2Ch 19 | XteSC | STEP | Yehuda mutu taleamu nimi deiyo ngebo Raja Yosafatda, Siria mutu neng konum ponmauanen tapra, er pe mutu Yehuda tara neitamai dinin, Yerusalem ila ati arum neitamai nimi deiyo neng kuramyaipu, telep deiki di tamupra yau.

2 Chronicles 19

Nabi ngebo tenpudi, Yosafat damai bena wenepu upu

1 Yehuda mutu taleamu nimi deiyo ngebo Raja Yosafatda, Siria mutu neng konum ponmauanen tapra, er pe mutu Yehuda tara neitamai dinin, Yerusalem ila ati arum neitamai nimi deiyo neng kuramyaipu, telep deiki di tamupra yau. 2 Nabi tenpu ngebo, er si Hanani, erdi deiamu ngebo, er si Yehu, erdi nimi deiyo ngebo Raja Yosafat damai peryau. Anabi ngebodi pepu. “Ne deiyo ngebo, kanda ware kupmarem do? Sun mali-mali keca talepra kunge nesala tep, ware deiyo deiki di, ange tenepmenge nesala tep melimrum do? Tonda, ange utopu, nun nai bo Allah Yahweh tep, ‘Nun dabale, erda nun songe,’ tenepmengedi, kange bongtore neng tep, ‘Sun aneng cap, ne cap, tonpa di yuk mutu neng tep, mar podankamepe. Aneng melipkamne,’ tenenmaremdi, kikiman embanmarem ngeda, warya tep do? Ne deiyo ngebo, kandi utenenmarema deiki di, nun nai bo Allah Yahwehdi, kan tep yu weik kupkerepa, erdi ne deiyo ngebo kan tep wenepkamakere.

3 Dinino, kan neitamaida, telepnge ton tupa akapmakere. Ada kan talepmum mutu neitamai yuma di, tali keca si eremna tep, amutu nengdi, isok si Asyerah, er si eremna tep, ila lyom co dopra ingaminge yumada, kandi peipmumpa, kan pel dona deiyo nengdi, akeca yuma gopra yukai deipidi, sikke buktapi. Ange kupmum ngeda, telepe. Tonda, kan peda, ‘Nun nai bo Allah Yahweh tep, er sipu eremkamne’ tenen, ‘Er upupu gekepnedi dombankamne. Erdi, ‘Ware upu pepkamner do?’ tenen, er tepapu dinedi, gekenkamne,’ tenerume. Ange peda telep kurume,” nabi Yehudi Yosafat tep pepu.

Raja Yosafatdi, Yehuda mutu kurami nesala tep, upu lepsisikra bongdina deiyo neng wepra deiamnga tep upu

4 Yehuda tara taleamu nimi deiyo ngebo Yosafatda, er kuramu mutuda, ila ati arum Yerusalem mutu neitamai kuramu. Ukuramudi, erdi taleamu mutu neitamai yumada, pio dapu tara neitamai, arah utara kwamu mutu, Berseba mutu di dipra embaramudi, iknapi dam tara, arah selatan kwamu tara, Efraim tara neitamai embaramudi, pel doramu. Ukuramnga deiyoda, ‘Ne mutu nengdi, sun mali kun keca tapmengedi, nun apu yapu tep, kalekra melimamu Allah, Allah Yahweh er tarapu tamupra kuptenge’ tenen, dipembaramudi, upu peramupa, aneng gekeramidi, Allah er tara tamupra kemdorami. 5 Tonda, er amutu Yehuda neitamai yumada, ‘Yuk mutu nengdi poryasenung’ tenen, ila ati arum domidi, akati dana-dana tara, lyom gel di ongopra beilya wiamyai bena, sun amutu kurami nesala makuna tep, bena upu lepsisingna deiyo neng erepra deipu.

6 Tonda, upu lepsisingna deiyo neng erepra deipudi, aupu pepra deiamu. “Uda, ‘Angeda kunkamrume, angeda pio men kunkamrume,’ pena upu pepra, nimi upu lepsisikra penkamrume. Aupu penkamrum taru neitamai yumada, moupra teneprumudi, telep ngepu upu bokra derinkamrume. Ada sun kange dipru neitamai dipapu, moupra tenepmumdi, ange yuma upu lepsisikra bongdinkamrumnge yumada, sun nimi sisa dipapu tenena gum dinin, nun nai bo Allah er si Yahwehdi tenerurtopu, upu bongdinkamrume. Amutu neng tep, upu lepsisikra bongdinkamrum taru yumada, Allah Yahwehdi melipra kalengamserepa, sundi, ‘Ukupkupe,’ tenepra, upu talenkamrume.

7 Ange tep nengeda, aupu bokra penkamrum taruda, Allah er si Yahweh tep, kware tenenkamrume. Angeda kupkup do, yuknge kupkup do, gum do?’ tenen, moupra tenenkamrume. Deiyoda, nun deiyo ngebo Allah er si Yahwehda, yuk neng yuma tep, tek sisi sun kuramengtopu, upu lepsisikra bongdirure. Ton tara neng tep, ‘Ne kange deipne,’ tenepra, yuk tara neng tep, ‘Anengda ne songe,’ tenena gum dipapu, utotopu telep kupra upu bongdirure. Erdi nesala ban-ban yuma tep, mali men kemdirure. Tonda, ‘Anengda ne dabale,’ tenena gum dipapu, ton tara neng tep, ikin keipredi, ton dana tara neng tep, telepnge men karerure. Bul keca dorona gum dipapu, nimi yuma kuramengtopu tenepra, upu lepsisikra bongdirure. Sunda, er tepapu apel talepra donkamruma cadi, sun peda, er kuretopu kupra, telep kupra upu lepsisikra bongdina deiyo neng pel talepra, pel telep don neng kunkamrume,” pepu.

8 Ange utopu ton, sun Yerusalem mutu neitamai kurami nesala yuma tep nengeda, Yosafatdi sun Lewi yala neng cap, Yehuda mutu neitamai kurami yala-yala neng kuramitopu, deiyo talena tep, deiyo-deiyo neng cap, tonda sun imam-imam neng cap, ‘Upu lepsisikra bongderina pel talepra kunkameng’ tenen, wepra deipu. Aneng yumada, Allah Yahwehdi, “Angeda ukupkurume, angeda pio men kunkamrume,’ pepra deiamu upu, tek sisi dombanapu kupmengedi, upu bongdina deiyo neng kunkameng’ tenen, wepra deipu. Tonda, sun Yerusalem mutu neitamaipu kurami nesaladi, mali kange doupmengedi, yu kuprepa, upu deiki di pangdanapu kunkameng taruda, ‘Adeiyo neng dipapu, upu lepsisikra penkameng’ tenen, aneng wepra deipupa, Yerusalem mutu neitamai kuramidi, apel talepra dorami.

9 Tonda, Yosafatdi, er wepra deipu neng tep, aupu ton pepra deipu. “Sun anesala yumada, sundi apel talepra kunkamrum taru yumada, angepu tenepra kunkamrume. Ada, ‘Mali kupmepepa, Allahdi wenepserur’ tenen, nun nai bo Allah Yahweh tep, kware kupra kunkamrume. Tonda, sun kange dipru yuma deiki dipapu yuma, tamna gum di, pio moupra dumsisipu kumumdi, kange pio deipra, apel talepra kunkamrume.

10 Sundi apel talepra upu bongdinkamrum taru yuma cap, upu lepsisikra bongdinkamrume taru yuma capda, sun kayapu neng, amutu kunge nesala tep, upenkamrume. Ada, ‘Sun yumadi, Allah Yahweh tep mali-mali men kunkamrume. Erdi, ‘Angeda kunkamrume, angeda pio men kunkamrume,’ peipseu upuda moupra kunkamrume. Atep, ware keca do yuma, nimidi popdangepa, yapi sangna tep nge cap, wenemna upu deiki di mem pepra derinange cap, ‘Ange kuna meme, angeda kuna telepe,’ penange cap, ‘Ange-ange yuma tep konuma pepra deipunge cap yumada, ange yuma moupra kunkamrume. Nun mutu neitamai kunge nesala yuma tep, upenkamrume. ‘Sun yumadi, Allah Yahweh tep mali kupra kuna ngeda, pio meme. Malinge kupmum pangeda, Allah er yuda, sun deiki cap, sun kayapu neng deiki cap, ‘Ikin keca deipseredi, wenepserur’ tenena tep pepsene. Dinino, nedi, ‘Ukupkamrume,’ pepra, deipsen upu, moupra kupmumnyopda, sundi mali kun keca talepra, men kunkamrume.

11 Tonda, sun imam-imam neng, sun ila deiyo ngebo, er si Amaryada, sun deiki tara deiyo ngebo kunkamsere. Ware kun keca do yuma, Allah Yahweh er damai upu lepsisikra bongdinkamrum keca yuma tep nengeda, angebodi melimkamsere. Ange utopu, amutu talerur deiyo ngebo, Raja tep keca yuma tep nengeda, Yehuda yala nesala, sun deiyo ngebo er sida Zebaja, erdi sun deiyo ngebo kupredi, melimkamsere. Zebaja er nai boda, er si Ismael kuramu. Tonda, sun Lewi yala nengdi, sun deiki tara kemna tep, sun deiyo neng utopu kunkamsenge. Sundi talepsengedi, ‘Angeda ukuprume,’ pena upuda penkamsenge. Ange tep nengeda, nedi sun upu bongdina deiyo neng wepra deipmasen neng yumada, ‘Kware tenena gum dipapu, sundi kange dipru eremna deiki, ila puto di apel talepra kunkamrume. Telep kupra kuprumu pangeda, ange ukupmenge neng tep, Allah Yahwehda, sun cap kikiman kunkamrume. Er dipapu sun kange dipru neitamai di melimkamsenge.” Yosafatdi, sun Yudea tara upu lepsisikra bongdina deiyo neng tep pepu.