2 Chronicles 20

Yudea mutu nengdi, Moab mutu nesala cap, Amon mutu nesala cap, popbisipi upu

1Ware kupra tumi konum kupkopda, Moab mutu jen neng cap, Amon mutu jen neng cap, tonda, sun melimna tep yai neng, sun Meunim mutu jen neng cap, kikiman keprapidi, ‘Yehuda mutu nesala cap, Yehosafat cap, popkamep’ tenen, poryanmai. 2Ton nengdi, ange gekepyopda, sun anengdi upu doupra, Yudea mutu taleamu ngebo, Raja Yosafat damai peryai. Ada, “Edom mutu tara dinin, ila laut mokon, er sida Laut ati ortara di, sun jen neng weika di yakanmange. Sunda, jen neng denge pio weika di yakanmangdi, kan pona tep konum yakanmange. Sun aneng dipapu Azezon-Tamar tamna damai konum yakanmange,” pepra lap pepi. Uda, Azezon-Tamar mutu tepapu, amutu yuk si ton perami ngeda, En-Gedi mutu perami.

3Aupuda Yosafat gekepudi, kwar kupupa, erdi, “Allah Yahweh, kandi ne kupkamnenge tep, ‘Ange kupkurume,’ pepra, kandi telep kupra peterepnerume,” pepra, gonga kepudi Allah tep moropu. Yosafatdi, ‘Allah moropkup’ tenen, keteneipu taruda, erdi taleamupa kurami nesala yuma tep, “Ne mutu neitamai kurum nesala tep, nun yumadi, jen keca jena gum dipapu, si tepra kupedi, Allah Yahweh er sipu erepra kupedi, ‘Ware kupkamep do?’ tenen, er tep moropkupe,” pepra deipu. 4Upepra deipupa, Yehuda tara neitamai kurami mutu-mutu yuma cap, sundi dorami ila ati arum yuma cap, yambul ati arum cap di, amutu neitamai kurami nesala yumada, Yerusalem mutu bena buluprapidi, sun yumada, “Uo, nun nai bo Allah Yahweh, kan dipapu melipkuserume. Nunda ware kupkamep do?” pepra moronmai.

5Yehuda mutu neitamai kuramyai di bulupmai nesala cap, Yerusalem ila ati arum neitamai kurami nesala cap, Yerusalem mutu buluprapidi, Allah er si eremna tep, ukupu domi ati damai dinin, akati urasin tara bena, bulupra weki. Awekmai nesala urasin dam tarada, Raja Yosafat erpu mepra tekudi, ‘Upu pepkun’ tenen, ketenepu. 6Raja Yosafat tekmaudi, upu puto di, pepu. Ada ake. “Allah Yahweh, nun Israel yala nesala, nun apu yapudi, kan tep si eremamkeipa, kandi sun tep pio kalekra melimamum ngeda, nun kaele. Kandi im deiki tara erepra kumemdi, kan ila puto deiki di, tuai mutu ban-ban yuma kunup nesala cap, nun tep talesenge nimi deiyo neng, Raja-Raja neng cap yumada, kan dipapu taleserume. Nimi ban-ban yumada, kan amutarapu kunupe. Ila puto kemnange yuma cap, ila puto deiki di mambul pel dona deiyonge yuma capda, kan pe buru di taleruma cadi, wareto nesala do yuma, nimi tuai nengdi kan tep, men bisbisa kapketenge. Nun yumada, kan amutarapu kunupe.

7Uo, tek sisi nun kaele. Nun nai bo Allah Yahweh, kan mawa nesala, kan nyapu Israel yala nesala tep nengeda, ‘Anesaladi amutu yuma talepmengedi, acapu kunkameng’ tenen, nun apu yapudi amutu yankoi taruda, amutu menop taru di sun amutu neitamai kurami nesala yumada, kan dipapu enepramume. Ada, kandi Israel nesala tep, puto weik kareamumpa, adeiki di, amutu kurami nesala yuma tep, popidi ton nengda, gawal daki, ton nengda, sepdaro bendopi. Ukupmuma deiki di, amutuda kandi dopra, kan kabo Abrahamdi deipupa, dadeipdanen yakaramidi, kurami nesala, sun tep kareamume. Ada, ‘Sun anesaladi, amutu yumada, pio tep talepra kunkameng’ tenen, kareamume. 8Amutu yuma dopra, nun Israel nesala tep kareamumpa, nundi amutu kuramepudi, ukutaruda, kan si eremna tep atida, nun konum domupudi, nundi kan tep si eremkenupe. Ataru yuma neitamai di uperameputopu, tupa penupe.

9Ada, ‘Ukupmantoda, nun damai ila kange mun keca yankamser taru neitamaida, nun mali kupmepepa, nun wenemna tep, kandi dokotepmempa, yuk mutu nengdi mar poryakankamseng do, ila kange mun pu benemdanapu pu jena deiyonge yankamser do, jen putana deiyonge karepmempa, nun jen keca gum kuprepa, jen putanapu kupmepyopda, akeca utopunge yarepa, dopropmepe dingeda, nun adipapu kan damai yana moronkamkepe. Tonda, Allah kan si eremna ati dadi, kan si eremna tep nengeda, akati neitamaipu kuramuma tep, ila kange mun keca nun damai yaryopda, ‘Kan urasin tara tekra, kan tep morokepepa, kandi gekepra lyemkamserum’ tenen, moronkamkepe,’ pepkepu. Uperamupka utopu, ukutaru peda, naio, ‘Kandi melipra lyepkuserem’ tenen, moropkepe.

10Ukutaruda, Amon mutu neng cap, Moab mutu neng cap, Edom mutu neng cap, sundi nun tep, poryakanmasenge. Nun apu yapu Mesir mutu di amutu damai yai taruda, kandi sun tep, ‘Amutu nesala kurami mutuda, men porbenkamrume,’ pepra deiamsemume. Atep nun apu yapudi, sun Amon mutu kurami nesala cap, Moab mutu kurami nesala cap, Edom mutu kurami nesala cap, amutu-amutu neitamai kurami nesala tep, popra gawal men dakami. ‘Dakunkameng’ tenen, tapronapu kuamu. 11Dinino, ukutaruda naio, sundi nun tep, mali kunmasengada, dinkurume. Sun amutu kunung nesaladi, nun tep ikin keca deipkamasenge. Ada, kandi nun tep kareamsemumpa tupa, acapu kunup mutu neitamai di, sundi nun tep, ‘Israel yala nesalada, amutu neitamai di enepra donokamepe’ tenen, yana warekmasenge.

12Uo, nun nai bo Allah, kan sipu eremkenupe. Atep, kanda nun nai bo Allah, nun puto boun nesala kunupa cadi, sunda jen neng gung weik yakanmangdi, ‘Israel nesala poptapra gawal dakamepe’ tenen, yankanmanga adano. Atep, kandi wenepra, ikin keca sun nong deiki deipkurume. Nunda, nun puto deiki di, ware kuptepe do? Angeda, nun walwal kupsere. Dinin, ‘Allahda ware kupkamra deiki di lyepkuser do?’ tenen, kan tepapu dinapu kunkamepe. Nun melimna tep, yana moropkepe.

Raja Yehosafatda, sun Israel yala nesala bulupra tekmaiyai di tekudi, Allah tep yana moropu. 13Aupu penmau taruda, sun Yehuda yala nesalada, sun nimi cap, nerapu cap, sun nyapu cap yumada, bulupra ‘Allah Yahwehdi acapu dinmaredi, gekenmasere’ tenen, er si eremna ati damai kikiman yana tekidi gekenmai. 14Sun yuma acapu tekmaidi, gekenmaiyai dipapu, nimi weik wekmaiya kan-kan di, Lewi yala ngebo tenpu, er si Yahasiel akunmaupa, ataruda Allah er Lek Sambaladi, Yahasiel er dipru neitamai wekra kuramu, angebodi upu pepu. Uda, Yahasiel, er nai bo sisada, Zakaria kuramu. Nimi si Benayadi, Zakaria deiamu. Benaya er nai bo sisada, Yeiel kuramu. Yeiel er nai bo sisada, Matanya kuramu. Matanyada, er nai bo sisa Asabdi deiamupa kuramu. Atep nengeda, animi yumada, Lewi yala nengdi deiamipa, dadeipdanen yakarami neng kuramya cadi, Yahasiel peda, Lewi yala ngebo kuramudi aupu pepu.

15Yahasieldi upepu, “Ne deiyo ngebo Raja Yosafat cap, ne kayapu neng, sun Yehuda tara kurum nesala cap, Yerusalem ila ati arum neitamai kurum nesala cap, sun yuma tep pepsene. Ukutaruda, nun nai bo Allah Yahwehdi upepsere. Ada, sun pona tep, jen talena neng denge pio weika di yakanmangepa, epmumdi kwar dangna cap, kange bongtona cap, kuna gume. Deiyoda, ayakanmang neng pona tep nengeda, sun puto deiki dipapu, men popkamarume. Allah er dipapu, aneng popkamare. 16Atep nengda, alukunda mapkurume. Mapmamumnya berekre pangeda, sun podan neng Zis mutu bisi welepra yakange tarupu bena, warekurume. Ukupmumpa, sun aneng cap, sun cap, amutu ban sirik tara, nimi men kunungai, ada Yeruel mutu, katuaipu antapdankurume.

17Ukupmumdi, sunda aneng tep, ‘Nun pe puto di popkamape,’ men tenepkurume. Sunda, aneng podana tep, keteneipmaseryaipu bena kumumdi, dinapu kunkamarume. Ukunmamumpane, sun tep Allah Yahwehdi nimi popbisipkamar ngeda, sundi epkamarume. Atep nengeda, sun Yerusalem mutu kurum nesala cap, Yehuda tara kurum nesala yuma capda, sunda kwar kuna cap, kange bongtona cap, dipru bulungsangna cap, kemna gume. Mapmamumnya berekyopda, mar podanaida, tali lupra wekurume. Ada sun tep, Allah Yahwehdi tek sisi melipra lyemdonkamasere.” Yahasieldi pepu.

18Upepka tep, Yudea tara nimi deiyo ngebo, Raja Yosafat, erdi taleamupa kurami nesala yuma cap, er cap, Allah er gispal dona tep, gutam tu dipdongopra, sun urasinda tu deikipu deipra, sundi Allah tep si eremai. 19Allah si tupa eremai taruda, Kehad yala ngebodi deiamu neng Lewi yala neng cap, tonda Korah yala ngebodi deiamu Lewi yala neng cap, sun yumadi tekra, Israel nesala sun nai bo Allah gispal dona tep, mut ila upu deiki di penmai. 20Konum mapmaiya, bereku pangeda, ipna sisadi, sun Israel nesala yumada, katauai mutu Tekoa tarapu bei. Sun anesala benkoi taruda, Raja Yosafatdi aupu peipu. “Yehuda tara neitamai kurum nesala cap, Yerusalem ila ati arum neitamai kurum nesala cap, sundi Allah Yahweh tepapu, teka tenepkurume. Ukupmumnyopda, Allahdi melipserepa, sun adipapu dim pepra puto tupa kunkamrume. Tonda, sun nabi-nabi nengdi, pediramsei upuda, betapra talepra, teka teneprumudi, telep kupkumumnyopda, sun kun keca yumada, nong kunkamsere.” Yosafatdi sun Israel nesala tep pepu.

21Raja Yosafatdi, er nyapu Israel nesala cap, konum upu talepyopda, nimi deiyo ngebo Rajadi, mut pena deiyo neng ton wepra deipudi, upepu. “Sundi nun nai Allah Yahweh tep, er si eremna mut ton penkamrume. Ada, ‘Nun nai Allah Yahweh, mali keca tenpunge peda men kuredi, erda pio-pio teleppu, pio lengna ngebo kurure,’ pepra, gispal dona tep mut, ila upu deiki di penkamrume,” pepra deipu. Upepka tep nengeda, sun mut pena deiyo nengdi, menmena mepra banmaipa, sun jen talena neng yumada, sun amnyo tara amenda banmaidi, nimi porbana tep bei. Sun kikiman bei taruda, sun mut pena nengdi, “Allah Yahweh tep nengeda, ila di ‘Nun nai telepe,’ penkamepe. Allahdi pio kalekra melimseredi, pio tep men tamseredi, ila di bicau teneseredi, makupra lyemdoserure,’ pepra, mut penmaidi, amut penmai taru dipapu, sun jen neng cap kikiman banmai.

22Yosafat er tara jen talena neng, bisi tupa banmai tarupu, Allah si eremna mut pena deiyo nengda, ila upu deiki di gonga kepra, mut penmai taru dipapu, sun ortara mutu podana jen talena nengdi, ‘Popkamap’ tenen, yakanmai nengda, sun kan-kan neitamaida, Allahdi go karepupa, sun Edom mutu neng inipmaiyai di, ayakanmai jen neng tep, mar popi. Mar ponmai taruda, Allahdi go karepupa, sun Moab mutu jen neng cap, Amon mutu jen neng capdi, sun Edom mutu jen neng tep yuma popra, gawal daki. 23Ada, sun Amon mutu jen neng cap, Moab mutu jen neng cap, sun kikiman di Edom mutu jen neng popra gawal daki. Sundi Edom mutu jen neng yumada popra, gum kupra deipi. Ataru dipapu, Allahdi, kange wang-wang penange karepka deiki di, sun Moab mutu jen neng cap, Amon mutu jen neng cap, sun pepu, sun pe tep popdanapu kupi. Ada, ton ngebodi, ton tara ngebo tep, tamupra popdanmaianen, siryada, gawal dakdanapu kupi.

24Ukupi pangeda, yambulanun amenda taru, Yehuda tara jen talena nengda, bisi banmaianen, katuai mutu epmantoi di, mutu buma deiki di bena, utara mutu bena dinmaipa, sun podana neng kunmai tara yumada, bena dinmaipa, nimi pio weik popipa deipmai nengpu epi. Ada, sun Moab mutu neng cap, Amon mutu neng cap, sun konum popdanmangu neng yumada, tenpu ton gam kunmaipa men epi. Ada, sun ‘Yudea mutu nesala popkup’ tenen, arup taru yakanmai nesala yumada, konum popra, gawal dakya cadi, amutu tu neitamai yumada, konum depmai nengpu epi.

25Ajen talena neng yumadi, konum poprapidi, gawal dakdaiya tep nengeda, Raja Yosafat cap, er nyapu cap kikiman beidi, sun podana nesala yuma konum depidi, bung keca tapmainge yumada, dalupra dopropi. Adopropi kecada ake. Sundi sun pel dona tep keca alat-alat yala-yala yuma cap, sundi kenengami opkal cap, sundi talerami bung keca cap, tonda kunumna weik keca yuknge yuma cap, denge weik men nukmanto dopropi. Sun taleami dinin, depidi tapmai keca yumada, pio weik cadi, ue weneri tumi deiki di, sun Yudea tara nengdi bulupra derinmai. Tonda, sundi tapmai bung keca pio weik kwapka cadi, Yudea tara nengdi, ton tara ngeda men dopropidi tapi. 26Ukupra bung keca dopra derinmaianen, ue dumbari tumi konum kupkopda, sun anesala yumadi, tenpaipu bulupra weki. Ada ila banai, er mutu sida Ada, mar porbenkoi taru, mut pena deiki di, Allah er si eremna tep, amutu banaipu bulupra weki. Abulupra wekidi, Allah er ila puto deiki di, akupmaunge yuma epidi, Allah tep, gispal donmai. Amutu banai tep nengeda, ‘Allah er pio telep kurura cadi, Allah si eremna mut penmai mutu cadi, ataru pe, ukutaru peda, amutu si tep, ‘Telepe pena ila mutu banai’ tenen, sun upu deiki di, ‘Baraka mutu’ tupa penunge.

27Uda, akeca-keca yuma konum bulupi dingeda, Raja Yosafatdi gonga kepra banmaupa, sun Yudea mutu jen neng cap, Yerusalem mutu jen neng cap, sun yuma ila di kange deipidi, tamupra Yerusalem mutupu tamupra bei. Ila kange deipinge deiyoda, Allah Yahwehdi sun podan neng yuma popra gawal dakua tep, kange deipidi, sun pe mutu tamupra bei. 28Aneng yuma, Yerusalem mutu ila ati arum tamupra wekoi taruda, bung-bung pena er si terompet cap, musik pen keca er si kecapi cap, gambus cap, sun douna kael nengdi doupipa, mut penmaidi, Allah er si eremna ati damai bei.

29Ataru neitamaida, yuk-yuk mutu kurami nesala yumada, “Allahdi Israel yala nesala, sun podan neng yuma tep, ila mambul pel dopka deiki di, sun podan neng yuma popra gawal daku,” pepipa, gekepidi, ‘Uo, ware kupra popmar do? Angeda ila mambule’ tenen, ila kware kupu. 30Ange tep nengeda, Yudea tara taleamu nimi deiyo ngebo Raja Yosafatdi, taleamu mutu kurami nesala yumada, pio telep dipapu dim pepra kurami. Sun cap, yuk mutu neng cap, podana men kurami. Ada tali tep gume. Yosafatdi si eremamu Allahdi, dim pepra kuna deiyonge karepudi, go karepupa, Yosafatdi taleamupa kurami mutu yumada, Allahdi meliamupa, teleppu kurami.

Raja Yosafatdi taleamnganen, gawal dakamu taru tep, pepu upu

31Yosafatda, er keteng tamun tiga puluh lima (35) tahun kepu taruda, gonga kepudi, Yehuda yala nesala, sun deiyo ngebo Raja kepra taleamu. Yosafatdi Yerusalem mutu ila ati arum neitamai talepra kuramu keteng tamun yumada, dua puluh lima (25) tahun mamu. Yosafat er ninda, Azuba kuramu. Azuba er nai boda, nimi si Silhi, erdi aner deiamupa kuramu. 32Raja Yosafatda, er nai bo sisa, Asa kuramu utopu, Yosafat peda, tamna gum dipapu, telep kupra kuramudi, Allah Yahwehdi, ‘Angeda telepe,’ teneramungepu talepra, dumsisi telep pelpu doramu. 33Yosafat er pedi telep kuramu dinin, er taleamu tara neitamai kurami nesala, sun kankan di, ton nengdi isok si eremna tep, mutu deiki ketenepra deriramyaida, “Gum kupra deipso,” men peramudi, uruptapra sikke men bungtamamu. Tonda, amutu neitamai kurami nesala peda, sun co puna nengdi si eremami Allah tep, ‘Tek sisa,’ tenepra, er sipu men eremamidi, sun kange dipru yuma peda, er deikipu men derirami.

34Uda, Yosafatdi nimi deiyo ngebo kepra taleamudi, gonga kepra pel dopyakaramnganen, er kuramu keca gawal dakunge yumada, ila buku neitamaipu sekra deipi. Ada, Hanani, er mi Yehu, er kuramu keca tep sekeipi buku neitamaiapu, sekra deipi. Abuku peda, Israel nesala talepra kurami deiyo-deiyo neng, sun Raja-Raja si sekra derirami buku neitamaipu, Yosafat kuramunge peda, sekra deipi. 35Tonda, yuk taru neitamaida, Yehuda tara taleamu ngebo, Raja Yosafat dakuramnganen, tenpu taruda, yuk Raja cap, tenpu kange doupra kikiman pel doramrei. Ada, er cap, Israel tara mutu kurami nesala tep, nimi deiyo kepra taleamu ngebo, Raja Ahasia cap, sun butenedi, tenpu kange doupra, ‘Nun podana gum di, telep kupra kikiman kupedi, pel kikiman donkamnem’ tenen, pedina upu deiki di, upu sisikdarei. Dinino, Israel tara kurami nesala taleamu deiyo ngebo Raja Ahasiada, dipru pio mali ngebo kuramudi, mali kun keca ton pio talepra kuramu. 36Ukuramu dinin, sun butenedi, upu sisikropreiopda, Raja Ahasia cap, Raja Yosafat cap, sundi, ila laut mokon deiki embana keca, er si kapal laut doprei. Ada, kunumna weik bung keca yala-yala yuma, orkaren mutu, Tarsis mutu kunumbenkameng’ tenen, doprei. Sundi akapal donada, mutu si Ezion-Geber mutu di doprei.

37Akapal laut konum doprei pangeda, Maresa mutu ngebo Dodawa, erdi deipu ngebo, er si Elieserdi, Yosafat damai yaudi, er kupkamau keca tep, yana lap pepu. Nabi Elieserdi pepu upuda ake. “Kanda, pio mali kuna ngebo Ahasia cap tonpa, upu kikiman sisingamrerumdi, pel kikiman doramreruma tep, Allah Yahwehdi, sun akapal pel doramrerum ngeda, uruptapra gawal dakamre. Upepka utopu, amenda taruda, sun butenedi kapal laut doramrei ngeda, laut mokon deiki embanmaipa, mokon di jepupa, gum kupu. Ange yuma konum gawal dakua cadi, Tarsis mutu pio men kunumbenami.