2Ch 22 | XteSC | STEP | Yerusalem mutu kurami nesaladi, Ahasia nimi deiyo ngebo Raja wepra deipi. Ada, Yehoram er nyapu du neng yumada, Arab mutu neng, ila yu nengdi yana, Yehoram er menmena deiamu nyapu yuma popropidi, kale ngebo pu tapi. Atep, er nai Yehoram pununada, er kale mi Ahasiapu, nimi deiyo ngebo Raja kuna tep wepra deipi.

2 Chronicles 22

Ahaziadi Yehuda mutu nimi deiyo ngebo kepu upu

1 Yerusalem mutu kurami nesaladi, Ahasia nimi deiyo ngebo Raja wepra deipi. Ada, Yehoram er nyapu du neng yumada, Arab mutu neng, ila yu nengdi yana, Yehoram er menmena deiamu nyapu yuma popropidi, kale ngebo pu tapi. Atep, er nai Yehoram pununada, er kale mi Ahasiapu, nimi deiyo ngebo Raja kuna tep wepra deipi. 2 Ahazia nimi deiyo ngebo Raja gonga kepu taruda, keteng tamun dua puluh dua (22) tahun kepu. Er amutu neitamai nimi deiyo ngebo Raja kepkada, keteng tamun tenpungepu 1 tahunpu talepu. Ahazia er nin sisada, Atalya kuramu. Atalyada, Israel tara nimi deiyo keamu ngebo, Raja Omridi deipu ngebodi deiamu ner kuramu. 3 Ahazia er kuramu ngeda, Raja Ahab er nyapsilip, sun mali-mali weik kuramya utopu, er Ahazia peda ukuramu. Deiyoda, er nin sisadi, mali kuna ngepu peteremupa, angepu talepra kuramu.

4 Ahaziadi, Allah er kangeda, ‘Angeda pio mali kuna pua,’ teneramungepu, amali keca weik, Allah damai tali lupra kuramu. Ada, Raja Ahab er nyapsilip, sun mali weik kuramya utopu, sundi, “Kan peda angepu kupkamrume,” pepra, gekepudi ukuramu. Ahazia er nai konum depu pangeda, Ahab er nyapsilip sundi er tep, ‘Ukupkurum-ukupkurum,’ pepra, upu kareramipa, gekeramudi, angepu kuramu. Sun aupu karerami neng dipapu, er nong deiki ikin keca pio weik deipi.

5 Tonda, Ahab er nyapsilip, sundi Ahazia tep, ‘Ukupkurume,’ pepra, upu kareramya deiki di, Israel tara kurami neng, sun deiyo ngebo Raja Yoram, er tamna kepropu. Ahaziadi ukupupa, sun tonpa di, Siria mutu taleamu nimi deiyo ngebo, Raja Hazael tep mar porberei. Ada, Gilead tara dinin, Ramot mutu mar bena popi. Apodanmaiya neitamai di, sun Aram mutu nengdi mar dopipa, Yoram er nong deiki dila dopu. 6 Ukupya tep nengeda, Yoram tamuprapudi, Yizreel mutu kwetena tep yau. Ada, er cap, Aram mutu nimi deiyo ngebo Hazael cap, mar podanmarei taru di dila doupka cadi, ‘Ne dila kwetepkamre’ tenen, Yizreel mutu beu. Ataru neitamai, Ahaziada, er pu jena kamo kwetena tep, Yizreel mutu tamupra beu.

Yehudi, Ahazia popu upu

7 Allah Yahwehdi, ‘Angeda ukupnepa Ahazia depkamre ja,’ tenemutopu, Ahaziadi Yoram er damai beu tarupu, nimidi popipa depu cadi, Ahaziada, Yoram damai beu taruda, nimi tenpu ngebo er si Nimsi, erdi deipu ngebo Yehu, ‘Angebo antapkamepe,’ tenepreidi berei. Angebo Yehuda, Allah Yahwehdi, ‘Raja Ahab cap, er nyapsilip capda, yuma popra gawal dakamre,’ teneamnga cadi, Allahdi angebo Yehu konum wepra deiamu. 8 Allahdi, ‘Angebo Yehudi, Ahab cap, er nyapsilip cap popkamre,’ tenemutopu, go karepupa, Yehudi Raja Ahab er nyapsilip tep ponmau taruda, yuk neng ton epu. Ada, Yehuda mutu nimi deiyo-deiyo neng cap, Raja Ahasia er kapu nengdi deiami nyapu cap, sundi Ahazia tep, melipra banmai. Ataru Yehudi aneng yuma epu dingeda, adipapu aneng yumada, popra gawal daku.

9 Ukupu dingeda, Yehudi nimi ton dopra deipupa, Ahaziada Samaria mutu neitamai inipmaua tep, epra dorbei. Ahazia konum enmaiyanen, dopropyopda, Yehu damai doupra yaipa popu. Konum popu dinin, sundi er nong dopra peirbei. Ada, sundi, ‘Gume, Raja Yosafatda, er kange dipru yuma deiki di, Allah Yahweh tep si eremamudi, ‘Allahdi ware pepkuner do?’ tenen, pio gekeramudi putaramnga cadi, ‘Yosafatdi angebo deipka cadi, er gispal dona tep, er deipu ngebo Ahazia, er nong peipkamepe,’ tenepidi peipi. Sun Ahab cap, er nyapsilip cap, Ahazia cap, er melipra embarami neng cap yuma konum popya tep nengeda, Ahazia er nyapsilip konum gawal dakya tep, er tara neng ton, ‘Amutu neitamai nimi deiyo kepra, Raja kuptengedi, amutu talepmanto neng ton, pio men kurami. Tupa gam kurami nengda, sun puto gum cadi, Raja men kupmanto kurami.

Raja Ahazia er nin sisa, er si Atalyadi ke taru tep, Yehuda mutu deiyo kepra, talepu upu

10 Ataruda, Yehuda tara taleamu Raja Ahazia, er nin sisa Atalyadi, ‘Uo, ne deipsi ngebo Raja Ahazia konum popipa depu’ tenen, konum kael kepu dingeda, erdi peipupa, er melimna nengdi, Yehuda yala neng, Raja keami nengdi deiamipa, dadeipdanen yakarami neng, Raja kepmanto neng yumada, ‘Sun ton tekmengedi Raja kepnung’ tenen, aneng yuma popra adipapu gawal daki. 11 Ukurami dinino, Raja Yehoramdi deipu ner, ada Ahazia er malner tenpu, er sida Yosabat kuramu. Tonda Allah er si eremna ati pumbon pel doramu ngebo, imam Yoyadadi, aner domu. Uda, aner Yosebadi Ahaziadi deipu mi, er si Yoas doprapudi inipu. Ada ataruda, Yehuda yala nengdi deiami nyapu, Raja kepmanto nyapu yumada, Atalyadi peipupa, er tara nengdi ponmaiya cadi, ‘Ami Yoas ton popnung,’ tenepudi, Yosebadi upu pena gum di, Ahazia deiamu mi Yoas dopropu. Yoas dopropudi, er cap, er kalekra melimna ner cap, tenpu man ati neitamai di inipra deipu. Ukupka cadi, Allah er si eremna ati neitamaida, tenpu ati bo neitamai di, inipra deiamupa dakuramrei. Yosebadi ami lyepropka deiki di, Atalyadi ami men popu. 12 Atalyadi nimi deiyo kepra, Yehuda tara talepudi kuramu taruda, keteng tamun ngangtan bari (6) neitamai yuma, Yoasda, Allah er si eremna ati neitamaida, inipra deiamipa, telep kupra dakuramu.