2Ch 29 | XteSC | STEP | Hiskia er keteng tamun dua puluh lima (25) tahun kepu taruda, Raja kepudi gonga kepra Yehuda tara talepu. Ukupudi keteng tamun dua puluh sembilan (29) tahun deiki di, Yerusalem mutu talepra kuramu. Hiskia er ninda, Zakariadi deiamu ner er sida Abia kuramu.

2 Chronicles 29

Hiskiadi Raja kepra, Yehuda tara mutu yuma taleamnga tep, seki upu

1 Hiskia er keteng tamun dua puluh lima (25) tahun kepu taruda, Raja kepudi gonga kepra Yehuda tara talepu. Ukupudi keteng tamun dua puluh sembilan (29) tahun deiki di, Yerusalem mutu talepra kuramu. Hiskia er ninda, Zakariadi deiamu ner er sida Abia kuramu. 2 Hiskiadi Yehuda tara talepra kuramu taruda, pio telep kupra pel doramua deiki di, Allah er kange telep deriramu. Ada, er co puna ngebo Raja Dauddi, dumsisi talepra kuramutopu kuramu.

Hiskiadi Allah er si eremna ati kange di telep kupra lepsisikra deipka tep, seki upu

3 Hiskiadi nimi deiyo ngebo kepu taruda, keteng tamun tenpunge, war peda tenpunge neitamaida, ataru dipapu, erdi Allah si eremna ati buplan yuma dekdongomi ngeda, pakra deipudi, akati neitamai mali kwamu buplan yuma tep, “Ataru dipapu, moupra dopkurume,” pepra deipu. 4 Tonda, Hiskiadi, “Ukuda, sun bupra wekurume,” peipupa, Allah er si eremna ati dinin, keteng yakan tara akati damaipu, sun imam-imam neng cap, sun pel melimna tep, Lewi yala neng cap, sun yuma bupra wekidi, er upu gekepi. 5 Bulupyopda, Hiskiadi sun tep upepu. “Uda sun Lewi yala neng, sun yumada, ‘Allah er pelpu telep kupra dopkamep’ tenen, sun mali kunange yuma taprumudi, pio telep kupra kudidankamrume. Tonda, sun apu yapudi si eremami Allah, er si Yahweh, er si eremna ati peda, pio mengne kepra deipkurume. Nun nai bo Allahdi, ‘Ne songe,’ tenerur mali kecada, akati pumbon ton akwamre ngeda, yuma dopra donokurume. Akati peda, ‘Allah erngepu kurure’ tenen, apel doprumudi, akati keteneipkurume,” pepra deipu.

6 Nun nai yapuda, Allah Yahwehdi, ‘Ukupkamrume, angeda men kupkamrume,’ pepra deiamu upuda, moupra men taleamidi, er tep tapra yaninapu kurami. Sundi Allah er kange telep kun pel ton, men dorami. Tonda, Allah tep amnyo kepra tapramidi, Allah er si eremna ati tep ton, ‘Gume akati men wengkamepe, nun songe,’ teneramidi, akati mengne kupra men derirami. 7 Sundi, Allah er si eremna ati pirmanai potokra deiami buplan yuma dengdongorami. Tonda lampu upnada, Allah er si eremna ati neitamai deriraminge yumada, tamdongorami. Allah er si eremna ati neitamaida, ‘Allah moropkup’ tenen, sundi siltong telep pen kecada, mesba deiki uku men dongorami. Tonda, ‘Allahdi, nun mali kunange gum kupra deipseredi, lyemdonkamsere’ tenen, Allah er karena tep, yapi keca popra, mesba deiki uku sekra men dongorami. Ada nun apu yapu, Israel nesaladi duyakarami keca yumada, uku men dongorami.

8 Ukurami pangeda, Allah er yu kupka tep, Yehuda tara mutu neitamai kunge nesala cap, Yerusalem mutu ila ati arum neitamai kunge nesala cap tep, sun deiki di wenemamudi, ila kange mun keca kareramupa dororami. Kange mun kange doupra ikin weik kurami ngeda, yuk mutu nesala yuma diramidi, ‘Uo, anesalada, ikin weik kununge. Sun anengda, mambul gum cadi, Allahdi, ‘Ne mawa nesala kununge,’ tek sisi men tenerure. Sunda, tali nengpu kununge. Tonda, ‘Nun ton ukupserure’ tenen, kware weik kurami. Uda, atumi sunda, ne upu gekenmanerum nesala yumada, Allah erdi akwamunge yumada, sun konum epra kael keamrume. Tonda, amutu-amutu dana-dana tara kurami nesala yumadi, ange yuma emidi, kware kuramupa, ali dangami. 9 Nun nai yapudi, mali weik kuramya tep nengeda, yuk mutu neng cap mar podanmankap, nimi pon ya di popipa weika di deami. Ukupudi, sundi deiami nyapu cap, ner nyapu cap, nerapu cap yumada, tomopra sun pe mutu tamupra, bena wenemnai derirbenamipa, tupa akununge.

10 Atep nengeda, ukutaruda, nedi nun nai yapu Israel neng, sun si eremami Allah er si Yahweh tep, pedina upu pepra deipkamne. Ukupnepa, erdi ton cap nun tep, ila yu di men wenenkamsere. Telep kupra kalekra melimkamsere. 11 Atep ne kayapu, ukutaruda, sun imam-imam neng cap, sun Lewi yala neng capda, ‘Dyo, ortaru-ortaru di, angeda kupkamep ja,’ pepra tali pertamna gume. Tek sisi Allahdi kareamseu pelpu moupra donkamrume. Allahdi sunpu wepra deipserepa, er upu gekena cap, er si eremna ati pumbon pel dona cap, Allah morona taru siltong telep pen keca, uku dongona cap, tonda sun dipapu Allah er si eremna tep pel don keca yumada, amutu kunung nesala tep, ‘Allah er upu gekepkupe,’ pepmumpa, gekenkamruma tep pepsene,” Raja Hiskiadi upepra deipu.

12 – 13 – 14 Rajadi upepka deiki di, sun Lewi yala neng yuma, ataru bulupra yana wekmai nengda ake. Ada, sun Kehat yala nesaladi deiamipa dadeipdanen, yakarami neng kankan di, Amizai er mi Mahat cap, tonda Azarya er mi Yoel cap, gonga keap pel dopbanapu kuprei. Ange utopu, Merari yala nesaladi deiamipa, dadeipdanen, yakarami neng kankan di, Abdi er mi Kish cap, Yahaleleel er mi Azarya yanmareidi, apel talepra donapu kepu. Utopu, Gersom yala nesaladi deiamipa, dadeipdanen, yakarami neng kankan di, Zima er mi Yoah cap, Yoah er mi Eden cap, yanmareidi, apel talepra doramrei. Tonda, Elizafan yala nesaladi, deiamipa dadeipdanen, yakarami neng kankan di, Simri cap, Yeiel cap, yanmareidi, apel talepra doramrei. Azaf yala nesaladi deiamipa, dadeipdanen, yakarami neng kankan di, Zakaria cap, Matan cap, yanmareidi, apel talepra doramrei. Hemana yala nesaladi deiamipa dadeipdanen, yakanmai neng kankan di, Yehiel cap, Simei cap, yareidi, apel talepra doramrei. Tonda, Yedutun yala nesaladi deiamipa dadeipdanen, yakarami neng kankan di, Zemaya cap, Uziel cap, yareidi, apel talepra doramrei.

15 – 16 Ukuramreipane, sundi sun kayapu neng ton, yuk Lewi yala nesala peda, sundi bulupra deipi. Konum buluprapi dingeda, sun yumadi, ‘Allah er pelpu donkamepe’ tenen, sun nong cap, sun kange dipru cap yumada, sun pedi mengne kepra deipdai. Ada, sun deiyo ngebo Rajadi peipu utopu kupi. Tonda, imam-imam neng yumada, Allah er si eremna ati neitamai wekidi, Allahdi, “Ange-ange yumada, ukunkamrume,” pepra, deiamutopu kupra, akati pumbon neitamai yumada, mengne kepra, telep kupra deipi. Mali keca ton, Allah si eremna ati neitamai kwamu ngeda, doupra bura tarapu duyai. Konum doupra yaiyopda, Lewi yala nengdi, amali keca yuma doupra, ila ati arum dopra kurami mutu pio karenai dinin, mutu sida Kidron mutu banai dubena moupra deipi.

17 Uda, apel dona tep nengeda, war peda tenpu ngepu, tanggal peda tenpungepu kepu taru dipapu, pel dona gonga kepi. Apel dopbaramyanen, banbari tumi ton, tanggal delapan konum kepkopda, sundi Allah er si eremna ati pirmanai yuma cap, ila lyom ati dam capda, konum mengne kepra deipidi, gawal daki. Tonda, sun dipapu komuni banbari ton yumada, Allah Yahweh er si eremna ati domya neitamai yumada, telep kupra pel doramyanen, awar neitamaipu tanggal enam belas deiki di, konum mengne kepra deipidi, apel dopra telep kupra deipyopda, gawal daki. Apel gawal daki tumida, war tenpunge dinin, tanggal enam belas deiki di, konum gawal daki.

Allah er si eremna atida tamupra Allah er teppu karepya tep, seki upu

18 Apel yuma konum ukupi dingeda, sun Lewi yala neng cap, imam-imam neng capdi, Raja Hiskia damai perbei. “Naie, kandi, ‘Allah Yahweh er si eremna ati mengne kupra derina tep, pel doprume,’ peipsemum ngeda, konum dopra gawal dakmape. Ada, ‘Allahdi nun mali kun keca daepkamser’ tenen, yapi keca popra, uku dongonupai mesba cap, apel don keca yuma cap, Allah er karena tep telep roti dapra derin meja deiki cap, tonda Allah er ati neitamai pel don keca yala yuma capda, nundi konun mengne kepra deipmape. 19 Tonda nun dipapu, Ahas Raja kepra taleamu taru di, Allah peamu ngeda, moupra men taleamudi, Allah er ati neitamai pel dona tep deiami keca yala-yala yuma, dopra donokamu ngeda, kange di konum telep kweipmapdi, tamupra akati yana deipmape. Ange yumada, Allah er ati neitamai kuna tep, konum ketenepra telep kupra deipmape. Atep ataruda, Allah karena tep, yapi keca popnedi mesba deiki derinupai, urasin tarapu konum deipmappa, tupa akapmare,” pepra, yana lap pepi.

20 Lap pepipa, gekepudi, sun yuma mapmaiyanen bereku pangeda, adipapu Raja Hiskiada, akati arum neitamai kurami nesala talepra, upu perami deiyo-deiyo neng yuma bupra deipudi, sun yuma adipapu, Allah er si eremna ati damaipu welerbei. 21 Raja Hiskia cap, er amutara pel don neng cap, amutu talepra upu pena deiyo-deiyo neng cap, Yehuda mutu pel dorami imam-imam neng cap, sun mali kurami keca daepra telep kudina tep, karen keca doupra bei. Tonda, Allah er si eremna ati cap, Yudea mutu cap, mengne kupra derina tep nengeda, akeca doupra karerbei. Sundi, ‘Akeca popra, Allah tep karepkupe’ tenen, yala yuk-yuk dinin, yoneitam bari di nukra keteneipidi, doupra karerbei gam kecada ake. Ada, jem sapi bisam cap, jem domba bisam cap, domba bisam mi cap, tonda jem kambing bisam cap, yuma yuk-yuk yoneitam baripu doupra dubei. Dubeiyopda, Harundi deiamupa, dadeipdanen yakaramidi, imam pel dorami neng tep, Rajadi, “Sunda agam keca yuma dopra popmumdi, Allah Yahweh er karena tep, mesba deiki deipra, uku dongona pel dopkurume,” pepu.

22 Upepu pangeda, sun imam nengdi, asapi bisam popidi, yapida dopra, amesba deiki dikra deipi. Tonda, sun dipapu jem domba bisam yoneitam bari cap, domba mi yoneitam bari cap yumada, ‘Allahdi nun mali kun keca daepra, telep kweipkamser’ tenen, poprapidi yapi dopra, amesba deiki dikra deipi. 23 Ange konum kupropi dingeda, ‘Allahdi nun mali kunup ngeda, gum kupra deipkuser’ tenen, sun dipapu akambing bisam doprapidi, Raja cap, er taleamu nesala yuma cap, sun yuma bulupra wekmaidi, Allah upu gekenmaiya neitamaipu, doupra yai. Yaiyopda, sun akunmai nesala yumadi, sun buru ^{▼▼buru Anengdi sun buru dopra, kambing deiki deipinge deiyoda, ake. Ada, ‘Nun mali kunup keca yuma, akambing deiki deipmepedi, ange popmepyopda, Allahdi kau kepkamser’ tenen, kupi. Ada, sun mali kunange wenemna tep, akambingda, nun pona tep, yo pununa kemdina tep, ukupi (Imamat 4).} dopra akambing bisam deikipu deipi. 24 Ukupi dingeda, sun imam-imam nengdi, akambing bisam yumada, popidi yapi doropra, mesba deikipu deikra deipi. Ada, amutu kurami Israel nesala yumada, sun mali kuraminge yuma, ‘Allahdi ange epredi, nun malinge daepkusere’ tenena tep kupi. Angeda, Rajadi imam neng tep, upepra deipu. “Sundi mali keca daemna tep, gam keca popra uku dongona cap, tonda Allah karena tep, gam keca popra, uku dongona cap yumada, sundi kupmumpa, Israel tara kunge nesala, sun mali kunung keca yumada daepropkamre,” peipmautopu kupi.

25 Allah Yahwehdi, Raja Daud er damai lap pena tep, Allah er upu lap pena deiyo neng, nabi Gad cap, nabi Natan cap, sun deiki pepra deiamupa, yanpepreipa, “Lewi yala nesalada, Allah er si eremna ati neitamai bung-bung pena, er sida, kecapi cap, gambus cap, douna tep wepra deipkurume,” peiamupa, weiamutopu, ataru Raja Hiskia peda, Lewi yala nesalapu wepra deipupa, Allah er si eremna ati pumbon ketenepra teki. 26 “Ukupkurume,” konum peipka tep, sun Lewi yala nengdi, Raja Dauddi menop taru pung pen keca, er si terompet, keteneipunge doupra, tekmaipa, imam-imam yala neng yumada, sun terompet ton dopra, karepudi wepra deiamutopu, Raja Hiskia peda, utopu kupudi wepra deipupa, sun yuma ketenepra tekmai.

27 Tekmaipanen, Raja Hiskiadi er karen keca uku dongona tep pel donada, ange kupudi, petenkeamnga deiki di gonga kepu. Allah tep karen keca kareryakanmai taruda, sun awekmai nesala yumadi, Allah Yahweh tep, gispal don mut penmai. Ataru sun bung-bung pena douna kael nengda, terompet lelim penmai. Tonda menop taru Raja Dauddi, ketenepra deiamu bung-bung pena yuk yalange peda, doupmaipa sun tonpa kikiman mut penmai. 28 – 29 Raja Hiskia cap, sun awekmai nesala cap yumadi, gutam tu dipdongopra genepdongopmaidi, Allah tep gispal donmai. Atarupu sun mut pena kael nengda, tupa mut penmai. Tonda, terompet bung-bung pena douna kael nengda, tupa doupmai. Ukunmaidi, sun yuma acapu tupa kunmaipane, Allah karena tep yapi keca popra, mesba deiki uku dongopmai ngeda, uku di jepra gawal daku. Konum uku di jepra gawal daku pangeda, Raja Hiskia cap, sun awekmai nesala yuma capdi, gutam tu dipra genepdongopmaidi, Allah tep gispal donmai.

30 Raja Hiskia cap, er amutara dinin, amutu nesala talepra kurami deiyo-deiyo neng cap, sundi, Lewi yala neng tep upepi. “Sundi, Raja Daud cap, nabi Asap cap, sundi liamrei mut dipapu pepmumdi, nun nai bo Allah Yahweh tep gispal donkurume,” pepi. Upepupa, amut penmai taruda, Allah er si eremna tep, awekmai nesala yumadi, sun giso genepdongopra, mut weika di penmai. 31 Ange yuma konum kupropyopda, Raja Hiskiadi upepu. “Ukutaru sunda, ‘Allah er sipu eremkamepe, er upupu talepra, telep kunkamepe. Allah Yahweh er tara pio tep, konum kepmepe,’ tenepmaruma cadi, Allah tep sundi telepe pena cap, sun mali kun keca daemna cap tep nengeda, gam keca doupra, Allah er si eremna ati damai duyankurume,” pepu. Upepupa, ayana bupra wekmai nesala yumadi, Allah tep telepe pena cap, er karena tep keca cap, sun mali kun keca daemna tep keca cap, ‘Uku dongonkamep’ tenen, gam keca doupra kareryai. Tonda, sun pe kange dipapu, ‘Ukupkupe,’ tenepmai nesaladi, gam keca popra uku dongonange ton doupra kareryai.

32 Sunda, ‘Nun nai bo Allahdi, nun mali kunange daepseredi, lyemdonkamser’ tenen, gam keca popnedi, uku dongonange doupra yai kecada ake. Ada, jem sapi bisamda, denge weik tujuh puluh (70) ekor cap, jem domba denge weik seratus (100) ekor cap, tonda jem domba nyapu denge weik dua ratus (200) ekor duyai. Ange yumada, Allah Yahweh er karena tep gam keca popnedi, uku dongonange tep nengeda, weika di doupra kareryai. 33 Tonda, sun yuma dipapu, ‘Akarepmap kecada, Allah er ngepu kurure’ tenen, doupra karepi ngeda, jem sapi bisam, denge weik enam ratus (600) ekor cap, tali domba cap, kambing cap, denge pio weik, tiga ribu (3.000) ekor cap doupra yaipa, sun aweikmai nesaladi, sun imam neng tep karepi.

34 Gam kecada, denge pio weika di duyakanmaiya tep nengeda, sun imam-imam neng sun apel dopmanto nengda, nimi yambulpu kunmaiya tep, Allah karena tep, ‘Uku dongopkup’ tenen, gam keca doupra yainge popra, bol kona tep nengeda, pio weik cadi, sun aketenepmai imam neng dipapu, men kupmanto kupu. Ukupmaiya tep, sundi sun kayapu neng tep moropipa, sun Lewi yala nengdi ton melipra bol kona pel dopi. Dinino, sun imam-imam nengda, ton nengda adipapu konum mengne kepra deipdanmaidi, ketenepmai dinin, ton tara nengda gume, men ketenepi. Atep, sun telep kupra men deipdanmai imam nengdi, apel donmai taruda, sun kayapu neng, Lewi yala nengdi gam keca popmainge, bol kona pel dona tep melipmai.

Deiyoda, Raja Hiskiadi, “Ukutaru sun adipapu ketenepra deipkamrume,’ peipu taruda, sun Lewi yala nengda, adipapu menmena apel dopmai dinin, sun kayapu imam-imam neng, ton tara nengda, sika dipapu kunmaiya cadi, men ketenepidi, telep kupra men deipdai. Atep, sun Lewi yala nengdi, apel melipra donmaipanen, ataruda, ton imam-imam nengdi, telep kupra derina tep, pel ton ketenepi. Ukupra melipmaipanen, sun pe imam neng peda, weikanun ton ketenepi.

35 Allah karena tep, gam keca popra uku dongonmai ngeda, pio weik duyakanmai. Ange utopu ton, ayana bulupra wekmai nesaladi, ‘Allah cap, nun cap, telep kupra kikiman kunkamep’ tenen, antamdina tep, popmai gam keca galepra, abisam-bisam nong di, meta di dopropmai ngeda, pio weik akapu. Tonda, sun imam nengdi, ‘Akarepmepe ngeda, pio telep, sah kepkup’ tenen, adipapu anggur me cap, ayapi keca ketenepra mesba deiki deipmainge deiki di, dikra deipi ngeda, pio weik akapu. Mesba deiki deipra uku dongopipa, uku di jepropupa, gawal daku. Menop taruda, Raja Ahasdi, Allah er si eremna ati buplan dekdongopu dinin, atumi di ange-ange yuma ukupmaiya deiki di, Allah Yahweh er si eremna ati pel donange yumada, kange di ton cap telep kupra deipidi, sundi, ‘Apel yuma aukupmepa utopu, tupa akunkamepe,’ tenepi.

36 Ange yuma konum kupra seng pepi dingeda, Raja Hiskia cap, er taleamu mutu neitamai kurami nesala cap, sun yumadi ila kange deipi. Ada, sika dipapu gum dinin, ataru dipapu Allahdi er mawa nesala melimna tep, er puto deiki di melipupa, sun yumadi, apel yuma menmena dopra gawal daki. Atep nengeda, sun yuma pingpinga di, kange deipi.