2Ch 30 | XteSC | STEP

2 Chronicles 30

Kaplemna Kalya ketenemdina tep, seki upu

1 – 2 – 3 – 4 – 5 Kaplemna Kalya ^{▼▼Kaplemna Kalya – Aupu deiyoda, ake. Pumun taruda, Mesir mutu nesaladi, sun Israel yala nesala yuma tep, ila ikin pel dimamipa, kange mun kange doupra, ikin pel talipu pel dorami. Dinino, Allah Yahweh diramnga cadi, bicau teneramudi, ‘Ne mawa nesala loptapnedi, doupra yuk karen mutu dubenkamne,’ tenepka tep, Israel nesala lyepropudi, dubenamu. Ukupkou lukundada, Allahdi upepu. “Uda atumi lukunda neitamaipu, ne Allahdi Mesir mutu neitamai yuma embenedi, Mesir mutu weni nyapu yuma cap, sun peinung gam keca, weninge yuma cap, poptapra sikke buktapkamne. Ukupne deiki di, Mesir mutu nesala, sun nong deiki pio ikin weik keca deipkamne. Dinino, sun Israel nesalada, sun yuk-yuk dinin, domba mi poprumudi, er yapi doupra, sun ati wengna buplan deiki cap, buplan dana-dana tara cap, likrapmumdi, petenkemna keca deipmum ngeda, epkamasene. Sun ati epnedi, ayapi sun buplan deiki akapyopda, adipapu sun atida kaplepnedi, ila kange mun keca, sun weni nyapuda men popkamne. Dinino, sun ati buplan deiki domba yapi men likipmange nesala yuma, sun Mesir mutu nesalada, sun weni nyapu cap, sundi peinung gam kun keca weninge cap, yuma popkamne.” Allahdi upeiputopu kupka cadi, ‘Akupunge cap, nun tep lopra lyepseunge cap pio tenenapu kunkamepe’ tenen, Israel nesaladi, Kaplemna Kalemna pio kalemami. Angeda, Keluaran pasal 12 deiki di epkamrume.} kalemami taruda, keteng tamun gonga kemna taru, ware tenpunge tekre taru, tanggal 14 deiki dipapu, sun Israel nesala yumadi, Kaplemna Kalemna kalemami. Dinino, ataru neitamaida, aKaplemna Kalemna ton men kalemami.

Deiyoda, apel dona tep deiyo neng, sun imam-imam nengda, Allah er damai yakana tep, telep kemdidana pel men ketenepra domi. Ada, imam nengda, ‘Allah er si eremna ati wengbenkamep’ tenen, yambulanunpu sun nong me kuprapidi, telep kupra deipdaidi, keteneipdaiadi, apel dorami. Dinino, ataruda, sun telep kemdidana pel men doramya tep, Allah er si eremna ati pel pe, akailya kalemna pel pe yumada, sundi men dopmanto kurami. Tonda, Israel nesala yuma peda, kapul bupra Yerusalem mutu men yai atep, sun peda akalya ketenepra men jepmanto kupi. Atep, Raja Hiskia cap, er amutara pel dona neng cap, tonda Yerusalem mutu kurami nesala cap, sun yuma bupra upu talepidi, “Aketeng tahun dinin, war butenenge tekre tarupu, Yerusalem mutu yarumudi, nun yumadi Kaplemna Kalya kalepra kikiman jepkamepe,” pepi. Upepi upuda, sun amutu kurami nesala yuma gekepidi, kange deipi.

Ukupya tep, Raja Hiskiadi surat sekra erdi taleamu tara, Yehuda mutu neitamai kurami nesala cap, Israel tara neitamai kurami nesala cap, Efraim yala nesala cap, Manasye yala nesala cap, tonda Dan yala nesala dinin, dapu tara (arah utara) di dipra, benamnganen, iknapi dam (arah selatan) tara kurami nesala cap, Bersyeba mutu kurami nesala cap, tonda sun Israel yala nesala yuma dinin, Allah er ati damai, Yerusalem mutu yangepa, Kaplemna Kalya kalepmepedi, Israel nesaladi, ‘Nun nai bo Allah er si Yahweh tep, er gispal dopkamep’ tenen, sekra deipi. Ada, Allahdi Musa er deiki peiamudi, “Ange-ange yumada, ukunkamrume,” peiamutopu, kupkaminge tepa. Tonda, ware kuprap keteng tamun deiki di, autopunge yumada, pio men kuramya tep, ‘Ange yumada ukutaru ukupkamep’ tenen, aupu peipu.

6 Raja Hiskiadi peipupa, er amutara pel dona nengdi, surat konum sekra keteneipmengopda, ‘Asurat dubenkameng’ tenen, nimi wepra deipidi, “Sundi asekeipmap surat douprapmumdi, Yehuda mutu kunung nesala cap, Israel mutu kunung nesala yuma cap, sun kunungai yuma bena lap perembenkurume,” pepi. Asurat neitamai sekra deipu upuda ake.

Israel nesalao! Sunda Asyur mutu nengdi popra bisbisa kapseidi, karen mutu dubena taleamseipane, Allahdi konum lyepropseupa, akaren mutu di tapra yakanmarum nesala yumada, ukutaruda sun apu yapu, Abraham cap, Isak cap, Yakub cap, sun yumadi si eremami Allah Yahweh, er damaipu tamupra yarumupa, Allahdi sun yuma tep melimkamsere. 7 Sun co puna neng mali kuramitopu kuna gume. Tonda, yuk Israel yala nesaladi, sun nai bo Allah Yahwehdi, “Ukupkamrume, angeda pio men kunamrume,” pepra, deiamu upu moupra men taleramidi, mali kuramitopu kuna gume. Allahdi anesala sun wenemna tep, ila kange mun keca sun deiki deiamupa, ikin weik kuramipa, yuk nesala yuma diramidi, ‘Uo angeda pio mambul weike,’ teneramidi, lungdanapu kurami. Sun ataru kurumu nesala peda, ange yuma konum epra kael kemrume.

8 Nun apu yapu, ataru kurami nesaladi kange moupra tenena gum di, ‘Allahdi pesere ngeda, sun apu yapudi, ‘Nun songe’ tenen, er upu gekena gum dipapu, gel giso kange douramitopu, sun ataru kurum nesaladi, ukuna pio gume. Dinino, Allahdi peipungepu moupra talepmumdi, Allah Yahweh, er amutarapu telep kupra kunkamrume. Atep sun yumada, sun nai bo Allah Yahweh, er si eremna ati tep, ‘Akatida, ne mawa ati, nengepu kurure,’ pepra konum ketenepra deiamngai, Yerusalem mutupu tamupra tupa-tupa pio yakankamrume. Tonda, Allah upu gekepra kumumdi, erdi peipseutopu telep kurumudi, er sipu eremkamrume. Ukumum dingeda, Allahdi sun yuma tep yu weik konum tenesere ngeda, amenda tapkamre. Kange deipkamsere.

9 Sun tamupra, Allah Yahweh er damai yatumdi, erdi, “Ukunkamrume,” peseretopu, kupmum pangeda, telep kuptume. Ukuptum teptoda, sun kayapu neng cap, sun nyapu cap yumada, sun podan nengdi ateng kouprapidi, tomopra wenemna ati derirbeipa kunung nesala yumada, adubena deipi neng, sun kange dipru neitamai Allahdi pel doptupa, sundi ateng koupdongopi nesala tep bicau kuptupa, tamupra loptapra deipsetengepa, anesala sun pe mutu tamupra acapu yakankamenge. Sun nai bo Allah er si Yahwehda, nimi tep bicau tenepredi, nun makuna tep, telep kwemdina deiyo ngebo kurure. Sundi Allah er damai tamupra yatum teptoda, erdi sun men tapsetu. Tek sisi dopropsetudi, melimkamsere.” Raja Hiskiadi upeipupa, aupu yumada, surat deiki di seki.

10 Ataru asurat doupra bana tep, erdi wepra deipmai nengda, ange doupra, akati-akati arum doramyai yuma doupra embeidi, lap perami. Ada, Efraim yala nesala kurami mutu cap, tonda Manasye yala nesala kurami mutu cap, yuma lap pepembei. Tonda, Zebulon yala nesala kurami mutu tu wilimdonai utara, dapu tara kurami nesala peda, bena pepyopda, aupu gekepidi, amutu kurami nesaladi, teka men tenepya tep, sundi, “Gume, apenmaserum ngeda, tali upu pua,” pepra, malya nenepra nalemaidi autunmai. 11 Ton tara nesaladi ukurami dinino, Asyer yala nesala cap, Manasye yala nesala cap, Zebulon yala nesala cap, ton tara neng capda, ‘Uo, tek sisingepu pepmaseng’ tenen, dipru boun kupupa, ‘Yerusalem mutu benkamap’ tenen, wilipra ketenepi. 12 Ange utopu ton, Yehuda tara kurami nesalada, Allahdi sun kange dipruai pel dopupa, sun yumada, tenpu kangepu doupidi, ‘Tek sisi Allah Yahweh er teneredi, pepserengepu moupra talepmepedi kunkamepe’ tenen, ketenepi. Utenepidi, Raja Heskia cap, er amutara pel dona deiyo neng cap, sundi pepmai upupu, ada Allahdi peipu ngepu moupra gekepi.

Kaplemna Kalya kalepi upu

13 Aketeng tamun dinin, ware butenenge konum kepu taruda, sun dana-dana tara Israel yala nesala denge pio weik bulupra, Yerusalem mutupu yaidi, ‘Nena Gum Roti kwaneng jena tep, kalya kalepkupe’ tenenmaidi, kalya kalemna tumi kepupa, kikiman kalepra jepi. 14 Ataru neitamaipuda, isok si eremna tep, yapi keca popra, uku dongona tep ketenepra deiami keca, er si mesba-mesba cap, tonda isok morona tep, siltong telep pen keca doupra, uku dongoryakaramyai, Yerusalem ila ati arum neitamai kwamunge yumada, urupra tapi. Ukuramidi, amesba-mesba Yerusalem mutu dopra deiaminge yumada, dopra Kidron mutu, ban mutupu donoki. 15 Ukupidi, dakuramyanen, abutene war neitamaipu dinin, tanggal empat belasda (14), sun Kaplemna Kalya Kalemna tep, domba bisam ton popra duyai. Ukupipa, sun imam neng cap, sun pel dona tep melimna neng, Lewi yala neng capda, sun pe mali kun keca tupa kapmau nengda, sun ali weik kupu. Ukupupa, sun anengda, ‘Allah er pelpu donkamepa cadi, mengne kupkupe’ tenen, telep kweipdapidi, yapi keca dopra, Allah er si eremna tep ati damai, apopmai gam keca dopra, uku dongoryai.

16 Sun aneng Allah si eremna ati wekra beiyopda, Allahdi peipupa, Musadi, ‘Ange-ange yumada, ukunkamrume,’ pepra sekra deipudi, buku sekeiamunge kuramutopu, sun imam neng yuk-yuk bena, ‘Allah gispal dona pel dopkup’ tenen, teki. Sun Israel nesala doupra benmai gam keca karepipa, sun Lewi yala nengdi akeca popra, yapi doprapidi, sun imam-imam neng tep kareryai. Karepipa, sun imam nengdi ayapida mesba deiki gege pepra likeipi.

17 Uda, aca bulupra wekmai Israel yala nesala yumada, sun neitamai kankan di, ton tara nesalada, Allahdi, ‘Ne damai kuna tep nengeda, ukupkurume,’ peiputopu kupra, telep men kupra deipdanmaiya cadi, sun anesaladi Kaplemna Kalya Kalemna tep, domba bisam doupra yanmai ngeda, ‘Allah Yahweh, er ngepu karepkamape’ tenen, sun pe dipapu, adomba men popmanto kunmai. Atep nengeda, sun Lewi yala neng dipapu, anesala sun domba duyanmai ngeda, adomba bisam melipra poprapidi, Allah tep karenmai. Deiyoda, sun kayapu neng, telep kupra men deipmai nengdi, apel utopu ngeda, men dopmanto kunmai. 18 Angepu gum dinin tonda, Efraim yala neng cap, Manasye yala neng cap, Izakhar yala neng cap, Zebulon yala neng cap, sun yala nesala wilipra, ton yanmai neng kankan, weik tara ngeda, Allah er damai yakana tep, telep kudina pel ngeda, sun kapul men mengne kupra deipdanmai dipapu, yanmaiya cadi, sun ayala nesala yumada, Kaplemna Kalya tep, domba bisam popra, jena tep duyakange ngeda, men di kuramitopu, men kupmaidi, tali lupra yana jepmaiya tep, Raja Hiskiadi, sun mali kupmainge tep, Allah moropudi upepu.

“Uo, nun nai Allah Yahweh, kanda pio telep kurum ngebo cadi, nun kayapu nengdi, mali kupmainge yuma kaukepmemdi, amalinge yuma gum kupra deipsetume. 19 Ada, tali neng gum dinin, sundi sun kange dipru yuma deiki di, ‘Nun nai Allah, nun co puna nengdi, si eremamkei ngebo, Allah Yahweh, kandi, “Ne si eremna ati damai yakana tep nengeda, ukupkurume-ukupkurume. Apel dopra kuna ngeda, men tapkamrume,” pepra deipsemum ngeda, ‘Angepu men kupkamepe,’ tenenge nengda, kaukepkamrume. Dinino, nun nai Allah, anesalada, sun pe telep kemdina tep pelda, telep kupra kapul men kupmangedi, men ketenepmangu dipapu, sun kange neitamai dipapu tenepra yanmangdi, Kaplemna Kalemna keca tali lupra jepmange. Atep kandi sun mali kupmai ngeda, kaukepmemdi, daepropo,” pepra, Raja Hiskiadi moropu. 20 Raja Hiskiadi Allah tep, aupu pepra moropu ngeda, Allah gekepudi, sun ayala nesala yumada, sun mali kupmainge kaukepra lyepropudi, anesala ka di telep kweipu. Ikin keca doupra, sun deiki men deipudi, men wenepka cadi, anesala tep, kange di telep kweipu.

21 Yoneitam bari tumi neitamai yumada, Nena Gum Roti Kwaneng jena tumi keamupa, Yerusalem mutupu bulupra yakanapu kurami Israel yala nesalada, dabal kuna gum di, pingping kangepu doupra, kari pona deiki dipapu, Kaplemna Kalya kalepra jeramidi kurami. Atumi-atumi neitamai yumada, sun Lewi yala neng cap, imam neng cap, sundi tek sisi Allah Yahweh er gispal don mut peramidi, er si eremami. Tonda, Allah Yahweh er si eremna tep, ketenepra deiami mut pen keca deiki di, er si alat-alat musik, ada kecapi cap, simbal cap, terompet cap, alelim pena keca deiki di mut ton penmaidi, Allah tep gispal donmai.

22 Sun Lewi yala nengda, Allah er si eremna cap, Kaplemna Kalya ketenemna cap taru neitamai yuma, ange yuma kepnepa pel donada, ila kael keamya cadi, sundi gonga keamipa, Allah er si eremami. Ukuramya tep nengeda, Raja Hiskiadi, ila kange deipudi, sun tep, “Telepe,” pepra, dipru kwadimna upu peipupa, gekepi. Komuni yoneitam bari deiki, sun deiyo nengdi kareamitopu, aneng yumadi, ila kalya kalepra jerami. Ada, Kaplemna Kalya tumi keamnepa, atumi gispal dona tep kurami. Tonda, sun co puna nengdi si eremami Allah Yahweh tep, gam keca popra kareramidi, ‘Er cap, nun cap, telep kupra kikiman kunkamep’ tenen, “Telepe,” pepra, gispal dorami. 23 Ukupra dakuramyanen, yoneitam bari tumi konum kupupa, sun anesala yumadi, ‘Gume, aKaplemna Kalya kupmeptopu, ton cap ue yoneitam bari deiki di ton tupa kunkamepe,’ tenepidi pepi. Upepidi, sun anesala pio kange deipidi, ton cap dukdongopra, Kaplemna Kalya ton kalepra jenmaiyanen, yoneitam bari tumi ton konum kupkopda, sengpepi.

24 AKaplemna Kalya kalemai taru neitamai di, sun kalya kalemna tep, Raja Hiskiadi jem sapi bisam denge pio weik seribu (1.000) ekor cap, domba bisam cap, kambing bisam cap, denge weik, tujuh ribu (7.000) ekor cap bupra deipudi keteneipu. Tonda, Raja Hiskia er amutara pel dona nengdi jem sapi bisam denge weik, seribu (1.000) ekor cap, domba bisam cap, kambing bisam cap, denge weik, sepuluh ribu (10.000) ekor bupra keteneipi. Aketenepi gam keca yumada, amutu nesala popra jepnedi, Allah si eremkaminge tep bupra deipi. Ataruda, sun imam pel dona nengda, denge weika di, ‘Allah er pelpu donkamep’ tenen, sun nong me kuprapidi, telep kupra deipdaidi keteneipi. 25 Yehuda tara mutu kurami nesala cap, sun imam neng cap, sun Lewi yala neng cap, tonda dapu tara (arah utara) di yanami Israel tara kurami nesala cap, tonda nimi bo neng dinin, Israel mutu cap, Yehuda mutu cap neitamai yana kurami nesala cap, sun yumada, pio kange deipi.

26 Ataru neitamai yumada, amutu ila ati arum sida, Yerusalem mutu neitamaida, ila kange lon pel dorami. Deiyoda, Raja Daud er mi Salomodi taleamu taru di dipra, ataru neitamai yumada, autopu kalya kalemnange ton, Yerusalem mutu neitamai, pio men kurami dinin, Raja Hiskia kuramu taruda, akalya kalemamya tepa. 27 Sun imam neng cap, sun pel dona tep melimna neng, Lewi yala neng cap, sundi Allah tep, “Uo, nun nai Allah, kandi amutu kunung nesala yumada, telep kupra deipkurume,” pepra moropi. Upepra moropipa, pio telepai, im deiki pio telep lengnai kurur ngebo Allahdi, sun anesaladi putapupa moropi ngeda, konum gekepu.