2Ch 2 | XteSC | STEP | Uda, nimi deiyo ngebo Raja Salomodi, “Allah Yahweh er si eremna tep ati dopne dingedi, ne pe kuna atida dopkamne,” pepra teneramu.

2 Chronicles 2

Allah Yahweh er si eremna ati dona tep, Raja Salomodi akeca-keca yuma keteneipu upu

1 Uda, nimi deiyo ngebo Raja Salomodi, “Allah Yahweh er si eremna tep ati dopne dingedi, ne pe kuna atida dopkamne,” pepra teneramu. 2 Akati dona tep nengeda, Raja Salomodi pel dona kael neng ton wepra deipu. Ada, akati don keca dopra dosemna tep nengda, tujuh puluh ribu (70.000) neng wepra deipudi dokotepu. Ton nengda, mutu dup bena, urasin pio telep gel sekra keteneipkamneng nengda, nimi gung weik, delapan puluh ribu (80.000) neng ton wepra deipu. Tonda, sun nimi denge pio weik, tiga ribu enam ratus (3.600) nengda, apel dona tep, “Sundi ukupkurume-ukupkurume,” pepra, pel dona deiyo neng ton wepra deipu. 3 Nimi deiyo ngebo Raja Salomodi aupu dopra, Tirus mutu nimi deiyo kepra kuramu ngebo, er si Hiram tep, er damai pepra deipu. “Teka ne kabo, telep ati dona tep, kandi ne nai bo Daud, er cap upu taleamumdi kuramumtopu, urasin telep gat co, er sida kapyal co (cemara co) ketenepra dokotemempa, nedi urasin pio telep ati dopkamne ja. Ada, kandi ne nai bo tep meliamumtopu, ne peda melipkamnerem’ tenen, moropkene,” pepu.

4 Raja Salomodi Tirus mutu nimi deiyo ngebo, er si Hiram tep upepu. “Ne dingeda, ne si eremnun Allah, er si Yahweh, er si eremna tep, telep ati dopkamne ja. Ada, Yahweh, er si eremna cap, gispal dona cap tep, tonda, ‘Nun Israel nesalada, nun mali kun keca tep, Allahdi gum kupra deipsetudi, lyepsetu’ tenena tep, yapi keca yala-yala yuma doupra, kareryakanmepyanen, Allah er karena tep, uku dongonkamepe. Tonda, siltong telep keca doupra, yana uku dongopmepepa, uku jeprepa, kete welepyopda, gekenkamre. Tonda, akati pumbonda, roti jen keca dapmengedi, meja deiki katuai derinung roti kwaneng karena tep, akati dopkamne.

Tonda sirik ngeda, nun nai bo Allah Yahwehdi, ‘Apepkusen kecada, sun Israel nesala yumadi, tamna gum dipapu, pio tep kupbankamrume. Ada, awar neitamaida, akeca ton ketenepra, ne gispal dona tep, kareryakankamnerume,’ pepra deiamseutopu, akeca tupa-tupa karenkamepe. Tonda, erdi, ‘Ipna taru cap, idona taru cap, yapi keca poprumudi, uku dongonkamrume,’ pepunge cap, tonda, ‘Ukupu tekamre war taru capda, akeca ketenepra karenkamnerume,’ tonda, ‘Tali pel dona gum di, beipye peingna tumi, Sabat tumi deiki akeca ton ukupkamrume,’ pepra, deiamseu upu yuma utopu, nundi, ‘Pio angepu kupbankamep’ tenena tep, er si eremna ati dopkamne ja.’

5 Ne tenenun ngeda, Allah Yahweh er si eremna tep ati, nedi dopkamne ngeda, ila ati cap, tonda pio urasin telep kupra dona cap kupkamne. Ukupkamna deiyoda, yuk nesala ban-ban yumadi, ‘Nun nai bo’ tenen, yuk tali keca cap, isok-isok cap tep, si eremameng ngeda, talipu kurur dinin, nun si eremnup Allahda, ila mambul cap, pio puto weik cap kurure.

6 Erda pio puto weik kurura cadi, tek sisi ngeda, wareto ngebodi er tep, telep ati doptenge do? Gume, nimi tenpu ngebodi, Allah er si eremna tep ati, men toptue. Ne peda men kuptene. Ange deiyoda, im yuma pe, pio im deiki alau tara peda, er kurenge yumada, wekra men kuptue. Tuai mutu neitamai yuma cap, im deiki neitamai yuma capda, acapu men kurure. Atep nengeda, neda wareto ngebo kuptenedi, er Allah tep, er pe ati doptene do? Gume, ne Salomo dipapu, ange men kuptene. Tenpunge puda, Allah Yahweh er si eremna tep, yapi keca popmepedi, uku dongonkamepai cap, tonda, siltong telep keca uku dongopmepepa, uku jeprepa, siltong telepnge welepyopda, Allahdi gekepredi, kange deipkamre ja. Atep, Allah er karena tepaipu, dopra deipkamne ja.

7 Akati dopkamna tep nengeda, ukutaru Hiram kandi ati dona tep, ila kael neng ton, dopra deipnetumpa, sundi melimkamsenge. Ada, kunumna weik keca emas cap, perak cap, tembaga cap, tonda gat keca besi cap, tonda urasin pio telep opkal, bol kain lenan warna ungu cap, opkal bol binge cap, wina pio ila kael ngebo ton dopra deipkunerume. Er angeboda, gel cap, co cap tep, pio urasin telep kupra derina ngebo dokotepkurume. Apel ukupra donkamre taruda, Yerusalem mutu neitamai cap, Yudea tara neitamai cap, ne nai bo Daud, erdi konum wepra deiamu neng ne cap, kikimanpu pel dopra kunkamenge. 8 Tonda, nedi konum kael keamsi. Ada kan mutu kunge nengda, co kwemna cap, ati dona tep, co ketenemna cap tep, ila di kael keami. Atep nengeda, ne kabo Hiram, kandi co yala-yala yuma kwepra ketenepmengedi, dopra ne damai dokotemkamnerume. Ada, kapyal co (cemara co) cap, cendana co cap, Libanon mutu di ne damai dokotepkamnerume. Kandi pepmempa, ukupkameng taruda, nedi ne pel melipra donenung neng tep pepnepa, ne kabo Hiram kan mutu neitamai di, apel donge neng, sun amutara kupmengedi, kan mutu neng tep melimbenkamenge.

9 Urasin telep co keteneipkame ngeda, meteka dipu gum dinin, pio weika di keteneipmengedi, ne damai dokotepkamnenge. Ange deiyoda, ake. Ada, ‘Allah Yahweh er si eremna tep ati dopkamne,’ tenepsi ngeda, urasin pio telep cap, ila nong weik ati cap, dopkamna tepa. 10 Kan mutu nengdi, urasin telep gat co kwepra keteneipkamneng kunumna tep nengeda, gandum du taikmengedi, gandum tepung, denge weik, dua ribu (2.000) ton (2.000 kilogram) karepkamne. Tonda, jen keca er si jelaida, utopu dua ribu ton (2.000 kilogram) karepkamne. Tonda, anggur du taikmengedi, anggur kange yawaramre meda empat ratus ribu (400.000) liter dokotepkamsene. Tonda, minyak zaitun ton, empat ratus ribu (400.000) liter tapakra dokotepkamne,” Raja Salomodi Tirus mutu ila deiyo ngebo Hiram tep pepu.

11 Upepu pangeda, Huramdi nimi deiyo ngebo Raja Salomo tep, sengna keca surat sekra keteneipudi, Salomo damai tamupra deipu. Huramdi tamupra sekeipu surat neitama di, aupu pepu. “Allah Yahwehda, erdi er mawa nesala, sun Israel nesala tep, ila di bicau tenerure. Ukurya tep, erdi kan Salomo tep, erepra deiamkeupa, kandi anesala talepra, sun ila nimi deiyo ngebo Raja kurume. 12 Allah Yahweh tep nengeda, ‘Kanda pio telepe,’ pepra, nun yumada kange deipra, er tep gispal donkamepe. Erdi, im cap, tuai mutu cap, akeca-keca neitamai kuramre keca cap, ketekepra deiamu. Er dipapu, ‘Israel nesala talenkamre’ tenen, menop taru kuramu ngebo, kan nai bo Daud tep, erepra deipupa, nimi deiyo talepra Raja kuramu. Tonda, Allahdi kareamupa, kan nai bo Dauddi, ila kael mi, kan konum deiamkeu. Tonda, Salomo kanda, ila kael kemna deiyo keca cap, ‘Telep kunada, ake, mali kuna ngeda ake,’ tenen keca cap, tonda, ‘E, dumsisi kuna ngeda ake,’ tenena cap, pel dona deiyo keca cap, ange yumada, kan Salomo tep kareamkeu. Atep, Israel nesala kunge mutu yumada, telep kupra talenkamrume. Atep nengeda, kan Salomodi, kan nai bo Allah tep, ‘Er si eremna ati tep doptene,’ tenena cap, tonda ‘Ne pe kuna ati peda, ataru dipapu doptene’ tenen, keteneipmarume,” Huramdi Salomo tep pepu.

13 Upepu dingeda, aupu ton dukdongopra pepu. “Kandi moropmaneremtopu, neda tenpu ngebo, er si Huram-Abi, wepra deipkene. Erda, ila kael ngebo ton kurura tepa. Angeboda, pio ila kael ngebo cap, pio telep pel dona ngebo cap kurura cadi, angebo dopra, kan damai dopra deipkamakene. 14 Adokotepkaman ngebo er nin yapuda, Dan yala nerapu cadi, er nin sisada, Dan yala nerdi deiamu. Tonda, er nai boda, Tirus mutu ngebo kuramu. Angebo Huram-Abida, kunumna weik keca, emas cap, perak cap, perunggu cap, gat keca besi cap, urasin telep gel cap, co cap, akeca yumada, petumna cap, ketekemna capda, ila kael ngebo kurura cadi, kan damai dokotepkamakene.

Utopu, angebo erda, im kalum opkal bol kain biru cap, kain ungu cap, kain binge merah cap, ton urasin pio telep kain, er si lenan nge capda, erdi aopkal dopropredi, urasin telep keca ketekeiptue. Tonda, urasin telep kupra petumne pel, yala warengetopu, nimidi moropnetopu yala yumada doptue. Telepe, ne deiyo kabo Salomon, kan amutara pel melimna neng cap, ne tamna di dokotepkamken pel melimna neng cap, sun kikiman pel donkamenga tep, dopra karepne. Ada, ne deiyo ngebo Salomo, anengda, kan nai bo sisa Raja Daud tep, er mororamutopu pel dorami neng cadi, sun cap, kan Salomo deipkamrem pel don neng cap, kikimanpu pel donkamenge.

15 Ange tep nengeda, ukutaruda, gandum yala butene cap, anggur me mokon cap, minyak zaitun me mokon capda, nun deiyo ngebo Salomodi, ‘Ukupra karepkamsene,’ pepra deiamseu ngeda, dokotepsemempa, nunda kan amutara pel dona nengdi, ‘Dan taru di yankamser do?’ tenen, dinapu kunkamepe. 16 Ukupsemem pangeda, Libanon mutu iknapi dam tara di, kapyal co cap, yuk yala co cap, kwepra deipmepepa, nun deiyo ngebo kan putanmakertopu kwepmepedi, doupra wor wiprapmepedi, adeiki aco koupdongopra deipmepedi, ila laut me mokon deiki di doupra, Yope mutu duyankamepe. Yope mutu konum deiryapyopda, nai kandi aco yuma doupra, Yerusalem mutu dubenkamrume.” Raja Huramdi asurat sekua deiki di, Raja Salomo tep pepu.

Salomodi Allah Yahweh er si eremna ati dona tep, gonga kepu upu

17 Nimi deiyo ngebo Raja Salomodi, yuk mutu neng dinin, Israel mutu wisipra kikiman kurami nesala tep, sun si sengna gonga kepu. Angeda, pumun taru, er nai bo Raja Dauddi kuamutopu kupu. Ukupra si seku dinin, yuk mutu nimi bo neng dengeda, seratus lima puluh tiga ribu, enam ratus (153.600) neng kupu. 18 Sun aneng kankan dipu dinin, ton dengeda, tujuh puluh ribu (70.000) nengda, akati don keca doupra dosemna cap, doupra yakana cap tep, aneng tep apel karepu. Utopu delapan puluh ribu (80.000) nengda, ‘Urasin telep gel petupra deipkameng’ tenen, mutu dup gel bongopra sengna tep pel karepu. Tonda, tiga ribu enam ratus (3.600) nengda, ‘Apelda ukupra dopkurume,’ pena deiyo neng cap, tonda apelda deiyo kemna tep, neng cap wepra deipu.