2Ch 24 | XteSC | STEP | Yoas er keteng tamun yoneitam bari (7) tujuh tahunpu kepu taruda, Yehuda yala nesala talena tep, erepra deipipa, gonga kepra, Raja kepudi amutu neitamai taleamu. Yoasdi Raja kepra, amutu talepra, Yerusalem ila ati arum neitamai kuramu keteng tamunda, empat puluh (40) tahun deiki di talepra kuramu. Yoasda, Bersyeba mutu ner, er sida, Zibyadi deiamu.

2 Chronicles 24

Yoasdi Yehuda yala nesala tep, Raja kepra taleamudi, pel dopunge tep upu

1 Yoas er keteng tamun yoneitam bari (7) tujuh tahunpu kepu taruda, Yehuda yala nesala talena tep, erepra deipipa, gonga kepra, Raja kepudi amutu neitamai taleamu. Yoasdi Raja kepra, amutu talepra, Yerusalem ila ati arum neitamai kuramu keteng tamunda, empat puluh (40) tahun deiki di talepra kuramu. Yoasda, Bersyeba mutu ner, er sida, Zibyadi deiamu. 2 Imam Yoyada gam tupa kuramu taruda, Raja Yoasdi pel yala-yala yuma talepra doramu ngeda, Allahdi, ‘Angeda telep,’ teneramutopu, dumsisipu kuramnga cadi, Allah Yahweh er kange telep kudiramu. 3 Imam Yoyadadi, Raja Yoas dopkamu nerapuda, butene wepra deiamupa, Yoasdi anerapu butene dopudi, sal nyapu cap, ner nyapu cap, deiamu.

4 Konum Raja kepudi, ue ware kuprap taru ton konum mapkopda, Yoasdi, ‘Allah Yahweh er si eremna ati mali kupu ngeda, kange di telep kupra doipkamne,’ tenepu. 5 Utenepka tep, Yoasdi imam-imam neng cap, Allah ati pumbon pel melipra dorami neng, Lewi yala neng cap tep, “Sundi Yehuda nesala ati arum dopra kunung mutu embemumdi, co bo tep moroprumpa, sun yumadi bupra deipmengepa, Allah Yahweh er si eremna ati, mali kupunge yumada, telep kudinkamepe. Atep, Israel nesaladi, aketeng tamun, aketeng tamun neitamai yumada, co bo bulupra kareramenge ngeda, bulupra deipmengepa, ange dopra ne damai tamupra duyankamrume. Aco bo deiki di, Allah er si eremna ati dona deiyo keca yuma kunupmepedi, akati lepsisikra donkamepe. Atep, angeda pio menmena kupkamepnge cadi, sun adipapu apel dopkurume. Angeda tamna pio gume,” Yoyadadi peipu. Upepu dinino, Lewi yala neng sundi, adipapu apel menmena dona gum dipapu kurami. 6 Lewi yala nengdi, sika dipapu kupya tep nengeda, Raja Yoasdi, imam neng sun ila nimi deiyo ngebo Yoyada tep, “Yarume,” pepupa, yauopda, asipetepu. “Allah Yahweh er pel don ngebo Musadi, Allah er si eremna ati dona cap, lepsikra pel dona cap tep, amutu kunge Israel nesala yuma tep, ‘Pajak co bo bupra deiprume,’ pepra deiamupa, amutu nengdi tupa men derinung do? Ware deiyo keca tep, sun Lewi nengdi, aco bo men douprapmengedi, ne damai men duyakanung do? Ukutaruda, kandi Lewi yala neng pepmempa, sundi Yehuda tara kunge nesala cap, Yerusalem mutu ila ati arum neitamai kunge nesala cap, sun damai bengedi, apajak co bo dopra duyankamenge. Aco boda, tali tep gum dinin, Allahdi, ‘Ange kunkamrume, angeda pio men kunkamrume,’ peiamunge, ila pala gel deiki sekra karepupa, er si eremna tep, opkal bol di dodin ati pumbon dongopinge lepsikra dona tep, karenkamsenge.” Raja Yoasdi pepu.

7 Ataru neitamaida, pio mali kuramu ner, er si Atalya melimami nengdi, Allah er si eremna atida, balila kupra puto di weki. Ukupidi, Allah er si eremna tep ketenepra deiami keca, pio mambul telep keca weikanun, upula dopropidi, Bahal isok er si eremna tep dopra benami. 8 Allah Yahweh er ati lepsikra dona tep keca cap, co bo cap, men kupupa, akeca putapka tep, nimi deiyo ngebo Raja Yoasdi, er melimna neng tep peipupa, sundi co bo moupra derina tep keca, co lase bekinda, er si kotak ton dopidi, Allah Yahweh er si eremna ati wengyakange bisi buplan damaida, ketenepra deipi. 9 Yerusalem mutu kurami nesala cap, Yehuda yala neng cap, sun yuma tep, upu karepi ngeda ake. “Sun amutu kurumu nesala yumada, Allah Yahweh er karena tep, pajak co bo bupra duyankurume. Ada, Israel nesala ila katawai mutu neitamai embarami taruda, Allah er pel dona ngebo, Musadi, ‘Allah si eremna tep, keana dodin tenda ati dona cap, lepsikra dona cap tep, pajak co bo ketenepra duyakankamrume,’ peiamupa kuramitopu, ukutaru peda ukupkurume,” pepra, lap perbarami. 10 Aco bo derin co bekin ketenepra deipi pangeda, amutu kurami nesala cap, amutu nesala talepra kurami deiyo-deiyo neng cap, Raja Yoasdi peipu upu sun yuma gekepidi, kange telep kupu. Atep amutu kurami nesala yumada, kange deipra Allah karena tep, pajak co bo doupra kidongon keca, er sida kotak dopra deiamyaipu dongoryakaramipa, dekpepra diniku.

11 Atumi-tumi yumada, amutu nesaladi co bo dongoramipa, akotak dekpepu pangeda, sun Lewi yala nengdi, akotak dopra, Raja Yoas er pel dona nengdi dirpetena tep, sun damai dubarami. Dipetepnedi, abekinda co bo weik wekmanopda, Raja er mambul keca sengna deiyo ngebo cap, ila imam deiyo ngebo, er amutara melimna ngebo cap, sundi aco bo wekman nge yumada, nungamrei. Ukupnedi akotakda, tamupra men di deiamyaipu, deriryakarami. Sun anengdi tupa-tupa ukuramya deiki di, co boda weik bupra derirami. 12 Ukupyopda, Raja cap, imam Yoyada cap, sundi aco boda dopra, Allah si eremna ati mali kwamunge lepsisikra dona tep deiyo kepi neng, sun deiki deiprei. Ukupreipa, Allah si eremna ati dona tep, urasin telep gel di, ketenemna kael neng cap, co cangna neng cap, co di ati dona kael neng cap, tonda gat keca er si besi cap, tonda tembaga cap di ati lepsisikra dona kael neng tep, karepi. Ada, sun pel dona tep keca, kunumna tep kareprei.

13 Adeiki di, Allah er si eremna ati mali kwamu ngeda, sun ati dona kael nengdi, lepsisikra dona tep gonga kepra, pio pe deipra telep kupra apel dorami. Sun aneng yumadi, moupra doramya deiki di, akatida men di domipa, puto kwamudi, kamo pio telep kwamutopu kupra, kange di ton cap dopipa, pio telep kupu. Tonda, ‘Akati puto weik ton kupkamre’ tenen, puto kemdinange ton, tapakra domipa, telep kupu. 14 Apel konum gawal dakyopda, tupa akapu kunumna weik keca emas cap, perak cap, tupa gawal akapu ngeda, tamupra duyaidi, Raja cap, imam Yoyada cap, sun tepapu tamupra karepi. Akarepi emas cap, perak cap, dopra akeca-keca dona kael neng tep karepipa, ange deiki di, Allah er si eremna ati pumbon neitamai pel dona tep keca, alat yala-yala yuma cap, metek me mau mangkok-mangkok cap, ketenepra deipi. Tonda, imam Yoyadadi, tupa gam kuramu taru neitamai yumada, sun Israel nesaladi, ‘Allahdi nun mali kun keca kaukepseredi, gum kupra deipkamser’ tenen, gam keca popra kareryakaramipa, imam-imam nengdi Allah Yahweh tep, er si eremna ati pumbon ^{▼▼pumbon – Pumun taruda, Israel nesaladi, gam keca popra, Allah karena tep, uku dongoramyaida, Allah Yahweh, er si eremna ati bura tara dinin, mesba deiki di uku dongorami. Dinino, sun imam-imam nengdi, yapi dopra, akati pumbon bena, Allah tep karerami. Ada, Allahdi nun mali kun keca daepkamser’ tenen, ayapida Peti Perjanjian deiki di likeipi.} di karerami.

Imam Yoyada depka tep, seki upu

15 Imam Yoyada pio wisi konum deipudi, er keteng tamunda, seratus tiga puluh (130) tahun konum kepkopda depu. 16 Yoyada konum depkopda, er kayapu nengdi, er nong dopra, Raja Daud kuramu mutuda, Sion mutu neitamai, sun Israel yala nesala talerami Raja-Raja neng depnepa, peiramyaipu, er nong peda dopra bena peipi. Imam Yoyada erda, Allah er si eremna ati moupra taleamudi, telep pel doramunge yuma cap, Israel yala nesala tep, telep kupra melimamunge yuma cap tep nengeda, konum depkopda, er nong dopra Raja Daud peiamyaipu bena peipi.

Raja Yoasda, pio mali weik kuramnga tep, seki upu

17 Imam Yoyada konum depkopda, Yehuda tara nimi deiyo kepra kurami neng yumadi, sun deiki tara ila nimi deiyo ngebo Raja Yoas damai yai. Yaidi, er tep telep gekena upu penmaidi, er tep gispal dopidi, “Ange-angepu kupkuserume,” pepra, yana moropipa, sundi aupu pepitopu, gonga kepra kupudi, Yudea tara kurami nesaladi, pio mali weik kupbaramai. 18 Ada, Yehuda mutu kurami nesala yumada, sun co puna nengdi, si eremami ngebo, Allah Yahweh er si eremna ati wekra men si eremamidi, tamami. Ukupi dingeda, sunda tali isok sipu eremamidi, isok si Asyera, er urasin utopu keca kupra, petuamidi, er si eremami.

Tonda aisok gispal dona cap, si eremna cap tep, ila lyom co ton ikrapidi deiamidi, aca dipapu Asyerah si eremami. Adeiki di sunda mali weik kuramipa, Yehuda yala neng cap, Yerusalem mutu ila ati arum neitamai kurami nesala cap, sun tep Allahdi, ‘Angeda ne songe, ne dabale’ tenepudi, yu weik kupu. 19 Allahdi sun tep, yu tenepka peda, ‘Anesalada tamupra ne tara kepronkamenge’ tenen, Allahdi er upu lap pena deiyo neng, nabi-nabi neng doproipupa, sun anesala damai yaidi, “Sun mali kurum ngeda, tapmumdi, tamupra Allah damai yamumdi, er sipu eremkamrume,” pepra lap peramidi wenemami. Wenemami dinino, sun amutu kurami nesaladi aperami upu tep, ‘Nun song cadi, men gekenkamepe’ tenen, aupu pio men gekerami.

20 Ukupra pio mali weik kuramya tep nengeda, Allah er Lek Sambaladi, imam Yoyada erdi pumun taru deiamu ngebo, er si Zakaria, er nong neitamai yana weka dinipupa, sun amutu kurami nesala kunmaiyai bena, sun urasin tara tekudi upepu. “Allahdi sun tep peipmaserada, ake. ‘Ware keca deiyo tep, sunda ne Allah Yahwehdi, ‘Angeda kunkamrume, angeda pio men kunkamrume,’ pepra deiamsisi upuda, moupra men talerum do? Sundi ne upu moupra men talerumnya deiki di, nedi karepsenepa, sun pe deikipu ikin keca kupkamsere. Sundi kunkamrum keca yumada, malipu kupkamre, telep men kupkamre ja. Sundi ne Allah Yahweh tep tapmaneruma utopu, nedi sun peda tapkamne!’ Allahdi upeipmasere,” Zakariadi sun Yudea tara nesala yuma tep pepu.

21 – 22 Allah er Lek Sambaladi, Zakaria tep, “Uperbenkurume,” peiputopu, aupu dopra peipu dinino, amutu kurami nesala yuma yu kupupa, sundi, “Gume, angeboda nun songe. Er Zakariada, adipapu popkupe,” pepra upu sisikdai. Aupu sisingmai taruda, Raja Yoas peda, ‘Jo, sundi angebo dapopkungada telep pua,’ tenepu. Atep, amutu kurami nesaladi, Allah Yahweh, er si eremna ati damai dinin, bura tara nimi wengamyaipu, Zakaria er nong deiki, gel di dokotepra popi. Ponmaipane, kapul men depu taruda, Zakariadi aupu pepu. “Uo, sundi gel di dopra, ne nong deiki dopra popnerum ngeda, ne nai Allah Yahwehdi konum epra kael kepmasere atep, ‘Amenda kwang dakamsere’ tenen, Allah tep moropne,” pepudi, Allah er si eremna ati dampu depu.

Yoasdi Raja kepra taleamu ngeda, gawal dakunge tep, seki upu

23 Uda, sun yuma dakuramipanen, aketeng tamun gawal dakudi, ukupu keteng tamun yau taruda, Siria mutu jen talena nengdi, Yehuda tara neitamai kurami nesala cap, Yerusalem mutu ila ati arum neitamai kurami nesala cap tep, ‘Popdankup’ tenen, mar poryai. Siria mutu jen talen neng sundi, Yudea mutu nimi deiyo kepra taleami neng yuma, popra gawal dakidi, sun poptapi nengdi talerami bung keca yumada, dalupra dopropidi, sun pe mutu taleamu deiyo ngebo Damasyik mutu Raja ngebo damai dubena karepi. 24 Siria mutu jen talena neng gungda, yambulanunpu yanmai dinin, Allah Yahwehdi, Yudea tara nesala sun wenemna tep, sun Siria mutu jen neng deiki puto weik karepudi, go karepupa, sun Yehuda mutu jen nengda, denge weik kurami dinin, popropi. Ada, Yehuda mutu kurami nesaladi, sun co puna nengdi, ‘Nun nai bo’ tenen, si eremami Allah, ada Allah Yahweh tep taprapidi, isok sipu eremamya deiki di, mali weik kuramya cadi, Allahdi anesala wenepudi, ikin keca weik, sun nong deiki deipu. Allahdi, ‘Adeiki di Raja Yoasda popra wenepkamne,’ tenemnga tep kupu.

25 Ataruda, sun Siria mutu jen nengdi mar dopipa, Yoas er nong deiki dourbeupa susu dila pio weik kupka cadi, depmanto kupu. Atep, sun poryanmai jen neng yuma, sun pe mutu tamupra bei taruda, Yoas er amutara pel dona deiyo-deiyo neng kankan, butenedi, ‘Yoas popkamanem’ tenen, upu sisikdarei. Ukupreiopda, sun anengdi, Yoas mapmaua damai bereidi, bena popdongoprei. Er poptapreia deiyoda, Yoasdi Yoyada er mi Zakaria tep, “Popkurume,” pepupa, pominge menenga tep, kwang dakrei. Yoas er nongda, doprapidi, Daud er kuramu mutu neitamaipu bena peipi dinin, sun Israel nesala taleami Raja-Raja neng peiramyaida, men peipi. Ange gum dinin, tali yukai bena peipi.

26 (Uda, Yoas tep, “Popkamanem,” pepra, upu sisingmarei nengda, ton ngeboda, er si Zabad, er nin sisada, er si Simeat, Amon mutu ner kuramudi, Zabad deiamu. Zabad tep upu sisiku ngebo, yuk ngeboda, er si Yosabad, er nin sisada, Moab mutu ner, er si Simrit kuramu. Sun butene Yosabad cap, Zabad capda, sundi, “Yoas popkamanem,” pepra upu sisikmareiadi poprei.) 27 Yoasdi deiamu nyapudi kuraminge cap, tonda nabi-nabi nengdi Yoas tep, “Amenda taru er Yoas tep, ange ton, ange ton kupkamre ja,” peraminge capda, tonda Yoasdi Allah er si eremna ati mali kwamngai dopra, lepsiskra deiamunge cap, ange yumada, mambul buku neitamai seki. Ada, Israel yala nesala dinin, Yudea mutu taleami deiyo neng, Raja-Raja neng kurami keca tep, sengna buku neitamaipu, sekra deipidi, lap pepi. Yoas konum depkopda, ataruda, Amaziadi er nai bo Yoas yo punupudi, Yudea tara tep, taleprapudi, Raja kepu.