2Ch 3 | XteSC | STEP | Nimi deiyo ngebo Raja Salomodi konum Allah Yahweh er si eremna tep, pio telep atida Yerusalem mutu dinin, Moria mutu dup deiki di gonga keap dopu. Acada Yebus yala ngebo er si Arauna, er pe gandum pel doramngai, amutupu gonga keap dopu. Tonda, Allah Yahwehdi, menop taru Raja Daud damai jenek kepdaupa, Dauddi epu. Amutu dupda, ‘Dauddi, ‘Acapu Allah Yahweh er si eremna ati dopkamep’ tenen, wepra deipyaipu kwamu. Allah Yahweh er si eremna tep ati gonga kepra dona tep nengeda, menop taru Raja Daud, erdi deiamupa, amenda er yo punupu ngebo, nimi deiyo ngebo Raja Salomodi gonga kepudi dopu.

2 Chronicles 3

Raja Salomodi, Allah er si eremna ati doamu upu

1 Nimi deiyo ngebo Raja Salomodi konum Allah Yahweh er si eremna tep, pio telep atida Yerusalem mutu dinin, Moria ^{▼▼Moria – Moriada, amutu si ton ngeda, Sion mutu ton perami dinin, amutuda, atenpua. Kejadian 22:2, 14} mutu dup deiki di gonga keap dopu. Acada Yebus yala ngebo er si Arauna, er pe gandum pel doramngai, amutupu gonga keap dopu. Tonda, Allah Yahwehdi, menop taru Raja Daud damai jenek kepdaupa, Dauddi epu. Amutu dupda, ‘Dauddi, ‘Acapu Allah Yahweh er si eremna ati dopkamep’ tenen, wepra deipyaipu kwamu. Allah Yahweh er si eremna tep ati gonga kepra dona tep nengeda, menop taru Raja Daud, erdi deiamupa, amenda er yo punupu ngebo, nimi deiyo ngebo Raja Salomodi gonga kepudi dopu. 2 Salomodi nimi deiyo talepra kuramu taru neitamai dinin, keteng tamun dumbaringe neitamai di, warda butene deiki di, akati dona tep gonga kepu. 3 Nimi deiyo ngebo Raja Salomodi, akati er lyom kunupra dopu ngeda, 27 meter, tonda akati er palada 9 meter kunupra dopu. 4 Akati urasin tarada, nimi wengna tep, atolong utopunge dinin, weiknge ton dopi. Akatolong er ila go kunupunge, er lyomda, dana tara adinin dipra, ortara lyomda, 9 meter kwamu. Akatolong utopunge, er palada, utopu 9 meterpu kwamu. Akati urasin tara dopu atolongda, pumbon neitamaida, kunumna weik keca, emas murni dopra pio urasin telep ngedi, palepra deipidi dopi.

5 Tonda, akati atolong delada, pio telep cemara co lase di deipra dopu. Ukupu dingeda, aco urasin pio telep kemna tep nengeda, kunumna weik keca emas pio telepnge di, palepra deipudi dopu. Tonda, apalepra deipra dopu emas deiki tarada, emas di co si palem co, er urasin utopu petupra deipudi dopu. Tonda, rantai tapu urasin utopu kepra deipudi dopu. 6 Nimi deiyo ngebo Raja Salomodi, ‘Ukupkurume,’ peipupa, er pel don nengdi, akati neitamaida, urasin pio telep cap, kunumna weik gel cap, pio telep-telepnge cap, tonda Parwaim mutu di, doupra yanami emas capdi deipra dopi.

7 Sun pel don nengdi, apio telep emas deipra dopinge peda, Allah Yahweh er si eremna tep ati deipra dopi ati dela gatnge yumada, aemas doprapidi dela deik palepra deipi. Ada balok co cap, tonda bisi buplan dana-dana tara tengderina tep co cap, tonda akati wengna bisi buplan dona tep, co cap yumada, emas di paleprapidi deipra dopi. Utopu, tembok-tembok adopinge yuma peda, aemas deiki dipapu urasin pio telep kupra petupidi, ‘Akati delada, urasin pio telep kupkamre’ tenena tep, malaikat utopu keca, er si kerub urasin utopu petupra deipra dopi.

8 Uda Raja Salomodi, ‘Ukupkurume,’ peipupa, er pel don nengdi, Allah er si eremna ati pumbon dinin, ortara pio neitamaida, Pio Telep Lengna Ati ton dopi. APio Telep Lengna Ati neitamai er lyomda, 9 meter kupu. Tonda, akati er pala peda, 9 meterpu kupu. Ada, Allah Yahweh er si eremna tep ati lyom dopitopu, aneitamai Pio Telep Lengna Ati peda, utopu kupu. Akatida emas dua puluh tiga (23) ton ikin deiki di Allah er si eremna tep Pio Telep Lengna Ati neitamaida, dela deiki di palepra deipidi dopi.

9 Tonda, emas deiki di co dungdongona tep keca, er si paku kwamu ngeda, konum palu di apaku popra, akati co lase dukdongopi dingeda, paku er deiki tara katuai kupkamunge peda, emas di palepra deipi. Paku deiki tara palepra deipi ngeda, er ikinda 570 gram kupu. Akati neitamai dinin, im alup deiki tara ati deipra dopi dela peda, pio telep emas deiki dipapu, teripleks urasin utopu dinin, emas di keteneprapidi, akeca dopra dela deiki palepra taplakeipidi, dopi.

10 – 11 – 12 – 13 Nimi deiyo ngebo Rajadi, er melimna neng tep peipupa, sundi telep gat co dopropidi, malaikat urasin utopu keca, er sida kerub, patung butene petuprapidi, ketenepra deipi. Apatung peda, emas dopropidi, taplakeipidi, akeca deiki palepra deipi. Akerubda, Allah er si eremna tep ati pumbon dinin, Pio Telep Lengna Ati pirman tekra deipudi, akati bisi wengna tep buplan urasin damai tekeipu. Tonda, amalaikat utopu keca, er si kerub, sun buteneda, pol dana-dana tara peda, sun lyomda, 2.2 meter kupu. Ukupipa, tenpunge, er tebalal tara pol er gumgumda, atara dela dam bena bepu. Dana tara polda, ortara tekeipi kerub, er pol dam bena bepu. Utopu, ortara kerub peda, ton tara polda dumsisi tara dela bena bepu dinin, akati neitamaida, dana tara pol, ortebalal tara kerub pol bena bepu. Atep akerub buteneda, atara dela di dipra, ortara dela dukdongopra kupka lyomda 9 meter kupu. Akerub buteneda, akati pumbon dinin, akati wengyakan bisi buplan urasin tara tekeipi.

14 Tonda, Pio Telep Lengna Ati dopudi, atara ati cap, ortara ati cap dinin, daneitamai wengna bisi neitamaida, aneitamai di wilimdonai tep keca, er si kain lenan, tonda gorden peramengada, pio telep boun kain di kapkotepi. Tonda, ange opkal bol er urasin warnada, im kalumnge, kain biru cap, miringe cap, warna ungu capdi, wisipra wipinge deipra kapkotepi. Tonda akain gorden deikida, malaikat er si kerub urasin utopu keca, wiprapidi akain gorden deiki deipi.

Ila ayumnya buteneda, perunggu deiki di ikra dopi upu

15 Nimi deiyo ngebo Raja Salomodi, ‘Ukupkurume,’ peipupa, er pel don nengdi, telep gat keca, er sida perunggu dopropidi, akati ayumnya butene ketenepra tekeipi. Akati urasin tara, angeda butene yuk-yuk tekeipi. Ange ayumnyada, er udi itara lyomda, 15.5 meter kupu. Ukupu dingeda, Allah Yahweh er si eremna tep ati urasin tarapu ketenepra deipi. Akayumnya yuma deiki tarada, er giso, er lyomda 2.2 meter di dopi. 16 Ukupi dingeda, akati ayumnya deiki tara gum-gumda, rantai tapke utopu keca di, wiprapidi deipi. Tonda, perunggu di delima co du urasin utopu keca, er dengeda, 100 telep kupra petuprapidi, arantai tapke deiki di deipi. 17 Akayumnya betapra deipi dingeda, Allah Yahweh er si eremna ati bisi buplan damai dumsisi tara cap, tebalal tara cap, pirmanai tekra deipi. Atekra deipidi, iknapi dam tara, arah selatan deipi ngeda, er si pena tep nengeda, Yakhin pepu. Tonda dapu tara, arah utara deipi ngeda, er si tep Boas pepra, si pepi.