2Ch 34 | XteSC | STEP | Yosia er keteng tamun delapan (8) tahun konum kepu taruda, Yehuda mutu nimi deiyo ngebo Raja kepu. Er nimi deiyo ngebo Raja kepra, Yerusalem mutu ila ati arum neitamai kuramudi, keteng tamun tiga puluh satu (31) tahun deiki di, amutu yuma taleamu.

2 Chronicles 34

Yosiadi Yehuda mutu nimi deiyo ngebo, Raja kepu upu

1 Yosia er keteng tamun delapan (8) tahun konum kepu taruda, Yehuda mutu nimi deiyo ngebo Raja kepu. Er nimi deiyo ngebo Raja kepra, Yerusalem mutu ila ati arum neitamai kuramudi, keteng tamun tiga puluh satu (31) tahun deiki di, amutu yuma taleamu. 2 Er kuramunge cap, pel doramunge cap yumada, dumsisipu kuramnga cadi, Allahdi er tep telep kange deipra kuramu. Tonda, er apu bo kuramunge utopu, er peda, angepu kuramudi, dumsisipu dukdongopra pel doramu. Ukuramudi, Allah erdi pepra deiamu upupu, moupra taleamudi telep kuramudi, ange tamna gum dipapu, ‘Yuknge ton kupkun do, gum do?’ pio men teneramudi, pio telep pelpu doramu.

Yosiadi tali isok si eremna tep ketenepra deiami keca yuma, gum kupra deipka tep upu

3 Yosia er kaber taru neitam dipu, nimi deiyo ngebo Raja keamudi, er keteng tamun delapan (8) tahun kupu taruda, er apu bo Raja Daud si eremamu Allah tep, er peda utopu, ‘Allahdi ware pepkuner do?’ tenen, Allah tep si eremna gonga kepudi, moupra gekeramu. Ukupra kuramnganen, keteng tamun dumbari ton mapu dingeda, sun Israel nesaladi menop taru isok si eremna tep ketenepra derirami keca yumada, ‘Amali keca gum kupra deipkamne,’ tenepudi, gonga kepu. Ada, isok si eremna tep mutu dup deiki ketenepra doramyai cap, isok Asyera pepra, er si eremna tep, lyom co ingaminge cap, yuk-yuk tali keca tep si eremami keca, nimi urasin utopu kupra petupra, deiaminge yumada, gonga kepudi, uruptaprapudi gum kupra deipu. 4 Yosiadi, ‘Ukupkurume,’ pepra deipupa, er pel dona melimna nengdi, Bahal si eremna tep, gam keca popnedi, uku dongoramyai yuma cap, akeca deiki tara deiami siltong telep keca danai tep, ketenepra deriraminge cap yumada, urupra tapidi metekanun kapak ya di sekra tapi.

Tonda, isok si Asyera pepra, er si eremna tep, lyom co ingaminge yuma capda, lokra tapupa, taikrapudi, gum kupra deipi. Ange utopu, aisok-isok yuma tep, “Nun nai,” pepra, si eremaminge yuma pe, nimi urasin utopu kupra, petupra deipnedi, si eremami keca yuma peda, Raja Yosiadi peipupa, er nyapu cap, sun yumadi, akeca uruprapidi, gum kupra deipi. Ukupipa akeca paupra, saku ngeda dopra, akeca tep si eremami neng dinin, konum deami neng, sun nong peiramyai tu deikipu yamupra deipi.

5 Ukupyopda, Yosiadi, isok si eremna tep, deiyo kepra kurami neng, sun imam neng dinin, konum deamipa, peiami neng, sun yo yumada dopra, gam keca popnedi, uku dongoramyai deiki di uku dongopupa, uku bodi sun yo jepropu. Ange yuma ukupka deiki di, Yehuda tara mutu-mutu cap, tonda Israel nesala kurami mutu, Yerusalem mutu ila ati arum doramya neitamai kurami nesala yuma capda, sun mali-mali kuraminge yuma gum kupra deipupa, telep deiki di sun nai Bo Allah si eremna tep, kange di ton cap gonga kepi. 6 Tonda, yuk mutu dinin, ila ati arum dorami mutuda, Manasye mutu cap, Efraim mutu cap, tonda Simeon mutu cap, aca di dipdongopra, Naftali mutuda, ila ati arum dorami mutu peda, Raja Yosiadi utopu, sun malinge gum kupra deipudi, telep kweipu. Ukupudi, amutu-amutu ila ati arum doramipa, meneng damai yambul ati arumpu dorami dinin, urupra tami mutu yumada, kange di ton cap telep kupra deipudi, mali keca yuma gum kupra deipu.

7 Ada, amutu-amutu neitamai yuma peda, Raja Yosiadi, isok si eremna tep, gam keca popnedi, uku dongoramyai mesba yuma cap uruptapu. Tonda, isok si Asyera pepra, er si eremna tep, lyom co ingaminge yuma capda, lokra tapudi, gum kupra deipu. Ange utopu, aisok-isok yuma tep, “Nun nai,” pepra, si eremaminge yuma pe, nimi urasin utopu kupra petupra deipnedi, si eremami keca, gambar yuma peda, doprapudi, akeca taikra gum kupra deipu. Tonda, isok morona tep, siltong telep pen keca uku dongoraminge cap, ketenepra deriraminge yumada, kapak ya meteka di sekra, tapka deiki di, gum kupra deipu. Raja Yosiadi apel-apel yuma konum kupra, seng pepu dingeda, kange di Yerusalem mutu tamupra beu.

Allah er si eremna ati lepsisikra dona tep, ketenemna pel doraminge tep, seki upu

8 Raja Yosiadi, Israel nesala talepra nimi deiyo Raja kuramnganen, keteng tamun delapan belas (18) tahun konum kepu pangeda, erdi, ‘Ne talenun mutu cap, ne si eremnun Allah, er si Yahweh, er si eremna ati cap yumada, mali keca gum kupra deipnedi, kange di telep kemdinkamne,’ tenepu. Ukupra tenepu taruda, nimi weneri neng ton, Allah er si eremna ati pumbon konum punupunge cap, mali kwamunge cap tep, telep kupra dona tep doproipu. Aneng sun sida ake. Ada, Asalya er mi Safan, erda sekretaris Raja Yosia, angebo cap, Yerusalem mutu ati arum talepra kuramu ngebo, Gubernur Maaseya cap, tonda Yoahas er mi Yoah cap wepra deipu. Yahasda, erdi, amutu mambul keca pel doraminge cap, kuraminge cap, negara pel yuma sekra, sejarah buku deiamu ngebo kuramu. Ada, ‘Sun anengdi, Allah er si eremna ati pio telep kupra, lepsisikra donkameng,’ tenena tep, aneng wepra deipu.

9 Uda, Lewi yala neng, Allah Yahweh er si eremna ati buplan dam, kalengna deiyo nengdi, Allah ati dona tep, amutu dana-dana tara kurami nesaladi, co bo bulumamidi, Lewi yala neng tep karerami ngeda, weneri neng tep, Yosiadi wepra deipu nengda, akeca dopra imam Hilkia damai bena karepi. Aco boda, Efraim mutu kurami nesala cap, tonda Manasye mutu kurami nesala cap, tonda yuk tara kurami nesala cap, tonda Yehuda yala nesala cap, Benyamin yala nesala cap, Yerusalem mutu ila ati arum neitamai kurami nesala cap, sun yumadi Lewi yala neng tep kareramipa, aweneri nengdi, aco bo dopra imam Hilkia tep karepi. 10 Karepipa, Hilkiadi doprapudi, aco boda Allah Yahweh, er si eremna ati lepsisikra dona tep, deiyo kepra apel kalengami neng, sun weneri neng deiki karepu. Karepupa, aweneri deiyo nengdi, ‘Akati telep kupra, moupra dopkameng’ tenen, wepra deiamu pel don neng tep karepi. Sun pel yuk-yuk dinin, ‘Akati lepsisikra dona cap, telep kemdina cap tep, pel dopkamnung neng’ tenen, karepi.

11 Ange utopu, ukupi dingeda, sun co cangne neng cap, ati dona kael keami neng cap, urasin telep gel ketenepra dopkameng neng cap tep, karepi. Tonda, ati dimna co cap, ati arum deiki deipkamnung co cap, kunupra keteneipkameng neng tep, aco bo ton bokra karepi. Akati lepsisikra dopkamya deiyoda, menop taru Yehuda mutu taleami deiyo neng, Raja-Raja nengdi, ‘Akatida mambule gume,’ teneramidi, tamamipa, akati mali kupudi, co pun deipka cadi, ataruda, ‘Akati yumada, telep kupra, dumsisikra dopkamep’ tenen, kupi.

12 Ange yuma konum keteneipidi, upu peipipa, akati lepsikra dona pel deiyo neng ada, ‘Akati telep dumsisikra dopkameng’ tenen, wepra deiami nengda, tamna gum di, tupa-tupa pio telep dumsisipu kuramidi, pel telep kupra dorami. Tonda, sun aneng tep kalengna deiyo nengda, Lewi yala neng, dumbari neng wepra deiami. Sun aneng sida ake. Ada, Yahat cap, Obaja cap, sun anengda Meraridi deipupa, dadeipdanen yai neng cadi, Lewi yala neng kurami. Tonda, Zakaria cap, Mesulam cap, sun anengda Kehat yala nengdi deami neng kuramya cadi, sun peda Lewi yala neng kurami. 13 Uda, Lewi yala neng yumada, mut pena tep nengeda, mut pena musik kemna taruda, bung-bung pena yala-yala yuma deiki di, ila kael kurami nengdi mut perami. Sun aLewi yala nengda, Allah er si eremna ati don keca, alat yala-yala yuma duyanpa, erepra duyakana cap, akati pel dona neng cap tep, kalengna deiyo neng kurami. Tonda, Lewi yala neng dinin, ataru pel donmananen, yuk taru yuk pel donmananen, sun pel dona tep, kalengna neng kurami. Tonda, apel donman keca sengna cap, tonda akati buplan dam kalengna neng cap, tonda yuk pel dona deiyo neng cap tep, wepra deipipa, apel dopra kurami.

Allahdi, “Angeda kunkamrume, angeda pio men kunkamrume,” pepra deipupa, Musadi sekamu upu deiamyai men dirami dinin, amenda taru tamupra epka tep, seki upu

14 Allah Yahweh er si eremna ati dona tep, bulupra deiami co bo tupa dopra bokeipi taruda, akati pumbon pel dona deiyo ngebo imam Hilkiada, menop taru Allahdi peiamu upu sekra deiaminge epu. Ada, Allah Yahwehdi Musa tep, “Angeda kunkamrume, angeda pio men kunkamrume,” pemupa, Musadi dopra akati deiamunge, aupu sekamu bukuda, imam Hilkiadi konum epu. Abukuda, Raja kemami taru di Allah Yahweh ati mali kudiramya deiki di, Musadi sekra deiamu upuda, keteng tamun ware kupra deiki di, lupromya tep, abuku men dirami dinin, imam Hilkiadi, kange di ton cap, Allah er si eremna ati pumbon di epu.

15 Epu dingeda, Hilkiadi, akeca-keca sengna deiyo ngebo, sekertaris Safan tep pepu. “Allahdi, ‘Ukunkamrume,’ pepra deiamseu mem upuda, Allah Yahweh, er si eremna ati pumbon di epmane,” pepu. Upepu dingeda, Hilkiadi abuku dopra, sekertaris Safan tep karepu. 16 Safandi abuku konum doropu dingeda, Raja Yosia damai beudi upepu. “Nun deiyo ngebo, kandi kan amutara pel dona deiyo neng tep, ‘Ukupkamrume,’ pepsemumnge yumada, konum pel dopmepue,” pepu. 17 Amutu nesaladi kareramipa, Allah er si eremna ati bo deiami co boda, konum dopropmepu. Ukupmepudi, sun akati dona tep kalengami neng cap, tonda ati lepsisikra dona deiyo neng cap, sundi pel doraminge tep nengeda, yuma karepmupu,” pepu.

18 Upepu dingeda, Safandi upu ton cap tapakra pepu. “Imam deiyo ngebo, Hilkiadi, Allah upu sekami buku ton karepneue,” pepu. Upepudi, Safandi abukuda, Raja er gekenai nukupa gekepu. 19 Upepupa, Rajadi gekepu dingeda, ‘Uo, ange yumada, men tenenupe. Abukuda wangapseua cadi, ange men talepra kunupe,’ tenepudi, ‘Uo,’ tenen, ikin kange doupudi, sun Yahudi neng kuramitopu, er kenekmau opkal gweleptapudi, engepu. 20 Ukupu dingeda, Raja Yosiadi er amutara deiyo neng tep, aupu pepra deipu. “Sun yumada, imam Hilkia cap, tonda Safan er mi Ahikam cap, Mikha er mi Abon cap, Safan sekertaris negara pel doramre ngebo cap, tonda Raja er melimna ngebo Asaya cap tep, upepsene.

21 Sun anengda, adipapu bemumdi, ne cap, Israel yala neng tupa akunung neng yuma cap, tonda Yehuda tara mutu neitamai kunge nesala cap tep, ‘Abuku wangapseu dinin, ukupu epmap buku, Allahdi peiamupa, abuku neitamai sekamunge tep, ware kupkamep do?’ tenen, Allah damai tep bena asipetepkurume. Ada, Allahdi nun tep konum tulum kupsera cadi, ikin keca nun nong deiki konum deipkamsere. Deiyoda, Allahdi, ‘Ukunkamrume,’ pemu ngeda, nun apu yapudi ton, abuku neitamai sekamunge ton, pio men kuramitopu, nun ataru kuramnup nesala peda men kunupe. Atep nengeda, ware kupkamep do?” pepu.

22 Raja Yosiadi upepka tep, anengda, imam Hilkia cap, Akiham cap, Abdon cap, sekertaris Sefan cap, tonda Asaya cap, sun yumada, Allah er upu lap peramu ner tenpu, er si Hulda damai bei. Ada, ‘Allah upu peramu ngeda, aner Hulda erdi angeda, lap pepsetue’ tenen, bena moropi. Anerda, Allahdi peipnepa, gekepudi lap pena ner, nabi ner kuramu. Erda Yerusalem mutu damai dinin, ukupu yambul ati arum dopra kuramyaipu, er peda aca kuramu. Hulda er nengeda, nimi si Tikwa, er mi Salum domu. Salumda, Allah upu tumi tep, imam-imamdi kenengne opkal ^{▼▼kenengne opkal – Angebo Salumdi ketenepra wiramamu opkalda, nun yambul walwale. Ton nengdi, ‘Er ketenemwiramu opkalda, Raja ngebodi kenengamu opkalpu ketenepra wiramu,’ penunge. Ukupmantonge ton, imam-imam nengdi kenengami opkal ton ketenemdiramu.} ketenemdina deiyo ngebo kuramu. Atep, Rajadi doproipu neng yuma, kikiman anabi ner Hulda, er damai bena, Rajadi peipmau upu yumada, lap pepipa, aner gekepu.

23 Aner Huldadi, aupu gekepu dingeda, upepu. “Sunda, Rajadi doproipseupa, ne damai yanmaruma cadi, Raja koripu tamupra bemumdi, apepkusen upuda, Raja tep lap pepkurume. 24 Ada ake, Allah Yahwehdi upepsere.

“Israel nesala sun co puna nengdi, si erepyakarami ngebo, neda Allahdi ukupkamne. Yerusalem mutu cap, amutu neitamai tupa kunung nesala cap, wipdongopra sun yumada, ila kange mun keca sun damai deipkamne. Ada, nedi menop taru peipsipa, abuku sekeiaminge neitamai di, ‘Allah pere upu men talepra kupmumnyopda, wipdogopnepa, ila kange mun keca yala-yala yuma, sun deiki yankamre ja,’ pepsi. Aupu yumada, sundi abuku dopra, sun Yehuda tara taleramre deiyo ngebo damai peipmarumpa, sun Raja ngebo Yosia konum gekepmau. 25 Sun Yahudi yala nesala yuma, Yehuda tara pe, Israel tara peda, ne Allah tep tek sisi teka men tenepneidi, ne cap, ne upu cap tapra, isok si eremna tepapu kurami. Sundi amali kunange kuraminge yuma tep nengeda, ne tep tulum kemdiramnei. Ukuramneipa, Yerusalem mutu kunge nesala tep, yu kupneupa derepsi, atenepsi ngeda, men gum kupmanto,” Allahdi pepu.

26 Aner Huldadi, aupu pepudi, dukdongopra aupu ton tapakra pepu. “Dinino, Yehuda mutu taleramre Rajada, ‘Allahdi angeda katawai lap pepkamasere,’ pepra, peipmaseu ngebo tep nengeda, adipapu aupu er damai lap perbenkurume. Ada ake.

“Ne Allah Yahwehdi upepsene. Sun Israel nesala yala-yala yumada, sun nai bo Allah Yahwehdi upepmasene. Abuku neitamai sekra deipunge, kan Yosiadi konum gekepmaremnge tep upepkene. 27 Kanda, aupu gekepmarumdi, ‘Uo, Allahdi nun mutu cap, nun mali kuramepunge cap tep, yu kupka cadi, ila di wenepkamsere. Atep, ware mali keca yuma, mangkau di mali weik kuramepu do?’ tenepmamumdi, kan dipru amutara kepmamumdi, ‘Malinge yuma tapnedi, Allah damai tamupra yanedi, dumsisipu kunkamne,’ tenepmamume. ‘Allahdi nun Yerusalem mutu nesala tep, popra wenepkamsere,’ tenepmamumdi, angeda kan konum kael kepmamumdi, dipru amu kepra, kan kenekmamum opkal gwelepra tapmumdi, ne Allah damai engepmume. Akupmum ngeda, nedi konum gekepkesidi epkesi.

28 Ange tep nengeda, kan tupa gam kuramem taru yumada, Israel mutu ikin keca ton men deipkamne. Tonda, kan depkamremada, ikin kange douna gum dipapu, tali dim peprap depkamrume. Ne Allahdi, ‘Angeboda, telep dipapu depkamre,’ pepkenepa, telep kupra, tali kange doupmem dipapu depkamreme. Tonda, konum depmemnyopda, amenda tarupu, amutu cap, amutu neitamai kunge nesala cap tep, ila kange mun keca karepnepa, ikin weik kunkameng ngeda, kan asuru di men epkamrume,” Allahdi upepmakere. Anabi ner Huldadi pepu.

Upepu pangeda, aner damai benmai neng yumada, tamupra Raja damaipu yaidi, anabi ner pepmau upu yuma Raja gekenai tep, yana lap pepipa, Raja Yosiadi gekepu.

Yosiadi, “Allah damai, pio tek sisi tenepra, dumsisipu kunkamepe,” pepu upu

29 Raja Yosiadi, sun lap penmai upu konum gekepu dingeda, nimi yuk neng tep, upupudi, ‘Allah er upu gekepkupe’ tenen, “Yerusalem mutu ila ati arum talepra deiyo neng yuma cap, Yehuda tara mutu deiyo neng cap tep, sun deiyo-deiyo neng yuma bulupra deipkurume,” pepupa, bulupi. 30 – 31 Upupupa, bulupra yai pangeda, er cap, Yudea tara deiyo neng cap, Yerusalem mutu kurami deiyo neng cap, sun yuma Allah Yahweh, er si eremna ati dam bei. Imam-imam neng pe, Lewi yala neng peda, sun cap amutu kurami nesala cap, tonda tali kan-kan dakurami nesala cap, ila isomka nesala cap, sun yuma kikiman bei. Sun yuma gekenai di, Raja er lyom ayumna co damai tekudi, Allahdi peiamu upu dopra ketenepra deriramengaida, Allah Yahweh er si eremna ati pumbon di doprami buku neitamai sekamunge yumada nuku. Ukupu dingeda, Rajadi, Allah Yahweh gekenmauai di upepu, “Uda, ne Allah tep teka tenepnedi, yuk tali keca tenena gum dipapu, Allah Yahweh er damai pio kunedi, ne kange cap, dipru cap, Allah er damai deipkamne.

Ukupnyopda, Allahdi, ‘Ange kunkamrume, angeda pio men kunkamrume,’ pepra deiputopu, nedi moupra talepnedi, ange pio kunkamne. Tonda, Allahdi, ‘Ne si erepra, ne gispal dona tep nengeda, ‘Angeda kunkamrume, angeda karepkamnerume, awar, atanggal konum kupyopda, akailya kalepra gispal donkamnerume,’ peiamupa, abuku neitamai sekinge yumada, tek sisi angepu talepra kunkamne,” pepra, nimi deiyo ngebo Raja Yosiadi, Allah damai jenek pepu.

32 Raja Yosiadi ange yuma konum pepu dingeda, erdi sun Yerusalem mutu kurami nesala cap, Benyamin mutu kunge nesala cap yuma tep, upepu. “Uda, aupu gekepra dipmumpa, sun anengda, Allah upu buku neitamai sekunge yuma eprumudi, teka tenepmumnyopda, ‘Nunda tek sisi Allah damai kunkamepe,’ pepkamrume. Ukuprumnya deiki di, Yerusalem mutu kumum neng yumada, ‘Allahdi pepra deipu ngeda, tek sisi pepra deipseue,’ tenepmumdi, Allah er pepka utopu kupkamrume,” pepu. Upepkopda, sun abulupra wekmai nesala yumadi, sun co puna nengdi si eremami Allah tep, “Dyo, nun peda tek sisi angeda ukunkamepe,” pepra, pedina upu deiki di upepra deipi.

33 Ange yuma konum seng pepyopda, Raja Yosiadi, amutu nesaladi, tali nong gum keca dinin, sundi, ‘Nun nai melipseo,’ pepra, si eremami keca, Israel nesaladi talerami mutu ban-ban yuma neitamai kwamunge yumada, urupra tapudi, gum kupra deipu. Ukupudi, amutu nesala yuma tep, “Nun nai bo Allah, er si Yahweh, er tepapu si eremkamrume,” pepu. Upepupa, ‘Teka, ukunkamnupe,’ tenepidi, Yosia tupa gam kuramu taru neitamai yumada, amutu nesala yumadi, sun co puna nengdi si eremami Allah, er si Yahweh, er tepapu teka tenepra dumsisipu kurami.