2Ch 31 | XteSC | STEP | Kaplemna kalemna pel konum kupidi, ajen keca konum kalepra jepropi taruda, anesala yumada, Yehuda tara mutu, sun yuk-yuk kuramitopu tamupra bei. Ukupi dingeda, nimi urasin utopu kupra petupra deiamidi, “Nun nai bo melipseo,” pepra, tali keca dinin, isok si eremami keca yumada, yawa popra tapi. Tonda Asyera isok ner, er urasin utopu kupra, dopra deiamidi, si eremaminge yumada, dalupra tapi. Ukupi dingeda, isok si eremna tep, mesba-mesba dopra, keteneiamyai yumada, urupra dakra sikke buktapi. Ada, Yehuda tara mutu yuma neitamaipu dinin, tonda yuk ati arum cap, tonda Benyamin yala neng kurami mutu cap, Efraim yala neng kurami mutu cap, Manasye yala neng kurami mutu capda, sun anesala-anesala yuma, sun tara mutu peda, ayuma utopu kupi. Ukupidi, tamupra anesala yumada, sun pe kurami mutupu yuk-yuk tamupra bei.

2 Chronicles 31

Raja Hiskiadi, Allah er si eremna ati pel dona tep, “Ukunkamrume,” pepu upu

1 Kaplemna kalemna pel konum kupidi, ajen keca konum kalepra jepropi taruda, anesala yumada, Yehuda tara mutu, sun yuk-yuk kuramitopu tamupra bei. Ukupi dingeda, nimi urasin utopu kupra petupra deiamidi, “Nun nai bo melipseo,” pepra, tali keca dinin, isok si eremami keca yumada, yawa popra tapi. Tonda Asyera isok ner, er urasin utopu kupra, dopra deiamidi, si eremaminge yumada, dalupra tapi.

Ukupi dingeda, isok si eremna tep, mesba-mesba dopra, keteneiamyai yumada, urupra dakra sikke buktapi. Ada, Yehuda tara mutu yuma neitamaipu dinin, tonda yuk ati arum cap, tonda Benyamin yala neng kurami mutu cap, Efraim yala neng kurami mutu cap, Manasye yala neng kurami mutu capda, sun anesala-anesala yuma, sun tara mutu peda, ayuma utopu kupi. Ukupidi, tamupra anesala yumada, sun pe kurami mutupu yuk-yuk tamupra bei.

2 Ukupi pangeda, Raja Hiskiadi, Allah er si eremna ati pumbon pel dona deiyo neng, sun imam-imam neng cap, tonda, sun pel melimna neng, Lewi yala nengda, sun yuk-yuk dinin, sun gung yuk-yuk pel doramitopu bokra deipu. Utopu ton, sun imam-imam neng peda, pel doramitopu, sun gung yuk-yuk bokra deipu. Ukupka deiki di, sun imam neng cap, Lewi yala neng cap, sun gung yuk-yuk tamupra weipudi, pel donange tep karepu. Sun pel talepra donkami ngeda ake. Ada, ‘Allahdi nun mali kun keca daepkamser’ tenen, gam keca popra, uku dongonange cap, tonda ‘Allah cap, nun cap, dukdongopra telep kunkamep’ tenena tep, Allah karena pel donange cap, Allah er upu geken taru pel donange cap, bokra karepu.

Tonda, Allah er si eremna ati buplan damai di, ‘Allah tep gispal donkameng’ tenen, Allah tep gispal dona mut penange cap, Allah tep, “Kanda pio teleppu kurume,” pepra, er si eremna upu penange cap, bokra karepu. Ada, Allah er si eremna ati pumbon, tonda er ati bura tara, yuk-yuk pel donange cap yumada, ketenepra deipudi, “Ukupkamrume, ukupkamrume,” pepra, aneng tep, sun pel yuma, yuk-yuk bokra karepu.

3 Raja Hiskiada, ‘Allahdi nun mali kunange daepkamser’ tenen, yapi keca popra, uku dongopmengedi, Allah si eremna tep kareryakan taruda, er pe peiramu gam keca neitamaipu doprapudi, tumi-tumi yuma ipna pe, sintara peda, tamna gum di, yuk-yuk kareryakaramu. Tonda ange utopu, Allahdi, “Atumida mem tumi cadi, tali pel dona gum dipapu, beipye peikra, ne sipu eremkamnerume,” peiamu tumi, Sabat tumi deiki kareami keca tep, tonda, ukupu war kepne taru cap, karerami keca tep, Raja Hiskiadi kareryakaramu. Tonda, men taru Allahdi, “Ukunkamrume, apel donkamrume,” pepra deiamupa, Musadi sekeiamu buku neitamai peiamu utopu, yuk deiyo taru cap, ila tumi cap, pel donange yuma peda, Raja Hiskiadi utopu kupra kareryakaramu.

4 Angepu gum dinin, Raja Hiskiadi Yerusalem mutu kurami nesala yuma tep upepu, “Allah si eremna ati pel talepra donkameng neng, sun imam neng cap, sun pel melimna neng, Lewi yala neng cap, sun dorona tep, yuk karen keca ton doupra kareryakankamrume. Ukupmumpa, sun adeiyo nengdi, Allah er si eremna ati boda, dumsisi pel talepra donkamenge. Tonda, ukupmumnya deiki di, sun anengdi, yuk tali keca tenena gum dipapu, amambul pelpu tenepmengedi, telep kupra apel talepra donkamenge. Angeda, Allah Yahwehdi, ‘Ukunkamrume,’ peipupa, ‘Musadi sekamu buku neitamai akapungepu utopu, dukdongopra kupkamenge,’ pepra deiamu ngepu kurami.

5 Uda, Raja Hiskiadi, “Ukunkamrume,” pepra, upu konum amutu nesala tep peipu pangeda, Allah tep karen keca yumada, Israel nesala, sundi Allah er si eremna ati damai duyanmaipa, imam nengdi, akati pumbon neitamaipu derirami. Adoupra yakarami kecada, sun wa pepra kourami keca, nong menmena keamnenge, weni ngeda, pio telep ngepu wepra duyakarami. Akecada ake. Terigu du cap, anggur du taikrapidi, kange yawaramne anggur me mokon cap, minyak zaitun cap, mong er me cap, kareryakarami. Tonda, yuk-yuk yala keca wa peramaidi, koupra kiraminge yuma neitamai di, menmenange sepuluh persen ^{▼▼sepuluh persen – Sepuluh persen perameng nge deiyoda, ‘Nun talenup keca yumada, Allah dipapu kareserura cadi, menmenada er gispal dona tep, yambulanun ton bokra er tep karenkamepe,’ teneramidi, ukurami. Atep, 10 akapyopda, tenpu dopra karerami. Seratus akapnopda, sepuluh dopra karerami. Angeda sepuluh persen (10%) perameng nge tep lap pepmepe.} (10%) ton bokra ketenepnedi, akeca yuma cap, Allah gispal dona tep, duyana karerami.

6 Yehuda mutu neitamai kurami neng dinin, ila ati arum doraminge neitamai kurami Israel yala nesala cap, Yehuda yala nesala cap yumada, sun peirami domba bisam cap, sapi bisam cap, ton bokrapidi, sun nai bo Allah, er si Yahweh tep karerami ngeda, sun pe mawa ngepu bokra, dopra kareryakarami. Tonda, yuk karen keca peda, weika di kareryakaramipa, sun akeca deriramyaida, ila di welepupa, weik akapu. Akaren keca yumada, sun nai bo Allah tepapu karerami. 7 Akurami ngeda, meteka dipapu gume. Sundi gonga kepra, akeca kareryakarami taruda, war weneringe di, gonga kepra kareryakaramipanen, yoneitam war deiki di karepra seng pepi. 8 Akareryakarami kecada, pio weik kupupa, Raja Hiskia cap, er amutara pel dona deiyo neng cap, sun yumadi epra kael kepidi, Allah tep, “Telepe,” pepra, er si erepi. Tonda, Allah er nyapu Israel mutu kurami nesala yuma tep, ‘Allahdi er mawa nesala, Israel nesala tep, telep kweipkamre’ tenen, telep upu pepra deipi.

9 Allah er si eremna tep kareryakaramipa, akeca yala-yala yuma, pio weik kupunge epyopda, Raja Hiskiadi, Allah er si eremna ati pumbon pel dona deiyo neng, sun imam neng cap, sun pel melimna neng, sun Lewi yala neng dinin, yuk neng cap tep asipetepu. Erdi, “Ware deiyo tep, akaren kecada, pio weik tupa akapmar do?” pepra asipetepu. 10 Asipetepupa, nimi si Zedokdi dadeipupa, deipdanen yakaramidi deiami ngebo, er si Azarya, erda sun imam neng ila deiyo ngebo kuramnga cadi, erdi upepu. “Gume, amutu kunung nesaladi, Allah er si Yahweh, er si eremna ati damai, telep karena keca kareryakanung taruda, nun jen kecada, gum ton men kuserure. Weika di tupa tapakra kareserepa, akapnapu kuserure. Ange yuma deiyoda, ake. Ada, Allahdi er mawa neng, sun Israel nesala, sun tep weika di melimredi, yamupra karerepa, sundi karesengepa doronupe,” pepu.

11 Upepupa, Raja Hiskiadi, Allah er si eremna ati pumbon pel dona deiyo neng, sun imam-imam neng cap, sun pel melimna tep Lewi yala neng cap tep, “Ukupkurume,” pepupa, anengdi ajen keca derina ati ton ketenepra dopi. Ada, Allah Yahweh, er si eremna ati pumbon di ajen keca derina ati dopi. 12 Konum dopra keteneipi dingeda, akati pel dona tep melimna neng, sun Lewi yala nengdi, amutu nesaladi kareryakarami keca cap, tonda sun mawange wilipra dana tara bokra kareraminge cap, sun weni keca neitamai di bokra, sepuluh persen (10%) bokra, Allah tep kareraminge cap yumada, akati neitamaipu derirami. Apel men tamami, tupa-tupa telep kupra pel dorami. Akati derirami jen keca tep, pel kalengna ngeboda, Lewi yala nengdi deiami ngebo, er si Konanya, erdi kalengamu. Tonda, er amutu tara melipra kalengamu ngeboda, er weit bo, er sida Simei ton wepra deiamipa, sun butene nengdi, apel kalengamrei.

13 Tonda, sun abutene nengdi gonga keamreipa, Lewi yala nengpu dinin, sun amutara yuk neng, 10 neng ton cap, tapakra pel dorami. Sun aneng sida ake. Ada, Yehiel cap, Azasya cap, Nahat cap, Asael cap, Yerimot cap, Yosabad cap, Eliel cap, Yismakhya cap, Mahat cap, tonda Benyanya cap, sun ukuprap neng cap apel dorami. Apel dorami ngeda, Raja Hiskia cap, Allah Yahweh er si eremna ati kalengna deiyo ngebo, imam neng sun ila deiyo ngebo Azarya cap, sundi, “Ukupkurume,” peiamreitopu, apel talepra pel dorami.

14 Lewi yala ngebo tenpu, er si Yimna, er mi Koreda, Allah si eremna ati buplan keteng yakan tara potokami ngeda, erdi kalengna deiyo ngebo keamu cadi, sundi, “Israel nesaladi, sun pe kange dipapu, ‘Allah karepkup’ tenen, Allah Yahweh tep, yana karenge keca yumada, dopropmemdi, bokmem dingeda, Allah er si eremna ati pumbon pel dona deiyo neng, sun imam-imam neng cap, sun melimna neng, Lewi yala neng dinin, yuk neng cap tep, bokra karenkamrume. Ada, Israel nesaladi, ‘Akeca yumada, Allah erngepu kurure’ tenen, ketenepra karenkameng ngeda, kan dipapu bokra derinkamrume,” peiamreitopu kuramu.

15 Yukai ati arum dopra kurami mutu peda, imam neng, sun kunai yuma tep nengeda, Kore dipapu deiyo keamu dinin, yuk neng ton, er melimna tep nengda, Lewi yala nengpu ton wiami. Aneng sun sida ake. Ada, Eden cap, Minyamin cap, Yesua cap, Semaya cap, Amarya cap, tonda Sekanya cap, sun anengdi tamna gum di, tupa-tupa melipra kalengnapu kurami. Ukuramipa, sun doupra yana karerami jen keca yumada, sun aneng dipapu bokra, Lewi yala nengdi, wisi neng pe, kaber neng peda, sun pel kareamipa, talepra dorami utotopu kupra, wilipnedi yuk-yuk bokra karerami.

16 Tonda, Israel nengdi deiamipa, dadeipdanen yakaramidi, deiami neng, nimi si sengami buku neitamai konum sekami nengda, sun tep ton bokra kareami. Ada, tali neng gum dinin, ‘Allah Yahweh, er si eremna ati pumbon pel donkameng’ tenen, konum wiami nengda, sun umur keteng tamun tiga puluh (30) tahun di, ^{▼▼30 tahun – Anomor 30 ngeda, ‘Angeda tek sisi kupke’ tenen, nun yambula di walwal kupsere. Ton buku neitamai di nomor 3 seki. Ton buku neitamai di nomor 30 seki. Aca di Ibrani upu deiki di seki ngeda, ikin kuserure. Ange kael kemna tep nengeda, aca ton dinkamrume. 1 Tawarikh 23:3; Bilangan 4:3.} itara keamne neng tep nengeda, ajen keca bokra karerami. Anengda, Allah er si eremna ati neitamai wekra, ton ne pel donmananen, tapnopda, ton tumida, ton neng punupra pel dorami. Angeda tumi-tumi yuma ukunapu kurami. Sun aneng apel dona tep nengeda, menop taru di, “Agungda, apel talepra donkamrume. Agungda, apelpu talepra donkamrume,” pepra, pel deiyo kareamitopu kupra, taleamidi dorami.

17 Tonda, ajen keca bokra karena deiyo nengdi, sun imam nengdi deipgerekdanen, yanami neng yuk-yuk, nimi si sengna buku neitamai sengamitopu kupra, aimam neng cap, sun nyapsilip cap tep, bokra karerami. Tonda ange utopu ton, sun Lewi yala neng, keteng tamun dua puluh tahun (20) itara keamne neng, apel talepra dorami neng tep, ton bokra karerami. Ada, menop taru di, “Agungda, apel talepra donkamrume. Agungda, apelpu talepra donkamrume,” pepra, pel deiyo kareamitopu kupra, taleamidi dorami neng pe tep, akeca bokra karerami. 18 Tonda, sun aneng cap, sun nerapu cap, sun nyapu cap, tonda sun kayapu tonpa kurami neng cap yumada, si sekidi, ajen keca bokra karerami. Ada menop taru di, ‘Sun anesaladi ataru yumada, adipapu ketenepra kungedi, Allah er pelpu talepra donkameng’ tenen, nimi si sengna buku neitamai di sekra deipi neng yuma dororami. Deiyoda, aneng yumada, ‘Gume, nun adipapu Allah er pelpu talepra pio donkamep’ tenen, tamna gum di, angepu tenepra, apelpu talepra dumsisipu kuramya cadi, ataruda ajen keca ton bokra kareramipa, anengdi dororami.

19 Uda, Harundi deipupa, dadeipdanen yanamidi, imam pel talepra doramidi, kurami mutu ati arum neitamaipu, tonda amutu ati arum dopra kuramyaipu dinin, yambulanun bura tara dakurami neng pe wepra deiamipa, sundi ajen keca ton bokra kareramipa, dororami. Ada, sun imam neng cap, sun Lewi yala neng cap, sun tep jen kareraminge wilipnedi, yuk-yuk bokra derirami. Ada, menop taru di, ‘Sun anesaladi ataru yumada, adipapu ketenepra kungedi, Allah er pelpu talepra donkameng’ tenen, nimi si sengna buku neitamai di sekra deiami neng tep pepmepe. Sun Lewi yala neng neitamai si sekra deiami neng tepapu, ajen keca bokra karerami.

20 Aca di deiki tara sekmepunge yumada, Raja Hiskiadi Yehuda tara mutu nesala taleamu taruda, pio tek sisi pelpu doramu. Tonda, erdi mali kuna gum dipapu, dumsisi pelpu doramu. Ukuramnga deiki di, Allahdi er tep, er kange telep kupra deriramu. 21 Raja Hisikia, erdi kuramu keca yumada, nongpu kemamupa, pio telep kupra kuramu. Deiyoda, ake. Ada, Raja Hiskiadi, ‘Allah er si eremna ati tep pel donkamnenge yuma cap, tonda, Allahdi, “Ange-ange yuma talepra kunkamrume,” pepra, deiamunge cap yumada, pio moupra talepnedi, Allah er tepapu teka tenepra, dipru kange yuma dopra, Allah er deikipu kange derinkamne,’ tenemudi, dumsisi pelpu talepra doramu. Atep, Allahdi er tep, kange deriramu.