2Ch 27 | XteSC | STEP | Yotamda, er keteng tamun dengeda, dua puluh lima (25) tahun konum kepu taru di, gonga kepra, nimi deiyo ngebo kepudi, Yehuda mutu taleamu. Erda, ila ati arum Yerusalem mutu neitamai kuramudi, Yudea mutu taleamnganen, keteng tamunda, enam belas (16) tahun deiki di amutu taleamudi kuramu. Er nin sisa Yerusada, nimi si Zadok, erdi deipu ner mi, er si Yerusa kuramu.

2 Chronicles 27

Yotamdi Yehuda mutu talena tep, nimi deiyo ngebo Raja kepka tep, seki upu

1 Yotamda, er keteng tamun dengeda, dua puluh lima (25) tahun konum kepu taru di, gonga kepra, nimi deiyo ngebo kepudi, Yehuda mutu taleamu. Erda, ila ati arum Yerusalem mutu neitamai kuramudi, Yudea mutu taleamnganen, keteng tamunda, enam belas (16) tahun deiki di amutu taleamudi kuramu. Er nin sisa Yerusada, nimi si Zadok, erdi deipu ner mi, er si Yerusa kuramu. 2 Yotamdi er nai bo Raja Uziada, Allah Yahwehdi, “Angeda ukunkamrume, angeda pio men kunkamrume,” pepra, deiamu keca tepapu, talepra kuramutopu, Yotam peda angepu talepra pel doramudi, telep kuramu. Allah er kangeda, ‘Angeda telepe,’ teneramungepu, Yotamdi angepu talepra kuramu. Dinino, Raja Uziadi, Allah Yahweh, er si eremna ati pumbon, tali lupra wekutopu, Yotamdi ange utopu pio men kuramu. Erda telep kuramu dinin, erdi taleamupa, amutu neitamai kurami nesaladi, mali kun keca tupa talepra kurami.

3 Yotam erdi, Yerusalem ila ati arum wengbana tep, bisi buplan tara, itara, deiki tara ngeda, lepsisikra dopra telep kupra deipu. Tonda, Yerusalem mutu ati arum dominge neitamai di, yambul mutu buma deiki, Ofel tamna tep, gel beilya lepsisikra wiamidi, ketenepra domi. 4 Tonda, Yotamdi Yehuda mutu neitamai dinin, mutu buma weik kwamngaida, nimi kuna tep ati arumda weik dopra deiamu. Utopu, ‘Nimi poryasenung’ tenen, kalengna tep, ati arum puto weiknge cap, tonda, ‘Poryakankamseng neng yangepa, karenai di eptepe’ tenen, ila lyom gel ati cap amutu bura tara dinin, co palpal kwamnga neitamai ton weik dopra keteneipu.

5 Yotamdi, Amon mutu taleamu nimi deiyo ngebo cap, er jen talen neng cap, sun yuma tep, ‘Popkamap’ tenen, mar porbeu. Ukupu dingeda, sun Amon mutu kurami nesala yuma tep, bisbisa kapupa, sundi er karena cap, gispal dona cap tep, “Pajak co bo bulupra, ne damai yana karepkunerume,” pepra, pio puto di peipupa, sundi akeca kareryakarami. Erdi, “Pajak co bo karepkunerume,” pepra deipu keteng tamun di gonga kepra, kareryakaramidi, tupa keteng tamun weneri ton yumada, tamna gum di adipapu doupra, kareryakarami. Sun Amon mutu nengdi, er tep karerami kecada ake. Ada kunumna weik keca, er si perak, er ikinda, denge weik tiga ribu empat ratus (3.400) kilogram cap, roti kwaneng deiyonge, er si gandum er yala butene kurura utopu, yuk-yuk dinin, seribu kilo (1.000 kg) ton cap er tep kareryakarami. 6 Yotam er dipapu, amutu neitamai yumada, puto dipapu taleamu. Ada, tamna pio gum dipapu, er nai bo Allah Yahwehdi pepra deiamungepu, pio moupra taleamnga deiki di, Allahdi er tep, puto kweipupa, erdi amutu puto di talepra kuramu.

7 Uda, Yotam er taleamu taru mambul pel doramunge yala-yala yumada, mar porbaramunge cap, ton yuk pel doramunge cap yumada, Israel mutu cap, Yehuda mutu cap, nimi deiyo neng Raja kepra, taleamidi kurami neng, sun kuraminge yuma sekra derirami buku, er sida, ‘Sejara Raja-Raja,’ perami buku neitamaipu sekra deipi. 8 Yotam er keteng tamun dua puluh lima (25) tahun kepu taruda, nimi deiyo ngebo Raja kemna tep gonga kepudi, amutu taleamu. Ukupudi, Yerusalem mutu ila ati arum neitamai kuramudi, amutu talepra, Raja kuramu keteng tamun yumada, enambelas (16) tahun deiki di mamu. 9 Amenda sirya taruda, Yotamda er nai yapu deramitopu, er peda depu. Ukupupa, Raja Dauddi menop taru taleamu mutupu bena, er nong peipi. Yotam depu pangeda, er mi Ahasdi, er yo pununa tep, nimi deiyo ngebo Raja kepu.