2Ch 28 | XteSC | STEP | Ahas er keteng tamun 20 tahun konum kepu taruda, nimi deiyo ngebo Raja kepu. Ukupudi, Yerusalem mutu talepra kuramu keteng tamun yumada, 16 keteng tamun deiki di mamu. Erda nimi deiyo ngebo Raja Daud, er co puna ngebodi, pio telep kuramupa, Allah Yahwehdi Daud tep, kange pio deiamutopu men kuramu. Ahas er kuramu taruda, mali keca ton talepra kuramnga cadi, Allah Yahwehdi er kange tenenada, ‘Ne dabale,’ teneramu.

2 Chronicles 28

Ahasdi nimi deiyo ngebo Raja kepu upu

1 Ahas er keteng tamun 20 tahun konum kepu taruda, nimi deiyo ngebo Raja kepu. Ukupudi, Yerusalem mutu talepra kuramu keteng tamun yumada, 16 keteng tamun deiki di mamu. Erda nimi deiyo ngebo Raja Daud, er co puna ngebodi, pio telep kuramupa, Allah Yahwehdi Daud tep, kange pio deiamutopu men kuramu. Ahas er kuramu taruda, mali keca ton talepra kuramnga cadi, Allah Yahwehdi er kange tenenada, ‘Ne dabale,’ teneramu. 2 Tonda, Ahas erdi sun Israel nesala talena tep, nimi deiyo kepra Raja-Raja kemami nengdi, mali kun keca weik kuramitopu, er Ahas peda, Bahal isok si eremna tep, atali keca urasin utopunge ketenemna tep, gat keca er si tembaga dopra, patung petupra deiamudi, aisok si tep si eremamu. Aisok si eremamu mutuda, nimi si Hinom, angebodi taleamu ban mutu neitamai di, aisok tep, karen keca kereramudi, mali weik kuramu.

3 Ange ukuramu taru neitamaida, er pe deiamu nyapu ^{▼▼er pe nyapu – Menop taruda, sun Kanaan tara kurami nesalada, Allah tep men kael keamya cadi, sundi sun pe nyapu popra isok-isok tep karerami. Ange tep, Raja Ahasdi, apio mali kuna ngeda, er pedi ton ukuramu. Ton tarada, sun Amon yala nengdi, sun nyapu popra, isok si Molek tep karerami. Angeda, 2 Raja-Raja 23:10; Yeremia 32:35 dinkurume. Angeda, Allahdi, ‘Ukunada pio meme,’ pepra deiamu ngeda, Imamat 20:2-5 cap, Ulangan 12:31 cap, Ulangan 18:10 cap dinkurume.} ton popra, isok si eremna tep uku sekra dongoramu. Ange ukuramu ngeda, menop taru sun Kanaan tara neitamai kurami nesaladi, tali-tali keca si eremna tep mali pel dorami pangeda, Allahdi, ‘Ne mawa nesala, Israel nengdi amutu yuma talenkameng’ tenen, sun Kanaan tara nesala enepra donokamu. Dinino, Ahasdi amali keca talepra si eremamitopu, er peda apelpu doramu. 4 Tonda, Ahasdi isok si eremna tep, yapi keca popra, uku dongona cap, tonda siltong telep pen keca, uku dongona capda, er taleamu mutu neitamai dinin, mutu deiki cap, tonda ila co tekamnga amutara capda, yapi keca popra duyandi, siltong telep pen keca cap, uku dongna pel doramu. Ukupra mali kuramnga tep nengeda, Allah Yahwehdi, angebo tep ikin keca karepu.

Siria mutu kurami nesala cap, Israel nesala cap, mar popdai upu

5 – 6 Raja Ahas er isok si eremamudi, mali weik kuramnga deiki di, er nai Allah Yahwehdi derepudi, go karepupa, Siria mutu taleamu ngebo Rajadi popbisipudi, Yehuda mutu nesala weika di tomopra, Damasyik mutu derirbenamu. Tonda, Allah Yahwehdi, Ahas tep men melipupa, Israel mutu taleamu ngebo Raja Remalya, er yo punupu ngebo, er mi Pekahdi, yuk taru ton yana popbisipudi, tenpu tumi deiki di, adipapu Yehuda mutu jen talena ila-ila puto neng dengeda, seratus dua puluh ribu (120.000) neng popu. Deiyoda, Yehuda tara kurami nengdi, sun co puna neng si eremami Allahda, tapropidi, yuk tara keproiya tepa. Ukupya tep, Allahdi sun men melipudi, tapka deiki di, angeda kupu. Ada, Yehuda mutu kurami nesala yumadi, Allah peipka utopu men kupka deiki di, sun deikipu ikin keca yaupa dopropi. 7 Tonda, Israel jen talena neng kankan, tenpu ila kael keamu ngebo, er si Zikri, erdi Ahas er mi Maaseya cap, Raja Ahas er ila ati pel dona neng tep, kalengna deiyo keamu ngebo, er si Asrikam cap, tonda Raja Ahas er amutarapu melipra kuramu ngebo, er si Elkana cap, sun yumada popu.

8 Tonda, sun Samaria tara kurami Israel yala nengdi, sun kayapu neng Yehuda tara kurami Israel yala nesala neitamai di, Yudea tara kurami nerapu cap, sundi deiami nyapu cap, sundi deiami ner nyapu capda, weika di tomopra, sun pe mutu Samaria tamupra dubenami. Angepu gum dinin, tonda, ware yala keca do yuma, sundi bung keca dalupra dopropidi, sun pe mutu Samaria tamupra dubena deipi. 9 Ukurami dinino, sun Samaria mutu neitamaida, Allah er upu lap pena ngebo tenpu, er sida nabi Odet kuramu. Ataruda, Israel jen talena nengdi, Yehuda mutu neng weika di tomoprapidi, sun pe mutu Samaria mutu bana tep, yakai taruda, bisai bena antapudi, aneng tep pepu. “Sundi Yehuda tara neng tep popdanmaruma deiyoda ake. Allah er si Yahweh, sun co puna neng si eremami ngebodi, sun Yudea tara neng tep, ‘Mali weik kuramya cadi, wenepkamne’ tenen, konum tapka tep, go karepseupa, sundi popmarume. Dinino, sunda ila yu deiki di Yehuda mutu jen talena neng yuma ikin keca deipra poprum ngeda, Allah im deiki kure ngebodi konum epra kael kepmasere.

10 Tonda, ataruda, Yerusalem mutu cap, Yudea tara kurami neng cap, nerapu capda, sun tep, sun Israel nengdi, ‘Nun pepmepe upupu gekepra, nun amutarapu kungedi, nun ikin pel dimepepa, nun pel melimna neng kupmengedi, karena gum dipapu, talipu pel donkamsenge’ tenepmarumdi, anesala tomopra, sun pe mutu Samaria duyanmarume. Dinino, sun ton tenipetepso, sun Israel neng peda, tek sisi sun nai bo Allah Yahweh tep, mali kupra deipmarum ngeda, moupra men kael kepmarumdi, men tenipmarum do? 11 Ange tep nengeda, sun moupra gekepneso! Allah Yahwehdi sun tep, er yu weik kupka cadi, sun deiki deipkamsere. Atep, sundi Yudea tara neng cap, nerapu cap tomopmarumdi, ateng koupra amutu duyanmarum nesala yumada, taprumdi, ‘Sunda tamupra sun pe mutu tali lupra benkurume,’ pepmum pangeda, sundi tamupra Yudea tara benkamenge.

12 Tonda ange utopu, Efraim yala neng tep, deiyo kepra taleami dumbari nengda, sun si Yohanan, er mi Azarya cap, Mesilemot, er mi Berekhya cap, Salum, er mi Yehiskia cap, tonda Adlai, er mi Amasa cap, sun anengdi Israel jen talen neng, Yudea mutu podanmayai di, Samaria mutu yakanmai neng damai beidi, “Ware keca deiyo tep, angeda kupmarum do?” pepra, derepidi, upu pepra wenepi. 13 Sundi aneng tep upepi. “Wenemna tep tomopra duyanmarum nengda, amutu doupra yakana gume! Anesala tapkurume! Ukupmum pangeda, nundi Allah Yahweh er damai konum mali kupkupe. Tonda, nun mali kupmepu ngeda, konum weik kupseu atep, tapangna meme. ‘Ada ikin keca pio weik dopropkamep’ tenena tep pepmepe. Sundi ange kupmaruma deiki di, ikin keca ton cap tapakra, nun deiki yanmarpa dopropmape,” pepra, upu karepi.

14 Upepi pangeda, Israel tara neng, sun jen talena nengdi, sun atomopra duyanmai neng cap, bung keca dalupra duyanmainge cap, yuma dopra, Israel mutu taleamya deiyo neng cap, amutu kunmai Israel nesala cap, sun dinmaipa sun damaipu dopra deipi. 15 Ange yuma tamupra karepi pangeda, amutu talepra deiyo kepra kurami nengdi, tomopra duyanami neng, doupra bana tep, aneng bena dopropi. Sun anengdi opkal dalupra dopraminge yuma, tamupra opkal gum neng tep, bokra karepipa dopropi. Tonda, sun anengdi sepatu cap, jen keca cap, me cap, bokra karepi. Atomopra duyanami neng, sun nong bol deiki dila doupmai neng, sun kwetena tep nengeda, minyak saitun me di likra deipi. Tonda, nong boun kupu di bisi men benmanto kupi nengda, keledai bisam bali deiki deipra, sun atomopra duyanami neng yuma doupra, Yeriko mutu kure Kurma co weik tekamu mutu dampu doupra bei. Ada, sun pe mutu Yehuda tara ati arum dopra kurami mutupu bana tep kupi. Sun aneng konum bena tapyopda, Israel nengda, tamupra Samaria mutupu yai.

Ahasdi, Asyur mutu deiyo kepra taleamu ngebo Raja tep, “Melipneo,” pepra moropu upu

16 Ataruda, Raja Ahasdi, ortara Asyur mutu deiyo kepra taleamu ngebo tep, “Uo, ne mar podan nengdi poryakanmanenga tep, sundi yana melipneso,” pepra moropu. 17 Ukupka deiyoda, sun keteng dangban tara kurami nesala, Edom mutu nengdi, Yehuda tara neitamai kurami nesala yuma tep, popra sirya dakidi, amutu nesala tomopra dubeiya tep, “Uo, sunda ne damai yana melipnetenge’ tenen, Raja Ahasdi, Asyur tara neng tep moropu. 18 Ataru dipapu, sun Filistin yala nengdi, Yehuda mutu keteng dangban tara mutu, pio mambul ila ati arum doraminge cap, tonda, iknapi tamna dinin, me pio gumai cap warengyai. Sun warengyaidi, popra bisbisa kapra dopropi mutuda, Bet-semes mutu cap, Ayalon mutu cap, Gederot mutu cap, tonda ila ati arum dorami mutu, Sokho mutu cap, Timna mutu cap, Gomso mutu cap, tonda aweneri mutu damai dorami yambul ati arum cap yuma, dalupra dopropidi, yana kurami.

19 Ange ukupya deiyoda, Yehuda mutu talepra kuramu nimi deiyo ngebo Raja Ahas erdi, Allah peipu ngeda, moupra men gekepudi tapu. Tonda erdi, ‘Ware ngebodi ne tep wenepnetu do, pio men kurura tep, nedi tali lupra mali kunangepu kunkamne,’ teneramudi, Yehuda mutu neitamaida, pio mali-mali weik kuramu. Tonda, Allah tapra, yuk tali keca talepra, isok sipu eremamu. Tonda erdi dumsisipu ton cap pio men doramnga tep, Allah Yahwehdi, Yehuda mutu neitamaida, ila kange mun keca weika di, kareramu.

20 Ange tep nengeda, Allahdi go karepupa, Asyur mutu taleamu nimi deiyo ngebo, Raja Tilgat-Pilneserdi, Yehuda tara yana, Ahas cap, erdi taleramu nesala cap tep, poryanamudi, ikin keca weik sun nong deiki deriramupa, amutu nesala yumada, ikin kurami. 21 Allahdi ukupka deiyoda, tali tep gume. Deiyoda, Ahasdi, Allah er si eremna ati pumbon derirami kunumna weik keca yumada, upula dopropu. Tonda, amutu neitamai kurami deiyo-deiyo neng, sun ati cap, amutu ila nimi deiyo ngebo Raja kuramu ati cap, akati-akati pumbon kwamu telep keca cap, upula dororamu. Dororamudi, ‘Akeca dopra, Asyur mutu nimi deiyo ngebo Raja tep, karepnyopda, erdi ne tep melipra kaleknetu’ tenen, kunumna weik keca kareramu. Kareamu dinino, Asyur mutu taleamu deiyo ngebodi, Ahas tep yana men meliamu. Tapnapu kuramu. Tonda, Allah Yahwehdi, Yehuda mutu neitamai kurami nesala yuma sun wenemna tep, ila kange mun keca kareamupa, amutu kurami nesala yumada, pio ikin kange doupra kurami.

Ahasdi mali weik kuramunge tep, tapakra seki upu

22 Ataruda, pio kange mun kange doupra kuramnga tep, angebo Ahasda, ka di tamupra, mali-mali kun keca ton tapakra kuramudi, isok tep si eremamupa, Allahdi er damai mali keca weik dopra deriramu. Angebo Raja Ahas dipapu, Allahdi perur upu yumada, pio men gekenkamne,’ teneramudi, ton cap tapakra pio mali weik kun kecapu talepra kuramu. 23 Ahas er tenepkada, ‘Siria mutu neitamai dinin, ila mambul ati arum, er sida, Damsyik amutu kunge nesalada, sundi si eremenge isok puto deiki di popra bisbisa kapneiya cadi, nedi aisok tep, yapi keca popra karepnedi, er si erepnya deiki di, sun anesala meliprepa, mar pona tepnge utopu, ne peda ange kupnepa, aisokdi melipkamnere,’ tenepu. Utenepu dinin, tek sisi ngeda, Siria mutu nesala, sun si eremami kecapu, si erepka deiki di, er cap, Yehuda mutu neitamai kurami nesala yuma cap, tonda Israel tara kurami nesala cap, Allahdi ila kange mun keca karepupa, dopropidi, ikin weik kurami.

24 Ange ukupu dingeda, Allah er si eremna ati pum neitamai kwamu pel don keca yuma doropra, bura tara deipudi, yawa popra sikke buktapudi, ‘Akati wekra Allah tep, er si men eremkamepe’ tenen, Allah Yahweh er si eremna ati buplanda, dekdongopu. Ukupu dingeda, Yerusalem mutu neitamai yumada, dana-dana tara embarami bisi antamdanaida, gam keca popra, isok si eremna tep kareryakanai, akeca er sida mesba, akeca keteneipudi yapi keca popra derirembanapu kuramu.

25 Angepu gum dinin, tonda, Yehuda mutu neitamai ila ati arum doramyai cap, yambul ati arum doramyai yumada, yuk mutu nengdi, si eremami isok si eremna tep, amutu-amutu deiki tarada, yapi keca popra, uku dongonai er si mesba dopra deipembaramu. Ange ukupka deiki di er co puna nengdi, si eremami ngebo Allah Yahwehdi, er tep yu kupupa derepu. 26 Ahasdi nimi deiyo kepra taleamunge cap, er pel doramunge cap yumada, gonga keamngai di dipra, gawal dakunge yumada, Yehuda mutu cap, Israel mutu cap, aneitamai nimi deiyo kepra talerami neng, sun pel doraminge tep sengami buku neitamaipu, konum sekra deipi. Abuku er sida, ‘Sejarah Raja-Raja Yehuda dan Israel’ penunge. 27 Raja Ahas konum depu pangeda, er nong dopra, Yerusalem mutupu bena peipi. Dinino, erda nimi deiyo neng depnapa peiramyaida, men peipi. Yukai peipi. Ahas depu pangeda, er pununa tep, er mi Hiskiadi, nimi deiyo ngebo Raja kepudi, Yehuda tara nesala yuma taleramu.