2 Chronicles 33

Manasye Yehuda mutu nimi deiyo ngebo Raja kepu upu

1Manasye er keteng tamun amul dam di dutara yuma, dua belas (12) tahun konum kepu taruda, Yehuda mutu nimi deiyo ngebo Raja kepu. Ukupudi, Yerusalem mutu talepra kuramu keteng tamun yumada, lima puluh lima (55) keteng tamun deiki di talepra kuramu. 2Raja Manasye er kuramunge cap, pel doramunge cap yumada, Allah Yahweh er damai mali weik kupka cadi, Allahdi, ‘Angeda ne songe,’ teneramu. Ada, Israel neng Mesir mutu di tapra, Kanaan mutu wekoi atep, Kanaan mutu kurami nesala tep, Allah Yahwehdi, ‘Yuk mutu benkamenge,’ tenepka tep, enepra dokotepupa bei dinin, sun amutu nesaladi kurami mali kecapu, bena dukdongopra akecapu talepra kuramu.

3Ada, tali keca dinin, isok si eremna tep deriramyai yumada, Raja Hiskiadi urup tapra, uku dongopra deiamupane, er mi Manasye dingeda, ange yuma kange di tamupra lepsisikra dopu. Ataruda, Bahal perameng keca, isok si eremna tep, yapi keca popra uku dongonai, er si mesba weik dopra deipu. Tonda, isok si Asyera pepra, ‘Aisok si eremkamep’ tenen, lyom co ingami keca ton, kange di ton cap ikra deipu. Tonda, nimi urasin utopu keca petupra ton dopra deipupa, ‘Nun nai bo’ tenen, si eremami. Tonda, im deiki kuramre keca, urasin utopu keca tep, weika di dopra deipupa, akeca ton si eremami. 4Allah Yahwehdi, “Yerusalem mutu ila ati arum neitamaida, ne sipu pio eremkamenga cadi, akati neitamaida, ne si konum deipsa tep, ne si eremna ati tupa akapkamre ja,” pepu. Ukupra peiamu dinino, Manasyedi amutu taleamu taru neitamaida, Allah er si eremna ati neitamaida, tali isok si eremna tep, gam keca popra, akeca er si mesba ton dopra deipu.

5Ange utopu ton, Allah si eremna tep ati, bura tara dinin akati damaida, ila go weik akapunge cap, go meteknge ton akapunge capda, nimi weik bulupra wengamyai buteneda, Manasyedi, ‘Im deiki tara kuramre keca yuma cap, kwirya cap, war cap, keteng cap yuma tep, si eremkamepa cadi, gam keca popra uku dongonkamep,’ tenena tep, mesba ton dopra deipu. 6Angepu gum dinin, sun dana-dana tara, Allah pio men kael keami nesaladi kuramitopu, Manasye peda, er pe nyapu pape, isok si eremna tep, ketenemdiramyai Ben-Hinom mutupu dinin, ila banaida dubaramudi, er nyape poptaprapudi, aisok tep karepudi, uku dongopupa, uku di anyapu jepropu. Manasye er peda, sun asuru kwa nesala pel doramya utopu kuramu. Tonda, “Akeca kupkamrume,” pepnedi, isok puto deiki di nimi men kupmanto keca pel dorami neng tep, ‘Sundi wareto keca pepkamneng do?’ tenen, aning damai bena asimtereramu. “Sundi pel dorum ngeda, ne ton peterepneso, angeda lap pepneso,” pepra mororamu.

Tonda, konum deami neng, sun sambala cap, upu sisingna kael keami nengdi, pel dorami ngeda, erdi ton, ‘Ange ton putapnere,’ tenepudi, aneng cap kikiman kuramu. Tonda, amenda kupkamu keca tep, konum deami nesala upu taleramya deiki di, gam tupa kuramne nesala tep, lap perami nengdi, perami upuda, erdi ton aupu gekeramudi, aneng cap kikiman kuramu. Ange-ange yuma ukuramnga deiki di, Allah damai ila mali kuramupa, Allah Yahwehdi er tep, ‘Angeda ne songe,’ teneamudi, ila di yu kemdiramu.

7Tonda, Manasyedi peipupa, er pel don nengdi, nimi urasin utopu kupra deipnedi, si eremami kecada, er si patung, petupra keteneipidi karepipa, Manasyedi akeca dopra, Allah er si eremna ati neitamai deipupa, erdi akeca si eremamu. Menop taru di, Allahdi Raja Daud cap, er mi Salomo cap tep, upeiamu.

“Yerusalem ila ati doraminge neitamaida, konum wepra deipsi. Israel yala 12 nesaladi kunge mutu weik ton akapmar dinin, amutu kan-kan neitamai di konum wepra deipsi. Amutu Yerusalem wepra deipsai deiyoda, ‘Israel nesala, sundi amutu neitamai di, ne sipu pio eremkamneng’ tenen, wepra deipsi. ‘Angeda apio akapkamre ja,’ tenemsi. 8Atep, nedi, ‘Angeda ukunkamrume, angeda, pio men kunkamrume,’ pepra deipsi upu cap, nedi sun tep, ‘Telep kunada, ukupra telep kunkamrume,’ pemsisi upu cap, tonda ‘Atumi atanggal deiki di, akailya kalemkamrume. Sun mali kun keca daemna tep, ukupra-ukupra pel donkamrume,’ pemsisi upu cap, Israel nesala sundi, ne pepra deipsi upu yuma tep, teka tenepmengedi, moupra talepmengedi, dukdongopra aupupu talepra dumsisipu kungopda, sun co puna neng tep, ‘Amutu yuma karepkamsene,’ peamsi mutu neitamai di, ataru amutu neitamai kunge nesala tep, ‘Amutu tapra yuk mutu beso!’ pio men pepkamsen dinin, amutu neitamaipu pio akunkamenge.” Ange yumada, Allahdi sun Israel nesala tep pepu.

9Allahdi upemu dinino, Manasye pel doramunge deiki di, Yehuda tara mutu nesala yuma pedi, ‘Gume, nun deiyo ngebo kuretopu, nun ton kupkupe’ tenen, kurami. Atep, Manasyedi Allah damai mali weik kuramupa, ‘Angeda ne songe,’ teneramu. Dinino, Israel mutu nesala kanaan mutu wekipa, kanaan mutu nesalada, Allahdi, “Yuk mutu benkurume,” peiamu nesala yumada, walwal di yambul mali keca kurami dinin, ataru di amutu kurami nesaladi, tek sisi pio mali weik kurami.

Manasye mali kuramunge tep, seki upu

10Mali weik kuramya cadi, Allahdi Manasye cap, er nyapu cap tep, wenemna keca karepu dinino, sundi, ‘Nun song,’ tenen, er pepu upu men gekepra dombarami. 11Ange tep nengeda, Allah Yahwehdi go karepupa, sun Asyur mutu jen talena neng cap, sun deiyo neng cap tep, upu deipupa, Yehuda mutu nesala tep warengyai. Ukupidi, Raja Manasye peda, tomopra, ateng koupidi, er u pumbonda, bon potokra, yambul ikin kecada, cincin ketenepidi, ange doupra, er u bon bisi dongopra deipidi, er nong doupra, gat keca er si tembaga di, ateng ketenepidi, er buru tang dana-dana tara koupdongopidi, Babel mutu dubena, wenemna ati pumbon dongopi.

12Ukupi pangeda, ikin keca deikipu, kange mun kange doupra kuramudi, ‘Uo, angeda, ne pedi mali kuramsa deiki di, ikin keca dopropmane,’ tenepudi, er kange bouna di amu kepra, er co puna nengdi, si eremami Allah damai yaudi, Allah Yahweh tep upepra moropu. “Uo, ne nai Allah, kan tep moropkene. Ne tep melipneo!” pepra moropu. 13Manasyedi Allah tep moropupa, Allah Yahwehdi er moropu upu gekepudi, er tep bicau teneramnga cadi, Manasyedi moropu utopu kupra melipu. Ada, tamupra Yerusalem mutupu dubeudi, nimi deiyo ngebo Raja kepra talepudi, kuramu. Ange ukupka deiki di, Manasyedi Allah Yahweh tep, ‘Uo, tek sisi, Yahwehda ila puto weik ngebo kurure. Allahda erpu kurure,’ tenepu.

14Uda, ange yuma konum kupu pangeda, Manasyedi, menop taru Raja Dauddi doramu mutuda, keteng yakan tara, bura gel beilyada, ton cap tapakra lepsisikra lyoma di dopra wipdongopu. Ataruda, tenpu mutu banda, Gihon me bungna damai di, gonga kepra deipudi, keteng dangban tara beu. Ukuamnganen, ortara deipbaramnganen, ‘Mekina Ati Buplan’ wengbana tep bisi, adinin Ofel mutu tara damai bena deipu. Amutu ila ati arum doraminge, Yerusalem mutu dana-dana tara yuma, ongopgenepra deiamidi, wiami beilyada, yambul lyom akapu dinin, erdi akeca lepsisikra wipdongopu taruda, ila lyom cap wipdongopupa, telep kupu. Tonda, Yehuda mutu neitamai yumada, ‘Yu nengdi men yana popsetenge’ tenen, ila ati arum doraminge yumada, lyom beilya wipdongopidi, ongopgenepra deipi. Amutu yumada, puto kemdina tep, apel doramu. Akati-akati yuma ketenepra deipudi, aca kalengna tep, jen deiyo neng ton yuk-yuk ketenepra deipu.

15Ukupu dingeda, yuk mutu nesaladi, nimi urasin utopu petupra deipnedi, ‘Nun nai bo ake’ tenen, si eremami keca cap, tonda yuk-yuk keca si eremamidi, Allah er si eremna ati neitamai deriraminge yumada, dopra donoku. Tonda, isok si eremna tep, gam keca popnedi, uku dongonai, er si mesba keca yuma peda, dopra deiami ngeda, tonda, Allah er ati damai gon deiki domunge yumada, urupra tapu. Ange-ange yumada doupra, akati arum kuramya neitamai di, ila karenai bura tara dopra donongbeu.

16Ange yuma konum kupu dingeda, Allah Yahweh er si eremna tep, gam keca popnedi, uku dongoramne keca, er si mesba, lepsisikra doprapudi, kange di telep kupra, ketenepra deipu dingeda, acada, ‘Allah Yahweh cap, nun cap, telep kupra antamkamep’ tenen, gam keca poprapudi, Allah karena tep, akeca dopra uku dongopu. Tonda, ‘Ne nai Allah, kandi melipmanerema tep, telepe pepkun’ tenen, kange deipra, yuk gam keca ton popra, amesba deiki uku dongopu. Ukupudi, Yehuda tara mutu kurami nesala yuma tep upepu. “Sun yumada, nun Israel nesaladi si eremnup Allah, er si Yahwehda, nun deiyo ngebo kurura tep, er sipu pio eremkamrume,” pepra deipu. 17Raja Manasyedi upepka cadi, Allah er si eremna ati damaipu, gam keca popra, uku dongoptenge dinino, sundi balila tupa kuramya cadi, amutu nesalada, sundi yuk tamna mutu dup deiki ketenepra, yuk mesba deiamyai ton, gam keca popra, Allah si erembarami. Angeda, men kuptenge dinin, sundi akeca karerbaraminge yumada, sun si eremami Allah, er si Yahweh tepapu, teneramidi kurami.

Raja Manasye pel sirik gawal daku taru tep, seki upu

18Manasye er pel dopyakaramunge yuk-yuknge yumada, Israel nesala talerami Raja-Raja nengdi sun pel doraminge tep, sengdirami buku, sejara neitamaipu sekra deiami. Ada, Manasye er nai bo Allah tep mororamunge cap, tonda Allahdi nabi-nabi neng damai peipnepa, sun gekepidi Manasye damai, Allah er si deiki di lap peryakaraminge cap, ange yumada, abuku neitamaipu sekra derirami. 19Ange utopu, ila kange mun pu jeramu taru, ‘Allahdi melipra kwetepkamner’ tenen, moropunge cap, tonda Allah gekepudi, bicau tenepra, tek sisi er nong kwetepunge cap, buku sejarah neitamai konum sekra deiami. Angepu gum dinin, tonda Raja Manasyedi, Allah si yaniramudi, mali weik kuramunge cap, tonda Allah tep men teka tenemudi, er upu moupra men taleamudi, mali kuramunge cap, tonda isok si eremna tep, yuk mesba ketenemdiramudi, isok tep, gam keca popra kareamunge cap, isok si Asyer si eremna tep, ila lyom co ikra, aca di mororamunge cap, tali keca dinin, ‘Nun naida, ake’ tenen, nimi urasin utopu kepra petupra, patung-patung deiamudi, tali keca si eremamunge cap, ange yuma mali keca yala-yala yuma ketenemdiramunge yumada, menop taru kuramu keca sengna buku, er si ‘Buku Sejarah Amenda Taru Kumkamunge tep Dina Neng’ neitamai sekra deiami.

Amalinge yumada, er mali kuramu taru neitamai, er dipru amutara kapul men kuramudi, kange di telep kupra, dumsisipu kapul men kuramu taru, mali kuramunge tep pepmepe. Ange yuma peda, Allahdi peipnepa, er upu lap pena neng, sun nabi-nabi nengdi perami keca, ‘Menop taru kurami nengdi kurami keca ake’ tenen, sejarah buku neitamai di sekra deiami.

20Uda, amenda taruda, Raja Manasye depupa, er nai yapu depnepa peiramitopu dinin, er nong dopra, nimi deiyo neng kurami pio telep ati, istana Raja ati pumbonpu bena peipi. Ukupidi, er yo pununa tep nengeda, erdi deiamu ngebo, er si Amon, erdi punupra, nimi deiyo ngebo Raja kepu.

Amondi Yehuda tara mutu yuma tep, talepra nimi deiyo ngebo Raja kepu upu

21Amon er keteng tamun dua puluh dua (22) tahun konum kepu taruda, Yehuda mutu nesala, sun nimi deiyo ngebo Raja gonga kepu. Ukupudi, Yerusalem ila ati arum neitamai kuramudi, Yudea tara mutu yuma talepra kuramu keteng tamunda, keteng tamun butenepu taleramudi kuramu. 22Amon er peda, er nai bo Manasyedi, Allah damai mali weik kuramu utopu, er peda ukuramu. Tonda, er nai bo Manasyedi, isok si eremna tep keca, nimi urasin utopu petupra deiami keca, er si patung-patung ketenemdiramudi, dopra deiamu keca damai, isok sipu eremamutopu, Amon peda utopu, aisok sipu eremamu. 23Dinino, er nai bo Raja Manasyeda, mali weik kuramu dinin, ton taruda, dipru boun kange doupra, amutara keprapudi, kange di ton cap Allah Yahweh damai tamupra yaudi, dumsisipu kuramu. Manasyedi ange ukuputopu, Amonda ange men kupu. Er dipru amu men kepudi, erda ila mali weik tupa kuramu. Amonda, er mali keca weika di ton cap, tapakra kupbaramu.

24Ange yuma ukupra kunmaupa, er amutara pel dona deiyo neng yuma epidi, upu talepra, er upu gekena gum di taprapidi, Manasye er nimi deiyo neng pio telep ati kuramyai pumbonai, adipapu poptapipa depu. 25Adeiyo nengdi Raja Amon poptapi dinino, Yehuda tara mutu kurami nesala yumadi, tamuprapidi, sun yuma upu talenmaiyanen, nimi deiyo ngebo Raja Amon popmai neng yumada, popra gawal daki. Ukupi dingeda, Amon er yo pununa tep, erdi deiamu ngebo, er mi Yosiapu dopra, nimi deiyo ngebo Raja kepra deipipa, er dipapu Yudea tara taleamu.