2 Chronicles 21

Yehoramdi nimi deiyo kepra, Raja kuramu taru tep, seki upu

1Yosafat konum depu taruda, Daud kuramu mutu, Yerusalem mutu neitamai tu palipi. Ada, Yosafat er apu yapu neng ton, sun nimi deiyo neng, Raja-Raja depnepa peiramyaipu, er ton tu palipi. Tu konum palipi dingeda, Yehoram er yo pununa tep, er mipu wepra ereipidi, nimi deiyo ngebo Raja kepra deipipa, amutu yuma taleramu.

Yehoramda, Yehuda mutu neitamai nimi deiyo ngebo Raja kepu taru kuramu keca tep seki upu

2Yosafat er mi Yehoramda, Yehuda mutu nimi deiyo kepra Raja kuramu ngeboda, er weitap, duap ton dakurami. Ada er nai bo Yosafatdi deiamu nyapuda, ngangtan bari (6) deiki di deiamu. Sun aneng sida ake. Ada, Azarya cap, Yehiel cap, Zakharia cap, Azariahu cap, Mikhail cap, tonda Sefaca cap, deiamu. Aneng yumada, Yehuda mutu taleamu ngebo, nimi deiyo Raja ngebo Yosafatdi deiamu neng kurami. 3Yosafatdi, er di ukupra deiamu neng yuma tep, kunumna weik keca weika di tali kareamupa, sundi kunumna weik gat keca emas cap, perak cap, tonda yuk-yuk bung keca yala-yala yuma, sun nai yapudi mambul tenerami keca yumada, pio weika di dopromi. Tonda, sun nai bo Yosafatdi, ila nimi ati arum ton bokra kareamupa, dopromi. Ada, ‘Nun podan nengdi yana popsenung’ tenen, Yehuda mutu neitamai, akati arum yuma dana-dana tarada, lyom gel di deiamidi, gel beilya ongopdongopra wiamidi domi ati arumda, Yosafatdi kareamupa, er nyapu sun aneng ngantan bari yumadi dopromi. Dinino Yehoram er mi tenpu ngebo tep, Yosafat er dipapu, ‘Ne mi Yehoramda, nimi deiyo ngebo Raja kepredi, Yehuda mutu yuma talenkamre’ tenen, wepra deipu. Deiyoda, er Yosafatdi, ‘Gume, amida ne menmena taru di deiamsi mi kurura cadi, er dipapu Yehuda mutu talenkamre,’ teneramnga cadi, Yehoram erepra deipipa, er dipapu Yehuda tara taleramu.

4Uda, Yehoram konum nimi deiyo ngebo kepra bukudi, Yehuda mutu yuma talena tep konum puto weik kepu dingeda, erdi er tara neng tep, “Ukupkurume,” pepra deipupa, er tara nengdi, er weitap, duap kurami neng sisa yumada, parang ya dopropidi, aneng yuma adipapu popra gawal daki. Tonda, ware kupra neng ton, sun Israel tara kurami deiyo neng ton, sun deiyo-deiyo kepra taleamidi kurami neng ton, popra gawal daki. 5Yehoramda, Yehuda tara talena tep, nimi deiyo ngebo Raja kemna tep, gonga kepu taruda, er keteng tamun tiga puluh dua (32) tahun umur kepu tarupu, er nimi deiyo ngebo kepu. Yehuda tara taleamudi, amutu nesala tep upu peramudi, nimi deiyo pel talepra doramu keteng tamun yumada, delapan (8) tahun deiki di apel doramudi kuramu.

6Yehoramda, Yehuda mutu taleramudi, nimi deiyo ngebo Raja kuramu taruda, pio mali-mali weik kuramu. Ada, menop taru, sun Israel tara yuk-yuk nimi deiyo Raja neng kuramidi, sun peda pio mali-mali weik kuramitopu, er Yehoram peda amali kecapu talepra kuramu. Tonda, menop taru kuramu nimi deiyo ngebo Raja Ahabdi taleamudi, mali weik kuramutopu, er Yehoram peda utopu kuramu. Erdi pio mali weik kuramnga deiyoda, er animi deiyo ngebo Ahabdi deiamu ner mi, Yehoramdi domnga cadi, aner er nai bo Raja Ahabdi kuramungepu, Yehoram peda angepu talepra kuramu. Ange ukuramnga deikida, Allah Yahweh er damaida, pio mali kupra kuramupa, Allahdi, ‘Ange yumada, ne pio songe,’ teneramu.

7Yehoramda, mali kunange weik kuramu dinino, Allah Yahwehda, Raja Daud erdi deiamupa, dadeipdanen yakarami neng yuma tep, men popra gawal daku. Aneng men popka deiyoda, ake. Ada, Allah Yahwehdi Daud er yala neng tep, pedina upu deiki di, “Dauddi deiprepa, dadeipdanen bankameng nengdi derinkameng neng, sun nimi deiyo kepra, amutu talepra, Raja neng pio kepbankamenge,” pepra, menop taru neitamai, pedina upu deiki di konum pepka tep, ‘Angeda konum peipsa tep, sun Daud yala neng dipapu, amutu talepmengedi, Raja neng kunkamenge,’ teneramu. “Pio angepu kupbankamenge,” pepra pedina upu deiki di konum peiamnga tep, animi deiyo nengda, men gum kupra deipyakaramu. Ada, Allahdi, “Daud er yala neng dipapu, amutu yuma talepmengedi, nimi deiyo kepra, Raja nengpu kunkamenge,” pepra, pedina upu deiki di konum menop taru di peiamnga cadi, ‘Daud er yala neng yumada men popra gawal dakamne,’ teneramu.

8Uda, Yehoram nimi deiyo ngebo Raja kuramudi upu peramu taru neitamaida, Edom tara kurami nesaladi, ‘Gume, Yehoramdi perur upu tupa men gekenkamepe. Er angebodi, nun tara mutu yuma tupa men talenkamsere,’ teneramidi, er upu yanipidi, ‘Nun tenenup ngebo, nun mutu ngebopu wepra deipmepepa, er angebodi, nun tara mutu talepredi, upu penkamsere,’ tenepidi, sun mutu talena tep, yuk ngebo wepra ereipipa, angebodi, nimi deiyo kepra, Raja kuramudi, Edom tara mutu yuma taleramu. 9Edom tara kurami nesaladi, ukuramya tep nengeda, er nimi deiyo ngebo Raja Yehoramdi, ‘Sun Edom tara nesala porbenkupe,’ peprapudi, er cap, er jen talena neng, sun deiki tara deiyo-deiyo kurami neng cap, er jen talena neng cap, tonda, nimi porbana tep, kuda bisam di gipra tu deiki emban keca, er sida kereta perang talena neng cap, sun yumadi, Edom tara kurami nesala tep porbei. Ukupi dinin, sun Edom mutu jen talena nengdi, Yehoram cap, er jen talena neng cap, er kereta perang talena deiyo neng cap dakunmaipa, Edom mutu nengdi Yehoram tara neng tep ongopra warekdongopi. Ukurami dinino, Yehoram cap, er jen talena neng yuma capdi, sun Edom mutu neng yuma tep, poprapipa, alukunda neitamai di sun Edom tara nengdi, gupsaka beidi sepra bendopi.

10Ataruda ukuramya tep, ataru di gonga kepra, adinin dipra, ataru neitamai yuma dinin, ukutaru peda, sun Edom tara kunge nesalada, sun Yehuda nesala amu tara kepnedi, Yehuda tara talerameng nimi deiyo nengdi penge upu pio moupra men gekenunge. Sundi, ‘Gume, nun pe yukpu kunkamepe,’ tenepra kununge. Yehuda tara talenung deiyo neng amutara pio men kununge. Tonda, ataru deiki dipapua, sun Libna mutu neitamai kurami nesala peda, balila deipra kuramidi, ‘Gume, nun peda Yehuda tara talenung deiyo neng, sun Raja nengdi penge upu, pio men gekenkamepe,’ tenepidi, aRaja neng tep tamami. Ange yuma ukuramya deiyoda, Yehuda tara taleramu nimi deiyo ngebo, Raja Yehoramdi, er apu yapu yumadi si eremami Allah, er si Yahweh tep, pio taprapudi, Allah er upu yaniramudi, mali kun kecapu kuramnga deiki dipapu, aikin keca er damai yakaramu. Ada er apu yapudi si eremami Allah, er si Yahwehda, Yehoram tapka tepa.

11Angepu gum dinin, Raja Yehoramdi, tali keca isok-isok si eremna tep, Yehuda tara mutu neitamai dinin, mutu dup deiki di, isok si eremna ati weika di doramu. Ukuramupa, sun Yerusalem mutu kurami nesala yuma peda, Allah tep tamamidi, mali weik kurami. Ange utopu ton, sun Yehuda mutu neitamai kurami nesala yuma peda, Allahdi peramu upu yaniramidi, Allah tep tamamidi, malipu kurami. Ange yumada, Yehoram er deiyo ja. 12Uda, ukupra dakuramupanen, yuk taru neitamaida, Allah er upu lap pena deiyo ngebo, nabi Eliadi yambul sengna keca, er sida surat ton sekra deipudi dokotepmaua, nimi deiyo ngebo Raja Yehoramdi dopropudi, epu. Nabi Eliadi asurat neitamai seku upuda ake.

“Kan apu bo Raja Dauddi si eremamu Allah, er si Yahwehdi, kan tep upepra wenepkere. ‘Uda, kandi pio mali-malipu kurume. Kanda, kan nai bo Yehosafatdi telep kupra kuramutopu pio men kurume. Tonda, menop taru Yehuda mutu taleramu ngebo, nimi deiyo ngebo Raja Asadi telep kuramutopu, kandi pio men kurume. Animi deiyo nengdi telep kuramreipa, kange deiamsi dinin, sun kuramrei utopu, kanda pio men kurume. Kanda pio mali-mali kun kecapu kuruma cadi, nedi kan cap, kan talerum nesala cap tep, ikin di wenepkamsene.

13Kanda, sun menop taru Raja nengdi telep kuramitopu, men kurum dinin, kanda sun Israel tara talengedi, nimi deiyo kepra, Raja kuramidi, pio mali-mali weik kurami nengdi kurami kecapu kurume. Tonda ukuruma deiki di sun Yehuda tara neitamai kunge nesala yuma cap, Yerusalem ila ati arum neitamai kunge nesala cap, sun yumadi kan kurem keca dikengedi, ‘Nun deiyo ngebodi mali weik kuramretopu, nun peda ange utopu kunkamepe,’ tenengedi, sun peda pio mali kun kecapu talepra kununge. Sun yumadi, ne Allahdi penun upu yanipmengedi, tamnenunge. Sun yumadi ne Allah tep teka tupa men tenenenunge.

Ange yumada, menop taru kuramu nimi deiyo ngebo Raja Ahab kuramutopu kureme. Er Raja Ahab peda, mali weik kuramnga deiki di, sun Israel tara neitamai kurami nesala yuma peda, ne upu yanipra tamamneidi, ne Allah tep, teka tupa men tenenerami. Sun peda, malipu kurami. Angepu gum dinin, kanda Yehoramda, kan kayapu neng sisa yuma peda, poptapnapu kupmume. Ada kan nai bo sisa Yehosafatdi deiamu neng, kan weitap duap sisa neng kurami dinin, kandi aneng yuma poptapmume. Sun aneng yumada, telep kuna neng kurami dinino, kan Yehoramda, mali kuna ngebopu kurume. Allah Yahwehdi upepkera tep, nedi lap pepkene,” nabi Eliadi asurat deiki di pepu.

14Upepu dingeda, surat neitamai di aupu ton dukdongopra pepu. “Amali-mali weik kuramruma tep nengeda, Allah Yahwehdi ila kange mun keca karepkamsere. Kanda moupra gekepkurume. Allah Yahwehdi, sun amutu neitamai kunung nesala yuma tep, pio ila kange mun pu, sakdanen jeramre pu deiyo keca yana, sun nong deiki deipkamsere. Apu karepre pangeda, akange mun pudi, jeramrepanen, sun nerapu yuma cap, sun nyape yuma cap, sundi peirum gam keca yuma cap, apu talenkamredi, pio jenkamre. Tonda, sundi, ‘Angeda mambul keca’ tenen, talerum bung keca yala-yala yuma capda, adipapu gum kupra deipkamre. 15Akange mun pu jenkamre taruda, kan peda, Yehuda nimi deiyo ngebo Raja Yehoramda, kan deiplyu neitmaida atumi deikida, ila kange mun pu jenkamkere. Apu jeramrepanen, kan dei lyektamkamrum taruda, kan deiplyu peda, lyektapkamrume!” nabi Eliadi, Raja Yehoram tep asurat deiki di pepu.

16Ataru neitamaida, Allahdi sun Filistin tara kurami neng cap, sun Arab yala neng cap, sun Sudan mutu neng dinin, sunda laut mokon pirman tara mutu neitamai yana kurami neng cap, sun kange dipru neitamai, yu tenena keca cap, song tenena deiyo keca cap, karepupa, aneng yumadi, Yehuda tara nesala tep, ‘Nun songe’ tenen, bena poryakarami. 17Aneng-aneng yumadi, Yehuda tara nesala poryakaramidi, adipapu Yehuda tara kurami nesala popra bisbisa kapi. Tonda, anengdi, Yehuda tara nimi deiyo ngebo Rajadi, er ati dopra kuramudi taleramu keca yumada, adipapu dalupra dopropi. Angepu gum dinin, ange yuma ukupi dingeda, adipapu nimi deiyo ngebo Yehoramdi deiamu nyapu yuma cap, er domu nerapu yuma cap, tomopidi, ateng koupra doupra bei. Ukupi pangeda, nimi deiyo ngebo Raja Yehoram er nyapsilip yumada, ton tupa men kurami. Dinino, Yehoramdi deiamu sirya mipu, er sida Ahazia tupa akupu.

18Ange yuma konum kupropu pangeda, Allah Yahwehdi nimi deiyo ngebo Raja Yehoram, er pio ila kange mun pu deiyo keca karepupa, er deiplyu neitamai jeramupa, apuda men kwetepmantonge karepupa pio jeramu. 19Akange mun pu pio jeramupanen, keteng tamun butene konum kupu taruda, nimi deiyo ngebo Raja Yehoram, er deiplyu ila kange mun pu jeramnga deiki di, er deiplyu yuma lektapupa, ila pu di dounmauanen, er adipapu konum depu. Konum depu pangeda, sun amutu neitamai tupa kurami nesala yumadi, er gipal dona tep, uku pio men lapra deipi. Ada sun amutu nesaladi, Yehoram er apu yapu deami taru, sun gispal dona tep, ila uku sengamitopu, er Yehoram konum depupa, sundi, ‘Dakwapye’ tenen, er tep uku pio men seki.

20Yehuda tara taleramu nimi deiyo ngebo, Raja Yehoram depunge tep nengeda, amutu neitamai kurami nesalada, tenpu ngebodi ton, ‘Uo,’ pio men tenepi. Konum depu pangeda, ‘Dakwapye,’ tenepi. Uda, Yehuda tara taleramu nimi deiyo ngebo Raja Yehoramdi, nimi deiyo kepra, Raja kemna tep gonga kepu taruda, er keteng tamunda, tiga puluh dua (32) tahun konum kupu. Ukupu dingeda, erdi Yerusalem mutu neitamaida, keteng tamun banbari (8) keteng tahun deiki di amutu taleamudi kuramu. Raja Yehoram konum depu pangeda, Raja Daud kuramu mutu, Yerusalem ati arum damaipu doupra bena peipi. Amutu bena peipi dinin, amutu nesaladi, ‘Angebo nun songe’ tenen, sun yuk nimi deiyo neng, sun Raja-Raja neng depnepa peirbaramyaida, Yehoram men peipi. Yuk taliyaipu peipi.