2Ch 23 | XteSC | STEP | Aner Atalyadi, Yehuda tara taleamnganen, keteng tamun yoneitam bari (7) konum kepkopda, imam Yoyadadi, ‘Uda konuma, Yoas erepra deipmepepa, Raja kepkamsere,’ tenepudi, balila kupka deiki di, puto kepudi, ‘Angeda kuptepe,’ tenepudi, Yoyadadi jen talena deiyo neng, pamubari neng cap tep, ‘Ukupkamepe,’ pepra, pedina upu deiki di, ketenepi. Ajen talena nengda, sun amutarada, jen neng ton seratus (100) taleamidi, upu perami. Ajen talena deiyo nengda, gung yuk-yuk kurami. Atep, imam Yoyada cap, jen talena deiyo neng cap, kange tenpu doupra upu sisiki neng sun sida ake. Ada, Yoreham er mi Azarya cap, Yohanan er mi Ismael cap, Obed er mi Azarya cap, Adaya er mi Maasyea cap, tonda Zikeri er mi Elisafat cap, sun yuma cap, Yoyada capdi, ‘Jo angeda, kupkamepe,’ pepra, pedina upu deiki di pepdai.

2 Chronicles 23

Imam Yoyadadi peipupa, er melimna nengdi Atalya popi upu

1 Aner Atalyadi, Yehuda tara taleamnganen, keteng tamun yoneitam bari (7) konum kepkopda, imam Yoyadadi, ‘Uda konuma, Yoas erepra deipmepepa, Raja kepkamsere,’ tenepudi, balila kupka deiki di, puto kepudi, ‘Angeda kuptepe,’ tenepudi, Yoyadadi jen talena deiyo neng, pamubari neng cap tep, ‘Ukupkamepe,’ pepra, pedina upu deiki di, ketenepi. Ajen talena nengda, sun amutarada, jen neng ton seratus (100) taleamidi, upu perami. Ajen talena deiyo nengda, gung yuk-yuk kurami. Atep, imam Yoyada cap, jen talena deiyo neng cap, kange tenpu doupra upu sisiki neng sun sida ake. Ada, Yoreham er mi Azarya cap, Yohanan er mi Ismael cap, Obed er mi Azarya cap, Adaya er mi Maasyea cap, tonda Zikeri er mi Elisafat cap, sun yuma cap, Yoyada capdi, ‘Jo angeda, kupkamepe,’ pepra, pedina upu deiki di pepdai.

2 Upepdai dingeda, sundi Yehuda mutu neitamai yuma embeidi, Lewi yala neng cap, sun Israel yala nengdi, deipdanen yakarami neng, sun yala yuk-yuk akuramitopu tep, deiyo kepra ayala-ayala yuma, upu pena deiyo neng yuma cap tep, upu dopra bena pepipa, gekepidi bulupyoda, adeiyo-deiyo neng yumadi, sun yuma Yerusalem mutupu yai. 3 Sun yuma buluprapidi, Allah er si eremna ati dam, yana bulupra wekidi, Raja Ahazia er mi Yoas tep, “Er dipapu nun Raja kepra talepserepa, nundi er upu gekenkamepe,” pepra, pedina upu deiki di pepdai. Aupu yuma pepyopda, Yoyadadi anesala tep upepu, “Allahdi Daud tep, ^{▼▼Daud – Allahdi Daud tep, “Kandi deipmempa, dadeipdanen bankameng nengpuda, ne mawa Israel nesala talena tep Raja kepmengedi talenkamenge,” pepu ngeda, 1 Tawarikh 17:12-14 dinkurume.} ‘Kandi deipmempa, dadeipdanen bankameng neng dipapu, Israel yala nesala yuma talena tep, nimi deiyo kepmengedi, Raja kunkamnunge,’ peiamutopu, Raja Ahazia er mi atekmar adano! Ataru di dipra oryankamre taruda, erda nun nimi deiyo ngebo, Raja kepra talenkamsere,” pepu. Apepudi, aupu ton cap dukdongopra pepu.

4 “Nundi apepkusentopu kupkamape. Sun imam yala neng cap, Lewi yala neng cap yumada, sun abulupmarum neng neitamai di, bokdarumdi, gung weneri deipra ketenepkurume. Ada, tenpu gungda, Allah gispal don tumi, tali pel dona gum di, beipye peingna tumi, Sabat tumi deiki, Allah er si eremna ati pel dopkumum nengda, Allah si eremna ati buplan-buplan yuma damai, ‘Tali neng weknung’ tenen, kalengkurume.

5 Angetopu, sun kankan dinin, ton neng bokra deipmumdi, gung butene ngeda, Raja er ila telep ati damai kalekununge. Tonda, ton neng bokra deipmumdi, gung weneri ngeda, anengda Yerusalem ila ati arum neitamai dinin, wengyakan bisi er sida Gerbang Dasar, ‘Tali neng weknung’ tenen, kalengkamnunge. Ton tupa tapmarum imam neng cap, Lewi yala neng capda, Allah Yahweh er si eremna ati damai dinin, dana-dana bura tarapu, Israel yala nesala wengmengaipu kalengkununge.

6 Ataru neitamai yumada, tenpu tali ngebo peda, Allah Yahweh er si eremna ati pumbon men wengkamenge. Dinino, sun imam-imam neng cap, Lewi yala neng capda, Allah si eremna ati pumbon pel talepra donkamnunga cadi, sun dipapu akati wektenge. Deiyoda, Allahdi, ‘Aneng dipapu, ne si eremna ati pumbon pel dopkameng’ tenen, ayala nengpu wepra deipka tep, sun aneng dipapu akati wekra kunkamanunge. Sun yuk nesala yumada, Allahdi, ‘Ukupkurume,’ pepra, deiputopu, angepu tenepra bura tara kunkamanunge. 7 Sun Lewi yala nengda, Raja kalengna tep, nimi pon parang ya doupra, Rajapu ongopdongopra kunkamanunge. Tonda, Raja dan tara do yuma, er benkurya peda, sun anengdi, er cap dipdongopra embankamanunge. Wareto tali neng do yuma, pe deipra Allah er si eremna ati wekure ngeboda, adipapu popkamarume,” imam Yoyadadi pepu.

8 Yoyadadi, “Ukuprume,” peputopu, angepuda, sun Lewi yala neng cap, Yehuda yala deiyo neng cap, erdi wepra deipu neng yumada, sundi apeputopu kupi. Ada, aneng gung yuk-yuk tep, deiyo kepra kurami nengdi, sun amutara neng dopra kalengami. Tonda, sundi, Allah er si eremna tumi deiki di, sun pel donmai neng tep, “Sun pe ati tamupra men benkurume. Acapu mapkurume,” pepra napra deipi. Tonda menmena taru apel konum donmai neng punupra, ‘Akati pel donkup’ tenen, yakai neng peda, acapu napra deipi. Allah er si eremna ati ataru dipapu damaipu kunmai. Sun pe ati tamupra men benmai. 9 Ukunmai taru neitamaida, imam Yoyadadi, sun jen neng gung yuk-yuk tep, deiyo kepra taleami neng, sun amutara seratus (100) jen neng taleami deiyo neng tep nengeda, nimi podan taru keca ton bokra karepu. Ada, menop taru, Raja Daud er pe douramu nimi pon tombak cap, mar podan taru di, ‘Mar popsenung’ tenen, nong lelimna tep douami keca, er si perisai, weiknge cap, meteknge capda, ange yuma dopra, ajen talena neng, sun deiyo neng tep karepu.

Animi pon keca yumada, menop taru Raja Dauddi akeca yuma, Allah er si eremna ati neitamai, mawa deiamnga cadi, ataruda imam Yoyadadi akeca dopra, sun ajen deiyo neng tep karepu. 10 ‘Raja popnung’ tenen, kalengna tep nimi pon parang ya cap, nimi pon tombak cap doupmai nengda, Allah er si eremna ati dam dinin, urasin tara cap, tonda Allah er karena tep, gam keca popra uku dongona tep, keteneipi keca, er si mesba deiki tarada, imam Yoyadadi, aLewi neng dopra deipmaupa, sundi kalengmai. Sun yumada, dukdongopra tekmaidi, dapu tara arah selatan di dipra, dipdongopra iknapi tara, arah utara tekmaidi kalengmai.

11 Ange-ange yuma konum kupmaidi, keteneipmai dingeda, imam Yoyadadi, Raja Ahazia er mi Yoas doupra, bura tara yaudi, awekmai neng urasin tara deipu. Ukupu dingeda, Yoas er giso deikida, nimi deiyo neng, Raja neng kemameng topi, er sida mahkota galupra deipu. Tonda, Allahdi sun Raja neng tep, ‘Ange kunkamrume, ange men kunkamrume,’ peipupa, sekamu upu ^{▼▼sekamu upu – Aupu sekra deiami ngeda, Allahdi sun Raja kemna neng tep, ‘Ange kunkamrume, ange men kunkamrume,’ pepra, deiamu upu tep Ulangan17:14-20 deiki di epkurume.} ton dopra, Raja Yoas tep karepu. Ukupka deiki di, Yoasda Israel nesala yuma, sun nimi deiyo ngebo kemna tep, erepra deipudi sah kepu. Ereipkopda, Yoyada cap, sun deiyo-deiyo neng capdi, ‘Yoasda nun Raja kunkamsere’ tenen, peten kemnange tep, Yoas er giso deiki minyak saitun me dikra derina pel dopi. Ataruda, sun awekmai nesala yuma, ila upu deiki di, “Telepe, kanda nun deiyo ngebo Raja, keteng tamun denge weika di, gam kunkamreme!” pepra, gispal donmaidi penmai.

12 Upenmai taruda, upu lelim weik penmaiya cadi, Atalyadi alelim gekepudi, ‘Ware kupmang do?’ tenen, menmena Allah er si eremna ati damai, sun anesala weik wekmaidi, Raja gispal dona tep, orbena yana kemaidi, ila upu di penmayaipu bena dinmau. 13 Beuopda dinmaupa, Raja ukupu wepra deipi ngebo Yoasda, Allah er ati neitamai wengyakarami bisi buplan damai, ila ayumnya co damai tekmaupa epu. Er tekmaua dana-dana tara yumada, sun jen neng gung yuk-yuk deiyo kepra kurami deiyo jen neng cap, lelim pena keca terompet dourami neng cap, sun dipapu Raja ngebo ongopdongopmai. Tonda Raja eremna tep, amutu neitamai kuramidi, apel dorami nesalada, akati damai bulupra wekmai neng yumada, ila kange deipmaidi, terompet doupra, pung penmaidi gispal donmai.

Tonda, kange derina mut pena deiyo nengdi, bung-bung pena keca cap, alat-alat musik yuk yala yuma cap, doupmaipa mut penmaidi, ila upu deiki di, Allah tep gispal donmai. Ataruda, Atalya bena epudi, er kange pio mali kupupa, er kenekmau opkal adipapu gwelepra tapudi, puto di upepu. “Uo, Uo, tek sisi nepuda amutu talepra nimi deiyo ner kununa cadi, sundi akupmaruma deiki di, ne yanipmanerume,” pepra, ngolokudi ila upu di mali pepu.

14 Ukupkopda, imam Yoyadadi, jen neng gung yuk-yuk tep, deiyo kepra, seratus (100) jen neng taleami deiyo neng, sun tep upepu, “Atalyada, tomoprumudi, duyankurume. Ada, tomopmumdi, Allah Yahweh, er si eremna ati damai di pona gum dinin, aner tomopmumdi, adipapu doupra, bura tara dubenkurume. Ukupra doupra bamumpane, ware ngebo do, Atalya tara kepredi, ‘Aner lyeipkun’ tenen, upu sengre ngeboda, popnapu kupkurume,” pepra deipu. 15 Sun anengdi, ila nimi deiyo ngebo Raja, er ati damai aner tep enmaiyanen, Raja er ila ati damai dinin, wengban bisi, er sida, ‘Kuda Bisam Bisi Buplan,’ pepra, potokeiaminge dam tara di, aner kunmauai di eprapidi, bena tomopidi, adipapu poptapi.

Imam Yoyadadi, ‘Nun yumada, Allah er tarapu tamupra kepropkamepe’ tenen, pepu upu

16 Uda, ange yuma konum kupyopda, imam Yoyadadi, pedina upu deiki pepra deipu. Ada, erdi, “Ne cap, nun ukupu Raja Yoas cap, amutu kunup nesala yuma capda, nunda Allah Yahweh er nyapu kunkamepe. Er tepapu si eremkamepe. Er upupu gekepra kunkamepe,” pepra, pedina upu deiki peipupa, sun anesala yuma gekepidi, “Jo, angepu kunkamepe,” pepi. 17 Aupu konum pepkopda, sun anesala yumadi, isok si Bahal, er si eremami ati dam beidi, akati yuma urupra tapi. Ukupidi, isok si eremamidi yapi keca popra, uku dongomna tep, dopra deiaminge, mesbada, uruptapra sikke buktapi. Tonda, isok do, nimi do, ‘Atali keca si eremkamep’ tenen, nimi urasin utopu kupra, petupra deiaminge yuma peda, akeca yumada, dakra tapi. Tonda, isok Bahal, ^{▼▼Bahal sekmepu ngeda, yuk Alkitab neitamai Baal sengnunge. Bahal sekmupkada, ‘Baal pepetepmengepa, ikin kuprepa, ‘Bal sisa tenepnung’ tenen, nundi Bahal sekmupke. Si yuk sekmepu dinino aisokda tenpua.} er si eremna ati deiyo keamu ngebo, er si Matanda, poptapi. Ada, isok Bahal, er karena tep, keteneiami mesba damai bena, angebo poptapi.

18 Ukupyopda, imam Yoyadadi, Allah Yahweh er si eremna ati kalengna tep nengeda, “Sun imam-imam neng cap, Lewi yala neng cap, sun dipapu akati kalekra kunkamenge,” pepu. Ada, men taru Dauddi, Allah er si eremna ati pel talepra dona tep, imam-imam neng cap, Lewi yala neng cap, sun tep pel yuk-yuk bokra deiamupa, talepra doramitopu, ‘Ukutaru peda, utopu pel dopra kunkameng’ tenen, Yoyadadi aneng wepra deipu. Sun anengdi Allah si eremna tep, gam keca popra, uku dongona tep pel dopkungopda, “Musadi, ‘Ukupra-ukupra kunkamrume,’ pepra, sekeiamutopu kunkamenge,” pepu. Tonda, “Sun aneng kange telep deiki di mut pengedi, apel donkamenge,” pepra weipu. Ada, men taru Dauddi wepra deiamutopu, Yoyada peda, utopu kupu. 19 Tonda, Allah Yahweh er si eremna ati buplan damai kalengna tep, Yoyadadi nimi ton wepra deipu. Ada, Allahdi, “Akecada, ne song cadi, akeca kupmenge neng do, ajen keca jepmenge neng do, amali keca mangkau di bepmenga peda, ne si eremna ati damai pio men yatenge,” pepunge, konum kupmange nengda, ‘Anengda, mali neng kununge,’ tenepka cadi, ‘Anengda, er si eremna ati weknung’ tenen, kalengna tep, nimi ton weipupa, anengdi akati buplan yuma kalengami.

20 Ange konum ukupkopda, Yoyadadi jen neng gung yuk-yuk tep, deiyo kepra kurami neng cap, Israel yala nesala yuk-yuk tep, deiyo kepra taleami neng cap, amutu kurami nesala yuma, deiyo kepra taleami neng cap, tonda amutu kurami nesala yuma cap, imam Yoyada cap, sun yumadi, ukupu erepra deipi ila nimi deiyo ngebo Raja Yoasda, Allah Yahweh er si eremna ati damai di doupra, Raja kuna tep ati damai dubei. Ada, ila bisi buplan potokra deiamya, er sida Deiki Tara Bublan, damai apu wekra bei. Bei taru Rajada, ila nimi deiyo neng bungna keca, er si takhta deiki bena buku. 21 Ange yuma konum kupyopda, Atalya popipa, konum depkopda, amutu kurami nesala yumada kange deipi. Amutu ila ati arum Yerusalem kurami mutuda, ton cap podana gum dipapu, dim pepra teleppu kurami.