2 Chronicles 26

Uziadi Yehuda mutu talena tep Raja kepu upu

1Amazia konum depu pangeda, sun Yehuda tara kurami nesala yumadi, Amazia er mi Uzia tep, ‘Er nai bo punupredi, nun Raja kunkamser’ tenen, wepra erepra deipi. Erepra deipi taruda, Uzia er keteng tamunda, enam belas (16) tahunpu kepu. 2Uziada, erdi ila ati arum, er sida, Elot mutu perami mutuda, yuk nengdi amutu konum urupra buluktapi dinin, erdi, amutu yuma lepsisikra doramudi, kange di ton cap telep kupra dopra deipu. Apel doramu ngeda, er nai bo Amazia konum depupa, er apu yapu peiramyaipu konum peipipa, amenda taru dipu, apel doramu. 3Uzia erepra deipi taruda, er keteng tamunda, enam belas (16) tahunpu kepu. Erda ila ati arum, Yerusalem mutu taleamudi, aneitamaipu kuramnganen, keteng tamun dengeda, lima puluh dua (52) tahun dakuramudi Yehuda tara taleramu. Tonda, er nin sida, Yekholya kuramu. Erda Yerusalem mutu ner kuramu.

4Uda, er nai bo Amaziahdi dumsisipu kuramutopu, Uzia peda, erdi amutu talepra kuramu taru yumada, pel telep kupra doramunge tep nengeda, Allah er kange telep kuramu. 5Tonda, Allah er upu lap pena deiyo ngebo, nabi Zakariadi, Uzia tep, Allah tara pel dona tep, “Angeda malinge, angeda telepnge. Allahdi kan tep peipkere upuda ake,” pepra, upu lepsisingdin ngebo kuramu. Raja Uziada, er gam tupa kuramu taru, Allahdi pepra deiamu upu moupra taleamudi, ‘Allah Yahwehdi, ware upu peipkamner do?’ tenen, Allah peramu upu moupra gekeramudi, telep kupra kuramu. Ukupra kuramnga cadi, ange utopu kuramu taru neitamai yumada, Allahdi er cap, er kuramunge cap tep, pio telep kupra deriramu.

6Uziadi, Filistin yala nesala mutu bena, popra bisbisa kapu taru di, sun Filistin nengdi ila ati arum doramidi, gat gel di ila lyom beilya wipdongopra kurami mutuda, bisbisa kapudi, amutu-amutu ongopgenepra wiami gel beilya yuma, urupra tapu. Ada, Gat mutu ila ati arum cap, Yabne mutu ila ati arum cap, tonda Asdod mutu ila ati arum damaida, cap yumada, urupra tapu. Konum ukupkopda, erdi Asdod mutu tarada, sun ati arum damai, ukupu ila ati arum dopudi, lyom gel beilya ton wipra ongopdongopu. Tonda ange utopu, Filistin yala nesala kurami mutu yuk tara peda, ati arum doamudi, lyom gel beilya ton wipra ongopdongopu. 7Allahdi er tep meliamupa, sun Filistin yala nesala cap, tonda Arab yala nesala dinin, Meunim mutu kurami neng cap, Gur-Bahal mutu kurami neng capda, anesala yumadi, er tep men bisbisa kapmanto kuramipa, erdi amutu nesala yuma bena popra bisbisa kapu. 8Sun Amon mutu kurami nesala talerami telep bung kecada, Raja Uzia er pajak karena tep, kunumna telep keca dopra, er damai kareryakarami. Erda ila puto di taleamupa, sun dana-dana tara kurami nesala yumadi, “Uo, er angebo mambule,” pepra, er sipu si siperami cadi, orkaren Mesir mutu kurami nesala peda, er si kael keami.

9Tonda, Raja Uziadi, ‘Nun podan nengdi, pera karen mutu di yana popsenung cadi, orkarenai di yankamenge taru eptepe’ tenen, Yerusalem mutu puto kepra derina tep nengeda, amutu ati arum dopra kuramyai sirik tara potokeiyami buplan weneri dopra deipu. Tenpu ngeda, er si ‘Pintu Gerbang Sudut’ cap, gel beilya wipra genemdongoramengai cap, tonda, butene ngeda, keteng dangban tara, akati arum tapra, bura tara neitamai, dana tara dana tara bisi bana tep, potokeiami buplan ton dopra deipu. Abuplan er si Pintu Gerbang Lembah, ila lyom ati ton dopu. Weneri ngeda, alyom gel beilya deiki benamipa, gwalipdaro benami tara, aca di ila lyom kalengna tep ati, weneringe dopra deipu. Abeilya deiki, sun podan neng kalengna tep dopu gel atida, Yerusalem mutu ila lyom gel beilya ongopgenepra wiamyai deiki tara, lyom gel ati weneri dopra deipu.

10Ange utopu, tonda Uzia er dipapu, nimi men kuramyai dinin, ila mutu katawai tara neitamai di, ‘Nun podan neng epkamep’ tenen, gel di lyom kalengna ati ton dopra deiamu. Tonda, ‘Nundi me jepkamep’ tenen, ila mutu bungne gel pumbon, me gumai cadi, bon potokra deipmepepa, mo ceprepa, me embaredi, abon wekredi mokon deipkamre’ tenen, bunkwan mokon weik palipra keteneiamu. Ukupunge deiyoda, akatawai mutu neitamaida, er pel melimna nengdi, er domba bisam cap, sapi bisam cap, pio weik peiramya cadi, Yudea mutu dinin, keteng dangban tara, yambul mutu buma deiki tara cap, ban mutu cap yumada, amokon derinai palipidi, ketenepra deiamu. Tonda Raja Uziada, tu telepaida, sukun tu tara ton wa pel don neng weik ketenepra deipupa, er anggur wa cap, er tep kourami keca yala-yala yuma cap tep nengeda, anengdi er melimna tep peiramemei. Uziada, wa pena keca pio kange deriramu ngebo, ‘Angeda telepe,’ teneramudi, kuramu ngebo tepa.

11Tonda, Uzia er jen talena nengda, pio weik keteneiamnga cadi, podana tepapu, tupa ketenepra kurami. Sunda nimi weik dinin, gung tenpu-tenpu kepra kuramipa, Raja er melipra si sengna neng, butene nengdi, sun jen talena neng yuma tep, si sengdiramrei. Apel talepra doramrei neng sun sida, Yeiel cap, Maaseya cap, kuramrei. Yeielda, jen talen neng tep, nimi si sengna deiyo ngebo kuramu. Er Maaseyada, jen talen neng, sun deiki tara deiyo ngebo kuramu. Sun abutene nengda, sun talepra deiyo keamu ngebo, er sida Ananya kuramu. Sun weneri nengda, Raja Uzia er amutara pel don neng kurami.

12– 13Jen talena neng, sun yuma dengeda, pio weik, tiga ratus tujuh ribu, lima ratus (307.500) neng kurami. Sun ajen talen neng, sun deiki tarada, dua ribu enam ratus (2.600) nengdi deiyo kepra taleamipa kurami. Sun ajen neng tep, upu pena deiyo yuk-yuk keami neng, sun yala-yala yuk-yuk kuramitopu ngeda, puto di nimi porbenmanto neng kurami. Tonda, Raja Uzia, er podan neng pona tep melimna neng ketenepra deipupa kurami. 14Raja Uziadi, ‘Ajen talena neng yuma tep, ketenepra puto kweipkamne’ tenen, sun karena tep nengeda, nimi pon keca yala yuk-yuknge yuma ketenepra deipu. Aketeneipu kecada, ake. Ada, nimi pon tombak cap, sun giso galuna tep, gat keca besi di ketekeipi. Tonda, giso galun keca topi besi cap, ‘Mar popsenung’ tenen, gat keca besi di, gat opkal kenengaminge cap, jen cap, mar cap, gel du deipra don keca, er si umban cap, ange yuma dopra, ajen neng tep karepu.

15Yerusalem mutu ila ati arum domya neitamaida, erdi amutu taleamu taruda, jen dona ila kael nengdi, mar dopmengepa lelimna cap, tonda gel dopmengepa lelimdongona cap keca ton, doprapidi ila lyom ati domyai cap, lyom gel beilya wiamya deiki tara dinin, sirikai cap dopra deipi. Allahdi Raja Uzia tep, pio weik meliamupa, er puto pio weik kupka cadi, sun dana-dana tara kurami nesala yumadi, ‘Uo, erda tek sisi ila puto weik ngebo kurure’ tenen, kael keamidi, “Erda tek sisi mambul weik ngebo,” pepra, er tep gispal dorami.

Uzia puto weik kepka cadi, sal nong-nong kupudi, dipru erepka tep, wenepu upu

16Uziadi amutu neitamai puto weikanun ton tapakra deipbaramudi, amutu taleamupa, er dipru erepudi, sal nong-nong kapka deiki di, er kuramunge yumada, pio mali kweipdau. Erdi Allah Yahwehdi, “Ukunkamrume, angeda pio men kunkamrume,” pepra, deiamu upu utopu, talepra men kuramu. Atep, Raja Uziada, imam ngebo men kuramu dinin, er pe kange dipapu, Allah Yahweh er si eremna ati pumbon, Telep Lengna Ati wekra, Allah er morona tep, siltong telep pen keca, uku dongona tep, kuramyaipu bena, er dipapu uku dongopu. Ukupka deiki di, mali weik kupu.

17Dinino, imam Azarya cap, ton imam neng denge pio weik, delapan puluh (80) imam cap, puto di balila deipra bena, ‘Akupmarem ngeda, pio mali cadi, angeda pio men kuptume,’ pepra, ‘Upepmepedi er tep wenepkupe’ tenen, pepkui neng cap melipra, sun tonpa kikiman akati wekra bei. 18Raja Uziadi, Allah si eremna ati wekra, siltong keca uku dongonai bena teku taruda, sun nengdi bena upepi. “Nai Rajao, kandi Allah morona tep, siltong telep kecada, akati pumbon uku men dongoptume. Deiyoda, kanda imam ngebo men kuruma tepa. Nun kap imam Harundi deiamupa, dadeipdanen yakange neng tepapu, ‘Apel donkameng’ tenen, konum wepra deiami imam nengpu, ‘Apelda sun dipapu talepra donkamenge. Yuk tali neng ton pio men kuptenge,’ pepra, deiamnga cadi, sun imam neng dipapu apel doptenge. Atep nengeda, Raja kanda Telep Lengna Ati neitamai dipapu tapra, bura benkurume! Nun nai bo Allah, er si Yahwehdi pepra deiamseutopu men kupmarema tep, erdi, ‘Telepe,’ men tenepkamakere,” pepi.

19Sundi aupu pepi taru dipapu, Uziada Allah si eremna ati, siltong telep keca, uku dongona tep keca dopra talepmaudi, akeca uku dongona tep keca, er si mesba deiaminge damai tekmau. Ukupmaudi, siltong telep pena tep uku dongona keca, er buru di talepra doupmau. Sun imam nengdi aupu pepmai pangeda, erdi sun tep yu kupupa derepu. Ataru dipapu, Allahdi karepupa, dato-dato di, Raja Uzia er aso deikida, bol deiki jeramre susu, ila kwar nge, er sida kusta susu jeramu. 20Ukupupa, imam Azarya cap, sun yuk imam neng cap, sundi er akupunge tep epidi, ila kwar suse, er si kusta, er aso deiki kupupa, sun aneng yumadi Uzia tep, “Uo, akeca kwamre nengda, akati pumbon mali kweipnunga cadi, akatida pio men wektenge. Atep, kanda Allah er si eremna ati pumbon di menmena bura tara beo!” pepi. Upepipa, er adipapu bura tara beu. Men kwetepmanto susu, ila kwar weik suse er aso deiki jepunge deiyoda, Allah Yahwehdi er wenemna tep, er nong deiki ikin keca deipu. Ada, er kael kemna tepa. Atep nengeda, er peda, ‘Uo akati pumbon men kunkamne,’ tenepudi, menmena akati tapra bura beu.

21Raja Uziada, kusta suse jeramu ngeda, men kwetepmanto kwamudi, tupa pu jeramupa, dakuramuanen, sirya depu. Erda bol deiki susu, er si kusta talepu pangeda, sun yuk nengdi, ‘Gume akecada, nun deiki sakroserur’ tenen, yuk ati dopra deiamipa, er yuk dakuramu. Ataru neitamai yumada, ‘Erda Allah Yahweh, er si eremna ati neitamai yakana pio gume. Allahdi, ‘Angeda pio meme, ne si eremna ati pumbonda, mali keca men wektue,’ peipseua cadi, ange pio men kunkamre,” pemipa, erda, akati damai ton men yakaramu. Tonda, er talepra pel doramunge yumada, tapropu. Ukupu taruda, Uzia er mi Yotamdi, er nai bo pununa tep, er amutara bungamu dinin, menop taru Raja er ila ati kuramngaida, taleamudi, amutu nesala tep deiyo kepra taleamudi, upu peramu.

22Uziadi, amutu talena tep, nimi deiyo ngebo keamudi, yuk pel yala-yala yuma talepra doramu ngeda, Amos er mi nabi Yesaya, er sengamu buku deiki di, konum sekra deiamupa akurure. 23Amenda taru, Raja Uzia konum depkopda, menop taru neitamai di Raja-Raja peirami tuaipu dinin, yambul yuk karenai bena peipi. Ada, er nong deikida, kumkum suse, er si kusta, er bol deiki talepra jeramupa, dakuramnganen, depka tep kupi. Ukupyopda, er mi Yotamdi, er yo punupra, nimi deiyo ngebo keprapudi, amutu yuma taleamu.