetepu. “Ware kupkamrema deiki di, er Ahab kange dipruda, tamupkamre do?” pepu. Upepupa, amalaikatdi tamupra pepu. “Angeda, Ahab damai upu pedinkamang neng, sun nabi-nabi tep, sun kange dipru neitamai mok upu pepnepa, bena gekepmengedi, atali upupu Ahab damai bena pedinkamenge,” pepu. Amalaikatdi upepupa, Allah er si Yahwehdi tamupra, amalaikat tep pepu. “Ange bena peipmempa, anabi-nabi nengdi Ahab tep, tali upu pepmenge pangeda, tek sisi gekepra, Ahab er kange dipru tamupkamre. Atep adipapu ukupkamreme,” pepra, Allahdi amalaikat tep pepu. Apepunge yumada, Mikhadi Ahab tep lap pepu.

22 Mikhadi aupu pepu dingeda, aupu ton dukdongopra pepu. “Aupu penmainge yumada, konum gekepsa tep, ne kaele. Sun amutu kunge nabi-nabi neng yumadi, yana penmakeng upu yumada, tali upupu penmakenge. Ada, tali tep gume. Allah Yahwehdi peipupa, er malaikat ngebodi, tali upu doupra, sun nabi-nabi neng damai peipupa, anengdi kan damai yana tali upupu penmakenge. Dinino, angeda Allah Yahweh erdi tenepmaretopu kunmange. Atep nengeda, kanda Raja Ahab tep nengeda, tek sisi ila kange mun keca dopropkamreme. Allah Yahwehdi tenepmakertopu konum kupkamreme.” Mikhadi Raja Ahab tep pepu.

23 Mikhadi aupu konum pepu pangeda, Kenana erdi deiamu ngebo, nabi Sedekiadi aupu gekepudi, adipapu yu kupupa tekra yaudi, nabi Mikha er katum yana bongopu. Ukupudi, Allah Yahweh erdi dokotepu malaikatda, ne damai yana peipneudi, ne damai di gopra, kan damai benmau taruda, dan tara bisi benmaudi, peipmakeu do?” pepra asipetepu. 24 Upepra asipetepupa, Mikhadi angebo Sedekia tep pepu, “Kanda, ‘Malaikatdi tek sisi yana peipmaneu,’ tenepmarem dinin, tali upu pertamne isokdi yana pepmakeu adano. Atep, kandi ne tep asipetepmanerem ngeda, ortaru kupkamrenge deiki dipapu kandi kael kepkamrume. Ortaruda, kan kware kupkerepa, bulung ati neitamai inipkamrem taru dipapu, kandi kael kepkamrume.” Mikhadi pepu.

25 Aupu pepupa, Israel tara nimi deiyo ngebo Ahab gekepudi, adipapu er nyapu tep peipu. “Sundi angebo tomopra, akati arum deiyo kepra taleredi, upu bongderina deiyo ngebo, er si Amon damai doupra berume. Tonda, ne mi er si Yoas, amutu deiyo ngebo cap, sun damai dubenkurume,” pepu. Upepupa, adipapu Mikha tomopi.

26 Ahabdi aupu pepu dingeda, aupu ton dukdongopra pepu. Aneng butene, sun damai dubemumpa, er wenemna ati deiprengopda, jen keca pio telepnge ton men karenkamrerunge. Mikha er tep nengeda, tali roti cap, tali me cappu karenkamrerunge. Angebo er jen tep nengeda, pio yambula dipapu karenkamrum panen, ne Ramot Gilead mutu neng damai porbenamnyanen, telep kupra tamupra yane pangeda, angebo epkamne. Atep, sun Amon cap, Yoas cap tep, sun damai nedi peipmasen upu doupra perbenkamrume,” pepra deipupa, Mikha tomopra doupra bei.

27 ‘Wenemna ati dubena deipkamep’ tenen, ketenepi pangeda, er nabi Mikhadi upu tenpu Ahab tep pepu. “Kan Ahabda, gekepneo! Kan men popkengedi tapkengepa, telep dipapu tamupra yamemnyopda, sun yumadi kael kepkamrume. Ada, Allah er si Yahwehdi Mikha deiki peiamemeu ngeda, Allah dia guma’ tenen, kael kepkamrume. Dinino, kan men tamupra yamemnyopda, ‘Uo, ada Allahdi peiamemua’ tenen, kan kael kepkamrume. Atep, aupu pepman ngeda, sun agekenmarum nesala yuma moupra tenepmumdi, dinapu kunkamrume. Nedi pepman upuda, tek sisi kupkamre,” Mikhadi pepu.

Raja Ahab Ramot-Giled mutu di popi upu

28 Israel tara deiyo ngebo Raja Ahab cap, Yehuda tara taleamu ngebo Raja Yosafat cap, sun butene adipapu, ‘Ramot-Gilead mutu neitamai kurami nesala yuma tep, mar porbenkupe’ tenen, porberei. 29 Sun abutene neng porbenkurei taruda, Israel tara deiyo ngebo Raja Ahabdi, Yosafat tep pepu, “Gume, neda jen talena neng sisa utopu kupra, nimi porbenkun cadi, nimi deiyo neng kemameng opkalda, ne men kepkune. ‘Amutu nengdi men kael kepkamneng’ tenen, tali jen neng kemamengepu kenekamane. Dinino, kan Yosafat tep nengeda, nimi deiyo neng kemameng utopu ngepu, telep opkalda, kanpu kenekurume,” pepu. Konum upepu cadi, Israel nesala sun deiyo ngebo, Raja Ahabda, ‘Yuk nengdi pio men kael kepkamneng’ tenen, jen neng sisa kemameng opkalpu kenekra, Ramot-Gilead mutu kurami neng tep, nimi porbeu.

30 Ukupu taruda, Siria tara nesala taleamnga deiyo ngebodi, er tara jen talena neng tep, konum peipu. Sun anengda, nimi porbenkup taru tep, kuda bisam tu deiki gipra embarur kecada, er si kereta kuda perang, er tara neng kankan neitamai di, akeca yuma taleamidi barami neng tep, upu pepra deipu. Ada, “Sun nimi porbenkurumu taruda, ila mambul neng pe, yambul mambul gum neng pe, yuk tali neng tep, men tenenkamrume. Dinino, sunda Israel tara nesala talepra kurur ila nimi deiyo ngebo Raja Ahabpu, er tepapu dombena popkurume,” pepra deipu.

31 Aupu konum pepra deipka cadi, er tara jen deiyo neng cap, sun nyapu jen neng cap, sun kikiman adipapu wisipra bei. Nimi mar porbana tep beidi, adipapu Yosafatda, nimi deiyo ngebo Raja neng kenengameng pio telep opkal kenekupa epi. Epidi, ‘E, ada ila neng kemameng opkal pio telepnge kepmar ngeboda, erda tek sisi Israel nesala, sun ila nimi deiyo ngebo Raja Ahabda akonuma’ tenen, dombei. Dombena wareki. Warekipa, Yosafatdi, “Uo, neda Israel nesala, sun ila nimi deiyo ngebo Raja guma. Neda Raja Ahab men kunune,” pepra, ngolokudi, Allah tep moropu. Ngolokra moropu pangeda, Allah Yahweh gekepudi melipu. Melipka deiki di, Siria mutu jen talena neng, apodanmai ngeda dopra, yuk tara keipupa, anengdi Yosafat tep, tupa dombana gum di taproi.

32 Atep, erdi ngoloku pangeda, sun abena warekmai jen talen neng cap, tonda ajen talen neng, sun deiyo neng capda, Yosafat er urasin epi dingeda, adipapu kael kepidi, “Gume, erda teka, sun Israel neng sun deiyo ngebo Raja Ahab guma cadi, ‘Men porbenkupe’ tenen, dombana gum di, adipapu taproi.

33 Yosafat tapidi, yuk neng cap podanmaiyanen, ataru neitamaida, Siria mutu jen talen ngebo tenpudi, ‘Israel neng, sun deiyo ngebo Ahabda ake,’ tenena gum dipapu, tali mangkau kange doupra, ‘Ahabda abanmare,’ tenena gum di, mar tali lupra dopupa, Ahab banmauai dourbeu. Ukupudi, amar Ahab nong deiki dourbeu dingeda, Ahab erda nimi podan taru kenengameng gat opkal kenekmaudi banmaupanen, agat opkal neitamai yambul go tupa kupmaua di, mar bena maraipu. Ada, yambul go kupmauai di, bena marapu pangeda, adipapu, Ahab er tu deiki di gipra embanmau keca, kereta perang ^{▼▼kereta perang – Akeca gambar dina tep, 2 Tawarik 1:17 dinkurume.} doupmau melimna ngebo tep upepu. “Uo, amutuda, nimi weik podanmai tara tapra, yuk karen tara sepra benkuneme. Sundi mar dopipa, ne nong maraipneue,” pepu.

34 “Ortara karenai benkuneme,” pepu dinin, sun adipapu men bura saka berei. Ada, sun mar podanmaiai di, ortara yambul karenai benmareia cadi, atumi neitamai yumada, sun Siria tara neng cap, Israel tara neng cap, podanmaidi kunmaiyaipu, yambul orkarenai di bena kunmareidi, dinmarei. Ada, er kudadi gipra tu deiki embaramu keca, kereta kuda perang damai baripra bukmaudi, aceipu kunmareidi dinmarei. Ataruda, Ahab er nong mar di marapmaipa, dila dopmau tara di, yapi pio embanapu kunmau. Er yapi yuma embanmauanen, keteng konum wengbeu taru, idona kepu pangeda, nimi deiyo ngebo Ahab adipapu depu.