2Ch 32 | XteSC | STEP | Raja Hiskiadi Allah tep dipru amutara kepra kuramudi, tamna gum dipapu, pel pio telep kupra konum dororamu. Ukuramu dinin, ataruda Asyur mutu taleamu ngebo, Raja Sanheribdi, ‘Yehuda tara mutu nesala popkun’ tenepudi beu. Beudi, ‘Akati-akati cap, anesala cap, popbisipkamne’ tenen, lyom gel beilya wiami ati arum, jen neng gung weik kurami ati arum damai bena wareku. Ukupudi, er jen neng yuma tep, upu deipudi, “Amutu nesala popra, gum kupra deipmepedi, sun ila ati arum yumada, ne dipapu dalupra dopropkamne,” pepu.

2 Chronicles 32

Asyur mutu nesaladi, ‘Yerusalem mutu nesala poptepye’ tenen, piripetepya tep, seki upu

1 Raja Hiskiadi Allah tep dipru amutara kepra kuramudi, tamna gum dipapu, pel pio telep kupra konum dororamu. Ukuramu dinin, ataruda Asyur mutu taleamu ngebo, Raja Sanheribdi, ‘Yehuda tara mutu nesala popkun’ tenepudi beu. Beudi, ‘Akati-akati cap, anesala cap, popbisipkamne’ tenen, lyom gel beilya wiami ati arum, jen neng gung weik kurami ati arum damai bena wareku. Ukupudi, er jen neng yuma tep, upu deipudi, “Amutu nesala popra, gum kupra deipmepedi, sun ila ati arum yumada, ne dipapu dalupra dopropkamne,” pepu. 2 Sanheribdi, ‘Yerusalem mutu nesala popra gawal daknedi, amutuda nedi dalupra doropkamne,’ tenepu ngeda, Raja Hiskiadi konum epra kael kepu.

3 – 4 Ange yuma konum epka cadi, Raja Hiskia cap, er amutara pel dona deiyo neng cap, tonda er kalengna tep, jen talena neng, sun gung yuk-yuk tep, deiyo keami neng cap, sun yuma bupra, upu talepmayaidi upepi. “Gume, amutu ati arum donupa, bura tamna me yumada, kepdongopkamape. Ada, Asyur mutu deiyo neng Yerusalem mutu pona tep yange taruda, sundi amutu yana, me ton men doropra jepkamenge,’ tenepidi pepi. Upepidi, sun amutu kurami nesala weika di buluprapidi, amutu bunkwan me mokon cap, me bungna me cap yumada, kepdongopi.

5 Raja Hiskiadi er taleamu mutu tep, ‘Puto kepra deipkun,’ tenepudi, ila lyom gel beilya wiamingepu, ton cap moupra dopudi wipdongopu. Tonda, agel beilya deiki tarada, ‘Poryankamseng neng epkamep’ tenen, nimi kalengna tep, ati ton ila lyom beilya wipra deipka alau tarada, lyom ati ton dopra keteneipu. Tonda, ila lyom gel beilya akapunge dinin, ange yambulanun bura tara ton, gel beilya butenenge ton wipdongopu. Ange kupu dipapu, Yerusalem mutupu dinin, pumun taru Raja Daud tep, ati domidi, beilya wiaminge ngeda, keteng yakan tara tu palipra deipidi, nimi kalengna tep, kange di ton cap tamupra puto kepra dopu. Tonda, Raja er dipapu er nyapu teppu, “Ukupkurume,” pepra, upu karepupa, nimi lukra pon co takke lelimna keca, er si perisai cap, yuk nimi pon keca yala-yala yuma cap, dopra keteneipi.

6 Ukupu dingeda, amutu kurami nesala yuma tep, ‘Sun gung yuk-yuk deiyo kepra talepkameng’ tenen, jen deiyo neng ton wepra deipu. Ukupkopda, Rajadi sun yuma tep, amutu ati arum doramya wengyakan bisi, ila buplan dam tarada, “Akati arum neitamai ila go kwamngaipu, bulupra yamumdi, ne damai wekmumdi, ne upu gekepkurume,” peipupa, sun yuma bulupra yana weki. Weki pangeda, Raja Hiskiadi sun tep upepu. 7 “Sunda dim pepra kuprumudi, puto keipdankamarume. ‘Uo,’ tenen, kwar dangna pio gum dipapu, balila kepra kuramrumudi, kalekamarume. Teka, Asyur mutu talerur ngebo Raja cap, er jen talena neng cap, amutu damai yanmangada, gung pio weike. Dinino, aneng yuma tep nengeda, kwar kuna gume. Nun melimserur ngebo er putoda, ila puto weik kurur dinin, er tep melimrur putoda, yambul putopu kurura cadi, sunda kwar kuna gume,” pepu.

8 Upepu dingeda, aupu ton pepu. “Angeda tali tep men pepsene. Raja Sanherib erda nimi puto deiki dipapu, yakanmar dinin, nunda nun nai Allah Yahweh, er ila puto deiki kunmape. Ange tep nengeda, Allah Yahwehdi nun tep, melipra kalengseredi, er puto deiki dipapu sun Asyur mutu jen neng yuma popbisipkamare,” pepu. Yehuda tara mutu yuma taleramu ngebo Raja Hiskiadi, aupu pepupa, er taleramu nesala yuma gekepidi, sun yumada, ‘E, tek pepmasere’ tenepidi, kware men kupudi, balila kupra, telep kange doupra kunmai.

9 Uda, ware kuprap taru ton, sun yuma dakunmaiyanen, ataru neitamaida, Raja Sanherib er gonga kemnada, ‘Amutu nesala popbisipkup’ tenen, Lakis mutupu kunmaidi warekmai. Ataru neitamai di, Raja Sanherib, er jen neng kan-kan di, jen neng tep, sun deiyo neng ton, wepra doproipupa, sun anengdi Yerusalem mutu kurami nesala damai upu peryai. Ada, Raja Sanheribdi, “Sunda, Yehuda tara talerur ngebo, Raja Hiskia cap, Yehuda tara mutu neitamai kunge nesala yuma cap tep, aupu perbenkurume,” pepra doproipupa, lap perbei. Sundi pepi upuda ake.

10 Neda, Raja Sanherib, Asyur mutu talepsi ngebodi, sun Yerusalem mutu kurum nesala yuma tep, asipetepkusene. Ware deiyo tep, sunda kwar men kupseupa, balila weik kurum do? Yerusalem mutuda, sun dana-dana tara yumada, ongopgenepra wekra ketenepmapdi, sun pona tep warekdongopmap dinin, warya deiyo tep, sunda acapu balila deipra kurum do?” pepra asipetepu.

11 Upepudi, aupu ton dukdongopra pepu. “Sun deiyo ngebo Raja Hiskiadi sun tep, ‘Gume sun kwardangna gume. Sun Asyur mutu di poryakanmaseng taruda, nun si eremnup Allah, er si Yahwehdi kalekra melipkamsere. Allah dipapu lyepropkamsera cadi, Asyur mutu nengdi men popbisipkamsenge,’ pepseupa, tali kange doupra kurum do? Sundi er apepseu upuda, pio men teka tenepkamrume. Erdi sun tep, mok upu peptapseu. Allah erdi, sun tep tapserepa, sun jen cap, me cap, men jepkamrume. Adeiki di depropkamruma tep pepmasene,” pepu. 12 Upepudi, aupu ton dukdongopra pepu. “Tonda, angebo Raja Hiskiadi, sun si eremrum Allah, er si eremnai, yuk-yuk doramrumnge yumada, urupra tapudi, erdi, ‘Gume yapi keca popra, Allah si eremna tep, akeca dopra, uku dongonai tep dopra deiamyai yumada, uruptapu. Ukupseuopda, erdi sun Yehuda yala nesala cap, Yerusalem mutu kurum nesala cap yuma tep, ‘Allah si eremna cap, Allah gispal dona cap tep, yapi keca popra duyamumdi, uku dongor yakankamrumaida, tenpua,’ pepu. Amesbada, tenpaipu ketenepra deipseu ngebodi pepseu,” Raja Sanheribdi pepu.

13 Ange ton pepu. “Nedi kuramsi ngeda, sunda men kael keprumdi do? Tonda, nepu gum dinin, ne pe, ne co puna neng peda, nundi yuk mutu kurami nesala damai bena popbisipmepu ngeda, men gekeramrum di do? Sun yuk mutu nesala yuma talepra si eremami kecadi, nun Asyur mutu nengdi anesala popmepudi, ikin keca weik, sun nong deiki deriramepunge tep, sundi men lyepdanmanto kurami. Sun ton poptapmepudi, sun kurami mutu ton, dalupra dopropmepu ngeda, sun anesala si eremami kecadi, sun puto gum tep, sundi nun tep, upu men sekamsei.

14 Sun ton tenipetepso! Dan tara nesala ton, sun si eremami kecadi, nun Asyur mutu neng tep, upu sekseidi, popbisipseipa, amutu ton men bisbisa kapmepudi, dalupra men dopropmepu do? Gume, ne co puna nengdi, dana-dana tara mutu kunge nesala yumada, tali lupra poptapidi, sun mutu yuma dalupra dopropi. Amutu nesala si eremami keca di, sun tep men lyepropipa, nedi amutu neng yuma popbisipsidi, ikin keca weik, sun deiki deriramsi. Sundi si eremami kecadi, men lyepropmanto kupya cadi, ange tep nengeda, ware deiyo tep, sun Israel nengdi, ‘Nun si eremnup ngebo Allahdi, Asyur mutu neng popredi lyepropsetue,’ tenerum do! Angeda, men kupmanto.

15 Atep, sun deiyo ngebo Raja Hiskia tep tapmumpa, erdi mok upu sun damai pio penmasere ngeda, teka men tenenkamrume. Erdi sun tep, walwal neng utopu kemdiserura cadi, erdi, ‘Ukupkamepe,’ penmaser upuda, gekena gume! Hiskiadi sun damai pesere upuda, teka men tenenkamrume. Sun ton moupra tenepetepkurume.

Dan mutu kunung nesala, sun si eremami kecadi, nun Asyur mutu neng tep, puto kepra popbisipsei do? Tonda, dan tara nesaladi, sun tara neng lyemna tep yana, ne co puna neng cap, ne cap tep, popbisipsei do? Gume, yuk-yuk mutu yuma dalupra dopromepudi, sun yuk mutu kurami nesala yuma popra, gawal dakmepu. Ukupmepudi, sun kurami mutu cap, sun talerami keca yuma capda, dalupra dopromepu. Atep, yuk-yuk mutu nesala yumada, men lyepdanmanto kuramya tep, nedi tek sisi pepsene. Sun Israel nesala peda, sun cap, sundi si eremrum ngebo capdi, sun tara nesala tep men yana lyepropdatume.” Raja Sanheribdi, sun Israel neng tep pepu.

16 Asyur mutu taleamu ngebo, Raja Sanheribdi peipmau upu tep, yana pepi nengda, sundi ton cap tapakra, tali-tali upu weikanun ton yana pepi. Ada, Allah Yahweh cap, Raja Hiskia cap tep, mali upu weik pepidi, sun si yanipi. Yanipidi, yana pepi upuda, Allah Yahweh cap, erdi dopramu ngebo, er amutara kuramudi, Israel neng taleamu ngebo, Raja Hiskia cap tep, yanipidi mali upu weik ton tapakra penmaidi, autupra nalemai. 17 Angepu gum dinin, Asyur mutu taleamu ngebo, Raja Sanheribdi sekeimau surat ton dokotepu. Asurat neitamaida, upepu. “Gume, sun Israel nesaladi si eremrum Allah, er si Yahwehda, tali tepapu si eremrume,” pepra, mali upu weikanun deiki di, Allah Yahweh tep, si yanipudi nalemau. Asurat neitamaida, aupu ton pepra sekmau. “Sun yuk-yuk mutu kurami nesaladi, ‘Nun deiyo kecada ace,’ pepra, si eremami isokdi, amutu yuma kurami nesala tep, men lyepmanto kuramipa, nedi sun popbisipsidi, sun mutu dalupra dopramsitopu, sun Israel nesala, amutu kurumu neng yuma peda, tek sisi nedi sun damai yana, popra dalupropkamne ja. Raja Hiskiadi, ‘Ne nai bo ake,’ pepra, si eremrur Allahdi, er pe, sun pe tep men lyeproptue! Erdi ne tep, men yana popra lung-lungupnetue,” Raja Sanheribdi upepra, surat sekmau.

18 Tonda, Asyur mutu taleamu Raja cap, erdi doproipmau neng capdi, sun yuma yaidi, ‘Sun amutu kunge nesalada, gekepmengedi kwar kuptue’ tenen, Ibrani upu deiki di, ila di erepra penmai. Ada, Yerusalem mutu dana-dana tara yuma, ila lyom gel beilya wipdongomya deiki tara, tekra kalengmai neng tep, Ibrani upu deiki di mali upu penmai. Ada, ‘Abeilya deiki kalengmange nesalada, telep kange dounung ngeda, tapmengedi, kware weik kuptupa, sundi mali kangepu douptenge’ tenen, yana mali upu penmai. Upepmepya deiki di, ‘Nundi amutuda, kanam dipapu yana, popbisiptepedi, sun mutu yuma dalupra dopropkamap’ tenen, yana penmai. 19 Ada, sun Asyur mutu nengdi, Yerusalem mutu kurami nesala, sun si eremami Allah tep nengeda, mali upu weik penmai. Ada, yuk-yuk mutu nesala, sun buru di, nimi urasin utopu kupra, petupra patung deipmengedi, si eremnung keca tep, “Akecada puto gume, tali keca pua,” pepra, akeca si yanipra, mali upu weik perami utopu kupra, Israel nengdi si eremami Allah tep, amali upupu penmaidi nalemai.

20 Upepra penmai pangeda, ange tep nengeda, Raja Hiskia cap, Amos er mi nabi Yesaya cap, sundi amali upu konum gekepreiyopda, ‘Uo,’ tenen, mali kange doupreidi, ‘Uo, nun nai Allahdi, nun melipsetudi, lyepropsetue’ tenen, Allah moroprei. 21 Ukupreiya tep, moroprei ngeda, Allah Yahweh konum gekepudi, Asyur mutu taleamu ngebo, Raja Sanherib, er jen talena neng cap, ajen neng sun gung yuk-yuk tep, deiyo keami neng cap pona tep, Allahdi er im deiki pel don ngebo malaikat tenpu doproipupa, amalaikat yaudi, sun Asyur mutu jen talena neng yuma cap, sun deiyo keami neng cap, sun upu pena deiyo neng cap yuma tep, yana poptapudi gawal daku.

Ukupupa, Asyur mutu Raja ngeboda, ila kwar dakudi, ali weik kupupa, tamupra er pe mutupu beu. Er pe mutu tamupra beu taruda, tenpu tumi ton, Raja Sanheribda, er si eremamu keca ati dopra deiamunge damaipu, bena bukudi, ange tep si eremaupa, er pe deiamu nyapupu, ware kuprap neng utopu ton, akati pumbon neitamai wekra yaidi, lyom ya nimi pon parang ya di, bena lukra popipa, Raja Sanherib depu.

22 Ange yumada, ukupka deiki di, Allah Yahwehdi Raja Hiskia cap, Yerusalem mutu ila ati arum kurami nesala cap, sun tep yana lyepropu. Ada, ‘Asyur mutu talerur ngebo Raja Sanherib cap, erdi doproipu neng cap, sun buru neitamai di, ne mawa nesala lyepra deipkune,’ tenen, ange kupu. Tonda, ‘Sun podan nesala damai di, angepu kupnedi, lyepra deipkune’ tenen, kupu. Tonda, ‘Ukupnyopda, sun anesalada, dim pepra bouna di, dumsisi telepepu kunkamenge. Yuk mutu nesaladi sun aneng tep, men poryakankamenge’ tenen, melipra kalengamupa, teleppu kurami.

23 Ukupu taru neitamaida, dana-dana tara kurami nimi denge weik, Yerusalem mutu yakaramidi, Allah Yahweh er gispal dona tep, telep karena keca kareryakana cap, tonda Yehuda tara taleamu ngebo Raja Hiskia tep, maton don keca, kunumna weiknge, duyakana cap kurami. Ukuramidi ataru di dipra, ortaru yumada, sun dana-dana tara nesala yumadi, Raja Hiskia tep, ‘Erda telepe,’ teneramidi, gispal dorami.

Raja Hiskiada, er pu jena deiyonge cap, tonda erdi, ‘Neda ila isomka’ tenen, dipru erepunge cap tep, seki upu

24 Ataru Raja Hiskiada, ila kange mun pu jena deiyonge dopropudi, ila pu jenmanka depmanto kupudi, Raja Hiskia erdi, ‘Allahdi kwetepnetue’ tenen, Allah tep moropu. Moropu pangeda, Allahdi, ‘Angebo kwetepkun’ tenen, er pu jeramunge kwetepra derina tep, ‘Kael kepkure,’ tenepudi petenkemna ^{▼▼petenkemna keca – Aupu deiyoda, Allahdi, ‘Angebo kwetepkun’ tenepka cadi, ‘Erdi kael keptue’ tenena tep, petenkemna keca karepupa, Raja Hiskiadi kael kepu. Ange kael kemna tep, Raja-Raja 20:8-11 ton dadinkurume.} tep keca ton karepu. 25 Dinino, ataru neitamaida, Hiskia er dipru eremna deiki di, Allah tep, “Uo, kandi bicau tenepnememnya deiki di, kan kange dipapu, gam bukra deipmanerema tep, telepe,” pepra, men pepu. Atep nengeda, Allahdi er Hiskia cap, tonda Yehuda tara mutu neitamai kurami nesala cap, Yerusalem ila ati arum neitamai kurami nesala cap tep, yu kupupa derepudi, sun nong deiki ikin keca deiamu.

26 Allahdi derepudi, ikin keca kareamnga deiki di, ange tep Hiskia cap, Yerusalem mutu kurami nesala cap, sun yumadi angeda betapra kael kepidi, ‘Uo, nunda tek sisi mali kuramupka cadi, angeda ton cap men kunkamepe,’ tenepidi, dipru eremnange tapi. Ukupyopda, sun dipru amutara kepra, bouna di dumsisi teleppu kurami. Ukuramya tep, Raja Hiskiadi tupa taleamu taru yumada, Allahdi wenemna tep ikin kecada, ton cap sun damai men kareamupa, sun damai ton yakaramupa, men dororami.

Raja Hiskia ila putoa di taleamudi, er bung keca peda, weik kupbaramnga tep, seki upu

27 Raja Hiskia erda, isomka ngebo kuramupa, nesala yumadi er tep, si erepra gispal dorami. Ataruda, Raja er bung keca derina tep ati dopudi, abung keca yumada, yuk-yuk derina tep ketenepra deipu. Akecada ake. Ada, kunumna weik gat keca emas cap, perak cap, urasin telep gel cap, tonda nintong telep pen keca cap, ‘Jen keca tau pepkamre’ tenen, tapakra derirami keca cap, tonda jen neng, sun nong lelimna tep keca, er si perisai cap, tonda yuk yala mambul keca yuma cap derina tep, ati yuk-yuk ton dopra keteneipudi, akati neitamaipu, akeca yumada dopra, aceipu deriamu.

28 Tonda, Raja Hiskiadi ati yuknge ton doprapudi, sun amutu kurami nesaladi kourami keca, nonge kipra derina tep keteneipu. Akoun kecada ake. Ada, gandum du cap, anggur du taikra me mokon deriramipa, kange yawaramne me cap, minyak zaitun cap yumada, ‘Mawa deipkup’ tenen, akeca dopra, akati yuk-yuk domutopu deriramu. Tonda, sapi bisam cap, kambing bisam cap, ayam ma cap weik peiramnga cadi, sun ati pumbon kuna tep, akati ton weika di dopra keteneipu. 29 Allahdi, Raja Hiskia tep, kareamu gam kecada, sapi bisam cap, domba cap, kambing cap, ma yala-yala yuma cap, pio weik kupka deiki di, amutupu gum dinin, yuk mutu ati arum doramyai peda, ange utopu kupra, ati doramudi keteneipu.

30 Uda yuk taru, Raja Hiskiadi Gihon me puai, me bungna damai di, dek pepra ipdongopudi, me embana tep, ketenemdirameng keca pel dopupa, ame durupra, atara di doupra beudi, menop taru Raja Daud kuramu mutu, Yerusalem mutu ila ati arum neitamai bena dongopu. Ada, Yerusalem mutu dinin, keteng dangban tara deipu. Hiskiadi pel doramunge yumada, nong kemna pelpu dopra, teleppu kuramu. 31 Dinino, Babel mutu taleamu deiyo ngebodi, er amutara neng wepra doproipupa, Hiskia er pu jeramupa, depmanto kuramunge tep, Allahdi gam bukra deiamu ngeda, petenkemna keca karepka tep nengeda, asimpetena tep yai. Anengdi asimna tep yai taruda, Allahdi Hiskia tep, ‘Erdi ne tep, tek sisi teka tenenerur do? Tek sisi upu pepkamre do, gum do? Erdi, ‘Ne puto dipapu telep kunune,’ pepkamre do? ‘Allah kwetepneua deiki di telep kunune,’ pepkamre do? Er dipruaida, wareto keca teneredi pepkamre do?’ tenena tep nengeda, Allahdi keana tep, Hiskia tep kau keprou.

Raja Hiskiadi taleamu taru konum gawal dakunge tep, seki upu

32 Raja Hiskiadi Israel nesala taleamudi, ton tara pel dopyakaramunge cap, erdi Allah tep, ‘Ne nai tepapu pel donkamne,’ tenepra, pel doramunge capda, Amos er mi nabi Yesaya tep, pepra deipu upu ton, seku buku neitamai tupa akapu. Tonda, Yehuda mutu tara cap, Israel nesala kurami tara cap, sun tep taleami deiyo neng, Raja-Rajadi kurami keca sengami bukuda, er sida, ‘Buku Sejara Raja-Raja Israel’ sun kuraminge nungna tep, sekra derirami buku neitamai sekeipi. Akeca yuma kael kemna tep acapu dinkamrume. 33 Uda, amenda taruda, Raja Hiskia depupa, er nong dopra peinaida, Israel nesala taleami nimi deiyo neng peiramyaipu dinin, menop taru Israel mutu taleamu deiyo ngebo Raja Daud cap, erdi deiamupa, dadeipdanen yakarami neng cap peiamyaipu, er peda amutu dup tara bena peipi. Raja Hiskia depu pangeda, ataruda sun Yerusalem mutu kurami nesala cap, Yehuda tara mutu kurami nesala capdi, er Raja Hiskia tep, “Telep dipapu dadepkamrume,” pepra, ila di gispal dopi. Ukupipa, er konum depu taruda, Hiskia erdi deiamu ngebo, Manasyedi, er nai bo yo pununa tep, Raja kepudi, amutu taleamu.